Maika 7 - The Keyagana NT and 25 OT books

Isaleli vayaʼmogimo hosu kavakeʼmo huʼa maiʼnaya gemae

¹ Kage kage huʼna yulagefaʼmo neʼauve. Nagaemo mago vekamoʼmo aga teʼnigenoʼaeʼmo mago neʼnaya alagepa yosa alagamo noʼageya agufa kava huʼna fatago vayaʼmo noʼapakove. Muki haga nofi alagaʼe haga yosa alagaʼeʼmo mukiʼamo neʼa hano huʼnaya kava huʼa muki fatago vayaʼmo oʼmaiʼnae.

² Muki ma mopafiʼmo fatago vayaʼmo faliʼnae. Magoke fatago vekamo oʼmaiʼniye. Muki vayaʼmogimo alu vayaʼaifeʼmo kame huʼa apateteʼa aliʼa hosu huʼa apatesaya kafeʼmo kahauya nehae. Muki vayaʼmogimo apakaiʼapi nofi vayaʼmo apatafauʼa kamitimo apamagisayafeʼmo umenimo aliniʼa neʼvae.

³ Lole apayatalatetiʼmo hosu kavaʼmo nehayaʼmonanafa alagepa kavaʼmo hisayafeʼmo apakesamo noʼafiye. Yagaiʼa apateʼnaya vayaʼmogimo fikumo lamiyo, huʼa hapa nepaiye. Agoti gemo neʼafiya vayaʼmogimo kutulu monimo alisayafeʼmo nehae. Ala apakimo haneʼniya vayaʼmogimo apakaiʼapimo hapauʼniya yaʼmo alisayafeʼmo alu hosu vayaʼaifeʼmo hapa paiʼnageʼapaeʼmo magokepiʼmo maiʼneʼa vegemo nehae.

⁴ Muki ani vayaʼmo alagi hosu vayaʼmo maiʼnayana ani vayapatiʼmo magoʼamogi aeʼa apakaseʼa aiseʼamo alagepa vayaʼmo hosu aufe nofi kahaukana huʼa maige vayaʼmo nehapaeya aufe nofikana huʼa maige huʼnae. Gotitegati gemo aliniʼeʼa aeʼa hakalo nehaya vayaʼmogi apavayafatiʼmo ehetapiye agufa gemo huʼa hapa paiʼapaeʼmo, Gotiʼa lapa painoʼaeʼmo, aliʼna hosu huʼna lapatalegauve, huno huʼniya afinaʼmo ago afole aigiye. Ani afinaʼmo apakesa afi yaʼmo alagepa huno ohanegaiyanageʼa negi nagi huʼa maigae.

⁵ Ani afinaʼmo lapao vayaʼmogi lapa maesayafeʼmo alita amufa oʼapamiyo. Lapavagi nehaya vayaʼaifeʼmo laha maegae, hutapa lapakesamo oʼafiyo. Lapakaemo aʼnetapieʼmo muki nehaya geleʼmo alagepa hutapa yagaiyo.

⁶ Ani afinaʼmo ve mafaʼnemogimo afoʼapimogi apakiʼapileʼmo aliʼa afepiʼmo apatesageʼa a mafaʼnemogimo itaʼapimogiʼeʼmo kaveta hisageʼa apanofeloʼapimogimo aʼne apanofeloʼapimogifeʼmo kame huʼa apategae. Vayaʼmogimo apakaiʼapi afamo anagaʼapiʼeʼmo kame huʼa apatesageʼa kame huʼa apatesageʼa huʼa maigae.

⁷ Hugayaʼmofeʼmo nagaemo Ala kava neʼmoʼa naha maesiyafeʼmo aulu heʼna agegauve. Nagufamo alino katino neʼnateya Gotiʼa naha maesiyafeʼmo agava maiguve. Nagaemo Gotiʼnimofeʼmo keya aeʼna ge hisugeno afigiye.

Ala kava neʼmoʼa vayaʼamo apakufamo alino katino apatesiya gemae

⁸ Kame vekaʼnimogae, huʼna, hosu yaʼmo aliʼnovaʼmofeʼmo alika afepi nateteka kamogaga oʼaiyo. Asagauʼna aisuvana halate he tiguve. Hanipiʼmo fai maisugenoʼaeʼmo Ala kava neʼmoʼa nagaeteʼmo aeno ha legaiye.

⁹ Nagaemo Ala kava netegamo hosu kavaʼmo huʼnovaʼmofeʼmo aipamo leno nateteno kayoʼmo neʼnamiya kana yaʼmo afaʼa aliguve. Alime alime neʼvisugenoʼaeʼmo agotileʼmo ge huno naha maesiya gemo huteno nagaetefeʼmo fatago kavaʼmo huno alino fako hugiye. Agaemo navalelinuno ha le yategamo natesigeʼna fatago kavaʼamo agegauve.

¹⁰ Agesugeno kame vayatieʼmo hunoʼaeʼmo, Ala kava neʼmo Gotikamoʼmo haiyaʼaleʼmo maiʼniye, huno huʼniya a kanomoʼmo agesiyana Ala kava neʼmoʼa alagepa huno naha maesigeno agetenoʼaeʼmo lusi kava huno avagage hugiye. Vayaʼmogi kateʼmo uʼeʼa huʼapaeʼmo hapafiʼmo aeʼa nekasaliya kava huʼa hemenimo vayaʼmogi ani a kanomo kame vayatimogi aeʼa lata paisageʼna agegauve.

¹¹ Ala kava neʼmoʼa hunoʼaeʼmo, Yulusalemu vayaʼmogitapae, huno, Lapakaemo halate taonitapileʼmo yafa kegiʼyamo hisaya afinaʼmo kini vekamo lahapa maesiya gemo hu malesiya gemo hunoʼaeʼmo, hiyo, huno hapa paisiya gemoʼmo afagitega uno aino atagu faegaiye.

¹² Yulusalemu taoniyo, huno, ani afinaʼmo vayakamo kalavusi huʼnaya vayaʼmo alu nofi vayaʼmogi kotegatiʼmo kagaetegamo egae. Apakaemo Asiliya kotegatiʼmo ege Isipi kotegatiʼmo ege Yufaletisi aniʼmo haneʼniya haopalegatiʼmo ege afagi haopalega haneʼniya solovala anitegatiʼe ave kotegatiʼeʼmo ege hugae.

¹³ Asole vayaʼmo kagaetegamo egayaʼmonanafa Isaleli kotegamo vayaʼmo oʼmaiʼnayanageno kahaepa koʼmo hanegaiye. Ani koteʼmo maiʼnaya vayaʼmogimo hosu kavaʼmo nehayaʼmofeʼmo aise vayaʼmo maiʼnaya koʼmo hanegaiye.

Gotiʼa Isaleli vayaʼmo hapa maeno hosu kavaʼapimo alino atalegaiye, huno huʼniya gemae

¹⁴ O Ala kava nene, huʼna, Sipisipileʼmo neʼyagaiya vekamoʼmo sipisipileʼmo yagaino neʼapateya kava huka vayakaleʼmo hayopa kayotetiʼmo yagaika apato. Apakaemo Gotiʼa kamiʼniya vayaʼmo yahaofilaga kaʼme avelegamo apaoteʼmo maiʼnae. Kagaemo afaʼa apatalegeʼa uʼa akeyaʼvilagamo maiʼnaya koʼmo alagepa mopamo haneʼniya koʼmo Mesani kotegaʼe Giliyati kotegaʼeʼmo maiyo.

¹⁵ Ala kava neʼmoʼa hunoʼaeʼmo, Nagaemo vayaʼnimo Isipi kotegatiʼmo apavaleliʼna eʼnova afinaʼmo noʼagaya agufa lokiya naune kavaʼmo huʼna apave liʼnova agufa kavaʼmo huʼna apave liguve.

¹⁶ Alu gamani vaya alu gamani vayaʼmogimo agesayana lokiyaʼniletiʼmo noʼagaya agufa naune kavaʼmo hisugeʼa ageteʼapaeʼmo lokiyatimo aiseʼamo haneʼniye, huʼa huteʼa lokiyaʼapilefeʼmo apavagage hugiye. Koli huteʼa ge osugae. Apakesaleʼmo aliʼa akaniteʼa gemo oʼafigae.

¹⁷ Apakaemo mopafiʼmo asagauʼa aiteʼa apaipagutegatiʼmo nagaloʼyavegana huʼa havaeʼa maigae. Apakaemo atete huʼa Ala kava neʼmo Gotitapimofeʼmo koli huteʼa fala kiʼa maiʼnayategatiʼmo ataleʼa egae.

¹⁸ Ina laʼmo Gotigakana huno maiʼniye. Kagaemo hosu kavaʼapilefeʼmo afaʼa ateyo, huka huteka alika neʼatalane. Kagaemo aise nofi vayaʼmo logufa vayakamogimo gekamo amagiʼa ataleʼnaya hosu kavaʼapimo uka aeka aga seka alika neʼatalane. Hau huno latesiyafeʼmo amuse nehiyaʼmofeʼmo muki afinaʼmo aipamo leno lateme lateme noʼviyanageno hau huno lategaiye.

¹⁹ Halate alu agesamo afiteno lagaefeʼmo hau ayamopafi hausigeno hosu kavatiʼeʼmo kame huno aeno aga seteno hosu kavatileʼmo yagaino ategaiye. Kagaemo muki hosu kavatimo alika yaga auka atalesanageno solovala aniʼmo afepilagamo lusi vasilonafiʼmo uno lamigiye.

²⁰ Kagaemo Yekopu aginago vayaʼmogita laha maeka Yekopufeʼmo ha paiʼnana lama ge kotalake gemo akame huge Emalehamu aginago vayaʼmogitaeʼmo kahau huka latege hugane. Akeyaʼvilagamo kagaemo laginago vayaʼaifeʼmo kagoʼyamo ataletekaeʼmo, Nagaemo lama gemo huʼnaeʼmo, lapa maeʼna lapamiguve, huka ani hapa paiʼnana gemo akame hugane.