Mai'naya kavane 25 - The Keyagana NT and 25 OT books

¹ Salomoniʼa alagepa huʼa maisaya kavafeʼmo aupa aupa gemo avoʼmo kae maleʼnigeʼa Yuta vayaʼai kini vekamo hesakaiya aliʼyaʼamo neʼaliya vayaʼmogimo ageteʼa avoʼmo kae maleʼnaya gemo haneʼniyana

² Gotiʼa mago yaʼamo alino fala ki maleʼniyaʼmofeʼmo ala agiʼamo neʼaliyaʼmonanafa kini vayaʼmogimo aliʼa fala ki maleʼnaya yaʼmo kahauya huʼa neʼagayaʼmofeʼmo ala apakimo neʼaliye.

³ Lagaemo kokuʼnaʼmo muga anagaʼmo haneʼniya yaʼmo oʼagege mopamo afeʼalumelagamo haneʼniya yaʼmo oʼagege huʼnona kava huʼa kini vayaʼai apaipafiʼmo noʼagae.

⁴ Vayaʼmogimo siluva yafaʼmo aliʼa atafiʼmo kaeteʼa hosu yaʼamo aliʼa ataleteʼa siluva yafatetiʼmo muki yaʼmo alo nehiya vekamo amisageno alagepa konali yaʼmo alo hugiye.

⁵ Ani kavaʼmo huʼa kini vekalegatiʼmo hosu vayaʼmo aliʼa hapa faiʼa apatalesageno kini vekamo lokiya vaino maiʼneno fatago kavaʼaletiʼmo yagaino apategaiye.

⁶ Kini vekamo aulagaleʼmo maiʼnekaeʼmo kagikaleʼmo alika asaga osuve. Ala apaki vayaʼaiteʼmo uka he otiyo.

⁷ Fiku yanageno kini vekamoʼmo kaha faino katalesigeka afa vayaʼaitegamo uka lamigane. Alagepa kavaʼmogeno kini vekamoʼmo haikeka manileʼmo maiyo, huno kaha paigiye.

⁸ Mago kavaʼmo agetekaeʼmo malage huka agoti huka oʼato. Henagaʼamo ani kavafeʼmo kahaopaleʼmo maiʼniya vekamoʼmo alino api aino katesigenoʼaeʼmo kavagage hisigekaeʼmo na agufa kavaʼmo hugane.

⁹ Kahaopaleʼmo maiʼniya vekalegamo uka lanakaitanigeʼmo ge huge afige hutetana alitana fako hiʼao. Ani gemo muki vayaʼaifeʼmo hapa opaiyo.

¹⁰ Fiku yanageʼa ani gemo afisaya vayaʼmogimo kavagage yaʼmo aliʼa kamisageka hosu kagimo aligane.

¹¹ Mago vekamoʼmo alagepa gemo kanale huno aeno hakalo huno hapa paisiyaʼmoʼmo inagi geʼamoʼmo siluva yuvapafiʼmo goli yafatetiʼmo alo huʼa neʼmaiya yosa alagagana huno haneʼniye.

¹² Mago afiteno ageʼniya vekamoʼmo hunoʼaeʼmo, hosu kavaʼmo huʼnane, huno huʼnigeno ani gemo alagepa huno afiʼniya vekamo aulagaleʼmo alagepa goli konali yakana huno haneʼniye.

¹³ Alagepa kavaʼmo nehiya apa vekamo aliʼa ateʼnageno apaʼmo uʼniya vayaʼai apaulagaleʼmo neʼyaʼmo neʼaliya afinaʼmo yasimo neʼaliya kavakana huno maiʼniye. Agaemo aliʼyaʼmo afoʼamogi apaipamo alino falu huno neʼapate.

¹⁴ Mago vekamoʼmo fikumo kaha maeʼna kamiguve, huno huteno nokamiya vekamo hiya kige yasi alige nehiyaʼmonanafa ko noʼaiya kavakana huno maiʼniye.

¹⁵ Vayaʼmogimo falu fala gemo huteʼa oʼatalesayana kini vekamoʼmo ani gemo henagaʼamo afigiye. Falumo hisaya gemoʼmo apayamufamo aino lo aegaiye.

¹⁶ Kagaemo lume anumo kahauya huka agesanaʼmoʼmo aiseʼamo no. Fikumo kamupa aesigeka mu valigane.

¹⁷ Muki afinaʼmo kahaopaleʼmo maiʼniya vekamo nopiʼmo uka ohaiyo. Fiku yanageno kagaefeʼmo alagaʼmo haesigeno kagaefeʼmo ohaugiyanagi.

¹⁸ Haopaleʼmo maiʼniya vekaeʼamo aigofe faigoko gemo nehiya vekamoʼmo alopa kayokana huno maige naepekana huno maige aveʼe kevegana huno maige huʼniye.

¹⁹ Hanageke yaʼmo neʼalina afinaʼmo kagaemo geʼamo akame nosiya vekaeʼmo naha maegaiye, huka hisana vekamo kafaʼmoʼmo neʼniya kavekana huno maige hosuʼniya kaiyagana huno maige huʼniye.

²⁰ Mago vekamoʼmo aipamoʼmo kana nehiya vekaeʼmo yokemo hisiyana ani vekamo yasimo neʼaliya afinaʼmo kukenamo kumayaʼmo neʼaliya vekagana huno maiʼniye. Agaemo mago vekamoʼmo ata nelesiya yuvapafiʼmo aniʼmo alino nelakisigenoʼaeʼmo age aiteno aniʼmo aeno fuli huno asaga uno neʼaiya anikana huno maiʼniye.

²¹ Kame vayatapimo apaka tesigetapaeʼmo neʼyaʼmo apamiyo. Anifeʼmo hapausigetapaeʼmo aniʼmo he fitapa apamiyo.

²² Mani kavaʼmo hisayana ata hokanufamo hutapa apakenopaleʼmo malesageno apakafu kigiye. Ani kavaʼmo hisayana Ala kava neʼmoʼa alagepa miyatapimo lapamigiye.

²³ Yasimoʼmo koʼmo alino hafailino neʼviya kava huno lokiya augosamo nekaliya kavaʼmoʼa apakamelega gemo alino hafaino neʼatale.

²⁴ Nokatoʼmuleʼmo maisana kavaʼmoʼmo nopiʼmo maiʼneno ge neʼvaiya a kanoʼeʼmo magokepi lokaeʼa maiʼnaya kavaʼmo ago aeno aga seʼniye.

²⁵ Alagaʼmo haeʼniya vekamoʼmo lanitani aniʼmo neʼneya kava huno alagepa faigoko gemo afagi kotegatiʼmo eʼniya faigoko gegana huno haneʼniye.

²⁶ Mago hosu vekamoʼmo fatago vekamo ayateʼmo alisigeno hosu kavaʼmo hisiya kavaʼmoʼa ani kelikotupiʼmo nunukakiya nehiya anikana huno haneʼniye. Agaemo meti aniʼmo hosumeti anikana huno maiʼniye.

²⁷ Lume anuʼmo alopaʼamo nesayana kanale kavaʼmo ohaneʼniya kava huno ala apakimo alisayafeʼmo kahauya nehaya kavaʼmo kanale kavaʼmo ohaneʼniye.

²⁸ Ati vayaʼmogi uʼa yafa kegiʼyamo aeʼa halagape vaiʼnaya taonimo haneʼniya kava huʼa hapauʼniya kavateʼmo alagepa huʼa noʼyagaiya vayaʼmo maiʼnae.