Mai'naya kavane 14 - The Keyagana NT and 25 OT books

¹ Afiteno ageʼniya a kanomoʼmo noʼamo alino alagepa huno nekiyaʼmonanafa negi a kanomoʼmo noʼamo heno halagape vaino atale.

² Api kateʼmo neʼviya vekamoʼmo Ala kava nefeʼmo koli nehiyaʼmonanafa kayagi kayaga kateʼmo neʼviya vekamoʼmo Ala kava nefeʼmo afaʼa ina agufa vekamae, huno agesamo neʼafiye.

³ Negi nagi vekamoʼmo himuʼnamu gemo nehiya geletiʼmo kayoʼmo aligiyaʼmonanafa afiteʼa ageʼnaya vayaʼmogi nehaya geletiʼmo apakaiʼapileʼmo yagaiʼa apategae.

⁴ Aliʼyaʼmo neʼaliya pulumakamo oʼmaiʼnisayaʼmoʼmo pulumakamo neʼyaʼmo neʼmalaya yuvapamo afaʼa haneʼniyaʼmonanafa pulumakamo maiʼnisayaʼmoʼmo lokiyaʼapiletiʼmo aliʼyaʼmo alisageno hoyafatiʼmo asole neʼyaʼmo hagegaiye.

⁵ Lama ge vekamoʼmo ageteno faigoko gemo hapa nepaiya gemo aigofe gemo nosiyaʼmonanafa aigofe vekamoʼmo ageteno faigoko gemo hapa nepaiya gemo aigofe gemo nehiye.

⁶ Himuʼnamu gemo nehaya vayaʼmogimo afiteʼa agesaya kavafeʼmo kahauya nehayaʼmonanafa noʼagae. Noʼagayaʼmonanafa afino aeto nehiya vekamoʼmo afiteno agesiyafeʼmo lokiya oʼvaiʼniye.

⁷ Kagaemo mago vekamo agekaeʼmo alagepa huno afino aeto osuge alagepa gemo osuge nehiye, huka agesana vekamo maika halove huka ato.

⁸ Afiteno ageʼniya vekamoʼmo afiteno ageʼniya kavaʼmo haneʼniyana visiya kaʼmo afiteno ageʼniyaʼmonanafa negi vayaʼmogimo negi kavaʼmo haneʼniyana aigofe kavaʼmo haneʼniye.

⁹ Negi vayaʼmogimo hosu kavaʼmo anonaʼapilefeʼmo vaiʼmo neʼaliʼapaeʼmo ina agufa kavane, huteʼa kigi nehayaʼmonanafa Gotiʼa fatago vayaʼaifeʼmo hapaoke nehe.

¹⁰ Vayaʼmogimo apakaiʼapimo apaipafiʼmo kana neʼaliya kavaʼapimo agege apamogaga neʼaiya kavaʼapimo agege nehayaʼmonanafa alu kotega vayaʼaifeʼmo huʼa afole aiʼa hapa opaigae.

¹¹ Hosu vayaʼmo noʼapimo aino halagape vaigiyaʼmonanafa fatago vayaʼmo seli noʼapimo lokiya vaino hanegaiye.

¹² Mago vayaʼmogimo alagepa kateʼmo neʼune, huʼa apakesamo neʼafiyaʼmonanafa vayaʼmo faliʼa uʼa neʼmaiya kotegageʼmo uʼa avaʼyi hugae.

¹³ Apavayaʼaletiʼmo kigi nehayaʼmonanafa mago afinaʼmo apaipamoʼmo kana nehiye. Apamogaga neʼaiyaʼmonanafa henagaʼamo kana yaʼmo aligae.

¹⁴ Alagepa kaʼmo ataleʼnaya vayaʼmo kavaʼapilefeʼmo miyaʼapimo aligayaʼmonanafa alagepa vayaʼmo alagepa miyaʼapimo aligae.

¹⁵ Alagepa huno oʼafiʼniya vekamoʼmo muki geʼapieʼmo lama geʼageʼmo haneʼniye, huno nehiyaʼmonanafa alagepa kavaʼmo hisiyafeʼmo ageʼniya vekamoʼmo nehiya kavaʼaeʼmo alagepa huno agesamo neʼafiye.

¹⁶ Afiteno ageʼniya vekamoʼmo hosu kavafeʼmo koli nehiyaʼmonanafa negi vekamoʼmo koli osuno aipamo leʼnigeno ayamukiki nehiye.

¹⁷ Malage huno aipamo neleya vekamoʼmo negi kavaʼmo nehiye. Gotiʼa hosu aliʼyaʼmo neʼaliya vekaeʼmo alagi ohauʼniye.

¹⁸ Alagepa huʼa oʼafiʼnaya vayaʼmogimo afoʼapimogi negi nagi kavaʼmo aliʼnayaʼmonanafa alagepa kavaʼmo hisayafeʼmo ageʼnaya vayaʼmogi afiʼa aeto nehaya kavaʼmoʼa kini vayaʼmogi kakolitagana huno apakenopaleʼmo haneʼniye.

¹⁹ Hosu vayaʼmogimo alagepa vayaʼai apaiyafiʼmo maigae. Hosu kavaʼmo nehaya vayaʼmogimo fatago vayaʼmogi kipateʼmo uʼa maigae.

²⁰ Muki vayaʼmogimo konagaʼapimogimo maiʼnayana kagemi yaʼamo ohaneʼniya vekaeʼmo nohapaiyaʼmonanafa kagemi yaʼamo haneʼniya vekamo ao vayaʼmo asole vayaʼmo maiʼnae.

²¹ Mago vekamoʼmo haopaleʼmo maiʼniya vekaeʼmo ina agufa vekamae, huno nehisiyana hosu gemo nehiyaʼmonanafa kagemi yaʼapimo ohaneʼniya vayaʼaifeʼmo hapau huʼa neʼapataya vayaʼmogimo alagepa huʼa neʼmaiyanageʼa afaʼa apamogaga aigae.

²² Hosu kavaʼmo hisayafeʼmo apakesa afifi huʼa neʼmaiya vayaʼmo alagepa kaʼmo ago ataleʼnayaʼmonanafa Gotiʼa alagepa kavaʼmo hisayafeʼmo apakesa afifi huʼa neʼmaiya vayafeʼmo hau huno apateteno lama gemo hapa paigiye.

²³ Aliʼyaʼmo neʼaliya vayaʼmo miyaʼapimo aligayaʼmonanafa afaʼa maiʼneʼa geʼageʼmo nehaya vayaʼmo kafu hugae.

²⁴ Afiteʼa ageʼnaya vayaʼmogi kagemi yaʼapimo kini vayaʼmogi kakolitagana huno haneʼniyaʼmonanafa negi vayaʼmogi kavaʼapimoʼmo negi kavaʼageʼmo haneʼniye.

²⁵ Lama ge vekamoʼmo faigoko gemo afiteno hapa nepaiya geletiʼmo vayaʼmo apakufamo alino katino apategaiyaʼmonanafa aigofe vekamoʼmo faigoko gemo afiteno hapa nepaiya gemo aigofe gemo nehiye.

²⁶ Ala kava nefeʼmo koli nehiya vekamoʼmo alagi naha maegaiye, huno magoke agesamo afigiye. Mafaʼne anagaʼaʼeʼmo alagepa huʼa fala kiʼa maisaya yaʼapimo hanegaiye.

²⁷ Ala kava nefeʼmo koli nehaya kavaʼapimoʼmo afaʼa neʼmaiya yaʼmo neʼapamiya meti anikana huno haneʼniye. Ani kavatetiʼmo falisaya aneʼaifatiʼmo faiʼa kasalo paegae.

²⁸ Kini vayaʼmogi vayaʼapimo asole vayaʼmo maiʼnisayaʼmoʼmo ala apakiʼapimo aligiyaʼmonanafa vayaʼapimo aise vayaʼmo maiʼnisayaʼmoʼmo asagauʼa aigae.

²⁹ Malage huno apaipamo noleya vayaʼmogi afiʼa aeto nehayaʼmonanafa malage huno apaipamo neleya vayaʼmogi negi nagi kavaʼmo agiʼaleʼmo aliʼa asaga huʼa neʼatae.

³⁰ Kaita ohauʼnigeno alagepa huno afaʼa haneʼniya aipamoʼmo agufamo alino lokiya vaino ategaiyaʼmonanafa aipa kafa nehaeya aipamoʼmo mago kaita haugekana huno haneʼniyanageno agufamo alino hosu huno ategaiye.

³¹ Mago vekamoʼmo kagemi yaʼapimo ohaneʼniya vayaʼmo alu kana ya alu kana yaʼmo alino apamisiyaʼmoʼmo alo huno ateʼniya vekaeʼmo huno faipa huno neʼateyaʼmonanafa mago vekamoʼmo alo huno ateʼniya vekamo ala agiʼamo amisiyaʼmoʼmo kagemi yaʼapimo ohaneʼniya vayaʼaifeʼmo hau huno apategaiye.

³² Hosu vayaʼmogimo alagi hosu kavaʼapifiʼmo maiʼnagenoʼaeʼmo alino hapa faino neʼapataleyaʼmonanafa fatago vayaʼmo faliteʼapaeʼmo afole aisiya kavafeʼmo apavayagunagu huʼa neʼmaiye.

³³ Afiteno ageʼniya kavaʼmo afino aeto nehiya vekamo aipafiʼmo afaʼa nehaneyaʼmonanafa negi vayaʼmogi apaipafiʼmo haneʼniya kavaʼmo afole neʼaiye.

³⁴ Vayaʼmogimo fatago kavaʼmo nehisagenoʼaeʼmo koʼapimoʼmo ala agimo aligiyaʼmonanafa hosu kavaʼmo nehisageʼapaeʼmo huʼa faipa huʼa apatesageno apavagage hugiye.

³⁵ Kini vekamoʼmo afiteno ageʼneno aliʼyaʼamo neʼaliya vekaeʼmo haoke neheyaʼmonanafa avagage yaʼmo alino neʼamiya vekaeʼmo aipamo leno ateno maiʼniye.