Luti 1 - The Keyagana NT and 25 OT books

Elimelekiʼe afamo anaga aʼeʼmo Movapu kotegamo hageʼa uʼa maiʼnaya gemae

¹ Akeyaʼvilagamo agoti gemo neʼafiya vayaʼmogimo Isaleli vayaʼaiteʼmo yagaiʼa apateʼnae. Ani afinaʼmo lusi kava huʼa neʼyafeʼmo kafu huʼnaya afinaʼmo afole aiʼnigeno mago vekamo Metelehamu taonimo hanetegeno Yuta kotegamo maiʼniya vekamo ataleno aʼaʼe mafaʼneʼalaʼeʼmo apavaleteno hageʼa uʼa Movapu kotegamo maiʼnae.

² Ani vekamo agiʼamo Elimelekiʼae, aʼamo agiʼamo Neyomiʼae, mafaʼneʼalaʼmogani anakiʼanimo Maloniʼe Kiliyoniʼene. Ani afamo anagaʼmo Efalata nofi afamo anagane.

³ Apakaemo Movapu kotegamo uʼa maiʼneʼapaeʼmo Elimelekiʼa ago falitegeʼapaeʼmo Neyomiʼa agaiʼageʼmo mafaʼneʼalaʼeʼmo magokepi lokaeʼa maiʼnae.

⁴ Lole mafaʼnelaʼmoganimo Movapu kote atalaʼmo aliteʼanaeʼmo maiʼnaʼae. Ani atalaʼani anakiʼanimo Opaʼe Lutiʼene. Naya loleʼa agufa kafugamo maiteʼapaeʼmo

⁵ Maloniʼe Kiliyoniʼeʼmo ago faliʼnaʼae. Falitaʼagenoʼaeʼmo Neyomiʼa anauʼamoʼmogi mafaʼneʼalanagi huʼa ago falitagenoʼaeʼmo agaiʼageʼmo maiʼniye.

Neyomiʼa Lutiʼmo avalelino uno Metelehamu taonifiʼmo maiʼniya gemae

⁶ Neyomiʼa Movapu kotega maiʼnenoʼaeʼmo afiʼniyana Gotiʼa vayaʼamo alagepa huno hapa maeʼnigeno neʼyaʼmo alagepa huno afole aiʼniye, huʼa huʼnaya gemo afiʼniye. Agaeʼe anofeloʼalaʼmoganiʼeʼmo visayafeʼmo alo huʼnae.

⁷ Yuta kotega ugefeʼmo kateʼmo magokepi lokaeʼa neʼuʼapaeʼmo

⁸ Neyomiʼa anakaefeʼmo hunoʼaeʼmo, Kotanilegamo aitana atagi netanutana itatanimoganiʼeʼmo maiʼao. Alagepa kavaʼmo hutana yagaitana natetetana faliʼnaʼa anautanilaʼmoganiʼeʼmo alagepa hutana yagaitana anateʼnaʼae. Ani kava huno Gotiʼa alagepa kavaʼmo huno yagaino lanatenagetana maiʼao.

⁹ Ala kava neʼmoʼa alagepa huno lahana maenagetana utana alu vekalateʼmo maitetana alagepa hutana maiʼao, huno hana paiteno hanaeno neʼnigeʼanaeʼmo lusi kava huʼana aviʼyaʼmo huʼnaʼae.

¹⁰ Huteʼanaeʼmo, haʼao, Kagaeʼekeʼmo lokaeta vayakalegamo ugune, huʼana

¹¹ ha paiʼnaʼagenoʼaeʼmo, Nanofeloʼnilaʼmoganitanae, huno, afaʼa atagi netana viʼao. Na kava higetanaeʼmo nagaeʼeʼmo magokepi lokaeta ugune, hutana nehaʼae. Magoʼe huʼna halate ve mafaʼnelaʼmo aliʼna anatesugetana ani vekalateʼmo maigaʼafiye.

¹² Haʼao, Ago anekalomo leʼnovanageʼna veleʼmo afaʼa oʼmaiguvanagi ataletana aitana atagi netana kotanilegamo viʼao. Hemeni haniʼilagamo veleʼmo maiteʼna ve mafaʼnelaʼmo aliʼna anatesugeʼana

¹³ kosisaʼafeʼmo anakava maisaʼafeʼmo nehaʼafiye. Anakava oʼmaitana utana alu vekalateʼmo maigaʼae. Haʼao, kanale osugiye. Ala kava neʼmoʼa nagaetegamo hosu kavaʼmo huʼnigeʼnaeʼmo nahau huʼna nelanatove, huno hana paiʼniye.

¹⁴ Ani gemo huʼnigeʼana afiteʼanaeʼmo magoʼe huʼana aviʼyaʼmo huʼnaʼae. Opaʼa anofeloʼamoʼmo haeno neteno ataleno uʼniyaʼmonanafa Lutiʼa ataleno oʼuʼniye.

¹⁵ Neyomiʼa Lutifeʼmo hunoʼaeʼmo, Kaganakamoʼmo ago kataleno nofi vayaʼalegaʼe gotiʼamotegaʼeʼmo uʼniye. Agaeʼeʼmo kotanilegamo viʼao, huno ha paiʼnigeno

¹⁶ Lutiʼa hunoʼaeʼmo, nagaefeʼmo, Nataleka uvo, huka osuvo. Nagaeʼeʼmo magokepiʼmo lokaeka oʼugane, huka huteka huka natafauka oʼnato. Haiya kotegamo visapi nagaeʼeʼmo afaʼageʼmo uguʼae. Haiya kotega uka maisapi nagaeʼeʼmo utaʼageʼmo maiguʼae. Vayakamo vayaʼnigeʼmo maigae. Gotikamoʼmo Gotiʼnimokeʼmo maigiye.

¹⁷ Haiya kotega uka maiʼneka falisapi nagaeʼeʼmo ani kotegamo uʼna maiʼneʼna falisugeʼa kiʼa nategae. Falisuʼa kavaʼmokeʼmo laʼagaemo alino fako huno laʼategaiye. Alagi lama gemo nehuve. Ani kavaʼmo osisuvaʼmoʼmo Gotiʼa lusi kava huno hanageke yaʼmo namigiye, huno huteno agoʼyamo ataleʼniye.

¹⁸ Lutiʼa lusi lokiya gemo huno, uguʼae, huno ha paiʼnigenoʼaeʼmo Neyomiʼa ge osuʼniye.

¹⁹ Anakaemo uʼana Metelehamu taonifiʼmo avaʼyi huʼnaʼageʼapaeʼmo muki ani taonifi aʼne anagaʼmogimo ageteʼapaeʼmo, Ani a kanomo Neyomiʼa neʼefi, huʼa huteʼa hapau aiʼnae.

²⁰ Neyomiʼa hunoʼaeʼmo, Nagaefeʼmo Neyomiyo, hutapa nagi oʼaeyo. Ala kava neʼmoʼa nagaetegamo hosu kavaʼmo huʼniyaʼmofeʼmo Malaʼae, hutapa nagi aeyo, huno hapa paiʼniye. (Neyomiʼae agimo aepaʼamo amogaga neʼaiya ane. Malaʼae agimo aepaʼamo hosu aipamo nekaliya ane.)

²¹ Neyomiʼa hunoʼaeʼmo, Mani kotetiʼmo ataleʼna uʼnova afinaʼmo anauʼnimoʼe mafaʼneʼnilaʼeʼmo magokepi lokaeta uʼnone. Muki yaʼnimo aliniʼna uʼnovaʼmonanafa Ala kava neʼmoʼa navalelino eʼnigeʼna nagufaʼageʼmo neʼove. Ala kava neʼmoʼa lusi kava huno hanageke yaʼmo namiʼniyaʼmofeʼmo Neyomiʼa amogaga neʼaiya a kanoe hutapa nagi oʼaeyo, huno hapa paiʼniye.

²² Ani kava huʼana Neyomiʼe anofeloʼamoʼmo Movapu kotega a kanomo Lutiʼeʼmo Movapu kotegatiʼmo eʼana mali neʼyaʼmo laisigana yaʼmo ago leʼnigeʼa nehatagaya afinaʼmo Metelehamu taonifiʼmo eʼana avaʼyi huʼnaʼae.