Mai'naya kavane 15 - The Keyagana NT and 25 OT books

¹ Mago vekamoʼmo aipamo leno katesigekaeʼmo aipamoʼmo falu hisiya gemo hisanagenoʼaeʼmo aipamoʼmo falu hugiyaʼmonanafa lokiya gefatiʼmo hisanagenoʼaeʼmo aipamo magoʼe huno legaiye.

² Afiteno ageʼniya vekamoʼmo afino aeto huʼniya gemo nehigeʼapaeʼmo afisayafeʼmo nehapaiyaʼmonanafa negi vayaʼmogimo apavayaʼaletikeʼmo negi gemo nehageno aniʼmo uno lamigekana huno uno nelamiye.

³ Ala kava neʼmoʼa muki haopalegamo ageno maiʼneno hosu kavaʼmo agege alagepa kavaʼmo agege huno neʼmaiye.

⁴ Kaitaʼmo ohauʼniya avayafatiʼmo nehiya gemoʼmo afaʼa neʼmaiya yaʼmo neʼapamiya yosagana huno haneʼniyaʼmonanafa kayagi kayaga gemo nehiya vekamoʼmo alino hosu huno neʼapate.

⁵ Negi vekamoʼmo afoʼamoʼmo alino aya neʼmaleya geeʼmo, ina agufa gemo haneʼniye, huno nehiyaʼmonanafa alino api aino ateʼniya gemo afiʼniya vekamoʼmo alagepa kavaʼmo hisiyafeʼmo ageʼniya vekamo maiʼniye.

⁶ Fatago vayaʼmogimo noʼapifiʼmo asole alagepa yaʼapimo maleʼnayaʼmonanafa hosu vayaʼmogi kagemi yaʼapimoʼmo hanageke yaʼmo alino neʼapamiye.

⁷ Afiteʼa ageʼnaya vayaʼmogimo afiʼa aeto hisaya agufa gemo hapa nepaiyaʼmonanafa negi vayaʼmogimo ani agufa gemo nosae.

⁸ Hosu vayaʼmogimo ofalinimo aminagenoʼaeʼmo Ala kava neʼmoʼa alagi ohauʼnigeno avenatuʼnaʼmo heno neʼataleyaʼmonanafa fatago vayaʼmogimo nunumuʼmo nehagenoʼaeʼmo hapaoke nehe.

⁹ Ala kava neʼmoʼa hosu vayaʼmogi kavaʼapieʼmo alagi ohauʼnigeno aini huteno avenatuʼnaʼmo heno neʼataleyaʼmonanafa fatago kavaʼmo akame nehaya vayaʼaifeʼmo hau ayamopafiʼmo nehaiye.

¹⁰ Mago vekamoʼmo alagepa kaʼmo atalesigenoʼaeʼmo lokiya gefatiʼmo huno alino api aino ategaiye. Mago vekamoʼmo alino api aino atesiya geeʼmo ohaisiyaʼmoʼmo faligiye.

¹¹ Ala kava neʼmoʼa ata koʼmo agege vayaʼmo faliʼa uʼa neʼmaiya koʼmo agege huʼniyaʼmofeʼmo muki vayaʼmogi apaipa apakesafiʼmo ageʼniye.

¹² Himuʼnamu kavaʼmo nehiya vekamoʼmo alino api aino atesiya gemo huʼniya vekaeʼmo ohauʼniyaʼmofeʼmo afiteʼa ageʼnaya vayaʼaitegamo oʼugiye.

¹³ Mago vekamoʼmo aipafiʼmo amogaga aisiyaʼmoʼmo augosamoʼmo kigi hugiyaʼmonanafa aipamoʼmo kana hisiyaʼmoʼmo aunemeʼamo maleno apaligiye.

¹⁴ Afino aeto huʼniya vekamoʼmo magoʼe huno afisiyafeʼmo kahauya nehiyaʼmonanafa negi vayaʼmogimo negi kavaʼmo nehaya kavaʼmo neʼyaʼapigana huʼa neʼnae.

¹⁵ Lusi kana yaʼmo neʼaliya vayaʼmogi muki afinaʼmo alagepa huʼa noʼmaiyaʼmonanafa aipafiʼmo amogaga neʼaiya vekamoʼmo muki afinaʼmo alopa yagita nehiya afinaʼagana huno haneʼniye.

¹⁶ Ala kava nefeʼmo koli nehiya vekamoʼmo aiseʼamo aliʼniya yaʼmoʼa alopa kagemi yanagi hanageke yanagi huno ago aeno agaseʼniye.

¹⁷ Vayafeʼmo hapau apayamopafiʼmo hapauʼnigeʼa magokepi lokaeʼa maiʼneʼa hagomupamo neʼnaya kavaʼmoʼa vayafeʼmo hosu apaipamo kaliteʼa magokepi lokaeʼa maiʼneʼa afayaʼe pulumakamo kaeʼa neʼnaya kavaʼmo ago aeno agaseʼniye.

¹⁸ Malage huno aipamo neleya vekamoʼmo kaveta hisaya agufa kavaʼmo alino afole aino neʼateyaʼmonanafa vase huno aipamo neleya vekamoʼmo apaipamoʼmo falu hisiya agufa kavaʼmo alino afole aino neʼate.

¹⁹ Alagaʼmo nehaeya vekamoʼmo hunoʼaeʼmo, aufe nofitetiʼmo ka akanino nateʼniye, huno nehiyaʼmonanafa fatago vekamo kaʼmo alopa kale kakana huno haneʼniye.

²⁰ Afiteno ageʼniya mafaʼnemoʼmo afoʼamoʼmo amogaga aisiya yaʼmo alino neʼamiyaʼmonanafa negi mafaʼnemoʼmo itaʼamofeʼmo ina agufa a kanomo maiʼniye, huno nehiye.

²¹ Alagepa huʼa oʼafiʼnaya vayaʼmogimo negi kavafeʼmo apamogaga neʼaiyaʼmonanafa afiʼniya vekamoʼmo api kavaʼmo nehiye.

²² Mago vekamoʼmo vayaʼeʼmo ge huge afige osisiyana aliʼyaʼamoʼmo hosugiyaʼmonanafa asole vayaʼeʼmo ge huge afige hisiyaʼmoʼmo aliʼyaʼamoʼmo kanale hugiye.

²³ Mago vekamoʼmo geʼaleʼmo alagepa gemo huno aeno atagaina huno ha paisigenoʼaeʼmo aipafiʼmo amogaga aigiye. Mago vekamoʼmo alu vekamoʼmo alagepa huno gemo afisiya afinaʼmo alagepa gemo ha paisiyaʼmoʼmo kanale gemo haneʼniye.

²⁴ Afiteʼa ageʼnaya vayaʼmogimo ata koʼmo afelaga kotetiʼmo aiʼa afe leʼa ataleʼa afaʼa maisaya yaʼmo apamisiya kaʼmo anagamo uno haiʼniya kaʼmo haneʼniye.

²⁵ Ala kava neʼmoʼa apakiʼapileʼmo aliʼa asaga huʼa neʼataya vayaʼai noʼapimo heno halagape vaino atalegaiyaʼmonanafa kogu a kanomo mopamo hakumo alino lokiya vaino ategaiyaʼmofeʼmo vayaʼmogimo kumaya oʼaligae.

²⁶ Ala kava neʼmoʼa hosu vayaʼmogimo apakesamo neʼafiya kavafeʼmo alagi ohauʼnigeno avenatuʼna heno atalegekana huno neʼataleyaʼmonanafa yaveyave apaipaʼe vayaʼmogi nehaya geeʼmo amuse huno neʼapate.

²⁷ Magoʼe yaʼmo alisiyafeʼmo haʼye nehiya vekamoʼmo afamo anagaʼamo hanageke yaʼmo alinineno neʼapamiyaʼmonanafa hosu kavaʼmo hisiyafeʼmo monimo hageʼa amisaya kavafeʼmo ohauʼniya vekamoʼmo ofalino alagepa huno afaʼa maigiye.

²⁸ Fatago vekamoʼmo geʼapileʼmo aeno atagaina huno hapa paisiyafeʼmo alagepa huno agesamo afiteno aeno atagaina huno hapa nepaiyaʼmonanafa hosu vekamoʼmo malage huno asole hosu gemo nehiye.

²⁹ Ala kava neʼmoʼa hosu kavaʼmo nehaya vayaʼmogi hapaopaleʼmo oʼmaino afagiʼaleʼmo neʼmaiyaʼmonanafa fatago vayaʼmogimo nunumuʼmo nehaya gemo agetafo huno neʼafiye.

³⁰ Alagepa yaʼmo ageteʼapaeʼmo apaipafiʼmo apamogaga neʼaiye. Ani kava huʼa alagepa faigoko gemo afiteʼapaeʼmo alagepa huʼa neʼmaiye.

³¹ Alagepa huʼa maisaya kavafeʼmo aliʼa api aiʼa hapa paisaya gemo alagepa huʼa afisaya vayaʼmogimo afiteʼa ageʼnaya vayaʼeʼmo magokepi lokaeʼa maigae.

³² Aliʼa aya malesayafeʼmo hisaya geeʼmo ina agufa gemo nehae, huno nehisiya vekamoʼmo agaiʼa aunemeʼaeʼmo ina agufa yane, huno nehiyaʼmonanafa aliʼa api aiʼa atesayafeʼmo hisaya gemo afisiya vekamoʼmo afino aeto hugiye.

³³ Ala kava nefeʼmo koli nehaya kavaʼmoʼa afiʼa aeto hisaya kavaʼmo alino apaya neʼmale. Apakiʼapileʼmo aliʼa afepi neʼataya kavatetiʼmo akamelegaʼamo ala apakiʼapimo aligae.