Mai'naya kavane 16 - The Keyagana NT and 25 OT books

¹ Vayaʼmogimo hisaya kavafeʼmo apakesa afifi huge huge huʼa neʼmaiyaʼmonanafa Ala kava neʼmoʼa ani hisaya gemo alino neʼapamiye.

² Vayaʼmogi apaulagaleʼmo muki kavaʼapimoʼmo yaveyave kavaʼageʼmo haneʼniyaʼmonanafa Ala kava neʼmoʼa alagepa huno kavaʼapimo aepaʼamo alino fako huno neʼage.

³ Muki kavaʼmo hisanafeʼmo hukaeʼmo Ala kava neʼmo ayapiʼmo alika maleʼnegenoʼao kagesafiʼmo afaʼa hanegaiye.

⁴ Ala kava neʼmoʼa muki yaʼamo agaiʼalefeʼmo alo hu maleʼniye. He, hosu vayaʼmo afela hesaya afinaʼmo alo hu maleʼniye.

⁵ Ala kava neʼmoʼa aliʼa apakiʼapileʼmo aliʼa asaga neʼapataya vayaʼaifeʼmo alagi ohauʼnigeno avenatuʼnaʼmo heno atalegekana huno neʼapatale. Apakaemo kayoʼmo apamisiya afinaʼmo afaʼa faiʼa kasalo opaegae.

⁶ Ala kava neʼmoʼa hau ayamopafiʼmo nehaiya kavatetiʼe lama geʼaletiʼeʼmo vayaʼai hosu kavaʼapimo alino neʼatale. Ani kava huʼa vayaʼmogi Ala kava nefeʼmo koli nehaya kavatetiʼmo hosu kavaʼapimo neʼatalae.

⁷ Ala kava neʼmoʼa mago vekamo kavafeʼmo haoke nehesiyaʼmoʼmo kame vayaʼaʼeʼmo magokepi lokaeno maisiyafeʼmo apaipamo alino falu hugiye.

⁸ Fatago kavaʼmo nehunoʼaeʼmo aiseʼamo aliʼniya vekamoʼmo fatago kavaʼmo nosiya vekamoʼmo alopa yaʼmo aliʼniya vekamo ago aeno aga seʼniye.

⁹ Vayaʼmogimo hisaya kavafeʼmo apakesamo neʼafiyaʼmonanafa Ala kava neʼmoʼa agaiʼageʼmo alino ho huno neʼapate.

¹⁰ Kini vayaʼmogimo Goti lokiyaʼaletiʼmo ge nehayaʼmonanafa fiku yanageʼa alagepa huʼa aliʼa fako osuʼa hosu gemo hugae.

¹¹ Ala kava neʼmoʼa lama ge sigelimo haneʼniya sigelileʼmo kana huʼniya yaʼmo neʼasaiya lama ge yaʼmo Ala kava netegatiʼmo aliʼnae.

¹² Kini vayaʼmogimo fatago kavaʼmo hisayaʼmoʼmo yagaiʼa apateme apateme ugayaʼmonanafa kini vayaʼmogimo hosu kavaʼmo hisayaʼmoʼmo alagi hosugiye.

¹³ Kini vayaʼmogimo fatago gemo nehaya vayaʼaifeʼmo apamogaga neʼaiye. Apakaemo alagepa gemo nehaya vayaʼaifekeʼmo nehapaiye.

¹⁴ Kini vekamoʼmo mago vekaeʼmo aipamo leno atesiyaʼmoʼmo ani vekamo kamitimo amagisigeno faligiyaʼmonanafa afiteno ageʼniya vekamoʼmo kini vekamo aipamo huno falu hugiye.

¹⁵ Kini vekamo alagepa augosamo kaliʼneno apakesiyaʼmoʼmo afaʼa maigae. Amuse huno neʼapateya kavaʼmoʼa mago avina yaʼmo nehakalaya afinaʼmo hiyaʼmoʼa koʼmo avalelino neʼeya kavakana huno haneʼniye.

¹⁶ Afiteʼa neʼagaya kavaʼmo alisaya kavaʼmoʼa magoʼe huno kanale alagepa kavaʼmo haneʼneno goli yafaʼmo ago aeno aga seʼniye. Afiʼa aeto nehaya kavaʼmo alisaya kavaʼmoʼa magoʼe huno kanale kavaʼmo haneʼneno siluva yafaʼmo ago aeno aga seʼniye.

¹⁷ Fatago vayaʼmogimo hosu kavaʼmo aeʼa aga sesaya kateʼmo neʼvae. Vayaʼmogimo kavaʼapileʼmo alagepa huʼa yagaiʼa neʼataya vayaʼmogi apauneʼapameʼmo alagepa huno maigiye.

¹⁸ Apakiʼapileʼmo aliʼa asaga huʼa neʼataya kavaʼapimo akamelegaʼamo haneʼniyana alino apagoʼya lagauno apatalesiya kavaʼmo afole aigiye. Apakufamo avaleliʼa nehaiya kavaʼmo akamelegaʼamo haneʼniyana asagauʼa aisaya kavaʼmo afole aigiye.

¹⁹ Ina agufa vekamo maiʼnove, huno huteno ani agufa vayaʼeʼmo magokepi lokaeno neʼmaiya vekamoʼmo magoʼe huno alagepa huno maigiyaʼmonanafa apakiʼapileʼmo aliʼa asaga huʼa neʼataya vayaʼeʼmo magokepi lokaeno maiʼneno kumaya aliʼnaya kagemi yaʼmo aliʼa fako huʼa aliʼnaya kagemi yapatiʼmo alisiya vekamo alagepa huno oʼmaigiye.

²⁰ Goti gemo afiteno akame nehiya vekamoʼmo alagepa huno maigiye. Ina kava huno Ala kava neʼmoʼa naha maegaiye, huno alino amufa neʼamiya vekamoʼmo afaʼa amogaga aigiye.

²¹ Vayaʼmogimo afiteʼa ageʼnaya vayaʼaifeʼmo apava gemo huʼapaeʼmo, alagepa kavaʼmo hisayafeʼmo ageʼnae, huʼa nehae. Mago vekamoʼmo alagepa gemo alino apaya malesigeʼapaeʼmo afiteʼa agegae.

²² Afino aeto nehiya kavaʼamo aliʼniya vekalefeʼmo afaʼa neʼmaiya yaʼmo neʼapamiya meti anikana huno maiʼniyaʼmonanafa negi vayaʼmogi negi kavaʼapiletiʼmo kayoʼmo neʼapamiye.

²³ Afiteno ageʼniya vekamo agaiʼa aipa agesaʼmoʼmo agaiʼamo alino aya maleʼnigenoʼaeʼmo aipafatiʼmo alagepa gemo nehiye.

²⁴ Alagepa gemoʼa lume anukana huno haneʼniye. Ani gemoʼmo apaipafatiʼmo haga nehapaigenoʼaeʼmo alino lokiya vaino neʼapate.

²⁵ Mago vayaʼmogimo, alagepa kateʼmo neʼune, huʼa apakesamo neʼafiyaʼmonanafa faliʼnaya vayaʼmo uʼa neʼmaiya kotegageʼmo uʼa avaʼyi hugae.

²⁶ Vayaʼmogimo neʼyafeʼmo apaka neteyaʼmofeʼmo apakaiʼapilefeʼmo aliʼyaʼmo neʼaliye.

²⁷ Gotifeʼmo mono nosiya vekamoʼmo vayafeʼmo hosu apava gemo hisiyafeʼmo lokiya vaino kahauya nehiye. Avayaletiʼmo nehiya gemoʼmo atagana huno haneʼniye.

²⁸ Kayagi kayaga kavaʼmo nehiya vekamoʼmo avina yaʼmo nehakalaya kavaʼmo huno alu kava alu kavaʼmo hisayafeʼmo alino fako huno neʼapate. Mago vekamoʼmo alu vekamo alino ao yaʼmo huʼnigeʼana alagepa huʼana magokepi lokaeʼana neʼmaiʼa kavaʼmo apakamelega gemo nehiya vekamoʼmo alino fako huno neʼanate.

²⁹ Kaveta nehiya vekamoʼmo noʼamo haopale vekamo ge huno avalelino hosu kateʼmo neʼviye.

³⁰ Agaemo aulama huteno agaiʼamo ge ge huteno hosu kavaʼmo nehiye.

³¹ Kosuna vekamoʼmo fatago kavaʼmo nehisiyaʼmoʼmo lui ayokamoʼa ha le konali kini kakolitagana huno haneʼniye.

³² Malage huno aipamo noleya vekamoʼmo lokiya vekamo ago aeno aga seʼniye. Ani kavaʼmo huno aipa agesaleʼmo alagepa huno yagaino neʼateya vekamoʼmo lokiya vaino kamemo huno aeno apaka seno taonimo aliʼniya vekamo ago aeno agaseʼniye.

³³ Vayaʼmogimo mago hisaya kavaʼmo alino apave lisiyafeʼmo yafatetiʼmofi yosaletiʼmofi pepaletiʼmofi huʼa nehagenoʼaeʼmo Ala kava neʼmoʼa na agufa kavaʼmo afole aigifi huno alino apave neliye.