Mai'naya kavane 21 - The Keyagana NT and 25 OT books

¹ Ala kava neʼmoʼa muki kini vayaʼmogi apaipa apakesamo ayapiʼmo aliʼneno aniʼmoʼa uteno eteno hulino uno nelamiya kava huno hauʼniya kateʼmo alino ho huno neʼapate.

² Muki vayaʼmogi huʼapaeʼmo, alagepa kavaʼmo nehune, huʼa nehiyaʼmonanafa Ala kava neʼmoʼa apaipafi kavaʼmo alino fako huno neʼage.

³ Ala kava neʼmoʼa fatago kavaʼe alagepa huʼa aliʼa fako nehaya kavaʼeʼmo hauʼnigeno ofalinimo neʼamiya kavafeʼmo hauʼniya kavaʼmo ago aeno aga seno magoʼe huno hauʼniye.

⁴ Aliʼa afepi apatesaya agufa kavanagi apakiʼapileʼmo aliʼa asaga huʼa neʼataya kavanagi hosu vayaʼmogimo hoyamo aiʼyumo neʼaiya kavanagi huno hosu kavaʼmo haneʼniye.

⁵ Lokiya aliʼyaʼmo neʼaliya vayaʼmogimo apakesamo afiteʼapaeʼmo asole neʼyaʼmo neʼaliyaʼmonanafa apakesamo oʼafiʼneʼa malage huʼa aliʼyaʼmo neʼaliya vayaʼmo kafu hugae.

⁶ Aigofe gemo huteʼa asole monimo alisayafeʼmo kahauya nehaya vayaʼmo ani kava huʼa falisaya kavafeʼmo kahauya nehae. Asole yaʼmo aligune, huʼa apakesamo neʼafiya yaʼmoʼa alagamunamo ageʼnageno malage huno apake nekaniya kava huno hano hugiye.

⁷ Hosu vayaʼmogimo alagepa kavaʼmo hisayafeʼmo ohapauʼniyaʼmofeʼmo himuʼnamu kavaʼmo huteʼa kumayaʼmo neʼaliya kavaʼapimoʼmo alino apagoʼya lagauno apatalegaiye.

⁸ Vaiʼmo neʼaliya vayaʼmogimo humiʼnami kavaʼmo nehayaʼmonanafa vaiʼmo noʼaliya vayaʼmogimo fatago kavaʼmo nehae.

⁹ Hiyato nopiʼmo maiʼnaya kavaʼmoʼa alagepa nopiʼmo maiʼneno kaveta nehiya a kanoʼeʼmo magokepi lokaeʼana maiʼnaʼa kavaʼmo ago aeno aga seʼniye.

¹⁰ Hosu vayaʼmogimo hosu kavafeʼmo lusi kava huno apaka nete. Hapaopaleʼmo maiʼnaya vayaʼaifeʼmo hapaoke nosae.

¹¹ Vayaʼmogimo himuʼnamu kavaʼmo nehisiya vekamo kayoʼmo amisagenoʼaeʼmo gemo afisiya yaʼamo ohaneʼnisiya vekamoʼmo agetenoʼaeʼmo afigiye. Afigiyaʼmonanafa afiteno ageʼniya vekamo aliʼa aya malesagenoʼaeʼmo magoʼe huno afiteno agegaiye.

¹² Fatago Gotiʼmo afiteno ageʼniya kavaʼaletiʼmo hosu afamo anaga vayaʼmo neʼapake. Hosu kavaʼmo huʼnayaʼmofeʼmo alino yaga auno apatalegaiye.

¹³ Kagemi yaʼapimo ohaneʼnisiya vayaʼmogimo laha maeyo, huʼa nehisaya geʼapimo oʼafisaya vayaʼmo naha mao, huʼa hisagenoʼaeʼmo geʼapimo oʼafigiye.

¹⁴ Fala kiʼa fikumo amisaya yaʼmoʼa aipamo neleya kavaʼmo falu hugiye. Fala kiʼa neʼapamiya kavaʼmoʼa lokiya apaipa neleya kavaʼmo alino hano huno neʼatale.

¹⁵ Fatago vayaʼmogi alagepa huʼa aliʼa fako huʼa neʼapataya kavafeʼmo apamogaga neʼaiyaʼmonanafa hosu kavaʼmo nehaya vayaʼmogi atete nehae.

¹⁶ Mago vekamoʼmo afino aeto hisiya kaʼmo atalesiyana faliʼnaya vayaʼmo aliʼa anupa huʼa neʼmaiyategamo uno maigiye.

¹⁷ Amega apakufaletiʼmo nehaya kavafeʼmo apamogaga neʼaiya kavafeʼmo nehapaiya vayaʼmo kagemi yaʼapimo ohanesigeʼa kafu hugae. Nofi alagafati aniʼe hogote neʼyaʼefeʼmo nehaiya vekamoʼmo kagemi yaʼamo ohanesiya vekamo maigiye.

¹⁸ Hosu vayaʼmogimo fatago vayaʼaina kana yaʼmo apamisayafeʼmo nehayana apakaiʼapigeʼmo atagineʼa neʼaliye. Ani kava huʼa geʼapimo amagiʼa neʼatalaya vayaʼmogimo fatago vayaʼmo alagepa huʼa maisayafeʼmo apakae apaimuʼyaleʼmo eʼa neʼmaiye.

¹⁹ Mago vekamoʼmo kaʼme kotegamo agaiʼageʼmo neʼmaiya kavaʼmoʼmo kaveta nehuno aipamo neleya a kanoʼeʼmo magokepi lokaeʼana neʼmaiʼa kavaʼmo ago aeno aga seʼniye.

²⁰ Afiteno ageʼniya vekamo noʼafiʼmo alagepa yaʼamo haneʼniyaʼmonanafa negi vekamoʼmo muki yaʼmo fikumo alino ataleno hano nehiye.

²¹ Fatago kavaʼmo huge hau huno apatege nehiya vekamoʼmo afaʼa maisiya kavaʼmo alige fatago kavaʼmo alige ala agimo alige hugiye.

²² Afiteno ageʼniya vekamoʼmo kamemo huno lokiya vayaʼai kegiʼyaʼapifatiʼmo aeno haleno uno lamino fala kiʼa neʼmaiya lokiya noʼapimo aeno halagape vaiteno aeno neʼapakase.

²³ Avayaleʼe avenafuʼnaleʼeʼmo yagaino neʼatesiya vekamoʼmo hanageke yaʼmo oʼaligiye.

²⁴ Agae agiʼaleʼmo alino asaga huno atege vayaʼai apakiʼapileʼmo alino afepi apatege nehiya vekamo agiʼamo himuʼnamuʼmae. Agaemo ala agimo alisiyafeʼmo himuʼnamu kavaʼmo nehiye.

²⁵ Alagaʼmo nehaeya vekamoʼmo aliʼyaʼmo alisiyafeʼmo nohaiyaʼmofeʼmo haʼye nehiya kavaʼamoʼmo amagisigeno faligiye.

²⁶ Muki afinaʼmo mago yaʼmo alisiyafeʼmo haʼye nehiyaʼmonanafa fatago vekamoʼmo muki yaʼamo agegeno noʼmalefa fikumo alino neʼapamiye.

²⁷ Ala kava neʼmoʼa hosu vayaʼmogi ofalini neʼamiya yafeʼmo ohauʼnigeno avenatuʼnaʼmo heno neʼatale. Hosu kavaʼmo hisayafeʼmo apakesamo afiteʼapaeʼmo ofalini neʼamiya yafeʼmo magoʼe huno ohauʼnigeno avenatuʼnaʼmo heno neʼatale.

²⁸ Agotileʼmo aigofe faigoko gemo nehiya vekamoʼa faligiyaʼmonanafa alagepa huno afiʼniya vekamoʼa alagepa huno afaʼa maige maige huno maigiye.

²⁹ Hosu vekamoʼmo Goti geʼalefeʼmo augosamo lokiya neʼvaiyaʼmonanafa fatago vekamoʼmo Goti geʼaletiʼmo alagepa kateʼmo neʼviye.

³⁰ Vayaʼmogimo afiteʼa ageʼnaya kavaʼapiletiʼmofi afiʼa aeto nehaya kavaʼapiletiʼmofi vege nehaya kavaʼapiletiʼmofi huʼa Ala kava neʼeʼmo kamemo hugayana huʼa aeʼa aga osegae.

³¹ Kame hisayafeʼmo hosi afuʼapimo aliʼa alo hugayaʼmonanafa Ala kava neʼmoʼa hapa maesiʼmoʼmo ofaliʼa afaʼa maigae.