Mai'naya kavane 17 - The Keyagana NT and 25 OT books

¹ Mago vekamoʼmo afamo anagaʼaʼeʼmo apaipamoʼmo falu huʼnigeʼa aise atupa neʼyaʼmo neʼnaya kavaʼmoʼa ge vaige kaveta huge huteʼa alopa yagita huʼa neʼnaya kavaʼmo ago aeno aga seʼniye.

² Afiteno ageʼneno aliʼyaʼmo neʼaliya vekamoʼmo apavagage yaʼmo alino apamisiya mafaʼneleʼmo yagaino ategaiye. Konagaʼamogimo afoʼapimo kagemi yaʼmo aliʼa fako huʼa alisagenoʼaeʼmo agaeʼeʼmo afaʼa aligiye.

³ Vayaʼmogimo siluva yafaʼmo samofiʼmo kaeʼa agege goli yafaʼmo kaeʼa agege nehaya kava huno Ala kava neʼmoʼa vayaʼmogi apaipa apakesaʼeʼmo apamalageka huno age neke.

⁴ Hosu vekamoʼmo aigofe gelefeʼmo agetafo huʼneno neʼafiye. Aigofe gemo nehiya vekamoʼmo huno faipa huno neʼateya gemo afisiyafeʼmo nehaiye.

⁵ Mago vekamoʼmo kagemi yaʼamo ohaneʼniya vekaeʼmo huno faipa huno neʼatesiyaʼmoʼmo kagemi yaʼamo ohaneʼniya vekamo alo huno ateʼniya vekaʼeʼmo huno faipa huno ateʼniye. Mago vekamoʼmo agesiyana alu vekamoʼmo hanageke yaʼmo alisigeno agetenoʼaeʼmo amogaga aisiyaʼmoʼmo kayoʼmo amisigenoʼaeʼmo faino kasalo opaegaiye.

⁶ Mafaʼneʼamogi mafaʼneʼapimo kosunamogi kini kakolitaʼapigana huʼa maiʼnae. Ani kava huno mafaʼne anagaʼmogi ha le konali yaʼapimo haneʼniyana afoʼapimogimo maiʼnae.

⁷ Negi vekamoʼmo alagepa gemo hisiyaʼmoʼmo agaiʼalefeʼmo hosugiyaʼmonanafa ala agi vekamoʼmo aigofe gemo hisiyaʼmoʼmo agaiʼalefeʼmo alagi hosugiye.

⁸ Hosu kavaʼmo hisayafeʼmo fikumo apamiʼnageʼa aliʼnaya vayaʼmogi apaulagaleʼmo alopa monileʼyaʼmo aeno agaseʼniya yaʼmo haneʼneno apayateʼmo neʼaliye.

⁹ Hosu kavaʼapimo aeno ati kaeno neʼapateya vekamoʼmo hapau apayamopafiʼmo hapausigeʼa hapausigeʼa huʼa maisayafeʼmo hauʼnigenoʼaeʼmo hosu kavaʼapimo aeno ati kaeno neʼapateyaʼmonanafa hosu kavaʼapieʼmo apava gemo nehiya vekamoʼmo alino ao yaʼmo huʼana neʼmaiʼa kavaʼmo alino fako nehiye.

¹⁰ Mago vekamoʼmo afiteno ageʼniya vekamo alino api aino atesiya gemo hisigeno afaʼa afigiyaʼmonanafa negi vekamo kayotetiʼmo vani hataletiʼa afinaʼmo amagisiyaʼmoʼmo oʼafigiye.

¹¹ Hosu vekamoʼmo apaiyafiʼmo maiʼneno geʼapimo oʼafino amagino neʼataleyaʼmofeʼmo Gotiʼa eminenoʼaeʼmo hau huno oʼatesiya vekamo agaetegamo alino atesigeno ugiye.

¹² Vayaʼmogimo mago afela afumo agiʼamo meyaʼmo anaʼaumo atafauʼa aliniʼa kategamo neʼvisageno itaʼamoʼmo eno apakaeʼeʼmo fotu huteno hapaesiya kavaʼmo alagi hosu kavaʼmo haneʼniyaʼmonanafa negi vekamoʼmo negi kavaʼmo nehisigenoʼaeʼmo neʼesigeʼana fotu hisaʼa kavaʼmo haneʼniyana magoʼe huno hosu kavaʼmo haneʼniye.

¹³ Ina laʼmo alagepa kavaʼmo anonaʼaleʼmo hosu kavaʼmo nehisifi muki afinaʼmo hosu kavaʼmo afamo anagaʼafiʼmo hanegaiye.

¹⁴ Mago vekamoʼmo aniʼmo eno haine neʼeya kateʼmo aeno akani maleʼniya mopamo alino atalesigenoʼaeʼmo aniʼmo uno nelamisigenoʼaeʼmo halate aeno oʼakanisiya kava huno mago vekamoʼmo kavetamo alino aepa nefaiye. Nefaiyaʼmofeʼmo kavetamo aliʼa aepa faiʼa osisayafeʼmo apaipamo alitapa falu hiyo.

¹⁵ Mago vayaʼmogimo hosu vayaʼaifeʼmo, fatago vayaʼmo maiʼnae, huʼa huge mago vayaʼmogimo fatago vayaʼaifeʼmo, hosu vayaʼmo maiʼnae, huʼa huge huʼnae. Ala kava neʼmoʼa ani agufa kavaʼmo nehaya vayaʼaifeʼmo alagi ohauʼnigeno avenatuʼna heno atalegekana huno neʼapatale.

¹⁶ Negi vekamoʼmo afiteno agesiya kavaʼmo alisiyafeʼmo ohauʼniyaʼmofeʼmo na kava higenoʼaeʼmo miyaʼamo aliʼniye.

¹⁷ Alagepa apao vayaʼmogimo muki afinaʼmo hapau apayamopafiʼmo nehapaiye. Ani kava huʼa kana yaʼmo alisaya afinafeʼmo konagaʼapimo maiʼnae.

¹⁸ Afino aeto nosiya vekamoʼmo hunoʼaeʼmo, nao vekamo anonaʼalefeʼmo nagaemo kamiguve, huno huʼnigeʼana ge huge afige huteʼana magoke anaipamo aliʼnaʼae.

¹⁹ Hosu kavafeʼmo hauʼniya vekamoʼmo kaveta hisaya kavafekeʼmo nehaiye. Alopa kegiʼyamo huteno noʼaleʼmo alopa kipaʼmo nekasageya vekamoʼmo lusi hanageke yaʼmo alisiyafeʼmo kahauya nehiye.

²⁰ Humi neʼapataya apaipaʼe vayaʼmogimo alagepa huʼa maisaya kavafeʼmo kahauya hugayaʼmonanafa oʼagegae. Ani kavaʼmo huno aigofe gemo nehiya vekamo hosu kavapiʼmo asagauno aigiye.

²¹ Mago vekamoʼmo negi mafaʼnemo alino atesiyaʼmoʼmo aipamoʼmo kana hugiye. Negi mafaʼnemo afoʼamoʼmo amogaga noʼaiye.

²² Apamogaga neʼaiya apaipamo malasinigana huno haneʼneno alino falu huno neʼapateyaʼmonanafa maleno neʼapaliya apauneʼapameʼmoʼa apauneʼapameʼmo alino hosu huno neʼate.

²³ Hosu vekamoʼmo hosu kavaʼmo hisiyafeʼmo fala kino fikumo amiʼniya monimo neʼaliye.

²⁴ Afino aeto huʼniya vekamoʼmo afiteno ageʼniya kavateʼmo aulu heno ageno neʼmaiyaʼmonanafa negi vekamoʼmo muki haopalegamo haneʼniya yatefeʼmo aulu heno ageno neʼmaiye.

²⁵ Negi mafaʼnemo afoʼamoʼmo aipamoʼmo kana nehiye. Alino ateʼniya itaʼamoʼmo atu neheya neʼyaʼmo neʼne.

²⁶ Vayaʼmogimo fatago vayaʼmo kayoʼmo apamisayaʼmoʼmo hosugiye. Ani kava huʼa vayaʼmogimo gamani vayaʼmogi alagepa kavaʼapilefeʼmo apamagisayaʼmoʼmo hosugiye.

²⁷ Afiʼniya vekamoʼmo gemo hugefeʼmo asole gemo nosiye. Afino aeto huʼniya vekamoʼmo malage huno aipamo nole.

²⁸ Negi vekamoʼmo ge osuno maiʼnigeʼapaeʼmo alagepa huno afiteno ageʼniya vekamo maiʼniye, huʼa hugae. Ge osisigeʼapaeʼmo alagepa kavaʼmo hisiyafeʼmo ageʼniya vekae, huʼa hugae.