Mai'naya kavane 22 - The Keyagana NT and 25 OT books

¹ Mago vekamoʼmo alagepa agimo alisiya kavaʼmoʼa asole kagemi yaʼmo ago aeno aga seʼniye. Vayaʼmogimo alagepa vekamo maiʼniye, huʼa nehaya kavaʼmoʼa siluva yafaʼe goli yafaʼeʼmo ago aeno aga seʼniye.

² Kagemi yaʼapimo haneʼniya vayaʼe kagemi yaʼapimo ohaneʼniya vayaʼeʼmo magoke agufa kavaʼmo huno Ala kava neʼmoʼa ani lole vayaʼmo alo huno apateʼniye.

³ Alagepa kavaʼmo hisiyafeʼmo afiʼniya vekamoʼmo nagaeteʼmo hanageke yaʼmo afole aigiye, huno agetenoʼaeʼmo maino halove huno neʼmaiyaʼmonanafa oʼafiʼnaya vayaʼmogimo hanageke yaʼmo alisaya kateʼmo neʼuʼapaeʼmo hanageke yaʼmo neʼaliye.

⁴ Afa vayaʼmo maiʼnone, huʼa huteʼa Ala kava nefeʼmo koli nehaya vayaʼmogimo kagemi yaʼapigi ala apakiʼapigi afaʼa maisaya yaʼapigi huʼa neʼaliye.

⁵ Kayagi kayaga kavaʼmo nehaya vayaʼmogi kaʼapileʼmo aufe nofiʼmo hanege aneʼaimo hanege huʼniye. Haneʼniyaʼmonanafa aunemeʼaleʼmo alagepa huno yagaino neʼateya vekaleʼmo aufe nofiʼmoʼe aneʼaimoʼeʼmo afagiʼaleʼmo haneʼniye.

⁶ Lapakaemo neʼvaya kateʼmo mafaʼne anagatapimogi visayafeʼmo alita apaya maleta aepa faitapa apateʼnigeʼa kosuna lesaya afinaʼmo oʼatalegae.

⁷ Kagemi yaʼapimo haneʼniya vayaʼmogimo kagemi yaʼapimo ohaneʼniya vayaʼaiteʼmo yagaiʼa neʼapatae. Anonaʼapimo haneʼniya vayaʼmogimo anonamo apamiʼnaya vayaʼai aliʼyaʼapimo neʼaliya vayaʼmo maiʼnae.

⁸ Vayaʼmogimo hosu kavaʼmo nehaya kavaʼmo avina yaʼmo hakalegekana huʼa nehakalayanageʼa neʼyaʼmo neʼaliya kava huʼa kana yaʼmo aligae. Apaipamo leʼnigeʼa kayoʼmo neʼapamiya kavaʼmo hano hugiye.

⁹ Vayaʼmo nekaiya vekamoʼmo kafu nehaya vayaʼaina neʼapamiyaʼmofeʼmo Gotiʼa alino auleno ategaiye.

¹⁰ Himuʼnamu kavaʼmo nehiya vekamo alita ha faitapa atalesayaʼmoʼmo ge neʼvaiya kavaʼmo hano hugiye. He, kaveta nehaya kavaʼe huʼa faipa huʼa neʼapataya geʼeʼmo hano hugiye.

¹¹ Yaveyave aipamo hanesiyafeʼmo hauʼnigeno fikumo hapa maeno neʼapamiya gemo hapa nepaiya vekamo kini vekamo ao vekamo maigiye.

¹² Ala kava neʼmoʼa afiteʼa ageʼnaya geleʼmo neʼyagaiyaʼmonanafa geʼapimo amagiʼa neʼatalaya vayaʼai geʼapimo alino hano huno neʼatale.

¹³ Alagaʼmo nehaeya vekamoʼmo noʼafiʼmo maiʼnenoʼaeʼmo, laiyonimo malaga maiʼniye. Maiʼniyanageno taonifi kateʼmo neʼvisugenoʼaeʼmo nahaegaiye, huno huʼniye.

¹⁴ Kumai kavaʼmo nehiya a kanomo avayamo ive keligana huno haneʼnigeʼapaeʼmo Ala kava neʼmoʼa alagi nohaiya vayaʼmo asagauʼa neʼaiye.

¹⁵ Negi nagi kavaʼmoʼa mafaʼne anagaʼai apaipafiʼmo aeno kamaeno alagi huʼniyaʼmonanafa alita api aitapa apatesayafeʼmo hopa kayotetiʼmo apamagisaya kavatetikeʼmo amagita hafaitalesageno uno afagiʼalegamo hanegaiye.

¹⁶ Mago vekamoʼmo kagemi yaʼmo magoʼe huno alisiyafeʼmo kafu nehaya vayaʼmo kana yaʼmo alino neʼapamisiyaʼmoʼmo agaiʼageʼmo kafu hisiya vekamo maigiye. Ani kava huno kagemi yaʼapimo haneʼniya vayaʼmo neʼapamiya vekamoʼmo kafu hisiya vekamo maigiye.

¹⁷ Kagetafo huʼneka afiteʼa ageʼnaya vayaʼai geʼapimo afiyo. Aliʼna kaya malesuva gemo alagepa huka afiyo.

¹⁸ Ani gemo kaipafiʼmo hanesigekaeʼmo alagepa huka maiʼneka kamogaga aigane. Muki ani gemo vayaʼaifeʼmo hapa paiyo.

¹⁹ Kagaemo Ala kava neʼmo alika amufa amitekaeʼmo naha maegaiye, huka hisanafeʼmo hemenimo aliʼna kaya maleʼnove.

²⁰ Nagaemo hogote gemo alino api aino katesigeka alagepa huka afisanafeʼmo avoʼmo kaeʼnove.

²¹ Kagaemo lole kagesamo oʼafika lama geʼaeʼmo alagi lama gemae, huka afisanafeʼmo avoʼmo nekaove. Loka huʼa kafi gesaya vayaʼaifeʼmo lama gemo aeka atagaina huka hapa paisanafeʼmae.

²² Kagemi yaʼapimo ohaneʼniya vayaʼmo afa vayaʼmo maiʼnayaʼmofeʼmo kagemi yaʼapimo kumayaʼmo oʼaliyo. Kana yaʼmo neʼaliya vayaʼmo agoti huka oʼapato.

²³ Ala kava neʼmoʼa hapa maeno muki kagemi yaʼapimo neʼaliya vayaʼaitegaʼeʼmo ani kavaʼmo hugiye.

²⁴ Aipamo nelesiya vekamo ao vekamo oʼmaiyo. Kaveta hisiyafeʼmo aipamo leʼnigeno ayamufa neʼvaleya vekaʼeʼmo magokepi lokaeka oʼuvo.

²⁵ Fiku yanageka agae kavaʼmo ageteka akame hisanaʼmoʼmo aneʼaimoʼmo katafaugiye.

²⁶ Mago vekamoʼmo alu vekalegatiʼmo anonamo alisigekaeʼmo nagaemo anonakalefeʼmo amiguve, huka osuvo.

²⁷ Fiku yanageno amisana yaʼmo ohanesigenoʼaeʼmo eno muki yakamo alitenoʼaeʼmo hipakaʼeʼmo aligiye.

²⁸ Kagaemo kaginago vayaʼmogi kali maleʼnaya haku fanofamo ovakaiyo.

²⁹ Kagaemo lokiya vaino aliʼyaʼmo neʼaliya vekamo ageʼnapiye. Kini vayaʼai apaulagaleʼmo afaʼa he tino maigiye. Apaki ohaneʼniya vayaʼai apaulagaleʼmo he tino oʼmaigiye.