Mai'naya kavane 10 - The Keyagana NT and 25 OT booksSalomoniʼa gemo aupa aupa huʼniya gemae 1 Salomoniʼa aupa aupa geʼamo haneʼniyana afiteno ageʼniya mafaʼnemo afoʼamoʼmo amogaga neʼaiyaʼmononafa negi mafaʼnemo itaʼamoʼmo aipamo kana huʼniye. 2 Hosu kavatetiʼmo neʼaliya kagemi yaʼapimoʼmo hapa oʼmaegiyaʼmonanafa fatago kavatetiʼmo falisaya kavatetiʼmo apakufamo alino katino apategaiye. 3 Ala kava neʼmoʼa fatago vayaʼmo apatalesigeʼa neʼyafeʼmo kafu osugayaʼmonanafa hosu vayaʼmogimo hapauʼniya yaʼmo alisayafeʼmo kahauya nehayana apatalesigeʼa oʼaligae. 4 Alagaʼmo haesiya vekamoʼmo kagemi yaʼamo ohanesiya vekamo maigiyaʼmonanafa lokiya vaino haise vose huno aliʼyaʼmo alisiya vekamoʼmo kagemi yaʼamo hanesiya vekamo maigiye. 5 Neʼyaʼmo neleya afinaʼmo neʼaliya mafaʼnemo afiteno ageʼniya mafaʼnemo maiʼniyaʼmonanafa neʼyaʼmo neʼaliya afinaʼmo au kaleno maiʼniya mafaʼnemo afamo anaga vayaʼamo apavagage hugiye. 6 Gotiʼa fatago vayaʼmo fikumo hapa maeno neʼapamiyaʼmonanafa hosu vayaʼai hosu kavaʼapimoʼa apavayamo aino akani malegaiye. 7 Fatago vayaʼmogi apakiʼapimo alino auleno ateʼniya apakiʼapimo afaʼa haneʼnigeʼa apake okaniʼa apakesamo neʼafiyaʼmonanafa hosu vayaʼaifeʼmo apake kanisigeno apakiʼapimo uno vagigiye. 8 Afiteno neʼageya vekamoʼa huvo, huʼa nehaya gemo akame nehiyaʼmonanafa asole afa gemo nehiya vekamo asagauno aigiye. 9 Fatago vayaʼmo alagepa huʼa maigayaʼmonanafa kayagi kayaga kateʼmo neʼvaya vayaʼmo hosu kavaʼapimo agegae. 10 Mago vekamo aigofe gemo nehunoʼaeʼmo aulaga fali nekaeya vekamoʼa lusi hanageke kavaʼmo nehiyaʼmonanafa asole afa gemo nehiya vekamoʼa agaiʼamo asagauno aigiye. 11 Fatago vayaʼai geʼapimoʼmo afaʼa maisaya yaʼmo alino neʼapamiya anikana huno haneʼniyaʼmonanafa hosu vayaʼai hosu kavaʼapimoʼa apavayamo aino akani malegaiye. 12 Apaipafiʼmo apaini nehaya kavaʼmoʼa kaveta nehaya kavaʼmo alino afole aino neʼateyaʼmonanafa hapau apayamopafiʼmo nehapaiya kavaʼmoʼa hosu kavaʼapimo aeno ati nekae. 13 Afiʼa aeto nehaya vayaʼmogi afiteʼa neʼagaya gemo nehayaʼmonanafa apakesamo ohaneʼniya vayaʼaina kayoʼmo apamigae. 14 Afiteʼa neʼagaya vayaʼmogi neʼafiya gemo aliʼa alu aiʼa neʼmalayaʼmonanafa negi vayaʼmogimo geʼapiletiʼmo apakaiʼapimo aliʼa hano huʼa neʼapatae. 15 Kagemi yaʼamo haneʼniya vekamo kagemi yaʼamoʼa faino vego huno neʼateyaʼmonanafa kagemi yaʼamo ohaneʼniya vekamo kafu hu kavaʼmoʼa alino hano huno ategaiye. 16 Fatago vayaʼmogi aliʼyaʼapimo neʼaliʼapaeʼmo afaʼa maisaya yaʼmo aligayaʼmonanafa hosu vayaʼmogimo aliʼyaʼapimo neʼaligenoʼaeʼmo hosu kavaʼapimo afole neʼaiye. 17 Aliʼa apaya neʼmalaya gemo neʼafiya vayaʼmo afaʼa maisaya yaʼmo neʼaliya kateʼmo neʼvayaʼmonanafa hosu kavaʼmo nehane, huno nehigenoʼaeʼmo noʼafiya vekamoʼmo alagepa kaʼmo ago neʼatale. 18 Ina laʼmo aipafiʼmo aini nehiya kavaʼmo aeno ati kaesiʼmoʼmo muki afinaʼaeʼmo aigofe gemo nehiye. Aigofeʼmo nehuno huno faipa huno neʼateya gemo aino atagu faesiyafeʼmo vayaʼaifeʼmo hapa nepaiya vekamoʼa negi nagi vekamo maiʼniye. 19 Asole gemo nehiya vekamoʼmo geʼafatiʼmo hosu kavaʼmo afole aigiyaʼmonanafa afiteno neʼageya vekamoʼa avayamo aino akani malegaiye. 20 Fatago vayaʼai geʼapimoʼmo hogote siluva yafakana huno haneʼniyaʼmonanafa hosu vayaʼai apaipamo ina agufa apaipamogeno miyaʼamo ohaneʼniye. 21 Fatago vayaʼai geʼapimoʼmo asole vayaʼaina hapa neʼmaeyaʼmonanafa negi vayaʼmo afiteʼa agesaya kavaʼmo noʼaliyaʼmofeʼmo faligae. 22 Ala kava neʼmoʼa alino auleno apateʼniya vayaʼmo kagemi yaʼapiʼe vayaʼmo maigae. Agaemo kana yaʼeʼmo magokepi alino lokaeno noʼapamiye. 23 Negi nagi vayaʼmogimo hosu kavaʼmo nehaya kavaʼmo yokalo legekana huʼa apamogaga neʼaiyaʼmonanafa afino aeto nehiya vekamoʼmo afiteno neʼage. 24 Hosu vayaʼmogi koli nehaya kavaʼmo apakaeteʼmo afole aigiyaʼmonanafa fatago vayaʼmogi afole aisiyafeʼmo nehapaiya kavaʼmo aligae. 25 Lusi yasimo alisigeʼapaeʼmo hosu vayaʼmo magoʼe huʼa oʼmaigayaʼmonanafa fatago vayaʼmogimo he tiʼa lokiya vaiʼa maigae. 26 Mago vayaʼmogi alagaʼmo nehaesiya vekamo aliʼyaʼapileʼmo atesayana atu neheya aniʼmoʼa apavayafiʼmo atu hapaesigeno halinaʼmoʼmo apaulagafiʼmo atu nehapaeya kava huno kana yaʼmo alino neʼapamiye. 27 Ala kava nefeʼmo koli nehuʼa akame nehaya vayaʼmogi kafugaʼapimo magoʼe huʼa maigayaʼmonanafa hosu vayaʼai kafugaʼapimo aiseʼamo maiteʼa faligae. 28 Fatago vayaʼmogimo afole aisiya kavafeʼmo apavayagunagu nehayanageno afole aigiyaʼmonanafa hosu vayaʼmogi afole aisiya kavafeʼmo apavayagunagu nehaya kavaʼmo hano hugiye. 29 Fatago vayaʼmogimo Ala kava neʼmo kateʼmo neʼvageno alino lokiya vaino neʼapateyaʼmonanafa hosu kavaʼmo nehaya vayaʼmo alino apagoʼya lagauno apatalegaiye. 30 Fatago vayaʼmo hapa faino oʼapatalesigeʼa afaʼa maigayaʼmonanafa hosu vayaʼmo ma mopafiʼmo maige maige huʼa oʼmaigae. 31 Fatago vayaʼai apavayafatiʼmo afiteʼa neʼagaya gemo afole neʼaiyaʼmonanafa hosu vayaʼai apavayamo lagauno atalegaiye. 32 Fatago vayaʼmogi hisaya gemo ago afiʼnayaʼmonanafa hosu vayaʼmogi hosu gegeʼmo hisayafeʼmo afiʼna e. |
© 2013, Wycliffe Bible Translators, Inc. All rights reserved.
Wycliffe Bible Translators, Inc.