Luki 6 - The Keyagana NT and 25 OT books

Sapati afinaʼmo nehaya kavafeʼmo huʼniya gemae

¹ Mago Sapati afinaʼmo Yesuʼe geʼamo neʼafiya vayaʼeʼmo viti hoya folagapiʼmo neʼuʼapaeʼmo geʼamo neʼafiya vayaʼmogi viti alagamo lagiʼa haletiʼyaʼamo apaya heʼa haleʼa ataleteʼa neme neme uʼnae.

² Neʼvageʼapaeʼmo mago Falasi vayaʼmogi apaketeʼapaeʼmo, na kava higetapa Sapati afinafeʼmo keʼaepa gemoʼmo hunoʼaeʼmo, ani agufa kavaʼmo osiyo, huno huʼniya kavaʼmo nehae, huʼa ge huʼa apafigeʼnageno

³ Yesuʼa hunoʼaeʼmo, laginago vekamo Neviniʼa huʼniya kavafeʼmo ava gemo lekana paita oʼafiʼnafiye.

⁴ Neviniʼe magokepi lokaeʼa maiʼnaya vayaʼeʼmo apaka teʼnigenoʼaeʼmo Goti mono nopiʼmo uno haino afa vayaʼmogi noʼnafa mono huʼa neʼapataya vayaʼamogigeʼmo neʼnaya peleti mayamo Goti aulagaleʼmo maleʼnaya peleti mayamo alino neteno agaeʼeʼmo lokaeʼa maiʼnaya vayaʼaina apamiʼniye.

⁵ Vemo Mafaʼnemoʼmo Sapati afinateʼeʼmo neʼyagaiya vekamo maiʼniye, huno hapa paiʼniye.

Sapati afinaʼmo Yesuʼa ayaʼmo kalage kiʼniya vekamo alino api aino ateʼniya gemae

⁶ Mago Sapati afinaʼmo mago vekamo ayaʼmo kalage kiʼniya vekamo mono nopiʼmo maiʼnigeno Yesuʼa uno haino alino apaya maleʼniye.

⁷ Keʼaepa gemo avoʼmo kaeʼa aliʼa apaya neʼmalaya vayaʼe Falasi vayaʼmogiʼeʼmo hosu kavaʼmo nehiye, huʼa hisaya kafeʼmo kahauya huʼa agesayafeʼmo yagaiʼa maiʼnae. Ageteʼapaeʼmo, Sapati afinaʼmo ayaʼmo alino api aino atesifigetae, huʼa huteʼa agava maiʼnae.

⁸ Yesuʼa apaipafiʼmo ageteno ayaʼmo kalage kiʼniya vekaeʼmo, eka maleʼmo he tika maiyo, huno ha paiʼnigeno eno haopaleʼmo he tino maiʼniye.

⁹ Yesuʼa apakaefeʼmo hunoʼaeʼmo, Sapati afinaʼmo Goti keʼaepa geʼamo akame hisayafeʼmo na agufa kavaʼmo haneʼniye. Vayaʼmo aliʼa alagepa huʼa apatesaya kavapi aliʼa hosu huʼa apatesaya kavaʼmo haneʼniye. Apakufamo aliʼa katiʼa apatesaya kavapi vayaʼmo hapaesaya kavaʼmo haneʼniye, huno ge huno apafi geʼniye.

¹⁰ Aulu hapaeno apaketeno agaefeʼmo hunoʼaeʼmo, kayaʼmo aeka hayo huvo, huno ha paiʼnigeno ayaʼmo aeno hayo huʼnigenoʼaeʼmo ayaʼmo aino api aiʼniye.

¹¹ Apaipamo lusi kava huno leʼnigeʼapaeʼmo, agaetegamo na agufa kavaʼmo hisune, huʼa huteʼa ge huge afige huʼa maiʼnae.

Yesuʼa apa vayaʼamo lekana paino apateʼniya gemae

¹² Mago afinaʼmo Yesuʼa nunumuʼmo hisiyafeʼmo avefiʼmo uno haino ani haniʼilagamo Gotifeʼmo nunumuʼmo huge huge nehigeno

¹³ gotiʼnigeno geʼamo neʼafiya vayaʼaifeʼmo ge huʼnigeʼa eʼnageno apakaepatiʼmo tuolofuʼa vayaʼmo lekana paino apateteno apakiʼapimo apa vayane, huno apateʼniye.

¹⁴ Ani vayaʼmogi apakiʼapimo Saimonifeʼmo Yesuʼa saufa agiʼamo Pitaʼae, huno ateʼniya vekagi aganaʼamoʼmo Eʼnaluʼagi Yemisiʼagi Yoniʼagi Filipiʼagi Matalomiyuʼagi

¹⁵ Matiyuʼagi Tomasiʼagi Afiyasi mafaʼnemo Yemisiʼagi Saimoniʼa lokiya vekae, huʼa agi aeʼnaya vekagi

¹⁶ Yemisi mafaʼnemo Yutasiʼagi Isakaliyoti kotega vekamo Yutasiʼa kutulu yaʼmo neʼniya vekagi huno lekana paino apateʼniye.

Yesuʼa asole vayaʼmo kaita hapauʼniya vayaʼmo alino hapageno apateʼniya gemae

¹⁷ Avefatiʼmo Yesuʼe apakaeʼeʼmo emi eʼa otuleʼmo he tiʼa maiʼnae. Asole vayaʼmo geʼamo neʼafiya vayanagi muki Yutiya haopalegatiʼmo ege Yulusalemu taonifatiʼmo ege ani haigifatiʼmo Taiya taonifatiʼe Saitoni taonifatiʼeʼmo ege huʼnae. Geʼamo afisayafeʼmo ege kaitaʼapimo alino hapageno apatesiyafeʼmo ege huʼa eʼa maiʼnae.

¹⁸ Hosu apaune vayaʼmo vayaʼai apaipafiʼmo maiʼneʼa aliʼa hosu huʼa neʼapataya apaune vayaʼmo alino hapafaino apataleʼniye.

¹⁹ Agufaleʼmo ame aliʼnageno himamuʼamo uʼnigeno alino hapageno apateʼniyaʼmofeʼmo ame alisayafeʼmo huʼnae.

Alagepa huʼa neʼmaiya vayaʼe alagepa huʼa noʼmaiya vayaʼefeʼmo huʼniya gemae

²⁰ Yesuʼa alino maku huno apakeyana geʼamo neʼafiya vayaʼmo maiʼnageno apaketenoʼaeʼmo, kagemi yatapimo ohaneʼnisaya vayaʼmogitapamo Gotiʼa yagaino neʼapateya kegiʼyafiʼmo uta haitapa maiʼnageno muki yaʼamo lapakaitapi yaʼmo haneʼniyaʼmofeʼmo Goti aulena vayaʼamo maiʼnae.

²¹ Hemenimo lapaka netesiya vayaʼmogitapamo henagaʼamo lusi kava hutapa neʼyaʼmo neta lapamu hugayaʼmofeʼmo Goti aulena vayaʼamo maiʼnae. Hemenimo aviʼyaʼmo nehaya vayaʼmogitapamo henagaʼamo kigi hugayaʼmofeʼmo Goti aulena vayaʼamo maiʼnae.

²² Vemo mafaʼnemo akame nehayaʼmofeʼmo vayaʼmogi lapakaefeʼmo apaini huge aliʼa lapafaiʼa lapatalege huʼa faipa huʼa lapateteʼapaeʼmo lapakitapileʼmo aliʼa afepi lapatege hugayaʼmofeʼmo Goti aulena vayaʼamo maiʼnae.

²³ Ani agufa kavaʼmo lapakaetegamo hisaya afinaʼmo lapamogaga aitetapa lapavayagunagu nehutapaeʼmo aeta hailo hiyo kokuʼnapatiʼmo alopa miyatapimo aligae. Lapakaetegamo hisaya agufa kavaʼmo huʼa apakinago vayaʼmogi ani kavaʼmo huʼa Gotitegati gemo alini eʼa aeʼa hakalo huʼa hapa nepaiya vayaʼaitegamo huʼnayaʼmofeʼmo lapamogaga aiyo.

²⁴ Lapamogaga aigayaʼmonanafa kagemi yatapimo haneʼniya vayane, huʼna, ehetapiye, amuse nehaya yaʼmo ago aliʼnae.

²⁵ Neʼyaʼmo ago neta lapamu nehaya vayane, huʼna, vaehae, henagaʼamo lapaka tegae. Kigi nehaya vayane, huʼna, vaehae, henagaʼamo yulagefa aita aviʼyaʼmo hugae.

²⁶ Muki vayaʼmogimo lapakitapileʼmo aliʼa asagauʼa lapatesaya afinaʼmo vaehae, huʼna, kage kage hisaya kavaʼmo afole aigiye. Apakinago vayaʼmogimo ani kavaʼmo huʼa aigofe gemo alini eʼa aeʼa hakalo huʼa hapa nepaiya vayaʼmogi apakiʼapileʼmo aliʼa asagauʼa apateʼnae.

Yesuʼa hunoʼaeʼmo, Kame vayatapieʼmo lapau lapayamopafiʼmo lahapaino, huno huʼniya gemae

²⁷ Hemenimo mani hisuva gemo geʼnimo neʼafiya vayaʼmogitapaeʼmo hugesuve. Kame vayatapieʼmo lapau lapayamopafiʼmo lahapaino. Lapakaefeʼmo apaini nehaya vayaʼmo hapa maeyo.

²⁸ Lifana huno neʼapataya vayaʼaifeʼmo hutapaeʼmo, Gotiʼa alino auleno lapateno, hutapa hiyo. Huʼa faipa huʼa lapatesaya vayaʼaifeʼmo nunumuʼmo huta apateyo.

²⁹ Mago vekamoʼmo kagalametaleʼmo nekamagisigekaeʼmo aika afe leka magokayaga kagalametamo amiyo. Mago vekamoʼmo saketikamo alitenoʼaeʼmo siyotikaʼeʼmo aligefeʼmo husigekaeʼmo, oʼaliyo, huka osuvo.

³⁰ Mago yafeʼmo aukaya husaya vayaʼmo afaʼa apamiyo. Kagemi yatapimo aliʼnisaya vayaʼaifeʼmo, halate namiyo, hutapa osiyo.

³¹ Lapakaetegamo husaya kavafeʼmo lapauʼnisigeta ani kavaʼmo hutapa apakaetegaʼeʼmo hiyo.

³² Apakaemo lapakaefeʼmo hapau apayamopafiʼmo hapauʼnisiya vayaʼaifeʼmo lapau lapayamopafiʼmo lapauʼnisiyaʼmoʼmo Gotiʼa lahapao ke hegaifiye. Haʼao. Hosu vayaʼmogiʼeʼmo apakaefeʼmo hapau apayamopafiʼmo nehapaiya vayaʼaifeʼmo hapau apayamopafiʼmo nehapaiye.

³³ Lapakaemo lapakaetegamo alagepa kavaʼmo nehaya vayaʼaitegamo alagepa kavaʼmo nehisayaʼmoʼmo Gotiʼa lahapao ke hegaifiye. Haʼao, hosu vayaʼmogiʼeʼmo ani agufa kavaʼmo nehae.

³⁴ Inagi mago yaʼmo apamiʼnetapaeʼmo halate lamigae, hutapa lapakesamo neʼafisayaʼmoʼmo Gotiʼa lahapao ke hegaifiye. Haʼao, hosu vayaʼmogi apamiʼnaya anonaʼapilefeʼmo halate alisayafekeʼmo hosu vayaʼmo neʼapamiye.

³⁵ Lapakaemo kame vayatapieʼmo lapau lapayamopafiʼmo lahapauʼnisigetapa alagepa kavaʼmo huteta anonatapileʼmo halate alisayafeʼmo lapakesamo oʼafita fikumo apamiyo alopa yatapimo aligae. Ala kava neʼmo anaga hogote vekamoʼmo muki yaʼamo neʼapamigeʼa aliteʼapaeʼmo kahao ke hove, huʼa osuʼa fiku neʼaliya vayaʼe hapaku ataleʼneʼa neʼaliya vayaʼeʼmo alagepa kavaʼmo huno yagaino neʼapateyaʼmofeʼmo ani agufa kavaʼmo hisayaʼmoʼmo mafaʼneʼamo maigae.

³⁶ Afotapimoʼmo hau huno neʼapateya kava hutapa lahapau huta apateyo, huno hapa paiʼniye.

Vayaʼmo alita fako hutapa oʼapateyo, huno huʼniya gemae

³⁷ Lapakaemo vayaʼaifeʼmo hutapaeʼmo, hosu kavaʼmo huʼnae, hutapa huteta alita fako huta oʼapateyo. Alita fako hutapa oʼapatesayaʼmoʼmo Gotiʼa hunoʼaeʼmo, hosu kavaʼmo huʼnae, huno huteno alino fako huno olapategae. Ina kava ina kavaʼmo nehana vekamo maiʼnane, hutapa osiyo. Gotiʼa lapakaefeʼmo hunoʼaeʼmo, ina kava ina kavaʼmo nehana vekamo maiʼnane, huno osugiye. Lapakaemo lapakaetegamo hosu kavaʼmo huʼnisaya vayaʼaifeʼmo afaʼa ateyo, hutapa hiyo, Gotiʼa lapakaefeʼmo hunoʼaeʼmo, afaʼa ateyo, huno hugiye.

³⁸ Alagepa yatapimo apamigenoʼao Gotiʼa lapamino. Gotiʼa havai teʼnisigenoʼaeʼmo aeno alagi huteno magoʼe huno maleno havai teteno ayatetiʼmo maleno alagi huteno aino ati kaeteno talasisi kupiʼmo ku ai malegaiye. Haiya agufa kavaʼmo huta alita fako hutapa apamisafi ani agufa kavaʼmo huno Gotiʼa alino fako huno lapamigiye, huno hapa paiʼniye.

Yesuʼa aeno kalafefa gemo huno hapa paiʼniya gemae.

³⁹ Yesuʼa mani gemo aeno kalafefa gemo huno hapa painoʼaeʼmo, mago aulagamo ali huʼnisiya vekamoʼmo aulagamo ali huʼnisiya vekamo alino alagepa huno avalelino ugifiye. Haʼao avalelino visiyategamo uʼana kelifiʼmo asagauʼana aigaʼae.

⁴⁰ Geʼamo neʼafiya vekamoʼmo alino aya neʼmaleya vekamo aeno noʼagase. Tisa vekamoʼmo alino aya maleme aya maleme visigeno afitenoʼaeʼmo alino aya maleʼniya vekagana huno maigiye.

⁴¹ Na kava higetapaeʼmo konagatapimogi apaulagafiʼmo haneʼniya afayaʼmo neʼagayaʼmonanafa lapaulagafiʼmo haneʼniya alopa latapa yosamo noʼagae.

⁴² Na kava higetapaeʼmo konagatapieʼmo hutapaeʼmo, konagaʼnimogae, kaulagafatiʼmo afayaʼmo aliʼna atalegauve, huta hapa nepaiyaʼmonanafa alopa latapa yosamo lapaulagafiʼmo haneʼniyana noʼagae. Aeta ati nekaya vayane, huʼna, hogotetapa lapaulagafiʼmo haneʼniya alopa latapa yosamo alita ataleʼnetapa konagatapimogi apaulagafiʼmo haneʼniya afayaʼmo alita atalesayafeʼmo ageta alagepa hutapa agegae.

Hosu yosamoʼmo hosu yosa alagaʼageʼmo aegaiye, huno huʼniya gemae

⁴³ Alagepa yosamoʼmo hosu yosa alagamo afaʼa oʼaegaiye.

⁴⁴ Vayaʼmogimo yosa alagaʼamo ageteʼapaekeʼmo na agufa yosamo haneʼnifi huʼa agegae. Vayaʼmogimo aufe nofiʼmoʼa fiki alagamo aeʼnisigeʼa olagigae. Aise aufe yosafatiʼmo mago nesaya yosa alagamo olagigae.

⁴⁵ Inagi mago alagepa vekamo aipafiʼmo alagepa kavaʼmo haneʼnigeno alagepa kavaʼmo aipafatiʼmo afole neʼaiye. Hosu vekamo aipafiʼmo hosu kavaʼageʼmo haneʼnigeno hosu kavaʼmo aipafatiʼmo afole neʼaiye. Ani agufa yaʼmo aipafiʼmo havai teʼneno eno haineno avayafatiʼmo afole neʼaiye, huno hapa paiʼniye.

Lole vekalaʼmoganimo noʼmo kiʼnaʼa kavafeʼmo huʼniya gemae

⁴⁶ Na kavaʼmo higetapaeʼmo nagaefeʼmo hutapaeʼmo, Ala kava nene, Ala kava nene, huta nehutapaeʼmo geʼnimo noʼafiye.

⁴⁷ Muki vayaʼmogimo nagaetegamo eʼa geʼnimo afiteʼapaeʼmo akame nehaya vayaʼmo haiya agufa vekagana huʼa maiʼnafigeʼna aliʼna lapave liguve.

⁴⁸ Apakaemo no kiʼniya vekagana huʼa maiʼnae. Ani vekamoʼmo noʼmo kisiyafeʼmo hogoteno yatala kelimo kafilino lami maleʼneno alopa yafaʼmo faino ateʼneno noʼmo ki maleʼniye. Ki maleʼnigenoʼaeʼmo lusi kava huno aniʼmo heteno noʼmo aeno agoʼya faigefeʼmo huʼniyana alopa yafaʼmo faino ateʼneno ki maleʼniyaʼmofeʼmo alino kanage osuʼniye.

⁴⁹ Ki maleʼniyaʼmonanafa geʼnimo fiku afiteʼa akame nosaya vayaʼmo mago vekamoʼmo noʼamo yafaʼmo faino oʼateʼneno ki maleʼniya vekagana huʼa maiʼnae. Mopalafateʼmo ki maleʼnigenoʼaeʼmo aniʼmoʼa aeno agoʼya faino ataleʼnigeno malage huno anipiʼmo asagauno aiʼnigeno alagi aeno halagape vaino alino hosu huno ataleʼniye, huno hapa paiʼniye.