Mai'naya kavane 24 - The Keyagana NT and 25 OT books

¹ Kagaemo hosu vayaʼmo alagepa huʼa neʼmaiyanageʼna ani kava huʼna maiguve, huteka apakaeʼeʼmo magokepi lokaeka oʼmaiyo.

² Apaipafiʼmo vayaʼmo aliʼa hosu huʼa apatesaya kavafeʼmo apakesamo afige hanageke kavaʼmo aliʼa afole aiʼa atesayafeʼmo ge huge huʼa neʼmaiye.

³ Mago vekamoʼmo afiteno ageʼniya kavaʼaletiʼmo noʼmo nekiye. Afino aeto nehiya kavaʼaletiʼmo noʼamo alino lokiya vaino ateʼniye.

⁴ Afiʼniya kavaʼaletiʼmo muki aeno hanagi maleʼniya yaʼafiʼmo alopa monileʼyaʼmo aeno agaseʼniya yaʼmo malege muki alagepa yaʼmo malege huno maleno havai tegaiye.

⁵ Afiteno ageʼniya vekamoʼmo lokiyaʼamo haneʼniye. Gemo neʼafiya vekamoʼmo magoʼeʼmagoʼe huno lokiyaʼamo aligiye.

⁶ Kamemo hisanafeʼmo afiteʼa ageʼnaya vayaʼai geʼapimo afiyo. Kamemo huka aeka apaka sesana kavafeʼmo asole vayaʼmogimo kaipa kagesamo kamisayafeʼmo hisaya geʼapimo afiyo.

⁷ Afiteʼa agesaya kavaʼmo muga anagamo haneʼniyaʼmofeʼmo negi vekamoʼmo afaʼa oʼaligiye, Vayaʼmo aliʼa anupa huʼa maiʼneʼapaeʼmo ge huge afige nehagenoʼaeʼmo ge osuno afaʼa neʼmaiye.

⁸ Hosu kavaʼmo hisiyafeʼmo agesa afifi huno neʼmaiya vekaeʼmo huʼapaeʼmo hanageke vekae, huʼa nehae.

⁹ Negi kavaʼmo hisayafeʼmo apakesa afifi huʼa neʼmaiya kavaʼmo hosu kavaʼmae. Vayaʼmogimo himuʼnamu kavaʼmo nehiya vekaeʼmo ohapauʼnigeʼa apavenatuʼnaʼmo heʼa neʼatalae.

¹⁰ Hosu afinaʼmo asagauka aisanaʼmoʼmo lokiyakamo aiseʼamo haneʼniye.

¹¹ Falisaya kavategamo apavaleliʼa neʼvaya vayaʼmo apakufamo alika katika apato. Falisaya kateʼmo laku taka huliʼa neʼvaya vayaʼmo apatafauvo.

¹² Kagaemo hukaeʼmo nagaemo falisaya kateʼmo neʼvae, huʼna oʼafiʼnove, huka hisanaʼmoʼmo apaipafiʼmo alino fako huno neʼapakeya vekamoʼmo gekamo afiteno agesa afifi huno maigiye. Kaunekameteʼmo yagaino kateʼniya vekamoʼmo kaipafiʼmo noʼagefiye. Agaemo muki vayaʼmogi huʼnaya kavaʼapilefeʼmo miyaʼapimo apamigiye.

¹³ Mafaneʼnimogae, huʼna lume anumo alagepa neʼyaʼmo haneʼniyanagi no. Lume anoʼamoʼeʼmo kanale hagamo nehiyanagi no.

¹⁴ Alagepa huka afiteka agesana kavaʼmoʼa kaipafiʼmo haga kahaugiye. Kahauya huka ageʼnisanaʼmoʼmo henagaʼamo alagepa yaʼmo afole aigiye. Afole aigiye, huteka kavayagunagu nehana kavaʼmo hano osugiye.

¹⁵ Hosu vekae, huʼna, fatago vekamo noteʼmo falakika yagaika oʼmaiyo. Nehavaeya nopatiʼmo kumayaʼmo oʼaliyo.

¹⁶ Fatago vekamoʼmo seveniʼa afinaʼmo asagauno aisiyana halate afaʼa he tigiyaʼmonanafa hosu vayaʼmo hanageke yaʼmo aliteʼa alagi asagauʼa aigae.

¹⁷ Kamevekakamo asaga uno neʼaisigekaeʼmo kamogaga oʼaiyo. Aiyafiʼmo haesigekaeʼmo haoke oso.

¹⁸ Fiku yanageno Ala kava neʼmoʼa kamogaga neʼaisanagenoʼaeʼmo aipamo kana huno kateteno kamevekakamo magoʼe huno oʼamagino afaʼa ategaiye.

¹⁹ Lapakaemo hosu kavaʼmo nehaya vayaʼaifeʼmo lapausoli osiyo. Lapakaemo hosu vayaʼmo neʼmaiya agufa kavaʼmo huʼna maigesuve, hutapa osiyo.

²⁰ Hosu vayaʼmo lamuʼapimo yu hesigeʼapaeʼmo alagepa yaʼapimo afaʼa oʼaligae.

²¹ Mafaʼneʼnimogae, huʼna, Ala kava nefeʼmo koli nehukaeʼmo kini vekaeʼefeʼmo koli huvo. Gamani vayaʼmo hapa faita apatalegaune, huʼa nehaya vayaʼeʼmo magokepi lokaeka oʼmaiyo.

²² Ala kava neʼmoʼe gamani vayaʼmogiʼeʼmo lusi kava huʼa kayoʼmo apamisagenoʼaeʼmo apakaetegamo hosu kavaʼmo malage huno afole aigiye.

²³ Afiteʼa ageʼnaya vayaʼmogi geʼapimo haneʼniyana apakufaeʼmofi ala apakiʼapiyeʼmofi lapao vayafeʼmofi hutapa lapakesamo oʼafitapa alagepa kavatetiʼmo keʼmo alita fako hiyo.

²⁴ Mago vekamoʼmo hosu vayaʼaifeʼmo, lapakaemo fatago vayaʼmo maiʼnae, huno hisiyaʼmoʼmo vayaʼmogi lifana huʼa ategae. Muki kotegamo maiʼnaya vayaʼmogimo ani vekaeʼmo ohapauninageʼa apavenatuʼnaʼmo heʼa atalegekana huʼa atalegae.

²⁵ Hosu vayaʼaifeʼmo, lapakaemo hosu kavaʼmo nehae, huʼa nehisaya vayaʼmo alino auleno apatesigeʼa apamogaga aigae.

²⁶ Alagepa gemo huno geʼaleʼmo aeno atagaina huno ha nepaiya vekamoʼmo haeno negekana agufa kavaʼmo nehiye.

²⁷ Hogoteka mopafiʼmo aiʼyu aika alika alagepa hu maleʼneka hoyamo hakaleteka henagaʼamo nokamo kiyo.

²⁸ Agotileʼmo ukaeʼmo kahaopaleʼmo neʼmaiya vekamoʼmo hosu kavaʼmo osuʼnisigekaeʼmo agaetegamo hosu faigoko gemo osuvo. Fiku yanageka aigofe gemo hugane.

²⁹ Kagaemo hukaeʼmo, nagaetegamo hosu kavaʼmo huʼniyanageʼna hemenimo anonaʼalefeʼmo agaetegamo hosu kavaʼmo huguve, huka osuvo.

^30-31 Nagaemo uʼneʼna huʼna ageʼnovana alagaʼmo haeʼnigeno afino aeto nosiya vekamo hoyaʼafiʼmo aufe nofiʼmoʼa kino ati kaeʼnigeno kegiʼyaʼamo ago aino halagape vaiʼnigeʼna ageʼnove.

³² Ageʼnogenoʼaeʼmo ani kavaʼmoʼa alino naya maleʼnigeʼna nagesa afifi huʼna maiʼnove.

^33-34 Maika falu hisanafeʼmo kayaʼmo alika aupa huneka atafauka maige alagaʼmo kahaege aiseʼamo kau kalege huka maisanaʼmoʼmo kumayaʼmo neʼaliya vekagana huno kafu hu kavaʼmo kesi katetiʼmo malage huno kagaeteʼmo afole aigiye.