Mai'naya kavane 26 - The Keyagana NT and 25 OT books

¹ Hoyamo aliʼa neʼvaiya afinaʼmo koʼmo aisiyaʼmoʼmo hosuge avina yaʼmo nehakalaya afinaʼmo alopa yegemo lesiyaʼmoʼmo hosuge nehiya kava huno negi vekamo ala agimo amisaya kavaʼmoʼa hosugiye.

² Kisaveʼyavemoʼmo halelinuneno huteno nohakaleya kava huno mago vekamoʼmo fikumo hunoʼaeʼmo, Gotiʼa lifana huno kateno, huno hisiya gemoʼmo neʼyaʼamo afole oʼaigiye.

³ Vayaʼmogimo nofi kayotetipmo hosimo apamagige nokimo kaʼmo aliʼa ho huʼa apatesayafeʼmo apavayafiʼmo aenimo atege nehaya kava huʼa negi nagi vayaʼmo hopa kayotetiʼmo neʼapamagiye.

⁴ Negi vekamoʼmo negi gemo hisiya geleʼmo aeka atagaina huka osuvo. Fiku yanageka agaekana huka alika hamalegane.

⁵ Negi vekamoʼmo negi gemo hisiya geleʼmo aeka atagaina huka ha paiyo. Fiku yanageno afiteʼna ageʼnova vekamae, huno hugiye.

⁶ Negi vekamo alika atesanageno visiya kavaʼmoʼa kaiyalaʼmo hatagausana agufa kavakana huno haneʼniye. Hanageke yaʼmo aliganaʼmofeʼmae.

⁷ Aiyamo hosuʼniya vekamoʼmo ka aesiya lokiyaʼamo ohaneʼniya kava huno negi vekamoʼmo afiteno ageʼniya kavafeʼmo aupa aupa huno gemo hisiya himamuʼamo ohaneʼniye.

⁸ Kagaemo negi vekamo ala agimo amisana kavaʼmoʼmo kumi atifiʼmo yafaʼmo malenaya agufa kavaʼmo hugane.

⁹ Alagepa gemo afiteʼa ageʼnaya gemo negi vekamoʼmo aeno hakalo hisiya kavaʼmoʼa aufe nofiʼmoʼa aniʼmo neteʼa negi nagi nehaya vayaʼai apayapiʼmo aeno lanu paiteno neʼapate kava huno haneʼniye.

¹⁰ Ala kava neʼmo Gotiʼa muki yaʼmo alo huʼniya vekamoʼmo negi vekamo anonaʼalefeʼmo miyaʼamo amigiye. Ani kava huno geʼamo amagiʼa neʼatalaya vayaʼmo miyaʼapimo apamigiye.

¹¹ Kalamoʼmo mu valino ataleno uʼniyategamo halate atagi neno neʼeya kava huno negi vekamoʼmo halate hogoteno negi kavaʼmo huʼniya kavaʼmo hugiye.

¹² Negi vekamoʼmo alagepa kavaʼmo hisiyafeʼmo mago vekamo agaiʼa aulagaleʼmo afiteʼna ageʼnova vekamo maiʼnove, huno nehiya vekamo aeno aga seʼniye.

¹³ Alagaʼmo nehaeya vekamoʼmo hunoʼaeʼmo, Mago laiyonimo eno kateʼmo maiʼniye. Vayaʼmonehapaeya laiyonimo taoni folagapiʼmo uneno nehiye, huno nehiye.

¹⁴ Kitamoʼmo uteno eteno nehiya kava huno alagaʼmo nehaeya vekamoʼmo hipaʼaleʼmo havaeno felo falo huno neʼmaiye.

¹⁵ Alagaʼmo nehaeya vekamoʼmo ayaʼmo siotifiʼmo falu kae maleʼneno neʼyaʼmo ayatetiʼmo alino nesiyafeʼmo alagaʼmo haeʼniye.

¹⁶ Alagaʼmo nehaeya vekamoʼmo agaiʼa aulagaleʼmo, afiteʼna ageʼnova vekamo maiʼnovaʼmofeʼmo seveniʼa vayaʼmo ago aeʼna apaka seʼnove, huno agesamo neʼafiyaʼmonanafa ani seveniʼa vayaʼmogimo ge aleʼmo alagepa huʼa afaʼa aeʼa atagaina huʼa ha paigae.

¹⁷ Ge neʼvaigenoʼaeʼmo mago vekamo eno folagaʼapimo he tino maiʼniya vekamo agaiʼa yaʼmo ohaneʼniyamofeʼmo kalamo agesaleʼmo atafauʼniya vekagana huno maiʼniye.

^18-19 Haopaleʼmo maiʼniya vekamo humi atetenoʼaeʼmo afaʼa kigi yokalo gemo nehuve, huno nehiya vekamo mago negi nagi vekamoʼmo kevemo fikumo haege atatipaʼmo fikumo atafaeno yaga auno atalege nehiya vekagana huno maiʼniye.

²⁰ Atamo ohanesiyaʼmoʼmo neleyaʼyaʼamo yu hesiya kava huno apakamelega gemo nehiya vekamo oʼmaisiyaʼmoʼmo kaveta nehaya kavaʼmo hano hugiye.

²¹ Atamo haneʼnigenoʼaekeʼmo alagepa huno atamo neleya kava huno ge neʼvaiya vekamo maiʼnigenoʼaeʼmo kaveta nehaya kavaʼmo magoʼe huno afole neʼaiye.

²² Naepeletiʼmo mago vekamo agufafiʼmo aiʼniya kava huno apakamelega gemo nehaya gemoʼmo vayaʼai apaipafiʼmo nefaiye.

²³ Hosu aipa agesa vekamoʼmo alagepa kavaʼmo hisiyafeʼmo lokiya gemo nehiya vekamo mopa yuvapaleʼmo aigofe siluva yafatetiʼmo faleʼa ati nekaya yuvapakana huno maiʼniye.

²⁴ Mago vayaʼaifeʼmo alagi nohaiya vekamoʼmo geʼaletiʼmo huno aeno ati kaeteno aigofe gemo alino aipafiʼmo neʼmale.

²⁵ Seveniʼa agufa hosu kavaʼmo aipafiʼmo haneʼniyaʼmofeʼmo falu fala gemo nehisigekaeʼmo lama gemo nehiye, huka osuvo.

²⁶ Hosu aipamo nekaliya kavaʼaleʼmo aigofe geletiʼmo huno aeno ati nekaeyaʼmonanafa aliʼa anupa huʼa neʼmaiya vayaʼai apaulagaleʼmo hosu kavaʼamo afaʼa afole aigiye.

²⁷ Kame vekaʼamo asagauno aisiyafeʼmo kafi maleʼniya kelifiʼmo agaiʼageʼmo asagauno aigiye. Yafaʼmo alino heleve huno ataletenoʼaeʼmo kame vekanimo haegaiye, huno huʼniyana agaiʼageʼmo haegaiye.

²⁸ Aigofe geʼaletiʼmo huno alino hosu huno neʼapateya vekamoʼmo huno alino hosu huno neʼapateya vayaʼaifeʼmo nohaiye. Aipafatiʼmo osuno avayaʼaletikeʼmo ala agimo amisiya vekamo alino hosu huno ategaiye.