Luti 4 - The Keyagana NT and 25 OT books

Movasiʼa Lutiʼmo aliʼniya gemae

¹ Movasiʼa taonimo yafa lafi kegiʼyaleʼmo aliʼa anupa huʼa neʼmaiya yateʼmo uno itopaleʼmo maiʼniye. Maiʼnigeno mago vekamo Elimeleki nofi vayapati vekaeʼmo Movasiʼa ava gemo huʼniya vekamo eʼnigeno ageteno Movasiʼa keya aeno ge hunoʼaeʼmo, Veʼnimo, huno, Eka manileʼmo itopaleʼmo maiyo, huno ha paiʼnigeno eno itopaleʼmo maiʼniye.

² Movasiʼa naya loleʼa vayatama vayaʼmo taonifiʼmo neʼyagaiya vayatama vayaʼmo apavalelino eʼnigeʼa magokepi itopaleʼmo maiʼnae.

³ Maiʼneʼapaeʼmo Movasiʼa agaiʼa anaga vayapati vekaeʼmo, Neyomiʼa Movapu kotegatiʼmo ataleno eno manileʼmo maiʼniye. Elimelekiʼa ago falitegeno Neyomiʼa Elimeleki mopamo laʼagae anaga vayapati vekamo mopaʼamo maketi hisiyafeʼmo hauʼniyanageʼna mago gemo kaha paigesuve.

⁴ Kagaemo miya faika hatu maeka atesanafeʼmo kahauʼnisiyana mani vayaʼai apaulagaleʼmo miya faiyo. Kagaemo miya faisanafeʼmo hogote vekamo maiʼnanageʼna kagae kakamelegati vekamo nagaemo maiʼnove. Inagi miya faiʼna hatu maeʼna ategauve, huka hisanaʼmoʼmo naha paiyo, huno afi geʼnigeno, miya faiʼna hatu maeʼna ategauve, huno ha paiʼniye.

⁵ Movasiʼa hunoʼaeʼmo, Neyomitetiʼmo mopamo miya faisanaʼmoʼmo Lutiʼmo Movapu kotega kogu a kanoʼeʼmo miya faigane. Faliʼniya vekamo nofi vayaʼamogi mopamo hanesiyafeʼmae, huno ha paiʼnigeno,

⁶ Nagaemo afaʼa miya faiʼna hatu maeʼna oʼategauve. Falitesugeʼapaeʼmo mafaʼne anagaʼnimogi oʼalisayaʼmo kanale osugiye. Oʼnahaiyanagi kagaikageʼmo miya faiyo, huno ha paiʼniye.

⁷ Akeyaʼvilagamo Isaleli vayaʼmogi huʼnaya kavaʼmo haneʼniyana mago yaʼmo miya faiʼa hatu maeʼa ateʼnaya afinaʼmo ani vayaʼmogimo apaiyaletiʼmo suʼapimo asagiʼa neʼapamiya kavaʼmo haneʼniye. Isaleli vayaʼmogimo ani kavaʼmo ago alita kanale huʼnone, huʼa huteʼa nehaya kavaʼmo haneʼniye.

⁸ Ani kavaʼmo haneʼniyaʼmofeʼmo ani vekamoʼa Movasifeʼmo hunoʼaeʼmo, Miya faiyo, huno ha paitenoʼaeʼmo aiyaletiʼmo suʼamo asagino amiʼniye.

⁹ Movasiʼa neʼyagaiya vayatama vayaʼe muki vayaʼefeʼmo hunoʼaeʼmo, Mukiʼamogitapamo ani kavaʼmo ago ageʼnae. Hogoteno Neyomiʼa Elimeleki yatenagi Kiliyoni yatenagi Maloni yatenagi huno muki yaʼapileʼmo yagaiʼniye. Hemenimo nagaemo muki yaʼapimo ago miya fauve.

¹⁰ Ago miya fauvaʼmofeʼmo Lutiʼmo nagae aʼmo maiye. Maloniʼa ani a kanomo Movapu kotega a kanomo aliʼniyatetiʼmo ago ataleno faliʼniya a kanomo nagaemo ago aluve. Aluvaʼmofeʼmo Maloni anaga vayaʼai mopamo hanegaiye. Maloni anaga vayaʼmo faliʼa hano osuʼa maige maige huʼa maigae. Hemenimo lapakaemo mani nehuva kavaʼmo ago ageʼnae, huno hapa paiʼniye.

¹¹ Neʼyagaiya vayatama vayaʼmogiʼeʼmo, He, ago ageʼnone. Ala kava neʼmoʼa ani nokafiʼmo esiya a kanomo alagepa huno yagaino ateʼnisigeno asole mafaʼnemo Yekopu atalaʼmo Lesoʼe Liyaʼeʼmo aliʼana apateʼnaʼa kava huno asole mafaʼne anagaʼmo alino apategaiye. Ala kava neʼmoʼa kaha maenageka Efalata nofi vayapatiʼmo kagemi yakaʼe vekamo maiʼneka ala kagi vekamo maiyo.

¹² Ala kava neʼmoʼa kaha maenageʼa mafaʼne anagakamogimo Pelesi nofi vayapatiʼmo Yutagani Temagani mafaʼne anaga vayakana huʼa maigae, huʼa ha paiʼnae.

¹³ Movasiʼa Lutiʼmo aliʼnigeno Ala kava neʼmoʼa Lutiʼmo alagepa huno ha maeʼnigeno aipaguʼeʼmo maiteno ve mafaʼnemo alino ateʼniye.

¹⁴ Aʼne anagaʼmogimo Neyomifeʼmo huʼapaeʼmo, Lagaemo Ala kava neʼmo alita auleta ategetao. Ala kava neʼmoʼa ve mafaʼnemo kamiʼniyanageno hemenimo miya faino hatu maeno latesiya vekamo maiʼniye. Ani mafaʼnemo ala agi vekamo maino.

¹⁵ Kanofelokamoʼmo kagaefeʼmo hau ayamopafiʼmo hauʼnigeno alagepa huno kaha neʼmaeyaʼmofeʼmo seveniʼa ve mafaʼnemo alika apateʼnanesinana ago aeno apaka seʼniyesine. Agaemo alino ateʼniya ve mafaʼnemoʼa alagepa huno yagaino kategaiye. Anekalomo ago leʼnananageno alagepa huno yagaino kategaiye, huʼa ha paiʼnae.

¹⁶ Inagi Neyomiʼa ani ve mafaʼnemo avaleno anu kiteno yagaino ateʼniye.

¹⁷ Ani kote aʼne anagaʼmogimo agiʼamo Ometiʼae huʼa ateʼnae. Muki vayaʼaifeʼmo huʼapaeʼmo, Neyomiʼa ve mafaʼnemo ago alino ateʼniye, huʼa hapa paiʼnae. Henagaʼamo Ometiʼa Yesimo alino ateʼnigeno Yesiʼa Neviniʼmo alino ateʼniye.

^18-22 Pelesi aginago vayaʼmogi apakiʼapimo haneʼniye. Ani vayaʼai apakiʼapimo Pelesiʼa Hesaloniʼmo alino ateʼnigeno Hesaloniʼa Lamoʼmo alino ateʼnigeno Lamoʼa Aminanapuʼmo alino ateʼnigeno Aminanapuʼa Nesoniʼmo alino ateʼnigeno Nesoniʼa Samoniʼmo alino ateʼnigeno Samoniʼa Movasiʼmo alino ateʼnigeno Movasiʼa Ometiʼmo alino ateʼnigeno Ometiʼa Yesiʼmo alino ateʼnigenoʼaeʼmo Yesiʼa Neviniʼmo alino ateʼniye.