Luti 2 - The Keyagana NT and 25 OT books

Lutiʼa Movasi hoyalegamo uʼniya gemae

¹ Neyomi negafoʼamo agiʼamo Movasiʼae. Ani vekamo ala agi vekamo maiʼneno Neyomi anauʼamoʼmo faliʼniya vekamo Elimeleki nofi vayapati vekamo maiʼniye.

² Lutiʼa Neyomifeʼmo hunoʼaeʼmo, Hoyalegamo uteʼna mali avoyamo hatagauʼa atalesaya mali alagamo alime alime uguve. Mago vekamoʼmo he, kanalene, huno hisigeʼna akame huʼna alime alime visuva kavaʼmo kanalepiye, huno afi geʼnigenoʼaeʼmo Neyomiʼa, he kanalenagi, nanofeloʼnimogamo afaʼa uka ani kavaʼmo huvo, huno ha paiʼniye.

³ Ha paiʼnigeno Lutiʼa hoyalega uteno mali avoyamo hatagauʼa ataleme uʼnaya vayaʼmo apakame huno alime alime uʼniye. Ina la hoyafiʼmo eʼna maiʼnofi huno agesamo oʼafiʼniyana Movasiʼa Elimeleki nofi vayapati vekamo hoyafikeʼmo eno aliʼyaʼmo aliʼniye.

⁴ Aliʼyaʼmo neʼaligenoʼaeʼmo Movasiʼa Metelehamu taonifatiʼmo eno avaʼyi huteno aliʼyaʼamo neʼaliya vayaʼaifeʼmo hunoʼaeʼmo, Ala kava neʼmoʼa lapakaeʼeʼmo magokepi lokaeno maino, huno ke apamamaeʼnigeʼapaeʼmo geʼaleʼmo aeʼa atagaina huʼapaeʼmo, Ala kava neʼmoʼa alino auleno kategaiye, huʼa ha paiʼnae.

⁵ Movasiʼa kava vekaeʼmo hunoʼaeʼmo, Uma venemo a kanomo haiya kotega a kanoe, huno

⁶ afi geʼnigenoʼaeʼmo, Alu kotegatiʼmo Neyomiʼeʼmo lokaeno eʼniya a kanomo Movapu kotega a kanomo maiʼniye.

⁷ Netepiʼmo eno nagaefeʼmo hunoʼaeʼmo, Aliʼyaʼmo neʼaliya vayaʼmo apakame huʼna mali avoyamo alime alime ugesuve, huno ge huno nafi geʼnigeʼnaeʼmo he, huʼna ha paiʼnogeno aliʼyaʼmo alime alime eno hemenitomo uluna nopiʼmo maino falu huʼniye, huno ha paiʼniye.

⁸ Movasiʼa uno Lutifeʼmo hunoʼaeʼmo, Geʼnimo alagepa huka afiyo. Uka alu vayaʼai hoyafatiʼmo mali avoyamo alika anupa osuvo. Mani hoyafikeʼmo aliʼyaʼnimo neʼaliya aʼne anagaʼeʼmo magokepi lokaeka aliʼyaʼmo aliyo.

⁹ Malimo nehatagaya vayaʼmo haiyateʼmo aliʼyaʼmo neʼalifigi apakeka alagepa hu malo. Apaketekaeʼmo aliʼyaʼnimo neʼaliya aʼne anagaʼmo apakame huka magokepi lokaeka aliʼyaʼmo aliyo. Nagae aliʼyaʼmo neʼaliya neya vayaʼaifeʼmo huʼnaeʼmo, Hanageke yaʼmo oʼamiyo, huʼna ago hapa paiʼnove. Anifeʼmo kahausigekaeʼmo uka yafa kepiʼmo he fili eʼa maleʼnaya anitetiʼmo no, huno ha paiʼniye.

¹⁰ Ha paiʼnigeno Lutiʼa ape huno mopafiʼmo aleʼya faino maiʼnenoʼaeʼmo, Nagaemo alu kotega a kanomo maiʼnovaʼmonanafa na kava higekaeʼmo alagepa kaulagamo neʼnagane, huno ha paiʼnigeno

¹¹ Movasiʼa hunoʼaeʼmo, Anaukamoʼmo ago faliʼnigeka kanofelokamofeʼmo alagepa huno kahauʼniya kavafeʼmo kava gemo ago afiʼnove. Afiʼnovana kokamogi itaka afokamogimogi huka ago apataleka oʼapakeʼnana vayaʼeʼmo maiʼnane, huʼa kava gemo huʼnageʼna afiʼnove.

¹² Ala kava neʼmoʼa kaha maeno kamisigeka maiyo. Kagaemo eka Ala kava neʼmo Isaleli vayaʼai Gotiʼapimo hakufiʼmo fala kiʼnananageno alagepa huno yagaino kategaiye, huno ha paiʼniye.

¹³ Ha paiʼnigeno Lutiʼa hunoʼaeʼmo, Nagaemo ina agufa a kanomo maiʼneʼna kagae aliʼyaʼmo noʼaluva a kanomo maiʼnovaʼmonanafa kaipamoʼmo falu huka nateʼnane. Aise gemo nehana geʼmoʼmo alika lokiya vaika neʼnatane, huno ha paiʼniye.

¹⁴ Neʼyaʼmo neʼneʼapaeʼmo Movasiʼa Lutifeʼmo hunoʼaeʼmo, Eka peleti mayamo alika nofi alagafati anipiʼmo aeteka no, huno ha paiʼniye. Lutiʼa aliʼyaʼmo neʼaliya vayaʼeʼmo itopaleʼmo maiʼnagenoʼaeʼmo Movasiʼa mali alagamo ago kae maleʼnaya mali alagamo alino amiʼnigeno neno amu hutegenoʼaeʼmo mago neʼyaʼamo afaʼa haneʼniye.

¹⁵ Magoʼe huno mali avoyamo alino anupa hisiyafeʼmo he tino uʼnigenoʼaeʼmo Movasiʼa aliʼyaʼamo neʼaliya vayaʼaifeʼmo, Mali hayamo neʼmalaya yateʼmo mago ataleʼnisaya mali avoyamo afaʼa aligiyanagi ge ohaiyo.

¹⁶ Mali hayafatiʼmo mago alita halauta maleʼnisageno alisigetapaeʼmo ge ohaiyo, huno hapa paiʼniye.

¹⁷ Ani ge huʼnigenoʼaeʼmo Lutiʼa mali avoyamo alino anupa hume hume neʼvigenoʼaeʼmo yegemo uno lamino faleʼniye. Kayotetiʼmo amagiʼnigeno mali alagaʼageʼmo mopafiʼmo asagauno aiʼnigeno kupiʼmo ku aiʼnigeno laisi kukana huno lusi kava huno kana huʼniye.

¹⁸ Taonifilagamo alininuno anofeloʼamoʼmo ave litenoʼaeʼmo Movasiʼa amiʼnigeno neno amu huteno aliʼniya neʼyaʼeʼmo anofeloʼamoʼmo amiʼniye.

¹⁹ Neyomiʼa Lutifeʼmo hunoʼaeʼmo, Hemenimo mali avoyamo haiyatetiʼmo aliʼnane. Ina la hoyafiʼmo aliʼyaʼmo aliʼnane. Ala kava neʼmoʼa kaha maeʼniya vekamo alino auleno ateno, huno ha paiʼnigeno, Mago vekamo agiʼamo Movasi hoyafiʼmo aliʼyaʼmo aliʼnove,

²⁰ Huno ha paiʼnigeno Neyomiʼa hunoʼaeʼmo, Ala kava neʼmoʼa alino auleno ateno. Ala kava neʼmoʼa faliʼnaya vayaʼaitegaʼe afaʼa neʼmaiya vayaʼaitegaʼeʼmo ani kavaʼmo huguve, huno hapa paiʼniya kavaʼmo age okaniʼnigeno nehiye. Ani vekamo negafotiʼamoʼmogeno laʼaha maesiya vekamo maiʼniye, huno ha paiʼniye.

²¹ Huno ha paiʼnigeno Lutiʼa Movapu kotega a kanomoʼmo hunoʼaeʼmo, Movasiʼa alagepa huno naha maeno naha painoʼaeʼmo, Aliʼyaʼnimo neʼaliya aʼne anagaʼeʼmo lokaeka mali avoyamo aliyo. Alime alime neʼugeʼapao ani aliʼyaʼmo aliʼa hano hiyo, huno naha paiʼniye, huno ha paiʼniye.

²² Neyomiʼa Lutifeʼmo hunoʼaeʼmo, He, Nanofelo, huno, Alu vekamo hoyalegamo visanaʼmoʼmo mago vayaʼmo kagaetegamo egae. Movasi hoyalega uka aʼne anagaʼeʼmo magokepi lokaeka aliʼyaʼmo alisanaʼmoʼmo alagepa huka maigane, huno ha paiʼniye.

²³ Inagi Lutiʼa apakaeʼeʼmo aliʼyaʼmo alime alime neʼvigeʼapaeʼmo mali avoyamo hatagauʼa hano huge viti avoyamo hatagauʼa hano huge huʼnae. Lutiʼa aliʼyaʼmo neʼalinoʼaeʼmo anofeloʼamoʼeʼmo lokaeno maiʼniye.