Luki 4 - The Keyagana NT and 25 OT books

Sataniʼa Yesuʼmo amalageka huʼniya gemae

^1-2 Aote Aunemeʼamoʼmo Yesu aipafiʼmo haino havai teʼnigeno Yesuʼa Yoneni anipatiʼmo ataleno uʼniye. Aote Aunemeʼamoʼmo avalelinuno kaʼme kotega ateʼnigeno fotiʼa afinaʼmo uneno huno maiʼnigeno Sataniʼmo amalageka huʼniye. Fotiʼa afinaʼmo neʼyaʼmo oʼneʼnigeno aga teʼnigenoʼaeʼmo

³ Sataniʼa hunoʼaeʼmo, Goti mafaʼneʼamo maiʼnisanaʼmoʼmo mani yafafeʼmo ge hugenoʼao peleti mayamo alino hamaleno, huno ha paiʼnigeno

⁴ Yesuʼa geʼaleʼmo aeno atagaina huno ha painoʼaeʼmo, Goti mukufi gemoʼmo hunoʼaeʼmo, vayaʼmogimo peleti mayaʼagekeʼmo nesayana alagepa huʼa oʼmaigayaʼmonanafa muki gemo Gotiʼa avayafatiʼmo huʼniya gemo afiteʼapaekeʼmo alagepa huʼa maigae, huno huʼniye, huno ha paiʼniye.

⁵ Sataniʼmo avalelinuno haino malage huno muki ma mopafi alaʼapimo maiʼneʼa yagaiʼa neʼapataya vayaʼai koʼmo alino ave liʼniye.

⁶ Inagi Sataniʼmo hunoʼaeʼmo, muki ageʼnana yaʼamo namiʼnigeʼna aliteʼna yagaiʼnovanageʼna mago vekamo amiguve huʼna huʼnisuvana afaʼa amiguve. Muki kotegamo yagaisanafeʼmo muki konali yaʼapimo kamisugeka aligane.

⁷ Inagi nagaefeʼmo mono hisanaʼmoʼmo muki yaʼamo kagaika yaʼmo hanegaiye, huno ha paiʼniye.

⁸ Yesuʼa hunoʼaeʼmo, Sataniyo, huno, nakamelegamo ekuka maiyo. Goti mukufi gemoʼmo hunoʼaeʼmo, Ala kava neʼmo Gotitapimofekeʼmo mono huteta agaiʼa magokeʼageʼmo akame hiyo, huno huʼniye, huno ha paiʼniye.

⁹ Sataniʼa Yulusalemu taonifiʼmo avalelinuno alopa mono noʼmo yatala noʼmo nokatoʼmuleʼmo avalelino haino ateʼnenoʼaeʼmo, Goti mafaʼneʼamo maiʼnisanaʼmoʼmo mopafiʼmo aeka hailo huka asagauka aiyo.

^10-11 Goti mukufi gemoʼa hunoʼaeʼmo, Ala kava neʼmoʼa enisole vayaʼaeʼmo hunoʼaeʼmo, yagaitapa ateyo, huno hapa paisigeʼa yagaiʼa kateʼneʼa apayatetiʼmo katafausageno yafaʼmoʼa kaiyafiʼmo okahaegaiye, huno avoʼmo kae maleʼniye, huno ha paiʼnigeno

¹² Yesuʼa hunoʼaeʼmo, Goti mukufi gemoʼa hunoʼaeʼmo, Ala kava neʼmo Gotitapimofeʼmo amalageka osiyo, huno huʼniye, huno ha paiʼniye.

¹³ Sataniʼmo alu ge alu gemo huno amalageka huno hano hutenoʼaeʼmo, alu afinaʼmo halate eʼna amalageka huguve, huno agesamo afiteno ataleno uʼniye.

Yesuʼa aliʼyaʼamo aepa faino aliʼniya gemae

¹⁴ Goti Aunemeʼamoʼmo Yesuʼa lokiya vaino ateʼnigeno halate aino atagi neno Galeliya kotega uʼnigeʼa ageteʼapaeʼmo ava gemo huʼnaya gemo muki Galeliya haopalegamo maiʼnaya vayaʼmogi afiʼnae.

¹⁵ Agaemo Yu vayaʼai mono nopiʼmo alino apaya maleʼnigeʼapaeʼmo agiʼaleʼmo aliʼa asaga huʼa ateʼnae.

Nasalasa taonifi maiʼnaya vayaʼmogimo Yesuʼmo apakameʼyamo amiʼnaya gemae

¹⁶ Yesuʼa Nasalasa taonifiʼmo maiʼneno ko siʼniya taonifiʼmo uno Sapati afinaʼmo nehiya agufa kavaʼmo huno mono nopiʼmo uno haino maiʼnenoʼaeʼmo Goti mukufi gemo lekana paisiyafeʼmo he tiʼniye.

¹⁷ Mago vekamoʼmo Aiyeyaʼa Gotitegati gemo alinino eno aeno hakalo huno hapa nepaiya vekamoʼmo avoʼmo kae maleʼniya mukumo alino amiʼnigeno alino vakaleno kahauya huno ageteno lekana painoʼaeʼmo,

¹⁸ Agaemo kagemi yaʼmo oʼaliʼnisaya vayaʼaifeʼmo alagepa faigoko gemo aeʼna hakalo huʼna hapa paisuvafeʼmo uvelimo ago lakino nateʼniyaʼmofeʼmo Ala kava neʼmo Aunemeʼamo emineno nagaeteʼmo maiʼniye. Agaemo alino nateʼnigeʼna emineʼna hosu kavaʼapieʼmo apaipamo kana nehiya vayaʼaina aliʼna hapageʼna apatege kalavusifi maiʼnaya vayaʼaifeʼmo huʼnaeʼmo, hatu maeʼna lapategauve, huʼna hapa paige apaulagamo ali huʼniya vayaʼaifeʼmo huʼnaeʼmo, agetapa ayakeyo, huʼna hapa paige aliʼa afepi apateteʼa huʼa apami neʼmalaya vayaʼmo hatu maeʼna apatege

¹⁹ Ala kava neʼmo alagepa afinaʼamo afole aiʼniye, huʼna hapa paige hisuvafeʼmo Goti Aunemeʼamoʼmo alino nateʼnigeʼna emineʼnove, huno huʼniye, huno lekana paiʼniye.

²⁰ Lekana paino hano huteno ani mukumo aino akaniteno mono nopiʼmo aliʼya neʼaliya vekamo halate amiteno fai maiʼniye. Mono nopiʼmo maiʼnaya vayaʼmogimo aulu haeʼnagenoʼaeʼmo,

²¹ hemenimo Goti mukufi gemo afiʼnaya gemo ago afole aiʼniye, huno hapa paiʼnigeʼapaeʼmo

²² muki vayaʼmogimo fiku hapa maeno neʼapamiya gemo avayafatiʼmo huʼnigeʼa afiteʼapaeʼmo hapau aiteʼapaeʼmo, Yosefe mafaʼnemo oʼmaiʼnifi, huʼa huʼnae.

²³ Yesuʼa hunoʼaeʼmo, ago afiʼnovana lapakinago vayaʼai gefatiʼmo aeta kalafefa gemo hutapa naha paitapaeʼmo, Lota vekae, hutapa, kagaikamo alika alagepa huka kato. Kapeneyamu taonifiʼmo huʼnana agufa kavaʼmo mani nokaleʼmo huvo, hutapa naha paigae.

²⁴ Lama gemo lapa nepauve, huno, Gotitegati gemo alini eʼa aeʼa hakalo huʼa hapa nepaiya vayaʼmo afole aiʼnaya koteʼmo uʼnageʼapaeʼmo vayaʼapimogi amuse huʼa noʼapatae.

²⁵ Geʼnimo afiyo. Ilaiyaʼa maiʼniya afinaʼmo loleʼe magoʼe kafugaʼe sigisiʼa kai leʼeʼmo ko oʼaiʼnigeʼapaeʼmo muki haopalegamo neʼyafeʼmo kafu huʼnaya afinaʼmo afole aiʼniye. Ani afinaʼmo muki kogu aʼne anagaʼmo Isaleli kotegamo maiʼnayaʼmonanafa

²⁶ Gotiʼa Ilaiyaʼmo alino ateʼnigeno Sitoni kotega Salefeti taonifiʼmo magoke kogu ategamo uʼniye.

²⁷ Ilaisaʼa maiʼnigeʼapaeʼmo Isaleli kotegamo muki lepolosi yaʼmo hapauʼniya vayaʼmo maiʼnayaʼmonanafa Ilaisaʼa Siliya kotega maiʼniya vekamo agiʼamo Nemenikeʼmo alino hageno ateʼniye, huno hapa paiʼnigeʼa

²⁸ afiteʼapaeʼmo lusi kava huno apaipamo leʼniye.

²⁹ Apaipamo leʼnigeʼapaeʼmo he tiʼa aliʼa hafaitalageno ataleno neʼvigeʼapaeʼmo uʼa avaleliʼuʼa haiʼa ani taonimo ki maleʼnaya aveletiʼmo mulifilaga aliʼa agoʼya faiʼa atalesayafeʼmo huʼnayaʼmonanafa

³⁰ apakae folagapatiʼmo ago faino kasalo paetaleno uʼniye.

Yesuʼa mago vekamo aipafatiʼmo hosu aune vekamo alino hafaino ataleʼniya gemae

³¹ Yesuʼa Galeliya kotega Kapeneyamu taonifiʼmo uno lamino Sapati afinaʼmo mono nopiʼmo uno haino alino apaya maleʼniye.

³² Alaʼapimo yagaino neʼapateya vekagana huno himamuʼaletiʼmo alino apaya maleʼnigeʼapaeʼmo hapau aiʼnae.

³³ Mago vekamo aipafiʼmo hosu aune vekamo maiʼniya vekamo mono nopiʼmo maiʼnenoʼaeʼmo alopa gefatiʼmo hunoʼaeʼmo,

³⁴ ae, huno, Nasalasa vekamo Yesuo, huno, lagaetegamo na agufa kavaʼmo hisanafeʼmo eʼnane. Alika hano huka latesanafeʼmo eʼnapiye. Ago kageʼnovana Goti aote vekaʼamo maiʼnane, huno ha paiʼniye.

³⁵ Yesuʼa ge hautenoʼaeʼmo, ge osuʼneka aipafatiʼmo eka emikeno, huno ha paiʼnigeno hosu aune vekamoʼa vayaʼmo maiʼnaya folagapiʼmo alino agoʼya faino ataleteno ago ataleno uʼniye. Agufamo alino hosu huno oʼateʼnigeno afaʼa maiʼniye.

³⁶ Ageteʼapaeʼmo muki vayaʼmogimo hapau aiʼnae. Apakaemo huʼapaeʼmo, ani agufa gemo na agufa gemo huʼniye. Alaʼapimo yagaino neʼapateya vekamo maiʼnegegana huno lokiya himamuʼaletiʼmo hosu apaune vayaʼaifeʼmo hunoʼaeʼmo, emiteyo, huno hapa paiʼnigeʼapaeʼmo emi eʼa neʼvae, huʼa huʼnae.

³⁷ Yesufeʼmo ava gemo muki haopalegamo aino atagu faeno uneno huʼniye.

Yesuʼa alu kaita alu kaitaʼmo hapauʼniya vayaʼmo alino hapageno apateʼniya gemae

³⁸ Yesuʼa mono nopatiʼmo uno laminoʼaeʼmo Saimoni nopiʼmo uno haiʼniye. Saimoni ayemoʼamoʼmo amuko kaita hauʼnigeno havaeno maiʼniye. Apakaemo Yesufeʼmo huʼapaeʼmo, alika hageka ato, huʼa ha paiʼnae.

³⁹ Uno agenopalegamo he tino maiʼnenoʼaeʼmo, kahageno, huno ha paiʼnigeno amuko hauʼniya yaʼamo hageʼnigeno malage huno he tino uno neʼyaʼmo yagita huno apateʼniye.

⁴⁰ Yegemo uno lamino falegefe huʼnigeʼapaeʼmo kaita hapauʼniya vayaʼaiteʼmo yagaiʼa neʼapataya vayaʼmogi kaita hapauʼniya vayaʼmo Yesutegamo apavaleliʼa eʼnae. Agaemo muki alu kaita alu kaitaʼmo hapauʼniya vayaʼmogi apakufaleʼmo ayaʼmo maleʼnenoʼaeʼmo alino hapageno apateʼniye.

⁴¹ Inagi hosu apaune vayaʼmo asole vayaʼmogi apaipafatiʼmo emi eʼapaeʼmo, Goti mafaʼneʼamo maiʼnane, huʼa alopa gefatiʼmo huʼnae. Kalaisi vekamo maiʼniye, huʼa ago ageʼnayaʼmofeʼmo Yesuʼa hunoʼaeʼmo, ge osuta afa maiyo, huno hapa paiʼniye.

Yesuʼa Yu vayaʼai kotegamo umenitata huno Goti geʼamo aeno hakalo huno hapa paiʼniya gemae

⁴² Gotilamiyapiʼmo taonifatiʼmo ataleno uno vayaʼmo oʼmaiʼnaya kotegamo maiʼnigeʼapaeʼmo kahauya hume hume uʼa ageteʼapaeʼmo apataleno oʼusiyafeʼmo atafauʼa maiʼnae.

⁴³ Atafauʼnayaʼmonanafa agaemo, nagaemo Gotiʼa yagaino neʼapateya kavafeʼmo alagepa gemo uʼna alu taonifi alu taonifiʼmo aeʼna hakalo huʼna hapa paisuva gemo haneʼniye. Ani kavaʼmo hisuvafeʼmo alino nateʼnigeʼna emiʼneʼnove, huno hapa paiteno

⁴⁴ apatalenuno Yutiya kotega mono nokopiʼmo uno haino aeno hakalo huno hapa paimale hapa paimale huno uneno huno maiʼniye.