Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Mai'naya kavane 11 - The Keyagana NT and 25 OT books

1 Ala kava neʼmoʼa aigofe sigelieʼmo alagi ohauʼniyaʼmonanafa lama ge sigelieʼmo haoke nehe.

2 Vayaʼmogimo apakiʼapileʼmo aliʼa asaga huʼa atesayana apavagage hugiyaʼmonanafa apakiʼapileʼmo aliʼa afepi neʼataya vayaʼmogimo afiteʼa neʼagae.

3 Fatago vayaʼai fatago kavaʼapimoʼa ka alino ho huno neʼapateyaʼmonanafa geʼapimo akame nosaya vayaʼai hosu kavaʼapimoʼa alagi alino apagoʼya lagauno apatalegaiye.

4 Ala kava neʼmoʼa aipamo leno apatesiya afinaʼmo vayaʼai kagemi yaʼapimoʼa hapa oʼmaegaiyaʼmonanafa vayaʼai fatago kavaʼapimoʼa falisaya kavategatiʼmo apakufamo alino katino apategaiye.

5 Vaiʼmo oʼaliʼnisaya vayaʼai fatago kavaʼapimoʼa visaya kaʼmo alino api aino apategaiyaʼmonanafa hosu vayaʼmogimo hosu kavaʼapiletiʼmo asagauʼa aigae.

6 Fatago vayaʼai fatago kavaʼapimoʼmo hosu kavategatiʼmo apakufamo alino katino apategaiyaʼmonanafa geʼapimo akame nosaya vayaʼmogi hapaʼye nehiya kavaʼapimoʼmo aneʼaigana huno apatafaugiye.

7 Hosu vekamoʼmo alagepa kavaʼmo afole aisiyafeʼmo avayagunagu nehisigenoʼaeʼmo falisigeno hano hugiye.

8 Fatago vayaʼmo hanageke yapatiʼmo apakufamo alino katino neʼapategeno ani hanageke yaʼmoʼmo hosu vayaʼaitegamo afole neʼaiye.

9 Aigofe mono vayaʼmogimo geʼapiletiʼmo hapaopaleʼmo maiʼnaya vayaʼmo aliʼa hosu huʼa neʼapatayaʼmonanafa fatago vayaʼmogi afiʼa aeto nehaya kavaʼapiletiʼmo hosu kavaʼmo aeʼa aga segae.

10 Fatago vayaʼmo alagepa huʼa maiʼnageʼapaeʼmo muki taonifiʼmo maiʼnaya vayaʼmogimo apamogaga neʼaiye. Hosu vayaʼmo falisageʼapaeʼmo apamogaga neʼaiʼapaeʼmo alopa gefatiʼmo hugae.

11 Fatago vayaʼmogimo aliʼa auleʼa neʼapataya kavaʼapiletiʼmo taonifiʼmo maiʼnaya vayaʼmogi alagepa huʼa neʼmaiyaʼmonanafa hosu vayaʼmogi geʼapiletiʼmo taoniʼapimo aliʼa hosu huʼa neʼatae.

12 Afiteno oʼageʼniya vekamoʼmo haopaleʼmo maiʼniya vekamo geʼaletiʼmo alino afepiʼmo neʼateyaʼmonanafa afino aeto nehiya vekamoʼmo ani agufa gemo nosiye.

13 Hosu faigoko gemo nehiya vekamoʼmo hapa opaisiya agufa gemo hapa nepaiyaʼmonanafa lama ge vekamoʼmo fala ki gemo hapa nopaiye.

14 Aliʼa api aiʼa neʼapataya vayaʼmo oʼmaiʼnisayana muki vayaʼmo asagauʼa aigayaʼmonanafa aliʼa api aiʼa neʼapataya vayaʼmo asole vayaʼmo maiʼnisayana muki vayaʼmo alagepa huʼa maigae.

15 Kagaemo alu kotegatiʼmo eʼniya vekalefeʼmo hukaeʼmo, ani vekamo aimuʼyaleʼmo maiʼneʼna anonaʼalefeʼmo afaʼa lapamiguve, huka hapa paisanana lusi kana yaʼmo aliganaʼmonanafa ani agufa kavafeʼmo okahauʼnisiyana afaʼa maigane.

16 Alagepa a kanomoʼmo alagepa agimo aliʼniya agiʼaleʼmo atafauno alagi huno maiteno oʼatalegaiye. Lokiya vayaʼmogimo kagemi yaʼapileʼmo atafauʼa alagi huʼa maiteʼa oʼatalegae.

17 Hau huno neʼapateya vekamoʼmo agaiʼa agupi mafaʼnemo alagepa huno ha neʼmaeyaʼmonanafa hau huno noʼapateya vekamoʼmo agaiʼageʼmo hanageke yaʼmo alino neʼamiye.

18 Hosu vekamoʼmo aliʼyaʼaletiʼmo miyaʼamo hano hisiya miyaʼmo aligiyaʼmonanafa avina yaʼmo nehakalaya kava huno fatago kavaʼmo huʼniya vekamoʼmo henagaʼamo alagi alagepa miyaʼmo aligiye.

19 Muki vayaʼmogi fatago kavaʼmo akame nehisayana afaʼa maisaya yaʼmo aligayaʼmonanafa hosu kavaʼmo hisayafeʼmo vegala neʼaya vayaʼmo faligae.

20 Ala kava neʼmoʼa kayagi kayaga kavaʼmo nehaya vayaʼaifeʼmo alagi ohauʼniyaʼmonanafa vaiʼmo oʼaliʼnisaya vayaʼaifeʼmo amogaga neʼaiye.

21 Hosu vayaʼmo magokepi aliʼa anupa huʼa maiʼnisayana kayoʼmo aligayaʼmonanafa fatago nofi vayaʼmo hanageke yapatiʼmo apakufamo alino katino apategaiye.

22 Goli linimo afumo agoʼyafiʼmo haneʼniya afumo maiʼniya kava huno alagepa apaulagamo neʼagaya a kanomoʼa alagepa kavaʼmo hisiya agufa agesamo noʼafiya a kanomo maiʼniye.

23 Fatago vayaʼmogi alagepa kavaʼmo afole aisiyafeʼmo hapauʼniyanageno alagepa kavaʼageʼmo afole aigiyaʼmonanafa hosu vayaʼmogimo alagepa huʼa maisaya kavafeʼmo apavayagunagu nehagenoʼaeʼmo aipamo leno neʼapateyanageno kayoʼmo apamigiye.

24 Mago vekamoʼmo alu ya alu yaʼamo apamitenoʼaeʼmo magoʼe yaʼmo neʼaliyaʼmonanafa mago vekamoʼmo apamisiya yaʼmo haneʼnigenoʼaeʼmo noʼapamiya kavatetiʼmo kafu hugiye.

25 Ala kava neʼmoʼa magoʼe yaʼmo neʼapamiya vekamo amisigeno kagemi yaʼamo haneʼniya vekamo maigiye. Hapa neʼmaeya vekamo ha maegae.

26 Vayaʼmogimo kafu afinaʼmo neʼyaʼapimo maketi osisaya vayaʼmo lifana huʼa apategayaʼmonanafa maketi hisaya vayaʼmo aliʼa auleʼa apategae.

27 Apakaemo alagepa kavaʼmo hisayafeʼmo apayamukiki huʼa kahauya huʼa agesaya vayaʼaifeʼmo hapaoke hegayaʼmonanafa hosu kavaʼmo hisayafeʼmo kahauya nehaya vayaʼmo hanageke yaʼmo aligae.

28 Kagemi yaʼnimoʼa alagepa huno naha maegaiye, huno alino amufa neʼamiya vekamoʼmo asagauno aigiyaʼmonanafa fatago vekamoʼmo saufa yosamo alagamo neʼaeya kava huno magoʼe magoʼe huno alagepa kavaʼmo huno maigiye.

29 Mago vekamoʼmo afamo anagaʼamo hanageke yaʼmo apamisiyaʼmoʼmo apakaepatiʼmo yasiʼageʼmo aligiye. Negi vekamoʼmo afiteno ageʼniya vekamo aliʼyaʼamo aligiye.

30 Fatago vayaʼai kavaʼapimoʼmo afaʼa maisaya yaʼmo neʼapamiya yosagana huno haneʼniye. Goti geʼaletiʼmo Goti mafaʼnemo alino hamaleno neʼapateya vekamo afiteno ageʼniya vekamo maiʼniye.

31 Fatago vayaʼmogimo hosu kavaʼmo hisagenoʼaeʼmo Gotiʼa kayoʼmo apamigiyana hosu vayaʼaina magoʼe huno kayoʼmo apamigiye.

© 2013, Wycliffe Bible Translators, Inc. All rights reserved.

Wycliffe Bible Translators, Inc.
ကြှနျုပျတို့နောကျလိုကျပါ:



ကြော်ငြာတွေ