Mai'naya kavane 19 - The Keyagana NT and 25 OT books

¹ Kagemi yaʼamo ohaneʼniya vekamoʼmo fatago kavaʼmo nehisiyaʼmoʼmo agaemo hosu gemo nehiya negi vekamo aeno aga segaiye.

² Vayaʼmogimo afiteʼa ageʼnaya kavaʼmo oʼalisayaʼmoʼmo hosugiye. Malage huʼa gemo nehaya vayaʼmogimo hosu kavaʼmo nehae.

³ Vayaʼmogimo apakaiʼapimo nehaya negi kavaʼapimoʼmo aliʼyaʼapimo alino hosu huno neʼategeʼapaeʼmo Ala kava nefeʼmo apaipamo leʼa neʼatae.

⁴ Kagemi yaʼamo haneʼniya vekamoʼmo asole ao vayaʼmo maiʼnayaʼmonanafa kagemi yaʼamo ohaneʼniya vekamo ao vayaʼmogimo ataleʼa uʼnae.

⁵ Aigofe faigoko gemo nehisiya vekamo kayoʼmo amigiye. Ani kava huno aigofe gemo nehisiya vekamo faino kasalo opaegaiye.

⁶ Asole vayaʼmogimo ala agi vekamoʼmo apakaefeʼmo hausiya agufa kavaʼmo aipafiʼmo aliʼa he tiʼa ategae. Muki vayaʼmo fikumo neʼapamiya vekamo ao vayaʼmo afaʼa maiʼnae.

⁷ Kagemi yaʼamo ohaneʼniya vekaeʼmo konagaʼamogimo nohapaiye. Ao vayaʼmogimo ataleʼa uʼnae. Agaemo apakaefeʼmo ge nehiyaʼmonanafa noʼafiye.

⁸ Afiteno ageʼniya yaʼmo aliʼniya vekamoʼmo agupi mafaʼneeʼmo nehaiye. Afino aeto huʼniya yaʼmo oʼataleno aliʼnisiya vekamoʼmo alagepa huno maigiye.

⁹ Aigofe faigoko gemo nehiya vekamo kayoʼmo amigiye. Aigofe gemo nehiya vekamo faligiye.

¹⁰ Negi vekamoʼmo alagepa huno maisiyaʼmoʼmo hosugiye. Aliʼyaʼmo neʼaliya vekamoʼmo ala apaki vayaʼaiteʼmo yagaino apatesiyaʼmoʼmo hosugiye.

¹¹ Afiteno ageʼniya vekamoʼmo malage huno aipamo olegaiye. Ala agiʼamo haneʼniya kavaʼmo haneʼniyana agaetegamo hosu kavaʼmo hisaya vayaʼmo afaʼa apakeno apatalegaiye.

¹² Kini vekamoʼmo aipamo neleya kavaʼamoʼmo laiyonimoʼmo alopa gefatiʼmo age neʼaiya agufa kava huno haneʼniye. Kini vekamoʼmo hapaoke neheya kavaʼamoʼmo kahauleʼmo lao yaʼmo emineʼniya yakana huno haneʼniye.

¹³ Negi mafaʼnemoʼmo afoʼamoʼmo kana yaʼmo alino neʼamiye. Mago vekamoʼmo muki afinaʼmo aʼaʼeʼmo ge neʼvaiʼa gemoʼmo aniʼmoʼmo lape tape huge huge huno neʼmaiya anikana huno haneʼniye.

¹⁴ Vayaʼmogimo afoʼapimogi kagemi yaʼe noʼeʼmo neʼaliyaʼmonanafa Ala kava netetiʼmo alagepa kavaʼmo hisiyafeʼmo ageʼniya a kanomo neʼaliye.

¹⁵ Vayaʼmo alagaʼmo nehapaeya kavaʼmoʼa alino apau kalegekana huno neʼapate. Aliʼyaʼmo oʼaliʼa afaʼa neʼmaiya vayaʼmo apaka tegaiye.

¹⁶ Hiyo, huno huʼniya geleʼmo alagepa huno neʼyagaiya vekamoʼmo agaiʼaleʼmo alagepa huno yagaino neʼateyaʼmonanafa agaiʼa kavaʼaleʼmo alagepa huno yagaino noʼateya vekamo faligiye.

¹⁷ Kagemi yaʼapimo ohaneʼniya vayaʼaifeʼmo hau huno apateteno fikumo neʼapamiya vekamoʼmo Ala kava nekeʼmo neʼamiyaʼmofeʼmo anonaʼalefeʼmo amigiye.

¹⁸ Lapakaemo mafaʼnetapimogi getapimo afisayafeʼmo ko osiʼnisagetapaekeʼmo hopa kayotetiʼmo apamagitapa alita api aitapa apateyo. Fiku yanageno Gotiʼa kayoʼmo apamisigeʼa faligayanagi.

¹⁹ Vayaʼmogi lusi kava huno aipamo neleya vekamo kayoʼmo amigae. Kagaemo mago afinaʼmo ha maeʼnisanaʼmoʼmo halate magoʼe huka ha maesana afinaʼmo afole aino.

²⁰ Kagaemo henaga kanalekamo afiteka agesanafeʼmo aliʼa api aiʼa katesaya gemo afige aliʼa kaya malesaya gemo afige huvo.

²¹ Vayaʼmogimo asole kavafeʼmo ani kavaʼmo hugune, huʼa apaipafiʼmo apakesamo neʼafiyaʼmonanafa Ala kava neʼmoʼa ani kavaʼmo afole aigiye, huno ago ageʼniya kavaʼageʼmo afole aigiye.

²² Hau ayamopafiʼmo hauʼniya vekamoʼmo hapa maesiyafeʼmo hauʼniye. Kagemi yaʼamo ohaneʼniya vekamoʼmo aigofe gemo nehiya vekamo ago aeno aga seʼniye.

²³ Ala kava nefeʼmo koli nehaya kavaʼmoʼa afaʼa maisaya yaʼmo neʼapamiye. Ala kava nefeʼmo koli nehaya vayaʼmogi hapaʼye nehiya kavaʼmo apaipamoʼmo falu hugiye. Hosu kavaʼmo apakaeteʼmo afole oʼaigiye.

²⁴ Alagaʼmo nehaeya vekamoʼmo ayaʼmo alino siotifiʼmo fala ki maleʼnenoʼaeʼmo neʼyaʼmo ayatetiʼmo alino nesiyafeʼmo alagaʼmo haeʼniye.

²⁵ Kagaemo himuʼnamu nehiya vekamo kayoʼmo amisanagenoʼaeʼmo gemo oʼafiʼniya vekamoʼmo alagepa kavaʼmo hisiyafeʼmo gemo afigiye. Kagaemo gemo afino aeto nehiya vekamo alika api aika atesanagenoʼaeʼmo magoʼe huno afigiye.

²⁶ Mago mafaʼnemoʼmo afoʼamo yaʼmo kumaya alige itaʼamoʼmo hafaino atalege hisiyaʼmoʼmo apavagage yaʼmo alino apamige hosu apakimo alino apamige hugiye.

²⁷ Mafaʼneʼnimogae, huʼna, kagaemo aliʼa kaya neʼmalaya gemo magoʼe huka afitekaeʼmo ataleka oʼafisanaʼmoʼmo hosu kateʼmo ugane.

²⁸ Hosu vekamoʼmo agotileʼmo faigoko gemo hunoʼaeʼmo lama gemo hisigeʼa alagepa huʼa aliʼa fako hisayafeʼmo agesamo noʼafiye. Agaemo hosu kavaʼmo neʼyaʼagana huno haneʼnigeno neʼne.

²⁹ Himuʼnamu kavaʼmo nehaya vayaʼmo agoti huʼa apategae. Negi vayaʼmo kayoʼmo apamigae.