Mai'naya kavane 12 - The Keyagana NT and 25 OT books1 Aliʼa aya neʼmalaya geʼapieʼmo hauʼniya vekamoʼmo afino aeto hisiya kavafeʼmo hauʼniyaʼmonanafa aliʼa api aiʼa atesaya geʼapieʼmo ohauʼniya vekamo negi vekamo maiʼniye. 2 Ala kava neʼmoʼa alagepa vekaeʼmo haoke neheyaʼmonanafa hosu kavafeʼmo agesa afifi huno neʼmaiya vekaeʼmo, hosu vekamo maiʼnane, huno huteno agoti huno ategaiye. 3 Mago vekamoʼmo hosu kavaʼaletiʼmo alagepa huno lokiya vaino oʼmaigiyaʼmonanafa yosamo lokiya vaino hanesiyafeʼmo hafuʼyamo neʼaeya kava huʼa fatago vayaʼmogi hapafuʼyamo aeʼnayaʼmofeʼmo lokiya vaiʼa maigae. 4 Alagepa a kanomoʼa anauʼamoʼmo alagepa huno ha maesigeʼapaeʼmo ala agiʼamo amigayaʼmonanafa mago vekamo aʼamoʼmo hosu kavaʼmo hisigeno anauʼamoʼmo avagage hisigenoʼaeʼmo ani a kanomoʼa kaita haugegana huno anauʼamoʼmo alino hosu huno neʼate. 5 Fatago vayaʼmogimo apakesamo neʼafiya kavaʼmo alagepa huno haneʼniyaʼmonanafa hosu vayaʼmogi vege nehaya gemo humi apatesayafeʼmo nehae. 6 Hosu vayaʼmogi huʼapaeʼmo, fala kita maiʼneta apamagigune, huʼa nehayaʼmonanafa fatago vayaʼai geʼapiletiʼmo apakaiʼapi apakufamo aliʼa katiʼa apategae. 7 Hosu vayaʼmo mago noʼmo alagi asagauno aiʼniya nokana huʼa maiʼnayaʼmonanafa fatago vayaʼai afamo anagaʼapimo afaʼa he tiʼa maigae. 8 Afiteʼa ageʼnaya vayaʼaifeʼmo vayaʼmogi afiteʼa ageʼnaya kavaʼapilefeʼmo ala apakiʼapimo apamigayaʼmonanafa kayagi kayaga kavaʼmo nehaya vayaʼaifeʼmo apakiʼapileʼmo aliʼa afepi apategae. 9 Mago vekamoʼmo aliʼyaʼamo neʼaliya vekamo maiʼniyaʼmonanafa vayaʼmogi agiʼaleʼmo aliʼa afepi ateʼnisayana agaemo neʼyaʼmo ohaneʼnisiya vekamo agaiʼa agiʼaleʼmo alino asaga huno neʼateya vekamo aeno aga seʼniye. 10 Fatago vayaʼmogi afuʼapimofi hosiʼapimofi pulumakaʼapimofi huʼa alagepa huʼa maisayafeʼmo apakesamo neʼafiyaʼmonanafa hosu vayaʼmogimo afuʼapimofi hosiʼapimofi pulumakaʼapimofi huʼa neʼyaʼapimo ohanege alagepa huʼa oʼmaige apakafu kige hisayafeʼmo apakesamo noʼafiye. 11 Hoyamo neʼvaiya vekamoʼmo neʼyaʼmo neno amu hugiyaʼmonanafa aliʼyaʼmo oʼaliʼa alu ya alu yafeʼmo apamogaga neʼaiya vayaʼmogi afiʼa aeto nosae. 12 Hosu vayaʼmogimo apakeʼnayana mago vayaʼmogimo hosu kava huteʼa asole yaʼmo aliʼnageʼa apaketeʼapaeʼmo hapaʼye nehayaʼmonanafa fatago vayaʼmo hapafuʼyamo aiʼnigeʼa asole alagamo neʼae. 13 Hosu vayaʼai geʼapimoʼmo aneʼai hegekana huno apatafaugiyaʼmonanafa fatago vayaʼmogi hanageke yaʼmo aeʼa aga segae. 14 Mago vekamoʼmo alagepa gemo hisiyaʼmoʼmo alagepa yaʼmoʼmo aipafiʼmo havaitesigeno alagi haiʼmo aliʼnove, huno hugiye. Ayatetiʼmo alagepa kavaʼmo hisiyaʼmoʼmo alagepa miyaʼmo aligiye. 15 Negi vekamoʼmo agaiʼa aulagaleʼmo nehiya kavaʼaeʼmo alagi alagepa kavaʼageʼmo nehuve, huno nehiyaʼmonanafa alino api aino atesiya gemo afiʼniya vekamoʼmo afiteno ageʼniya vekamo maiʼniye. 16 Negi vekamoʼmo malage huno aipamo leno neʼapateyaʼmonanafa alagepa kavaʼmo hisiyafeʼmo ageʼniya vekamoʼmo huʼa faipa huʼa atesaya geeʼmo agesamo noʼafiye. 17 Agotileʼmo lama ge faigoko gemo nehiya vekamoʼmo fatago kavaʼmo alino apave neliyaʼmonanafa aigofe faigoko gemo nehiya vekamoʼmo humi apatesiya agufa gemo nehiye. 18 Naipemoʼmo vayaʼai apaipafiʼmo neʼaeya kava huʼa mago vayaʼmogi lokiya gefatiʼmo huʼnagenoʼaeʼmo apakafu nekiya gemo nehayaʼmonanafa afiteʼa ageʼnaya vayaʼmogimo geʼapiletiʼmo vayaʼmo hapa maeʼa aliʼa alagepa huʼa neʼapatae. 19 Aigofe gemoʼmo aise afinaʼmo hanegaiyaʼmonanafa lama gemoʼmo hanege hanege huno hanegaiye. 20 Vayaʼmogi hosu kavaʼmo hisayafeʼmo apakesa afifi huʼa maiʼnaya vayaʼai apaipafiʼmo aigofe kavaʼmo haneʼniyaʼmonanafa muki vayaʼmo alagepa huʼa magokepi lokaeʼa maisayafeʼmo ge nehaya vayaʼmogi apamogaga aigae. 21 Muki fatago vayaʼmogi alopa hanageke yaʼmo oʼaligayaʼmonanafa hosu vayaʼmogi asole hanageke yaʼmo aliʼa havaitegae. 22 Ala kava neʼmoʼa aigofe gemo nehaya vayaʼaifeʼmo alagi ohauʼniyaʼmonanafa lama gemo nehaya vayaʼaifeʼmo hapaoke nehe. 23 Alagepa kavaʼmo hisiyafeʼmo ageʼniya vekamoʼmo malage huno afiʼniya gemo aeno hakalo huno hapa nopaiyaʼmonanafa negi vayaʼmogi negi gemo huʼa hapa nepaiye. 24 Apayamukiki huʼa aliʼyaʼmo neʼaliya vayaʼmogi vayateʼmo yagaiʼa apategaiyaʼmonanafa alagaʼmo nehapaeya vayaʼmogi kalavusi aliʼyaʼmo aligae. 25 Hausoli nehiya vekamo aipamoʼmo kana nehiyaʼmonanafa mago vekamoʼmo alagepa gemo ha paisigenoʼaeʼmo amogaga aigiye. 26 Fatago vekamoʼmo haopaleʼmo maiʼniya vekamo kaʼmo alino ho huno ategaiyaʼmonanafa hosu vayaʼmogimo hosu kavaʼapimoʼa alagepa kaʼmo ataleʼa hosu kateʼmo visayafeʼmo apavalelino neʼviye. 27 Alagaʼmo nehaeya vekamoʼmo yaga yaʼmo huno haeʼniya yagamo okaeno neʼataleyaʼmonanafa apayamukiki nehaya vekamo yaʼamo alopa monileʼyaʼmo aeno agaseʼniya yaʼmo haneʼniye. 28 Fatago kavaʼmo kaʼamo afaʼa maisaya kavategamo uʼniye. Ani kateʼmo neʼvaya vayaʼmo alagi ofaligae. |
© 2013, Wycliffe Bible Translators, Inc. All rights reserved.
Wycliffe Bible Translators, Inc.