Mai'naya kavane 23 - The Keyagana NT and 25 OT books

¹ Kagaemo neʼyagaiya vekaʼeʼmo magokepi lokaetana maiʼnetana neʼyaʼmo nesaʼafeʼmo nehutanaeʼmo neʼyafeʼmo kagesamo afiyo.

² Lusi neʼyaʼmo neʼnesana vekamo maiʼnisanaʼmoʼmo kagaikamo kahauʼniya kavaʼmo alika afepi ato.

³ Kagaemo agaemo alagepa neʼyaʼaeʼmo ageka kahaʼye osuvo. Fiku yanageno neʼyaʼamoʼmo kagaemo humi katesigeka hosu kavaʼmo hugane.

⁴ Kagemi yakamo hanesiya vekamo maisanafeʼmo lusi kava huka aliʼyaʼmo oʼaliyo. Ani agufa kagesamo neʼafina kagesamo alika atalo.

⁵ Nama kanomo neʼaganagenoʼaeʼmo malage huno halelino neʼviya kava huno kagemi yaʼmo malage huno hano hugiye.

⁶ Agaiʼa yateʼmo atafauno alagi huno neʼmaiya vekamo neʼyaʼamo oʼneka alagepa neʼyaʼamo ageka kahaʼye osuvo.

⁷ Aipafiʼmo agesamo neʼafiya kavaʼmo haneʼniya kava huno ani agufa vekamo maiʼniye. Agaemo hunoʼaeʼmo, neʼyaʼmo nege aniʼmo nege huvo, huno hugiyaʼmonanafa aipa agesaʼamo kagaeʼeʼmo ohaneʼnigeno nehiye.

⁸ Neʼnana neʼyaʼmo mu valika atalesanagenoʼaeʼmo alagepa neʼyaʼmo namiʼnane, huka huʼnana gemo hano hugiye.

⁹ Kagaemo negi vekaeʼmo mago gemo ha opaiyo. Agaemo afiteka ageʼnana gekaeʼmo huno faipa huno kategaiye.

^10-11 Kaginago vayaʼmogimo kali maleʼnaya haku fanofamo ovakaiyo. Megusa mafaʼne anagaʼmogi mopamo kumayaʼmo oʼaliyo. Apakufamo alino katino neʼapateya vekamo lokiya vekamo maiʼniyanageno hapa maegaiye.

¹² Aliʼa kaya neʼmalesagekaeʼmo kaipamo apamiyo. Alagepa huʼa afiʼnaya gemo afisanafeʼmo kagetafo huʼneka afiyo.

¹³ Mafaʼnetapimo maita halove hutapa oʼapateta alita api aitapa apateyo. Hopa kayotetiʼmo apamagisayaʼmoʼmo afaʼa ofaligae.

¹⁴ Hopa kayotetiʼmo apamagisayana apakupi mafaʼnemo alita katitapa atesageno ata kopiʼmo uno olamigiye.

¹⁵ Mafaʼneʼnimogae, huʼna, afiteka agesana kaipa kagesamo alisanana naipamoʼmo amogaga aigiye.

¹⁶ Kagaemo alagepa gemo hisanageʼnaeʼmo namogaga aiguve.

¹⁷ Kagaemo hosu vayaʼmogimo alagepa huʼa neʼmaiyanageʼna ani agufa kava huʼna maiguve, huka kagesamo oʼafika muki afinaʼmo Ala kava nefekeʼmo koli huvo.

¹⁸ Ma mopafiʼmo alagepa huʼa neʼmaiya kavaʼmo alagi hano hugiyaʼmonanafa afole aigiye, huka kavayagunagu nehana kavaʼmo alagi afole aigiye.

¹⁹ Mafaʼneʼnimogae, huʼna, geʼnimo afigenoʼao afiteka agesana vekamo ha maleteka alagepa kateʼmo visanafeʼmo kaipamo alika ho huka ategananagi.

²⁰ Kagaemo lokiya aniʼmo nege lusi neʼyaʼmo nege nehaya vayaʼmo alika kao yaʼmo osuvo.

²¹ Lokiya aniʼmo neteʼa negi nagi nehaya vayaʼe asole neʼyaʼmo neʼnaya vayaʼeʼmo kafu hugae. Neʼyaʼmo neteʼa apau kaleʼa neʼmaiya vayaʼmo atalagauʼnisiya kukenamo vaigae.

²² Alino kateʼniya afokamo geʼamo afiteka akame huvo. Inagi itakamoʼmo anekalo lesigekaeʼmo huka faipa huka oʼato.

²³ Lama gemo miya faitekaeʼmo halate miya faisayafeʼmo maketimo osuvo. Ani kavaʼmo huka afiteka agesana yaʼmo alige aliʼna kaya malesuva gemo afige afika aeto hisana gemo alige huteka oʼatalo.

²⁴ Fatago mafaʼnemo afoʼamoʼmo lusi kava huno amogaga aigiye. Afiteno ageʼniya mafaʼnemo alino ateʼniya vekamoʼmo agaefeʼmo haoke hegaiye.

²⁵ Ani agufa alagepa kavaʼmo hugeʼanao itaka afokalaʼmoganimo anamogaga aiʼao. He, alino kateʼniya vekamoʼmo amogaga aigiye.

²⁶ Mafaʼneʼnimogae, huʼna, kaipa kagesamo namiʼneka nehuva geʼnimo alagepa huka afiyo.

²⁷ Kumai kavaʼmo nehaya aʼne anagaʼmo ive keligana huʼa maiʼnae. Vemo apayate neʼaliya aʼne anagaʼmo yatala ani keligana huʼa maiʼnae.

²⁸ Afela afumogimo vayaʼmo hapaesayafeʼmo fala kiʼa yagaiʼa neʼmaiya kava huʼa apakava neʼmaiye. Ani aʼne anagaʼmogimo vayaʼmo aliʼa hosu vayaʼmo hamaleʼa neʼapatae.

²⁹ Ina lagimo hanageke yaʼmo neʼaliye. Ina lagimo apaipamoʼmo kana nehiye. Ina lagimo kaveta nehae. Ina lagimo ohapauʼniya kavafeʼmo ge huliʼa uʼeʼa huʼa asole gemo nehae. Kaveta hisaya kavaʼmo aepaʼamo ohaneʼniyaʼmonanafa ina lagimo fikumo kaveta huteʼapaeʼmo apakufamo aiʼa neʼatalagae. Ina lagimo apaulagamoʼmo alino kola agege nehiye.

³⁰ Yatala afinaʼmo maiʼneʼa lokiya aniʼmo nege nege huʼa maiʼnaya vayaʼmogimo ani kava huʼa neʼmaiye. Alu ani alu aniʼmo aliʼa magokepi lakiteʼa neʼnaya kava huʼa nesayafeʼmo kahauya nehaya vayaʼmo ani kavaʼmo huʼa neʼmaiye.

³¹ Fiku yanageka lokiya aniʼmo afaʼa ateʼnisanageno kayate heno ka vayu hulino ugiyaʼmofeʼmo alagepa agufaʼaeʼmo kagesamo oʼafige alino alave alave nehiya kavaʼaeʼmo kagesamo oʼafige lugokaletiʼmo haga nekahaiya kavafeʼmo kagesamo oʼafige huvo.

³² Henagaʼamo alika kamalagisanana nagaloʼyavemoʼmo nehapaeya kava huno kahaegaiye.

³³ Neʼnekaeʼmo aeto agufa yaʼmo agege negi nagi gemo huge hugane.

³⁴ Vayaʼmo sipifiʼmo neʼvagenoʼaeʼmo aino felo falo huʼnigenoʼaeʼmo negi nagi apakesamo kaliʼnigeʼa mu valige hosu apaipamo kalige huʼniya kava hugane.

³⁵ Kagaemo hukaeʼmo, namagiʼnayana nagafu okiʼniye. Aliʼna oʼnamalagiʼnove. Hainu afinaʼmo magoʼe aniʼmo nesuvafeʼmo he tiʼna maiguve, huka hugane.