Maika 1 - The Keyagana NT and 25 OT books

¹ Kini vayaʼmo Yotamuʼmo maitegeno Ehayiʼmo maitegeno Heyekaiyaʼmo maitegeno huʼa magoke magoke huʼa Yuta vayaʼaiteʼmo yagaiʼa apateʼnaya afinaʼmo Ala kava neʼmoʼa mani gemo Maikaʼmo Moleseti taonifi vekaeʼmo Isaleli vayaʼmogi Sameliya alopa taoniʼapifiʼe Yuta vayaʼmogi Yulusalemu alopa taoniʼapifiʼeʼmo afole aisiya kavaʼmo alino aveliʼniye.

Gotiʼa Sameliya taonifi vayaʼe Yulusalemu taonifi vayaʼeʼmo apamagisiyafeʼmo huʼniya gemae

² Maikaʼa ani gemo hapa painoʼaeʼmo, Muki nofi vayaʼmogitapamo mani gemo afiyo. Lapakaemo muki ma mopafi vayaʼmogitapamo Goti geʼamo lapaketafo hutapa afiyo. Ala kava neʼmo Gotiʼa alino fako huno agoti huno lapategaiye. Ala kava neʼmo aote mono noʼafiʼmo maiʼnenoʼaeʼmo hosu kavatapimo ageʼniyanageno agoti huno lapategaiye.

³ Afiyo, huʼna, Ala kava neʼmoʼa koʼamo ataleno eminegaiye. Agaemo emineno muki aveleʼmo umenitata hugiye.

⁴ Umenitata nehisigenoʼaeʼmo avemogimo aiyakafatiʼmo aniʼmo heteno alino lataʼnelino ugiye. Avemogimo anikana huʼa aliʼa hamaleʼnageno lusi kava huno aniʼmo uno lamino muki kagoʼmufiʼmo alino kalokalopatigiye. Ata kaegeno yafaʼmo alino aniʼmo hamaleteno kagoʼmufiʼmo aino apalo tisigeno avefatiʼmo aniʼmo nagu nagu huno uno nelamiya anikana huʼa uʼa lamigae.

⁵ Yekopu nofi vayaʼmogimo Goti geʼamo amagiʼa ataleʼnayaʼmofeʼmo muki ani kavaʼmo afole aigiye. Isaleli nofi vayaʼmogimo hosu kavaʼmo huʼnayaʼmofeʼmo ani kavaʼmo afole aigiye. Yekopu nofi vayaʼmogimo Goti geʼamo amagiʼa ataleʼnaya kavaʼmo aepa vayaʼmo haiya vayane. Sameliya taonifiʼmo maiʼnaya vayane. Yuta nofi vayaʼmogimo aveleʼmo aigofe gotiʼapimogifeʼmo mono nehaya kavaʼmo aepa vayaʼmo haiya vayane. Yulusalemu taonifiʼmo maiʼnaya vayane.

⁶ Ala kava neʼmoʼa hunoʼaeʼmo, Hosu kavaʼmo aepaʼamo maiʼnayaʼmofeʼmo Sameliya vayaʼmogi taoniʼapimo heʼna halagape vaiʼna atalesugeno atupa yaʼmo afole yateʼmo nofi hoyamo aliʼa neʼvaiya koʼmo hanegaiye. Nagaemo muki noʼapimo heʼna halagape vaiʼna atalesugeno yafa kagoʼmufilagamo asagauno aisigeno noʼmo faiʼa ateʼnaya yafaʼageʼmo hanegaiye.

⁷ Kame vayaʼapimogimo eʼa aigofe gotigi apauneʼamo aiʼa atagiteʼa aliʼa yaga auʼa atalegae. Apakaemo Sameliya vayaʼmogimo nagaefeʼmo apakameʼyamo namiteʼa ani aigofe gotigitefeʼmo monoʼmo huʼnaya kavaʼmoʼa a kanomoʼmo anauʼamoʼmo ataleno kumai kavaʼmo nehiya agufa kavaʼmo huʼnae. Apakaemo ani kumai kavaʼmo nehuʼapaeʼmo miyaʼapimo aliʼnaya yaʼmo kame vayaʼapimogi aliʼa atafiʼmo kaegae. Apakaemo ani yaʼmo hosu kumai kavatetiʼmo aliʼnaya yaʼmo kame vayaʼapimogi eʼa aliniʼuʼa aigofe gotiʼapimogitefeʼmo monoʼmo hisayafeʼmo kumai aʼne anagaʼaina apamigae, huno huʼniye.

⁸ Inagi Maikaʼmo hunoʼaeʼmo, Ani kavaʼmo afole aigiyaʼmofeʼmo naipafiʼmo nahau huʼna yulagefaʼmo aiguve. Yulagefaʼmo neʼaiʼnaeʼmo kukena yaʼnimo asagiʼna ataleʼna suʼmo oʼvaiʼna umenitata huguve. Nagaemo afela kalamoʼa age neʼaiya agufa kavaʼmo huʼna naipafiʼmo nage aige kataluʼmefa anagaʼmogimo yulagefa aigekana apakemo neʼaiya agufa kavaʼmo huʼna yulagefa aiguve.

⁹ Na agufa kavaʼmo hinageʼnaeʼmo yulagefaʼmo aiguve. Muki vayaʼmogimo Sameliya vayaʼmo apamagiʼnaya apamuʼmo afaʼa aliʼa hau okiʼnisigeno Yuta vayaʼaitegamo ani agufa hosu kavaʼmo afole aigiye. He, kame vayaʼmogimo eʼa vayaʼnimo maiʼnaya Yulusalemu taonile yafa kegiʼyamo kipateʼmo avaʼyi huʼnae.

Kame vayaʼmo Yulusalemu taonileʼmo ago eʼa hogo huʼnaya gemae

¹⁰ Lapakaemo kame vayatimo Gati taonifiʼmo maiʼnaya vayaʼaifeʼmo kame vayaʼmogi eʼa lahaeʼnaya kavafeʼmo ava gemo huta hapa opaiyo. Lapakaemo afaʼa apateʼnigeʼa aviʼyaʼmo hisaya kavaʼmo oʼapakeyo. Meti Leyafa taonifi vayaʼmogitapae, huʼna, Lapaipamoʼmo alagi kana huʼninagetapa aviʼyaʼmo nehutapaeʼmo mumusopamo alita lapakufaleʼmo faleyo.

¹¹ Sefai taonifi vayaʼmogitapae, huʼna, Lapakaemo alagi lapavagage huʼninagetapa lapagufaʼalagaʼagekeʼmo kame vayatapimogi kotegamo kalavusi vayakana hutapa viyo. Yeyanani taonifi vayaʼmogimo lusi kava huʼa koli huteʼa taonifatiʼmo ataleʼa malagamo eʼa emi oʼmegae. Lapakaemo afisageʼa Meti Iyo taonifi vayaʼmogimo yulagefaʼmo aiʼa aviʼyaʼmo hisagetapa afigayana ani taonifiʼmo uʼa afaʼa fala kiʼa maisaya taonimo ohaneʼniye.

¹² Ala kava neʼmoʼa alopa hanageke yaʼmo alino ateʼnigeno eno Yulusalemu taonimo yafa kegiʼya kipateʼmo afole aiʼniyaʼmofeʼmo Meloti taonifi vayaʼmogimo hapausoli huteʼa vayaʼmogimo eʼa hapa maesayafeʼmo apakava maiʼnae.

¹³ O, Lekisi taonifi vayaʼmogitapae, huʼna, Lapakaemo Isaleli vayaʼmogi hosu kavaʼapimo agetetapaeʼmo akame huʼnayaʼmofeʼmo Yulusalemu taonifi vayaʼmogi hosu kavatapimo ageteʼapaeʼmo aepa faiʼa hosu kavaʼmo huʼnae. Lapakaemo lusi kava huta nagu nagu hutapa lapaune hetapa visayafeʼmo hosi anagaʼaiteʼmo talalamo alita aetapa apateyo.

¹⁴ Yuta vayaʼmogitapae, huʼna, Lapakaemo Moleseti Gati taonifi vayaʼaina fikumo apamigayaʼmonanafa lapa oʼmaeʼa afaʼa lapatalegae. Akasipi taonifi vayaʼmogimo aigofe kavaʼmo huteʼa Isaleli kini vayaʼmo hapa oʼmaegae.

¹⁵ Ala kava neʼmoʼa hunoʼaeʼmo, Malisa taonifi vayaʼmogitapae, huno, Nagaemo lapavaleliʼnuʼna kame vayatapimogi apayapiʼmo apamisugeʼa taonitapimo aligae. Isaleli taonimo ha le konali taonimo eʼa Aʼnalami taonifiʼmo kame vayatapimogi oʼaligae.

¹⁶ Kame vayatapimogi eʼa kamemo lahapaeteʼa lusi kava huno lahapauʼniya mafaʼnetapimo kalavusi huʼa apateteʼa apavaleliʼa ugayaʼmofeʼmo yulagefa aitapaeʼmo muki lapakenopa lapayokaʼmo alita faitapa ataletetapa kagiyaʼe vayaʼmo hamaleyo.