Luti 3 - The Keyagana NT and 25 OT books

Lutiʼa Movasitegamo uʼniya gemae

¹ Neyomiʼa Lutifeʼmo hunoʼaeʼmo, Nanofelo, huno, kagaemo mago vekamoʼmo aliteno alagepa huno yagaino katesigeka kanale huka maisanafeʼmo nahauʼniye.

² Ani vekamo Movasiʼa negafokamoʼmo maiʼniye. Aliʼyaʼamo neʼaliya aʼne anagaʼeʼmo lokaeka aliʼyaʼamo aliʼnana vekamo maiʼniye. Hemeni haniʼilagamo ve anagaʼmogimo mali alagaʼe haletiʼyaʼaʼeʼmo sipetiletiʼmo faiʼa kateʼa kokuʼnapiʼmo yaga yaga hisageno yasimoʼmo haletiʼyaʼamo alino halelino neʼvisigeno alagaʼageʼmo mopafiʼmo asagauno aigiye. Movasiʼa ani aliʼyaʼmo alisayategamo uno maigiye.

³ Uno maiʼnisigekaeʼmo aniʼmo faletaleka alagepa atumo neʼaiya uvelimo faleteka hogote alagepa kukena yakamo vaika aliteka aliʼyaʼmo neʼalisayategamo uka maiyo. Ukaeʼmo aulagaleʼmo uka afole oʼaika maiʼnegenoʼao neʼyaʼe aniʼeʼmo neno hano hino.

⁴ Neno hano hutenoʼaeʼmo uno haino havaegefeʼmo hisigekaeʼmo uno haino havaesiya yaʼamo ageka alagepa hu maleʼneka havaeʼnisigekaeʼmo palaketimo alika asagauliʼneka aiyalegatiʼmo falekuka haika aiya afafaleʼmo havao. Henagaʼamo ina kava huvo, huno kaha paigiye, huno ha paiʼniye.

⁵ Lutiʼa hunoʼaeʼmo, He kanalenageʼna muki naha paina kavaʼmo akame huguve, huno ha paiʼniye.

⁶ Inagi aliʼyaʼmo neʼaliyategamo unoʼaeʼmo muki anofeloʼamoʼmo ha paiʼniya kavaʼmo akame huno huʼniye.

⁷ Movasiʼa neʼyaʼmo nege aniʼmo nege huʼnigenoʼaeʼmo aipamoʼmo kanale huʼnigeno uno mali alagamo maleʼnaya yateʼmo havaeʼniye. Au kaleʼnigenoʼaeʼmo Lutiʼa sako huno uno palaketimo alino asagauliʼneno aiyalegatiʼmo faleno uno haino havaeʼniye.

⁸ Movasiʼa au kaleʼnenoʼaeʼmo haniʼilaga folaguʼmo aino afe leno havaeyategamo a kanomo eno havaeʼnigeno agetenoʼaeʼmo hau aiʼniye.

⁹ Hau aiteno atete hutenoʼaeʼmo ina lagae, huno afi geʼnigenoʼaeʼmo, Ala nene, huno, Nagaemo Lutiʼnageʼmae. Negafoʼnimogamo maiʼnanaʼmofeʼmo kukena yakaletiʼmo alika kofika nato, huno ha paiʼnigeno

¹⁰ Movasiʼa hunoʼaeʼmo, Ala kava neʼmoʼa alino auleno kateʼniye. Hemenimo nehana kavakamoʼmo kanofelokamoʼeʼmo maiʼnekaeʼmo nehana alagepa kavakamo ago aeno aga seʼniye. Asole neya vayaʼmo maiʼneʼa mago neya vayaʼmogi kagemi yaʼapimo hanege mago neya vayaʼmo ohanege huʼniya vayaʼmo maiʼnayanageka mago neya vekaleʼmo maiguve, huka kagesamo oʼafiʼnane.

¹¹ Muki mani kote ve aʼnemogimo kagaemo kageʼnayana kanale a kanomo maiʼnane, huʼa ago kageʼnayaʼmofeʼmo koli osuvo. Naha paiʼnana gemo afiʼnovanageʼna kaha paigesuve.

¹² Negafokamoʼnamo maiʼnovanageʼna miya faiʼna hatu maeʼna katesuva vekamo maiʼnovaʼmonanafa mago hogote vekamo negafokamoʼmo maitegeʼna agae akamelegati vekamo nagaemo maiʼnove.

¹³ Hemenimo manile havaeʼnegeʼnao egamo uʼna aipa agesaeʼmo ge huʼna afi gegauve. Yagaiʼna kategauve, huno hisiyana kanalene. Agaemo hunoʼaeʼmo, yagaiʼna okategauve, huno hisiyana nagaemo afaʼa yagaiʼna kategauve. Gotiʼa maiʼniye, huʼa alagi lama gemo nehaya kava huʼna lama gemo kaha nepauve. Hemenimo halate ago havaeʼnegeno kotino, huno ha paiʼniye.

¹⁴ Lutiʼa halate havaeteno kotino ha oleʼnigenoʼaeʼmo ve aʼnemogimo oʼagesayafeʼmo ago he tino uʼniye. Movasiʼa vayaʼmogimo Lutiʼmo agesayafeʼmo ohauʼniyaʼmofeʼmo hanipiʼmo he tino uʼniye.

¹⁵ Movasiʼa Lutifeʼmo hunoʼaeʼmo, lavolavokamo alika ataleka yakai maleno, huno ha paiʼnigeno Lutiʼa alino ataleno yakai maleʼnigeno laisi kukana yaʼmo alino aeno laku faeno maleteno alino asagauno kofino ateʼniye. Kofino ateʼnigeno kofilino taonifilagamo uno haiʼniye.

¹⁶ Lutiʼa uno haino anofeloʼamotegamo avaʼyi huʼnigenoʼaeʼmo, nanofelo, huno, ago neʼapiye, huno afi geʼnigenoʼaeʼmo Lutiʼa Movasiʼmo muki ha maeʼniya gemo ava ge huno ha paiʼniye.

¹⁷ Ha paiteno magoʼe gemo ha painoʼaeʼmo, Movasiʼa mali alagamo alino namitenoʼaeʼmo, Kanofelokamotegamo kagufaʼagekeʼmo oʼuka neʼyaʼekeʼmo alinika uvo, huno naha paiʼniye, huno ha paiʼnigeno

¹⁸ Neyomiʼa hunoʼaeʼmo, ani kavafeʼmo kahausoli osuka haiya kavaʼmo afole aisifigi aise afinaʼmo afaʼa agava maiyo. Movasiʼa hemenimo afaʼa oʼmaiʼnegaifa ani kavaʼmo alino alagepa huno neʼategaiye, huno ha paiʼniye.