Mai'naya kavane 13 - The Keyagana NT and 25 OT books1 Afiteno ageʼniya mafaʼnemoʼmo afoʼamoʼmo alino aya neʼmaleya gemo neʼafiyaʼmonanafa himuʼnamu kavaʼmo nehiya mafaʼnemoʼmo afoʼamoʼmo alino api aino neʼateya gemo noʼafiye. 2 Vayaʼmogimo alagepa gemo nehaya geletiʼmo alagepa huʼa maigayaʼmonanafa gemo amagiʼa neʼatalaya vayaʼmogi kaveta huge kame huge nehaya kavatetiʼmo alagepa huʼa oʼmaigae. 3 Avayaleʼmo alagepa huno neʼyagaiya vekamo alagepa huno maigiyaʼmonanafa asole gemo nehiya vekamo alagepa huno oʼmaigiye. 4 Alagaʼmo nehaeya vekamoʼmo kagemi yaʼmo alisiyafeʼmo haʼye nehiyaʼmonanafa oʼalisigeno ayamukiki huno haise vose huno aliʼyaʼmo neʼaliya vekamoʼmo kagemi yaʼmo aligiye. 5 Fatago vayaʼmogimo aigofe geeʼmo nohapaiyaʼmonanafa hosu vayaʼmo apavagage hisigeʼa hosu apakiʼapimo aligae. 6 Vaiʼmo oʼaliʼniya vekamo fatago kavaʼamoʼmo yagaino atesigeno alagepa huno maigiyaʼmonanafa hosu vekamo hosu kavaʼamoʼmo alino hosu huno ategaiye. 7 Mago vayaʼmogimo huʼapaeʼmo, kagemi yatimo haneʼniya vayaʼmo maiʼnone, huʼa nehayaʼmonanafa ohaneʼniye. Mago vayaʼmogimo huʼapaeʼmo, kagemi yatimo ohaneʼniya vayaʼmo maiʼnone, huʼa nehayaʼmonanafa kagemi yaʼapimo haneʼniya vayaʼmo maiʼnae. 8 Kame vayaʼmogimo kagemi yaʼamo haneʼniya vekaeʼmo, kahaegaune, huʼa hisagenoʼaeʼmo alopa moniletiʼmo miya faigiyaʼmonanafa kame vayaʼmogimo kagemi yaʼamo ohaneʼniya vekaeʼmo, kahaegaune, huʼa osisageno afaʼa maigiye. 9 Fatago vayaʼmogi lamuʼapimoʼmo amogaga neʼaiyaʼmonanafa hosu vayaʼmogi lamuʼapifi aniʼamo ago leno hano hugiye. 10 Apakiʼapileʼmo aliʼa asaga huʼa neʼataya kavapatiʼmo ge nehapaya kavaʼmo afole neʼaiyaʼmonanafa aliʼa api aiʼa apatesayafeʼmo nehaya gemo neʼafiya vayaʼmogi afiteʼa ageʼnaya vayaʼmo maiʼnae. 11 Hosu kavatetiʼmo fikumo neʼaliya monimoʼmo alino aise hume hume uno lamigiyaʼmonanafa lokiya aliʼyaʼmo hapaise vose huʼa aliteʼa neʼaliya monimoʼmo magoʼe huno kosime kosime uno haigiye. 12 Vayaʼmogimo alagepa kavaʼmo afole aisiyafeʼmo agava maiʼneʼa apavayagunagu nehagenoʼaeʼmo ani kavaʼmo afole oʼaino yatala afinaʼmo maisigeʼapaeʼmo apaipamoʼmo kana hugiyaʼmonanafa hapauʼniya kavaʼmo afole aisigenoʼaeʼmo afaʼa maisaya yaʼmo neʼapamiya yosagana huno hanegaiye. 13 Ina lagimo Goti geʼaeʼmo, afaʼa ina agufa gemo haneʼniye, huʼa apakesamo neʼafisafigeno alino apagoʼyamo lagauno apatalegaiyaʼmonanafa geʼaeʼmo koli nehaya vayaʼmogimo miyaʼapimo aligae. 14 Afiteʼa ageʼnaya vayaʼai keʼaepa geʼapimoʼmo afaʼa maisaya yaʼmo alino neʼapamiya meti anikana huno haneʼniye. Ani geletiʼmo nefaliya kavaʼmo aneʼaifatiʼmo faiʼa kasalo paegae. 15 Alagepa huʼa afiʼa aeto nehaya vayaʼaifeʼmo hapaoke hegaiyaʼmonanafa gemo amagiʼa neʼatalaya vayaʼmogi kaʼmo apakafu kisiya kaʼmo haneʼniye. 16 Alagepa kavaʼmo hisayafeʼmo ageʼnaya vayaʼmogimo afiʼnaya kavaʼapiletiʼmo muki kavaʼmo nehayaʼmonanafa negi vayaʼmogimo negi kavaʼmo nehaya kavaʼapimoʼmo muki haopalegamo aino atagu faeno uneno hisigeʼa afigae. 17 Hosu apa vekamoʼmo hanageke yaʼmo aligiyaʼmonanafa alagepa aliʼyaʼmo neʼaliya apa vekamoʼmo vayaʼmo alagepa huno hapa maegaiye. 18 Alino aya malesiya gemo oʼafisiya vekamo avagage hisigeno kafu hugiyaʼmonanafa alino api aino atesiya gemo afisiya vekamoʼmo ala agimo aligiye. 19 Mago vekamoʼmo hauʼniya kavaʼmo afole aisigenoʼaeʼmo aipafiʼmo haga haugiyaʼmonanafa negi vayaʼmogimo hosu kavaʼmo atalesayafeʼmo alagi ohapaugiye. 20 Afiteʼa ageʼnaya vayaʼeʼmo magokepi lokaeno umenitata nehiya vekamoʼmo afiteno agegaiyaʼmonanafa negi vayaʼeʼmo magokepi lokaeno neʼmaiya vekamo alagepa huno oʼmaigiyaʼmofeʼmo alino agoʼya lagauno atalegaiye. 21 Hosu vayaʼmo hanageke kavaʼapimoʼmo apavegala neʼaeyaʼmonanafa fatago vayaʼmo anonaʼapilefeʼmo alagepa huʼa maigae. 22 Alagepa vekamo mafaʼne anagaʼamogimo falisigeʼapaeʼmo alisayafeʼmo apateʼniya kagemi yaʼapimo aligayaʼmonanafa hosu vekamoʼmo apateʼniya kagemi yaʼamo fatago vayaʼmogimo aligae. 23 Kagemi yaʼamo ohaneʼniya vekamo hoyafatiʼmo asole neʼyaʼmo hagegaiyaʼmonanafa ala apaki vayaʼmogi aigofe huteʼa kumayaʼmo aligae. 24 Mafaʼneʼamo maino halove huno ateteno hopa kayotetiʼmo oʼamagiʼniya vekamoʼmo mafaʼneʼaeʼmo ohauʼniye. Mafaʼneʼaeʼmo hauʼniya vekamoʼmo malage huno amagino alino api aino neʼate. 25 Fatago vayaʼmogimo neʼyaʼmo neʼa apamu nehayaʼmonanafa hosu vayaʼmo apaka tegaiye. |
© 2013, Wycliffe Bible Translators, Inc. All rights reserved.
Wycliffe Bible Translators, Inc.