Maika 4 - The Keyagana NT and 25 OT books

Ala kava neʼmoʼa Saiyoni vayaʼaiteʼmo yagaino apatesiya kini vekamo maisiya gemae

¹ Henagaʼamo atupa afinaʼmo Ala kava neʼmo alopa mono noʼamo haneʼniya avemoʼmo anagaʼamo haneʼneno haino kasaeteno muki aveʼamo alino aiyafiʼmo apategaiye. Alopa aniʼmoʼa muki afinaʼmo uno nelamiya kava huʼa muki afinaʼmo asole alu nofi vaya alu nofi vayaʼmo ani mono notegamo uʼa haigae.

² Asole nofi vayaʼmogi eʼa huʼapaeʼmo, Egetao, Ala kava neʼmo aote aveleʼmo uta haigune. Yekopu Gotiʼamo mono noʼafiʼmo uta haisunageno hauʼniya kateʼmo visunafeʼmo alino laya malesigeta kaʼaleʼmo uteta hugune. Keʼaepa gemo Saiyoni aveletiʼmo uneno hugiye. Ala kava neʼmo geʼamo Yulusalemu taonifatiʼmo aino atagu faeno uneno hugiye.

³ Agaemo muki nofi vayaʼmo alino fako huno apateteno afagitega maiʼnaya lokiya nofi vayakoʼmo alino api aino apategaiye. Inagi apakaemo naipeʼapileʼmo neʼamagisagenoʼaeʼmo aiʼyumo neʼaiya aenimo alino hamalege hayoʼapileʼmo neʼamagisagenoʼaeʼmo nofiʼmo nehatagaya haginamo alino hamalege hugiye. Muki nofi vayaʼmogimo magoʼe huʼa kame osuge kame hisaya kavaʼmo magoʼe huʼa aliʼa apaya oʼmalege hugae.

⁴ Osugayaʼmonanafa muki vayaʼmogimo apaote apaote huʼa nofi hoyaʼapifiʼe fiki hoyaʼapifiʼeʼmo alagepa huʼa fai maisageʼa mago vayaʼmogi koli yaʼmo aliʼa oʼapamigae.

⁵ Muki vayaʼmo apaote apaote huʼa gotiʼapimogi apakiʼapilefeʼmo umenitata nehayaʼmonanafa lagaemo Ala kava neʼmo Gotitimo agiʼalefekeʼmo muki afinaʼmo umenitata huge huge huta maigune, huta nehune.

⁶ Ala kava neʼmoʼa hunoʼaeʼmo, Ani afinaʼmo nagaemo alagepa huʼa umenitata nosaya vayanagi hapafaiʼna apataleʼnova vayanagi kana yaʼmo aliʼna apamiʼnova vayanagi huʼna aliʼna anupa huʼna apategauve.

⁷ Nagaemo logufa vayaʼmo apaiyamo hosuʼniya vayaʼmo aliʼna ha maleʼna apategauve. Apaini huʼa neʼapataya vayaʼmo lokiya nofi vayaʼmo magoke gamani vayaʼmo aliʼna ha maleʼna apategauve. Nagaemo ani kava huʼna Ala kava neʼmoʼnamo Saiyoni aveleʼmo maiʼnaya vayaʼaiteʼmo ani afinaʼmo aepa faiʼna yagaiʼna apateme apateme uʼna muki afinaʼaeʼmo yagaiʼna apategauve.

⁸ Yulusalemu taoniyo, huʼna, Kagaemo sipisipi anagakaleʼmo yagaisanafeʼmo Saiyoni aʼmafaʼnemo kokunapiʼmo uno haiʼniya noʼmo yatala nokana huka maige sipisipi anagakamo alagepa huʼa maisaya lokiya nokana huka maige huʼnane. Hogoteka muki vayaʼaiteʼmo yagaika apateʼnana kava huka halate Yulusalemu aʼmafaʼneleʼmo yagaika apategane.

⁹ Yulusalemu taoniyo, huʼna, na kava higekaeʼmo alopa gefatiʼmo keya aeka ge nehane. Kini vekakamo vayakamo folagapiʼmo oʼmaiʼnifiye. Na kava higekaeʼmo kagaemo aʼnemogimo mafaʼnemo aliʼa atesayafeʼmo apakafu nekiya agufa kava huno kagafu nekiye. Kini vekakamo oʼmaiʼnifiye. Aipa agesamo kamiʼniya vekamo ago faliʼnifiye.

¹⁰ Saiyoni aʼmafaʼneyo, huʼna, Aʼnemogi mafaʼne aliʼa apatesayafeʼmo apakafu nekiya kava huno kagafu kino. Kagaemo taonimo atalekuka hiʼyagofa kotegamo maigane. Maiganaʼmofeʼmo aʼnemogimo mafaʼnemo aliʼa atesayafeʼmo nehaya afinaʼmo apakafu kiʼnigeʼa aiʼa afelo falo nehaya kavaʼmo huno kagafu kisigeka mafaʼnemo alika ato. Kame vayatapimogimo eʼa kavaleliʼa Mamiloni taonifiʼmo ugayaʼmonanafa ani taonifatiʼmo Ala kava neʼmoʼa kame vayatapimogi apayapatiʼmo miya faino hatu maeno kategaiye.

¹¹ Hemenimo asole nofi vayaʼmogi lapakaeʼeʼmo kamemo hisayafeʼmo ago aliʼa anupa huʼnae. Apakaemo huʼapaeʼmo, Yulusalemu taonimo alita hosu huta atalegaune. No atufaʼageʼmo hanesigeta ageteta lamogaga aigune, huʼa nehayaʼmonanafa

¹² apakaemo Ala kava neʼmoʼa afiʼniya yaʼmo oʼafige aipa agesamo oʼagege huʼnae. Ala kava neʼmoʼa vayaʼmogimo vitimo aliʼa anupa hu maleʼneʼa haletiʼyaʼamo aeʼa haleteʼa neʼyaʼamo neʼaliya nopiʼmo viti hayagana huno alino anupa huno apategaiye.

¹³ Ala kava neʼmoʼa Yulusalemu vayaʼaifeʼmo ina gemo huno hapa paigiye. Saiyoni a mafaʼneo, huno, he tika uka kaiyaletiʼmo aeka lata paiyo. Nagaemo lapakaemo mago ve pulumakamoʼa aeni lokiyaʼagi aeni aiyagi huno maiʼniya agufa ve pulumakagana huʼna lokiya vaiʼna lapategauvaʼmofeʼmo lapakaemo muki asole nofi vayaʼmo aeta lata paigae. Kame vayatapimogimo muki yaʼmo kamefatiʼmo aliʼnaya yaʼmo lapakaemo alitetapa malesaya yaʼmo namigae. Nagaemo muki ma mopafi vayaʼai Ala kava neʼapimoʼnae.