Maika 5 - The Keyagana NT and 25 OT books

¹ O, Yulusalemu vayane, huno, ati vayatapimo apavaleta alita anupa hutapa apateyo. Kame vayatapimogi eʼa ago faiʼa vego huʼa lateʼnae. Apakaemo Isaleli vayaʼaiteʼmo yagaiʼniya vekamo agalametaleʼmo kayotetiʼmo amagigae, huno hapa paiʼniye.

Gotiʼa Metelehamu taonifiʼmo Mesaiya kini vekamo afole aigiye, huno polomasi gemo huʼniya gemae

² Gotiʼa ina ge huno huʼniye. Metelehamu Efalatao, huno, Kagaemo muki Yuta taonimo folagapiʼmo alagi aise taonimo haneʼnanaʼmonanafa Isaleli kini vekamo maisiyafeʼmo mago vekamo nagaetefeʼmo kagaepatiʼmo afole aino maigiye. Agaemo akeyaʼvilagamo Gotiʼa ma mopaʼe kokuʼnaʼeʼmo alo osuʼniya afinaʼmo maiʼniye.

³ Afole aigiyaʼmonanafa Gotiʼa vayaʼamo kame vayaʼapimogi apayapiʼmo apatesigeʼa maime maime neʼvisagenoʼaeʼmo mago a kanomoʼmo mago ve mafaʼnemo alino atesigeʼa ani mafaʼnemo nofi vayaʼamo logufaʼa Isaleli vayaʼmo Isaleli vayaʼaitegamo aiʼa atagineʼa egae.

⁴ Inagi ani vekamoʼmo agaiʼa sipisipi vayaʼaleʼmo Ala kava neʼmo Gotiʼamo himamuʼaletiʼe ha le konali agiʼaletiʼeʼmo yagaino apateʼnenoʼaeʼmo neʼyaʼmo apamigiye. Muki ma mopafi vayaʼmogimo ala agiʼamo amigayaʼmofeʼmo vayaʼamo alagepa huʼa maige maige huʼa maigae.

⁵ Ani vekamo vayaʼamogimo muki afinaʼmo alagepa huʼa maige maige huʼa kame osuʼa maiʼa haga lesaya kavaʼapimo aepa vekamo maigiye.

Ala kava neʼmoʼa vayaʼamo hapa maesiyafeʼmo kayoʼmo apamisiya gemae Asiliya ati vayaʼmo eʼa lagae mopaleʼmo taonitile lokiya kegiʼyamo heʼa halagape vaisaya afinaʼmo lagaemo sipisipileʼmo yagaiʼnaya seveniʼa vayaʼe eitiʼa ala vayaʼeʼmo alita apatesunageʼa

⁶ Asiliya koteʼmo Nimilotiʼmo aepa faiʼniya koteʼmo uʼa naipeletiʼmo kamemo huʼa aeʼa apaka segae. Asiliya vayaʼmogi lagae mopaleʼmo esageʼapaeʼmo apakaemo kame hisageno agaemo ani kavatetiʼmo Asiliya vayaʼai apayapatiʼmo hatu maeno lavalelino egaiye.

⁷ Ani afinaʼmo logufaʼa vayaʼmo Yekopu vayaʼmogimo asole nofi vayaʼmogi folagapiʼmo Ala kava netetiʼmo hapa neʼmaeya lao yakana huʼa maige kahauleʼmo koʼmo aigekana kavaʼmo huʼa maige hugae. Apakaemo mago vekamoʼmo hapa maesiyafeʼmo agava oʼmaige vayaʼmogimo hapa maesayafeʼmo apakava oʼmaige hugae.

⁸ Ani logufaʼa vayaʼmo Yekopu vayaʼmogimo laiyonimoʼmo afela afumo hapaesiyafeʼmo nehiya kava huʼa alu nofi vayaʼai folagapiʼmo hapaegae. Aikeli laiyonimoʼmo sipisipi anagaʼmogi folagapiʼmo maiʼneno apatafauge hapaeno nege nehiya kava huʼa maigae. Mago sipisipi anagaʼmo hapa maesiya vekamo maiʼniya kava huʼa Yekopu kame vayaʼamo hapa maesaya vayaʼmo oʼmaigae.

⁹ Ala kava neʼmoʼa hunoʼaeʼmo, Muki kame vayatapimo alita afepiʼmo apatetetapa hapaeta hano hugae.

¹⁰ Ala kava neʼmoʼa Isaleli vayaʼaifeʼmo ina gemo huno hapa paigiye. Ani afinaʼmo nagaemo hositapimo aliʼna hano huʼna apatalege kame hisaya talalatapimo aliʼna hano huʼna atalege huguve.

¹¹ Nagaemo muki taoniʼatapimo aliʼna hosu huʼna ataleteʼna lokiya kegiʼyaʼe lokiya notapiʼeʼmo heʼna halagape vaiʼna atalegauve.

¹² Nagaemo muki lusa nehaya kavatapimo aliʼna ataleteʼna afole aisiya kavafeʼmo apaune gemo nehaya vayatapimo afaʼa apatesugeʼa oʼmaigae.

¹³ Nagaemo muki yosaletiʼmo alo nehaya apaune yatapiʼe aote mono positapiʼeʼmo aliʼna atalegauve. Lapakaemo lapayatetiʼmo alo huʼnaya yatefeʼmo magoʼe hutapa monoʼmo osugae.

¹⁴ Nagaemo lapakaetegatiʼmo aigofe gotitapimogi apakiʼapimo Asalimigimo aliʼna hosu huʼna apataleteʼna lapakae taonimo heʼna halagape vaiguve.

¹⁵ Inagi nagaemo lusi kava huno naipamo leʼnisigeʼna ani nofi vayaʼmogimo geʼnimo akame osuʼnaya kavaʼmo anonaʼapilefeʼmo apamiguve, huno huʼniye.