Luki 8 - The Keyagana NT and 25 OT books

Yesuʼeʼmo mago aʼne anagaʼmo lokaeʼa uʼnaya gemae

¹ Aise afinaʼmo utegeno Yesuʼa muki aise taonifiʼe alopa taonifiʼeʼmo alagepa faigoko gemo Gotiʼa yagaino neʼapateya kavafeʼmo ava gemo aeno hakalo huno hapa paimale hapa paimale hulino uneno huʼniye. Agaeʼeʼmo tuolofuʼa vayaʼmo geʼamo neʼafiya vayaʼe

² mago aʼne anagaʼeʼmo lokaeʼa uʼeʼa huʼnae. Yesuʼa hogoteno hosu apaune vayaʼmo ani aʼne anagaʼmogi apaipafatiʼmo alino hapa faino apatalege kaita hapauʼniya aʼne anagaʼmo alino hapageno apatege huʼniya aʼne anagaʼeʼmo lokaeʼa uʼnae. Ani aʼne anagapatiʼmo Maliyaʼa Maganala kotega aʼmo aipafatiʼmo seveniʼa hosu apaune vayaʼmo alino hapa faino apataleʼniya aʼmo maige

³ Yovana anauʼamo agiʼamo Suyaʼa Heloti noʼafi yateʼmo neʼyagaiya vekamo aʼmo maige Susanaʼe magoʼe huʼa asole aʼne anagaʼmogiʼeʼmo moniʼe neʼyaʼeʼmo ha maeʼa amimale amimale huʼa uʼeʼa huʼnae.

Avina yafeʼmo huʼniya gemae

⁴ Muki asole vayaʼmo taoniʼapifati taoniʼapifatiʼmo ete ete huʼa aliʼa anupa huʼa maiʼnagenoʼaeʼmo Yesuʼa aeno kalafefa gemo huno hapa painoʼaeʼmo,

⁵ mago vekamoʼmo avina yaʼmo hakalesiyafeʼmo uʼniye. Neʼunoʼaeʼmo yaga auno ataleme ataleme uʼnigenoʼaeʼmo mago avina yaʼmo kateʼmo asagauno aiʼnigeʼapaeʼmo vayaʼmo uʼeʼa huʼapaeʼmo aeʼa latapaiʼnageno nama anagaʼmogimo eʼa neʼnae.

⁶ Mago avina yaʼmo yafa agotofuleʼmo asagauno aiteno hageʼniyana aniʼmo ohaneʼniyaʼmofeʼmo hagegenoʼaeʼmo malage huno ago falu teʼniye.

⁷ Mago avina yaʼmo aufe nofiʼmo haneʼniya mopafiʼmo asagauno aiteno hageʼniyaʼmonanafa aufe nofiʼmoʼa ago kino ati kaeʼniye.

⁸ Mago avina yaʼmo alagepa mopafiʼmo asagauno aiteno hageno haitenoʼaeʼmo vani hataletiʼa alagamo aeʼniye. Gemo neʼafisaya lapakesamo haneʼnisiyana mani gemo alagepa huta afiyo, huno hapa paiʼniye.

Yesuʼa aeno kalafefa gemo huʼniya gemo aepaʼamo hapa paiʼniya gemae

⁹ Geʼamo neʼafiya vayaʼmogi agaefeʼmo huʼapaeʼmo, ani aeka kalafefa gemo huʼnana gemo aepaʼamo na agufa gemo huʼnane, huʼa ge huʼa afi geʼnageno

¹⁰ Yesuʼa hunoʼaeʼmo, lapakaemo Gotiʼa yagaino neʼapateya kavaʼmo alino fala ki maleʼneno ago alino afole aino ateʼniya geeʼmo aeʼna kalafefa gemo huʼnova gemo aepaʼamo lapakaemo afaʼa afigayaʼmonanafa mago vayaʼmogimo alagi oʼafigae. Apakaemo agegayaʼmonanafa ageʼa aeto osuge afigayaʼmonanafa afiʼa aeto osuge hisayafeʼmo ani aeʼna kalafefa gemo huʼna hapa nepauve.

¹¹ Aeʼna kalafefa gemo nehuva gemo aepaʼamo haneʼniyana avina yakana huno Goti geʼamo haneʼniye.

¹² Mago avina yaʼmo kateʼmo asagauno aiʼniya avina yakana huʼa vayaʼmogi Goti geʼamo afitagenoʼaeʼmo Sataniʼmo eno ani gemo apaipafatiʼmo alinino neʼviye. Sataniʼa hunoʼaeʼmo, fiku yanageʼa geʼaeʼmo apakesamo afiʼa fatago hisageno Gotiʼa apakufamo alino katino apategaiye, huno agesamo neʼafiye.

¹³ Mago avina yaʼmo yafa agotofuleʼmo asagauno aiʼniya avina yakana huʼa mago vayaʼmogi Goti geʼamo afiteʼapaeʼmo apamogaga neʼaiye. Hafuʼyamo mopafi oʼaeʼniya agufa kavaʼmo huʼa yoka apakesamo afiʼa fatago huʼnagenoʼaeʼmo apamalageka nehiya afinaʼmo ataleʼa ago asagauʼa neʼaiye.

¹⁴ Mago avina yaʼmo aufe nofiʼmo haneʼniya mopafiʼmo asagauno aiʼniya avina yakana huʼa mago vayaʼmogi Goti geʼamo afiteʼapaeʼmo atale uʼa ma mopafi kavafeʼmo hapausoli huge monieʼmo apakesa alaʼamo afige ma mopafi kavafeʼmo apamogaga aige huʼa maime maime neʼvagenoʼaeʼmo ani kavaʼmoʼa aeno apati kaeʼnigeno alagaʼamo neʼaeyana afu nole.

¹⁵ Mago avina yaʼmo alagepa mopafiʼmo asagauno aiʼniya avina yakana huʼa mago vayaʼmogi Goti geʼamo afiteʼapaeʼmo aliʼa lama ge apaipamo kanale apaipafiʼmo maleteʼapaeʼmo alagepa kateʼmo uge uge huʼa maiʼneʼapaeʼmo alagepa alagamo neʼae.

Lamu kanifeʼmo huʼniya gemae

¹⁶ Vayaʼmogi lamufiʼmo kani aeʼa kaeteʼapaeʼmo aiʼa ati kaeteʼa hipakapiʼmo noʼmalafa nopiʼmo eʼa hai eʼa maisaya vayaʼmogi alagepa huʼa ageʼa ha leʼa maisayafeʼmo anaga hiʼyalamuteʼmo neʼmalae.

¹⁷ Muki yaʼamo fala kiʼniya yaʼmo alino afole aino ategaiye. Muki kavaʼmo huʼa aeʼa ati nekaya kavaʼmo afole yategamo afole aigiye.

¹⁸ Aliʼnisaya vayaʼmo magoʼe huno apamigiyaʼmonanafa oʼaliʼnisaya vayaʼmogimo aliʼnone, huʼa apakesamo neʼafisaya vayaʼmogi yaʼmo hapa faleno aligiye. Aligiyaʼmofeʼmo ehetapiye, huʼna Goti geʼamo neʼafitapaeʼmo, haiya agufa kava huʼna neʼafufi, hutapa alagepa huta lapakesamo afiyo.

Yesutegamo itaʼamoʼe aganaʼamogiʼeʼmo eʼnaya gemae

¹⁹ Yesutegamo itaʼamoʼe aganaʼamogiʼeʼmo eʼnayana asole vayaʼmo maiʼa kili paeʼnayaʼmofeʼmo oʼageʼnae.

²⁰ Mago vekamoʼmo hunoʼaeʼmo, itakamoʼe kaganakamogiʼeʼmo kagesayafeʼmo eʼa kumatega maiʼnae, huno ha paiʼnigeno,

²¹ geʼnimo afiteʼa akame nehaya vayaʼmo itaʼnimogi maige naganaʼnimogi maige huʼnae, huno hapa paiʼniye.

Yesuʼa yasieʼmo alagi alika hano huvo, huno huʼniya gemae

²² Mago afinaʼmo Yesuʼe geʼamo neʼafiya vayaʼeʼmo sipifiʼmo uʼa haiʼa maiʼneʼapaeʼmo, ani kotuʼmo mugagayaga faligamo lakaeta ugune, huno hapa paiʼnigeʼapaeʼmo ani kotu agiʼnaletiʼmo ataleʼa uʼnae.

²³ Neʼuʼapaeʼmo Yesuʼa au kaleno maiʼniye. Ani kotuteʼmo lusi kava huno yasimo aliʼnigeno aniʼmo aino holakau holakau huno sipifiʼmo haino havaiteme havaiteme uʼnigeʼapaeʼmo aeʼa lapanesayafeʼmo huʼnae.

²⁴ Uʼa aupatiʼmo hau neteʼapaeʼmo, Ala kava nene, Ala kava nene, huʼa, aeta lapanegefeʼmo hune, huʼa ha paiʼnageno aupatiʼmo he tino aniʼmo lusi kava huno aino holakau holakau huʼniya aniʼe yasiʼefeʼmo hunoʼaeʼmo, afaʼa hano hiʼao, huno hana paiʼnigeʼana geʼamo afiteʼana hano huʼnaʼae.

²⁵ Yesuʼa hunoʼaeʼmo, lapakesamo afita fatago huʼnaya kavatapimo haiyaʼaleʼmo haneʼniye, huno ge huno apafi geʼnigeʼapaeʼmo koli huteʼa apakaiʼapimo huʼapaeʼmo, yasimoʼe aniʼmoʼeʼmo geʼamo afiʼnaʼagi mani vekamo na agufa vekamo maiʼnenoʼaeʼmo nehiye, huʼa huteʼa hapau aiʼnae.

Yesuʼa negi nagi nehiya vekamo aipafatiʼmo hosu apaune vayaʼmo alino hapafaino apataleʼniya gemae

²⁶ Lakaeʼa uʼa Gelasini kotegamo avaʼyi huʼnae. Ani koʼmo ani haigifiʼmo haneʼnigeno Galeliya koʼmo mugagayaga faliga haneʼniye.

²⁷ Yesuʼa sipifatiʼmo uno lamino ani agiʼnaleʼmo aiyamo neʼaegenoʼaeʼmo mago vekamo anileʼmo hogoteno haneʼniya taonifiʼmo maiʼniya vekamo aipafiʼmo hosu apaune vayaʼmo maiʼnaya vekamo neʼegeʼana fotu huʼnaʼae. Agaemo kukena yaʼmo vaino oʼalige nopiʼmo ohavaege huteno kanolufiʼmo yafakapikeʼmo maiʼniye.

²⁸ Agaemo Yesuʼa agetenoʼaeʼmo, ai, aeteno Yesu aiyafiʼmo eno agoʼya faiʼneno alopa gefatiʼmo ge hunoʼaeʼmo, Yesuo, huno, Hogote Anaga vekamo mafaʼneʼamogae, huno, nagaetegamo na agufa kavaʼmo huka natesanafeʼmo neʼane. Nagafu kisiya agufa kavaʼmo nagaetegamo osisanafeʼmo kahao ke nehove, huno ha paiʼniye.

²⁹ Yesuʼa hogoteno hosu aune vekaeʼmo hunoʼaeʼmo, emikeka ataleka uvo, huno ha paiʼniyaʼmofeʼmo hosu aune vekamoʼmo ani gemo ha paiʼniye. Muki afinaʼmo hosu aune vekamoʼmo atafauno maiʼnigeno seli nofitetiʼmo ayatalate kite aiyalate kite hu maleʼnaya seli nofiʼmo ago alino kapalu aeʼnigeno hosu aune vekamoʼmo alino hafaitalegeno kaʼme kotega ute ute huno maiʼniye.

³⁰ Yesuʼa hunoʼaeʼmo, kagikamo ina lagae, huno ge huno afi geʼnigenoʼaeʼmo, Nagiʼnimo Asole vayaʼnae, huno ha paiʼniye. Asole hosu apaune vayaʼmo aipafiʼmo maiʼnayaʼmofeʼmo agiʼamo Asole vayaʼae.

³¹ Hosu apaune vayaʼmogi huʼapaeʼmo, kahao ke honanagi ive kelifiʼmo alika lahafaika olato, huʼa ha paiʼnae.

³² Asole afu anagaʼmo mago aise avemo haopaleʼmo kahaumo neʼa maiʼnae. Apakaemo Yesufeʼmo huʼapaeʼmo, kahao ke honanagi alika lahafaitalegeta uta afu anagaʼmogi apaipafiʼmo faleta haita maino, huʼa ha paiʼnagenoʼaeʼmo, he, afaʼa viyo, huno hapa paiʼniye.

³³ Hosu apaune vayaʼmo ani vekamo aipafatiʼmo atale uʼa lamiʼa afu anagaʼmogi apaipafiʼmo faleʼa uʼa haiʼnageʼapaeʼmo afu anagaʼmo mulifatiʼmo nagu nagu huʼa uʼa lamiʼa anipiʼmo asagauʼa aiteʼa aniʼmo neteʼa faliʼnae.

³⁴ Ani afu anagateʼmo neʼyagaiya vayaʼmogi ani kavaʼmo ageteʼapaeʼmo apaune hetaleʼa uʼa taonifiʼe muki haopalegaʼeʼmo ani kavafeʼmo ava gemo huʼa hapa paiʼnageno aino atagu faeno uneno huʼniye.

³⁵ Muki vayaʼmogi ani kavafeʼmo ava gemo afiteʼapaeʼmo agesayafeʼmo Yesutegamo uʼa agayana hosu apaune vayaʼmo ago ataleʼa uʼnaya vekamo agesamo aino halo aiʼnigeno kukena yaʼmo vaiteno Yesu aiyafiʼmo maiʼnigeʼa ageteʼapaeʼmo apamoʼya aiʼniye.

³⁶ Ageʼnageno Yesuʼa hosu apaune vayaʼmo aipafatiʼmo alino hapa faino apataleteno alino alagepa huno ateʼniya kavafeʼmo ava gemo huʼa hapa paiʼnae.

³⁷ Ani koʼmo agiʼamo Gelasini koʼmo haopaleʼmo maiʼnaya vayaʼmogimo ani kavafeʼmo lusi kava huʼa koli huteʼapaeʼmo, mani kotetiʼmo ataleka uvo, huʼa ha paiʼnageno sipifiʼmo uno haino maitegeʼapaeʼmo geʼamo neʼafiya vayaʼeʼmo halate aiʼa atagi neʼa uʼnae.

³⁸ Ugefeʼmo nehagenoʼaeʼmo hosu apaune vayaʼmo aipafatiʼmo alino hapa faino apataleʼniya vekamoʼmo Yesufeʼmo hunoʼaeʼmo, kahao ke hovanagetaʼa uguʼae, huno ha paiʼniyana

³⁹ halate nokalega aika atagi neka uka Gotiʼa lusi kava huno kaha maeʼniya kavafeʼmo ava gemo huka hapa paiyo, huno ha paiʼnigeno uno muki taonifi maiʼnaya vayaʼaifeʼmo Yesuʼa lusi kava huno ha maeʼniya kavafeʼmo ava gemo huno hapa paiʼniye.

Yesuʼa mago a kanomo alino alagepa huno ateteno Yailasi aʼmafaʼnemo alino he tino ateʼniya gemae

⁴⁰ Yesuʼa aino atagi neno eʼnigeʼapaeʼmo agava maiʼneʼa aliʼa falu fala huʼa ateʼnae.

⁴¹ Mago vekamo Yu monoteʼmo yagaiʼniya vekamo agiʼamo Yailasiʼa Yesutegamo eno aiyafiʼmo agoʼya faiʼneno, kahao ke hovanagi aʼmafaʼneʼnimo faligefeʼmo nehigi nagae notega ugetaʼao, huno ha paiʼniye.

⁴² Magokeʼatomo alino ateʼniya aʼmafaʼnemo tuolofuʼa kafugamo maiʼniya aʼmafaʼnemo kaita hauʼnigeno faligefeʼmo huʼniye. Inagi Yesuʼa neʼvigeʼapaeʼmo asole vayaʼmogi maleʼa apalime apalime uʼnae.

⁴³ Mago a kanomo tuolofuʼa kafugamo aiguʼyaʼmo hauge hauge huno maiʼniye. Agaemo muki lota vayaʼaitegamo uno moniʼamo apamino hano huʼniyana ha oʼmaeʼnae.

⁴⁴ Ani a kanomoʼmo Yesu akamelegamo neʼenoʼaeʼmo kukenaʼamo atupaleʼmo ame aliʼnigenoʼaeʼmo malage huno aiguʼyaʼamo hageʼniye.

⁴⁵ Yesuʼa hunoʼaeʼmo, ina laʼmo eno name aliʼniye, huno ge huno apafi geʼnigeʼapaeʼmo muki vayaʼmogimo huʼapaeʼmo, lagaemo kame oʼaliʼnone, huʼa ha paiʼnae. Pitaʼeʼmo magokepi maiʼnaya vayaʼmogimo huʼapaeʼmo, Tisao, huʼa, muki vayaʼmogimo maleʼa kapaligekaeʼmo ina laʼmo name aliʼniye, huka nehane, huʼa ha paiʼnagenoʼaeʼmo

⁴⁶ Yesuʼa hunoʼaeʼmo, himamuʼnimo ago uʼniyaʼmofeʼmo ageʼnovana mago vekamoʼmo name aliʼniye, huno hapa paiʼnigeno

⁴⁷ ani a kanomoʼa ageʼniyana ago nageʼniye, huno agesamo afiteno atete haume haume eno Yesu haopaleʼmo agoʼya faiʼneno muki vayaʼai apaulagaleʼmo hunoʼaeʼmo, alika nahageka natesanafeʼmo ame aliʼnogeno aiguʼyaʼnimo malage huno nahageʼniye, huno ha paiʼnigenoʼaeʼmo,

⁴⁸ aʼmafaʼneʼnimogae, huno, kamogaga aiyo. Nagaefeʼmo kagesamo afika fatago nehana kavakamoʼmo alino kahageno kateʼniyanagi kaipamoʼmo falu huʼninageka afaʼa uvo, huno ha paiʼniye.

⁴⁹ Ha nepaigenoʼaeʼmo mago yagaino neʼapateya vekamo notegatiʼmo mago vekamo eno avaʼyi hutenoʼaeʼmo, aʼmafaʼnekamo ago faliʼnigi tisa vekamo mago aliʼyaʼmo oʼamiyo, huno ha paiʼnigeno

⁵⁰ Yesuʼa afitenoʼaeʼmo, koli osuka nagaefekeʼmo kagesamo afika fatago hugenoʼao aʼmafaʼnekamo afaʼa alagepa huno maino, huno ha paiʼniye.

⁵¹ Yesuʼa uno ani vekamo noʼaleʼmo avaʼyi huteno muki vayaʼaifeʼmo hunoʼaeʼmo, kumatega maiyo, huno hapa paiteno Pitaʼagi Yoniʼagi Yemisiʼagi itaʼafoʼalaʼmoganimogi huno nopiʼmo apavalelino uno haiʼniye.

⁵² Muki vayaʼmogi faiyosago faiʼa aviʼyaʼmo huge huge huʼa maiʼnagenoʼaeʼmo Yesuʼa hunoʼaeʼmo, aviʼyaʼmo osiyo. Ani aʼmafaʼnemo alagi ofaliʼnifa afaʼa au kaleno maiʼniye, huno hapa paiʼnigeʼapaeʼmo,

⁵³ ago faliʼniye, huʼa ageʼnayaʼmofeʼmo kigi huʼa ateʼnae.

⁵⁴ Agaemo kumatega maiʼniyo, huno hapa paiteno uno haino ayateʼmo atafauʼneno, aʼmafaʼneyo, huno, he tiyo, huno ha paiʼnigeno

⁵⁵ aunemeʼamo halate aino atagi neno eno agufafiʼmo faleʼnigeno malage huno he tiʼniye. Yesuʼa hunoʼaeʼmo, neʼyaʼmo alita amiyo, huno hapa paiʼniye.

⁵⁶ Itaʼafoʼalaʼmoganimo hanau aiʼnaʼagenoʼaeʼmo, mago vekaeʼmo utana ha opaiʼao, huno hana paiʼniye.