Mai'naya kavane 2 - The Keyagana NT and 25 OT books

Afiteno ageʼniya vekamoʼmo magoʼe huno gemo alino apaya maleʼniya gemae

¹ Mafaʼneʼnimogae, huʼna, kagaemo geʼnimo afiyo, huʼna nehuva gemo afiteka kaipafiʼmo alika maleteka yagaika atege

² afiteka agesana geleʼmo kagetafo huka afige afika aeto hisanafeʼmo aliʼyaʼmo alige

³ alagepa huka alika fako hisanafeʼmo ge huge afika aeto hisanafeʼmo alopa gefatiʼmo ge huge huka maiʼnisanana ageteka afigane.

⁴ Vayaʼmogimo siluva yafafeʼmo lusi kava huʼa aliʼyaʼmo aliʼa kahauya nehaya agufa kavaʼmo huka kahauya hisanana ageka aligane. Vayaʼmogimo alagepa yaʼmo lageso huʼnigeʼapaeʼmo apayamukiki huʼa kahauya nehaya kava huka kahauya hisanana ageka aligane.

⁵ Ani agufa kavaʼmo nehisanana Ala kava nefeʼmo koli nehaya kavaʼmo aepaʼamo agegane. Kagaemo Gotiʼmo alagepa huka agegane.

⁶ Ala kava neʼmoʼa afiteʼa neʼagaya kavaʼmo alino neʼapamiye. Agaiʼa avayafatiʼmo afiteʼa neʼagaya kavaʼe afiʼa aeto nehaya kavaʼeʼmo emineneʼe.

⁷ Agaemo fatago vayaʼmogimo alagepa huʼa afiteʼa neʼagaya kavaʼmo alino anupa nehiye. Agaemo haleguʼapigana huno maiʼneno aeno hau vaino neʼapate.

⁸ Fatago kavaʼmo nehaya vayaʼaiteʼmo kava yagaino neʼapate. Apaote vayaʼamo hapa neʼmaegeʼapaeʼmo alagi asagauʼa oʼaiʼa neʼmaiye.

⁹ Geʼnimo afisanana fatago kavaʼmo agege alagepa huka alika fako huge huka maigane. Fatago kavaʼmo hisana kaʼe muki alagepa kavaʼmo hisana kaʼeʼmo agegane.

^10-11 Afiteka agesana kavaʼmoʼmo kaipafiʼmo faleno uno haisigeka alagepa huka maigane. Afiteka agesana kavaʼmoʼmo haga nekahausigeno afiʼka aeto hisana kavaʼmoʼa yagaino kategaiye.

¹² Ani kavaʼmoʼa hosu kavategatiʼmo kavalelino egaiye. Hosu gemo nehiya vekamo ayapatiʼmo kagufamo alino katino kategaiye.

¹³ Ani vayaʼmogimo alagepa kaʼmo ataleʼa hosu kaʼmo hani huʼniya kateʼmo neʼvae.

¹⁴ Apakaemo alu hosu kava alu hosu kavaʼmo hisayafeʼmo apamogaga neʼaiye. Vayaʼmogimo nehaya hosu kavaʼapiyeʼmo amuse nehae.

¹⁵ Kavaʼapimoʼmo kayagi kayaga huʼniye. Api kaʼmo ago ataleʼnae.

¹⁶ Afiteka agesana kavaʼmoʼmo kumai a kanomo ayapatiʼmo kavalelino ugiye. Kagesamo faisiya gemo oʼafigane.

¹⁷ Ani agufa a kanomoʼmo anauʼamoʼmo ataleno Goti aulagaleʼmo kotalakemo hu maleʼniya geʼaeʼmo age kanimo neʼatale.

¹⁸ Noʼafiʼmo uka haisanana falisana kateʼmo ugane. Ani kateʼmo neʼvaya vayaʼmogi faliʼnaya vayaʼmo uʼa neʼmaiya kotegamo uʼa maigae.

¹⁹ Muki vayaʼmo agaetegamo neʼvaya vayaʼmo halate ataleʼa atagineʼa oʼmegae. Aiʼa atagi neʼa eʼa afaʼa maisaya kateʼmo oʼugae.

²⁰ Geʼnimo afisanana alagepa vayaʼmogi neʼvaya kateʼmo ugane. Fatago kavaʼmo hisanafeʼmo uganaʼmofeʼmo oʼatalegane.

²¹ Muki alagepa fatago vayaʼmo alagepa huʼa muki afinaʼmo mopatileʼmo maigae. Vaiʼmo oʼaliʼnisaya vayaʼmo oʼataleʼa mopatileʼmo maige maige huʼa maigae.

²² Maigayaʼmonanafa Gotiʼa hosu vayaʼmo alagi alino hano huno apatalegaiye. Vayaʼmogimo kahaumo aliʼa neʼvakaiya kava huno geʼapimo akame nosaya vayaʼmo alino vakaino apatalegaiye.