Mai'naya kavane 20 - The Keyagana NT and 25 OT books

¹ Nofi alagafati aniʼmoʼa humi neʼapate. Lokiya aniʼmoʼa humi neʼapate. Lokiya aniʼmoʼa kaveta hisaya kavaʼmo alino he tino neʼapate. Ani aniʼmoʼa humi apateʼnigeʼa alagepa kaʼmo ataleʼnaya vayaʼmo negi vayaʼmo maiʼnae.

² Kini vekamoʼmo aipamo neleya kavaʼmoʼa laiyonimoʼmo alopa gefatiʼmo age neʼaiya gegana huno haneʼniye. Aipamo leno apatesiya agufa kavaʼmo hisaya vayaʼmo apakaiʼapigeʼmo aliʼa hosu huʼa apategae.

³ Muki negi vayaʼmogimo ge vaisaya kavaʼmo aliʼa he tiʼa ategayaʼmonanafa ge vaisaya kavaʼmo aliʼa hano huʼa atalesaya vayaʼmogi ala apakimo aligae.

⁴ Yasimo aliʼniya afinaʼmo alagaʼmo nehaeya vekamoʼmo aiʼyu oʼaigiyaʼmofeʼmo neʼyaʼmo lesigeʼapaeʼmo alisaya afinaʼmo neʼyaʼamo ohanesigeno aukaya hugiye.

⁵ Vayaʼmogimo apaipafiʼmo apakesamo neʼafiya yaʼapimo yatala ani keli kotukana huno haneʼniyaʼmonanafa afino aeto nehiya vekamoʼmo halaulino haineno afole yateʼmo malegaiye.

⁶ Asole vayaʼmogimo huʼapaeʼmo, lagaemo alagepa vayaʼmo maiʼnone, huʼa hugayaʼmonanafa ina laʼmo lama gemo nehiya vekamo kahauya huno agegaiye.

⁷ Fatago vayaʼmogimo fatago kavaʼmo nehageʼapaeʼmo mafaʼne anagaʼapimogi aulena vayaʼmo maiʼnae.

⁸ Kini vekamoʼa agoti huno apatesiyafeʼmo haino siyaʼaleʼmo fai maiʼneno hosu vayaʼmo aulu hapaeno neʼapakesigenoʼaeʼmo asole hosu kavaʼapimo aino atagu faegaiye.

⁹ Ina laʼmo hunoʼaeʼmo, nagaemo naipafatiʼmo hosu kavaʼnimo aeʼna kalo paeʼna ataleʼnogeno naipafiʼmo hosu kavaʼnimo ohaneʼnigeno yaveyave naipamo haneʼniye, huno afaʼa hugiye.

¹⁰ Alu ya alu yaʼmo kanaʼamo agesaya kavanagi ani kava huʼa alu ya alu yatefeʼmo yatalaʼaeʼmofi aupaʼaeʼmofi huʼa maleʼa ageʼnekaya kavanagi huno Ala kava neʼmoʼa ohauʼnigeno avenatuʼnaʼmo heno neʼatale.

¹¹ Vayaʼmogimo kavaʼapimo ageteʼapaeʼmo alagepa vayaʼmo maiʼnae, huʼa apakege hosu vayaʼmo maiʼnae, huʼa apakege nehaya kava huʼa aise mafaʼne anagaʼeʼmo apakeʼnae.

¹² Ala kava neʼmoʼa apakesamo neʼafiya apakesaʼe neʼagaya apaulagaʼeʼmo alo huʼniye.

¹³ Kau kaleka maisana kavafeʼmo okahaino fiku yanageno kagemi yakamo ohanesiya vekamo maigane. Kaupatiʼmo he tika aliʼyaʼmo alisanaʼmoʼmo neʼyaʼmo neka kamu hugane.

¹⁴ Maketi hu maleʼniya vekaeʼmo miya nefaiya vekamoʼmo miya faisiyafeʼmo hunoʼaeʼmo, hosu yaʼmo haneʼniye, huno huteno miya faino alinino neʼunoʼaeʼmo kanale yaʼmo miya faiʼnove, huno alu vayaʼaifeʼmo hapa nepaiye.

¹⁵ Goli yafaʼmo hanege asole yafaʼmo alopa moniletiʼmo miya nefaiya yafaʼmo hanege huʼniyaʼmonanafa afino aeto huʼniya vekamo gemoʼmo alopa monileʼyaʼmo aeno agaseʼniya yafakana huno haneʼniye.

¹⁶ Mago vekamoʼmo alu kotegatiʼmo eʼniya vekamo anonaleʼmo nagaemo kamiguve, huno kaha paisiyaʼmoʼmo alapaʼage siotiʼamo aliyo. Ani kava huno vayaʼmo apayate neʼaliya hosu a kanomo anonaleʼmo nagaemo kamiguve, huno kaha paisiyaʼmoʼmo kenaʼamo aliyo.

¹⁷ Vayaʼmogimo aigofe kavaʼapiletiʼmo neʼyaʼmo neʼneʼapaeʼmo haga nahaiye, huʼa nehayaʼmonanafa henagaʼamo ani kahaepagana huno apavayafiʼmo hanegaiye.

¹⁸ Aliʼyaʼmo aligefeʼmo hukaeʼmo hogoteka ageʼnaya vayaʼmogi hisaya gemo afiyo. Ani kava hutapa afiʼnaya vayaʼmogi hisaya gemo afitetapaekeʼmo kamemo hiyo.

¹⁹ Gemo failitata huno hapa nepaiya vekamoʼmo fala kiʼa nehaya gemo huno afole aino hapa nepaiyaʼmofeʼmo muki geʼamo ha paisanafeʼmo huʼniyanagi agaeʼeʼmo afalu afalugana hutana magokepi lokaetana oʼmaiʼao.

²⁰ Mago vekamoʼmo itaʼafoʼalaʼmoganifeʼmo lifana huno anatesiʼmoʼmo lamuʼamo yu hesigenoʼaeʼmo hanipiʼmo maiʼneno faligiye.

²¹ Mago vekamoʼmo afoʼamo yaʼmo malage huno aliʼnisiyaʼmoʼmo atupa afinaʼmo Gotiʼa alino auleno oʼategaiye.

²² Kagaemo hukaeʼmo, hosu kavaʼamo anonaʼalefeʼmo aeʼna atagaina huʼna huguve, huka osuvo. Ala kava nefekeʼmo agava maiʼnegenoʼao kaha maegaiye.

²³ Ala kava neʼmoʼa alu ya alu yatetifeʼmo kanamo alisaya kavafeʼmo ohauʼnigenoʼaeʼmo avenatuʼnaʼmo heno neʼatale. Aigofe sigelimo alagepa sigelimo ohaneʼniye.

²⁴ Ala kava neʼmoʼa vayaʼmogimo hisaya kavaʼmo alino ho huno neʼapateyaʼmofeʼmo haiya kava huʼa apakaiʼapimo hisaya kavaʼmo agegae.

²⁵ Mago vekamoʼmo aneʼaifiʼmo neheya kavaʼmo haneʼniyana Gotiʼmo amiguve, huno huteno henagaʼamo huʼniya geʼaeʼmo agesa alaʼamo neʼafiye.

²⁶ Afiteno ageʼniya kini vekamoʼmo hosu vayaʼmo alino atagu faeno neʼapatale. Monu yafatetiʼmo maleʼa lata nepaiya kava huno alino fako huno apategaiye.

²⁷ Vayaʼmogi apauneʼapameʼmo Ala kava neʼmo lamugana huno haneʼneno vasilona apaipafatiʼmo kahauya huno haneʼniya yaʼmo alino afole neʼaiye.

²⁸ Kini vekamoʼmo hau huno apatege lama gemo huge nehisiyaʼmoʼmo alagepa huno yatala afinaʼmo kini vekamo maigiye. Hau huno apatesiya kavatetiʼmo yagaino apatesiyaʼmoʼmo lokiya vaino maigiye.

²⁹ Neya vayaʼmo ha le konali yaʼapimoʼmo lokiyaʼapimo haneʼniye. Kosuna vayaʼmogimo ha le konali yaʼapimo lui apayokamo haneʼniye.

³⁰ Kayotetiʼmo hosu kavaʼapimo alino neʼatale. Ani kava huno kayotetiʼmo apamagiʼnigeno fugagiʼnaʼapimoʼmo nehiya kavatetiʼmo vasilona apaipafatiʼmo hosu kavaʼapimo alino neʼatale.