Mai'naya kavane 18 - The Keyagana NT and 25 OT books1 Alu vayaʼmo apataleno uno aoteʼmo neʼmaiya vekamoʼmo agaiʼa kavafekeʼmo agesamo neʼafiye. Alu vayaʼmogi huʼnaya geeʼmo agesamo noʼafiye. 2 Negi vekamoʼmo afino aeto hisiya kavafeʼmo amogaga noʼaiyaʼmonanafa agaiʼamo agesamo neʼafiya kavafeʼmo hapa paisayafeʼmo amogaga neʼaiye. 3 Hosu vayaʼmo afole neʼaigenoʼaeʼmo ani agufa vayaʼmo maiʼnae, huʼa nehaya geʼeʼmo afole neʼaiye. Apakaemo huʼa faipa huʼa neʼapatagenoʼaeʼmo apavagage nehiya kavaʼmo afole neʼaiye. 4 Vayaʼmogi nehaya geʼapimoʼmo ani kotuʼmo vasilonagana huno haneʼniye. Afiteʼa ageʼnaya kavaʼmoʼa meti aniʼmo eno haineno uno nelamiya anikana huno haneʼniye. 5 Lapakaemo hosu vayaʼmogi apakiʼapieʼmo lapakesamo afige aliʼnaya yafeʼmo lapakesamo afige alu ya alu yaʼapieʼmo lapakesamo afige nehaya kavaʼmo hosu kavaʼmae. Vaiʼmo oʼaliʼnaya vayaʼmo alagepa huʼa aliʼa fako huʼa noʼapataya kavaʼmo hosu kavaʼmo haneʼniye. 6 Negi vekamoʼmo alu vayaʼmo ge vaisaya gemo nehiye. Ge vaisaya gemo nehigeʼapaeʼmo vayaʼmogimo ani gemo afiteʼapaeʼmo amagigefeʼmo nehae. 7 Negi vekamoʼmo agaiʼamo huʼniya gemoʼmo agaiʼamo alino hano huno atalegaiye. Agaiʼamo avayafatiʼmo huʼniya gemoʼmo aneʼaifi hegekana huno atafaugiye. 8 Apakamelega gemo nehaya gemoʼa haga neʼyakana huno haneʼniye. Ani agufa gemoʼmo vayaʼmogi apaipafiʼmo uno nelamiye. 9 Aliʼyaʼmo neʼalinoʼaeʼmo alagaʼmo haeʼniya vekamoʼmo muki yaʼmo alino hosu huno neʼateya vekamo konagaʼamoʼmo maiʼniye. 10 Ala kava neʼmo agiʼamoʼmo yatala noʼmo kokuʼnapiʼmo uno haiʼniya lokiya nokana huno haneʼniye. Fatago vayaʼmogimo ani nopiʼmo nagu nagu huʼa uʼa haiʼa alagepa huʼa maigae. 11 Kagemi yaʼamo haneʼniya vekamoʼmo kagemi yaʼamoʼmo lokiya taonigana huno haneʼniye. Agaemo agesamo afinoʼaeʼmo, lokiya yafa lafi kegiʼyaʼnimo haneʼniye, huno agesamo neʼafiye. 12 Mago vekamoʼmo aipafiʼmo agesamo afinoʼaeʼmo, ina agufa vayane, huno agesamo neʼafiya kavaʼaletiʼmo akamelegaʼamo asagauno aisiya kavaʼmo afole aigiyaʼmonanafa mago vekamoʼmo agiʼaleʼmo alino afepi atesiya kavaʼaletiʼmo akamelegaʼamo ala agiʼamo alisiya kavaʼmo afole aigiye. 13 Mago vekamoʼmo ha paiʼniya gemo alagepa huno oʼafiʼneno malage huno geʼapileʼmo aeno atagaina huno hisiyaʼmoʼmo negi gemo hugiyaʼmofeʼmo avagage hugiye. 14 Vayaʼmogi apauneʼapameʼmo kaitaʼmo hauʼnisiyaʼmoʼmo lokiya vaino apategaiyaʼmonanafa maleno apaliʼnisiya apauneʼapameʼmo haneʼnisayaʼmoʼmo haiya kava huʼa alagepa huʼa maigae. 15 Alagepa kavaʼmo hisiyafeʼmo ageʼniya vekamoʼmo magoʼe huno afigiye. Afiteno ageʼniya vekamoʼmo magoʼe huno afisiyafeʼmo alino aya maleʼniya gemo agetafo huʼneno neʼafiye. 16 Vayaʼmogimo fikumo neʼapamiya yaʼmoʼa visaya kaʼmo valino neʼapate. Fikumo apamisageʼapaeʼmo ala apaki vayaʼmogi apaulagaleʼmo apatesageʼa eʼa he tiʼa maigae. 17 Hogoteno agotileʼmo uno he tiʼniya vekamoʼmo huʼniya geeʼmo, lama gemo huʼniye, huʼa apakesamo afisayaʼmonanafa no haopaleʼmo maiʼniya vekamoʼmo eno hosu kavaʼamo alino apave ligiye. 18 Lokiya vayaʼmogimo apakaeʼeʼmo kaveta hisayafeʼmo nehageʼapaeʼmo yafatetiʼmofi yosaletiʼmofi pepaletiʼmofi huʼa satu yokalo legekana agufa kavatetiʼmo kaveta hisayafeʼmo huʼnaya kavaʼmo aliʼa hano huʼa atalegae. 19 Kamemo huʼa aeʼa apaka seteʼa lokiya taonimo alisaya kavaʼmoʼa lokiya vaiʼniyaʼmonanafa konagakamoʼeʼmo ge vaitetanaeʼmo agaemo aipamo alika falu hisana kavaʼmoʼmo magoʼe huno lokiya vaiʼniye. Ge neʼvaiya kavaʼmoʼmo lokiya kitaleʼmo loki ae maleʼnaya kitagana huno haneʼniye. 20 Vayaʼmogimo nehaya gemoʼmo avina yakana huno haneʼniye. Ani avina yaʼmoʼmo neʼyaʼmo neʼaegenoʼaeʼmo apamu nehiye. Geʼapimoʼmo neʼyaʼamo aisigenoʼaeʼmo apaipafiʼmo havai tegaiye. 21 Apavayafatiʼmo nehaya geʼapimoʼmo afaʼa maisaya yaʼmo alino apamige falisaya yaʼmo alino apamige nehiye. Alagepa geeʼmo nehapaisiya vayaʼmo alagepa huʼa maigayaʼmonanafa hosu geeʼmo nehapausiya vayaʼmo alagepa huʼa oʼmaigae. 22 Mago vekamoʼmo agaiʼaleʼmo maisiya a kanomo kahauya huno agesiyaʼmoʼmo alagepa yaʼmo kahauya huno ageno aligiyaʼmofeʼmo Ala kava neʼmoʼa haoke hegaiye. 23 Kagemi yaʼamo ohaneʼniya vekamoʼmo vase gemo huno aukaya nehiyaʼmonanafa kagemi yaʼamo haneʼniya vekamoʼmo geʼapileʼmo aeno atagaina huno ge hugefeʼmo lokiya gefatiʼmo nehiye. 24 Mago vekamoʼmo ao vayaʼmo maiʼnisayaʼmoʼmo alagepa huno alino ao yaʼmo hino. Mago apao vekamoʼmo konagatapimogimo aeno apaka seno maiʼniya vekamoʼmo ao vayaʼmo oʼapataleno alagi magokepi lokaeno maigiye. |
© 2013, Wycliffe Bible Translators, Inc. All rights reserved.
Wycliffe Bible Translators, Inc.