Luki 23 - The Keyagana NT and 25 OT books

Yesuʼmo Pailati aulagaleʼmo agoti huʼa ateʼnaya gemae

¹ Muki kanisole vayaʼmogi avaleliʼa Pailatitegamo uʼnae.

² Apakaemo aepa faiʼa agoti huʼa ateʼapaeʼmo, mani vekamoʼmo hunoʼaeʼmo, Gamani vayaʼmogi gemo oʼafiyo. Alatapimo Sisaʼmo takesi monimo oʼamiyo. Nagaemo Kalaisi vekamo alatapimo kini vekamo maiʼnove, huno laha paiʼnigeta afiʼnone, huʼa ha paiʼnageno

³ Pailatiʼa hunoʼaeʼmo, Yu vayaʼaiteʼmo yagaiʼnana ala kini vekaʼapimo maiʼnapiye, huno ge huno afi geʼnigenoʼaeʼmo, he, huno, ani gemo kagaemo alagi ago nehane, huno ha paiʼniye.

⁴ Pailatiʼa mono huʼa neʼapataya vayaʼaiteʼmo yagaiʼa neʼapataya vayaʼe muki vayaʼefeʼmo hunoʼaeʼmo, agoti huʼna atesuva kavaʼmo aepaʼamo oʼageʼnove, huno hapa paiʼnigeʼapaeʼmo

⁵ lokiya gefatiʼmo huʼapaeʼmo, Galeliya kotegatiʼmo aepa faino alino apaya maleme maleme eno manile Yutiya kotegaʼeʼmo alino apaya malenoʼaeʼmo muki vayaʼmogi hosu kavaʼmo hisayafekeʼmo alino he tino apateʼniye, huʼa ha paiʼnae.

Heloti aulagaleʼmo agoti huʼa ateʼnaya gemae

⁶ Pailatiʼa ani gemo afitenoʼaeʼmo, Galeliya kotega vekamo maiʼnifiye, huno ge huno apafi geʼnigeʼapaeʼmo,

⁷ he, huʼa ha paiʼnagenoʼaeʼmo, Helotiʼa yagaino neʼapateya kote vekamo maiʼniye, huno huteno Helotitegamo alino ateʼnigeno uʼniye. Ani afinaʼmo Helotiʼa Yulusalemu taonifiʼmo eno maiʼniye.

⁸ Helotiʼa Yesufeʼmo ava gemo huʼnageno afitenoʼaeʼmo, mago noʼagaya agufa aune kavaʼmo hisigeno agesiyafeʼmo hauʼnigeno yatala afinaʼmo agava maiʼniyaʼmofeʼmo Yesuʼmo agetenoʼaeʼmo amogaga aiʼniye.

⁹ Inagi Yesufeʼmo loka huno ge huno afi ge afi ge huʼniyaʼmonanafa geʼaleʼmo aeno atagaina huno ge osuʼniye.

¹⁰ Mono huʼa neʼapataya vayaʼaiteʼmo yagaiʼa neʼapataya vayaʼe keʼaepa gemo avoʼmo kaeʼa aliʼa apaya neʼmalaya vayaʼmogiʼeʼmo he tiʼa lokiya gefatiʼmo huʼapaeʼmo, ina kavaʼmo huteno ina gemo huʼniye, huʼa hosu faigoko gemo huʼa ateʼnae.

¹¹ Helotiʼe ati vayaʼamogiʼeʼmo agiʼaleʼmo aliʼa afepi atege huʼa faipa huʼa atege huteʼa alagepa kukena yaʼmo vaiʼa ateteʼapaeʼmo Helotiʼa halate alino Pailatitegamo ateʼnigeno uʼniye.

¹² Hogoteʼana Helotiʼe Pailatiʼeʼmo kame kame huʼana maiʼnaʼaʼmonanafa ani afinaʼmo aliʼana konaga heʼnaʼae.

Pailatiʼa malipu yosaleʼmo nili aigeno falino, huno hapa paiʼniya gemae

¹³ Pailatiʼa mono huʼa neʼapataya vayaʼaiteʼmo yagaiʼa neʼapataya vayaʼe Yu vayaʼaiteʼmo yagaiʼa neʼapataya vayaʼefeʼmo ge huʼnigeʼapaeʼmo eʼnageno hapa painoʼaeʼmo,

¹⁴ ani vekamo nagaetegamo avaleliteta agoti huta atetetapaeʼmo, agaemo vayaʼaifeʼmo hunoʼaeʼmo, gamani vayaʼmogi gemo oʼafiyo, huno hapa paiteno apakesamo nefaiye, hutapa naha paiʼnageʼnaeʼmo lapaulagaleʼmo ago aliʼna fako huʼna ateʼnove. Afiyo, huʼna, hosu kavaʼmo huʼniye, hutetapa hosu faigoko gemo huʼnayaʼmonanafa ani huʼniya hosu kavaʼmo alagi oʼagove.

¹⁵ Ani kavaʼmo huno Helotiʼa hosu kavaʼamo oʼageno alino ateʼnigeno halate aino atagi neno lagaetegamo eʼniye. Afiyo, huno, kamitimo amagisugeno falisiya agufa kavaʼmo huno oʼmaiʼniyaʼmofeʼmo

¹⁶ nofi kayotetiʼmo amagiteʼna afa atesugeno ugiye, huno hapa paiʼniye.

¹⁷ Pailatiʼa hopa afinaʼmo kalavusifiʼmo maiʼnaya vayapatiʼmo magoke vekamo hatu maeno atesigeno visiya vekamo maiʼniye.

¹⁸ Maiʼniyaʼmonanafa muki vayaʼamogi magokepiʼmo aeʼa lago huʼa alopa gefatiʼmo huʼapaeʼmo, ani vekamo amagiyo, amagiyo, huʼa huteʼa Malamasiʼa hatu maeka ategeno lagaetegamo eno, huʼa huʼnae.

¹⁹ Malamasiʼa ani taonifatiʼmo gamani vayaʼmo apamagiʼa hapafaiʼa apatalesayafeʼmo huʼnaya afinaʼmo mago vekamo kamitimo amagiʼnigeno faliʼniyaʼmofeʼmo kalavusi huʼa ateʼnae.

²⁰ Pailatiʼa Yesuʼmo afaʼa atesiyafeʼmo hunoʼaeʼmo halate ge huno apafi geʼniyaʼmonanafa

²¹ malipu yosaleʼmo nili aiyo, nili aiyo, huʼa huʼnae.

²² Pailatiʼa halate napa tali afinaʼmo hunoʼaeʼmo, na agufa kavaʼmo huʼnigetapaene. Haiya agufa hosu kavaʼmo huʼniye. Amagisugeno falisiya agufa hosu kavaʼamo oʼagovaʼmofeʼmo nofi kayotetiʼmo amagiteʼna afaʼa atesugeno ugiye, huno hapa paiʼniyaʼmonanafa

²³ magoʼe magoʼe huʼa alopa gefatiʼmo magokepiʼmo aeʼa lago huʼa huʼapaeʼmo, malipu yosaleʼmo nili aiyo, nili aiyo, huʼa huge huge huʼnaya gemoʼmo Pailati geleʼmo ago huʼa aeʼa ati kaeʼnayaʼmofeʼmo

²⁴ Pailatiʼa geʼapimo afiteno hapauʼniya kavaʼmo huʼniye.

²⁵ Kalavusi vekamoʼmo Gamani vayaʼaina apamagino hapa faino apatalesiyafeʼmo huʼniya afinaʼmo mago vekamo kamitimo amagiʼnigeno faliʼniyaʼmofeʼmo kalavusi huʼa ateʼnaya vekaeʼmo ato, huʼa ha paiʼnaya vekamo hatu maeno ateteno hapauʼniya kavaʼmo akame huno Yesufeʼmo malipu yosaleʼmo nili aigeno falino, huno ati vayaʼaifeʼmo hapa paiteno avaleno apamiʼniye.

Malipu yosaleʼmo nili aiʼnaya gemae

²⁶ Avaleliʼa neʼvagenoʼaeʼmo Saimoniʼa Sailini taonifi vekamo kahaufilagatiʼmo neʼegeʼa fotu huteʼapaeʼmo atafauʼa malipu yosamo aliʼa agiʼnaleʼmo kofiʼa ateʼnageno kofino alinino Yesu akame huno uʼniye.

²⁷ Asole vayaʼmo akame huʼa uʼnageʼapaeʼmo aʼne anagaʼmogimo yulagefa aige aviʼyaʼmo huge huliʼa akame huʼa uʼnae.

²⁸ Yesuʼa aino afe leno hapa painoʼaeʼmo, Yulusalemu aʼne anagane, huno, aviʼyaʼmo hutapa oʼnateyo. Lapakaitapiʼe mafaʼnetapiʼefekeʼmo aviʼyaʼmo huta lapateyo.

²⁹ Na agufa kavaʼmo hugiyaʼmofeʼmae. Afiyo, huno, mago afinaʼmo afole aisigeʼapaeʼmo, anamo aʼne anagaʼmo mafaʼne aliʼa noʼapataya aʼnegi mafaʼnemo nu noʼapamiya aʼnegi huʼa aulena aʼnemo maigae, huʼa hugae.

³⁰ Ani afinaʼmo alopa aveeʼmo, aika nagupaeka emikeka lagufaleʼmo asagauka aigeta falino. Aise aveeʼmo, eka aeka lati kao, huʼa ha paigae.

³¹ Hegafa yosaleʼmo ani kavaʼmo nehayaʼmofeʼmo vaiʼniya yosaleʼmo na agufa kavaʼmo hugae, huno hapa paiʼniye.

³² Malipu yosaleʼmo agaeʼeʼmo magokepi nili aiteʼa aliʼa he tiʼa anatesayafeʼmo gamani keʼaepa gemo amagiʼana ataleʼnaʼa vekalaʼeʼmo apavaleliʼa uʼnae.

³³ Mago aupilaga agiʼamo Anu Ayamufagayagamo uʼa avaʼyi huteʼa Yesuʼe gamani keʼaepa gemo amagiʼana ataleʼnaʼa vekalaʼeʼmo malipu yosaleʼmo nili aiteʼa aliʼa he tiʼa apateʼnae. Mago vekamo lamaga haopaleʼmo aliʼa he tiʼa ateteʼa mago vekamo hoga haopaleʼmo aliʼa he tiʼa ateʼnae.

³⁴ Yesuʼa hunoʼaeʼmo, Afo, huno, na agufa kavaʼmo nehupi huʼa oʼageʼnayaʼmofeʼmo hosu kavaʼmo anonaʼapimo afaʼa alika atalo, huno nunumuʼmo huʼniye. Kukenaʼamo aliʼa fako hu maleʼneʼa yafatetiʼmo yokalo leʼnae.

³⁵ Muki ve aʼnemo he tiʼa maiʼneʼa aulu heʼa ageʼa maiʼnae. Yagaiʼa neʼapataya vayaʼeʼmo magokepi lokaeʼa maiʼneʼa huʼapaeʼmo, muki vayaʼmo apakufamo alino katino apateʼniye. Kalaisi vekamo Gotiʼa lekana paino ateʼniya vekamo maiʼnisiyana agaiʼa agufamo afaʼa alino katino ategaiye, huteʼa huʼa faipa huʼa ateʼnae.

³⁶ Ani kavaʼmo huʼa ati vayaʼmogi eʼa atu neheya nofi alagafati aniʼmo amiteʼapaeʼmo,

³⁷ Yu vayaʼmogi ala kini vekaʼapimo maiʼnisanana kagaika kagufamo alika katika kato, huteʼa huʼa faipa huʼa ateʼnae.

³⁸ Avoʼmo kaenoʼaeʼmo, mani vekamo Yu vayaʼmogi ala kini vekaʼapimae, huno avoʼmo kaeteno malipu yosaleʼmo Yesu agenopaleʼmo nili ai maleʼniye. Ani avoʼmo kaeʼniya gemo Galiki gefatiʼmo kaege Latini gefatiʼmo kaege Himulu gefatiʼmo kaege hu maleʼniye.

Mago vekamo keʼaepa gemo amagino ataleʼniya vekamo malipu yosaleʼmo Yesuʼeʼmo nili aiteʼa aliʼa he tiʼa ateʼnaya vekamoʼmo Yesufeʼmo agesa afino fatago huʼniya gemae

³⁹ Mago vekamo gamani keʼaepa gemo amagino ataleʼniya vekamo malipu yosaleʼmo Yesuʼeʼmo nili aiteʼa aliʼa he tiʼa ateʼnaya vekamoʼmo ina ge huno huʼniye, Kalaisi vekamo maiʼnisanaʼmoʼmo kagaikaʼe laʼagaeʼeʼmo lahau vaiyo, huteno huno faipa huno ateʼniye.

⁴⁰ Ateʼnigeno alu vekamoʼmo ge hautenoʼaeʼmo, agoti huʼa lateteʼapaeʼmo, hosu kavaʼmo huʼnayanageʼa afaʼa faligae, huʼa laha paiʼnagetaeʼmo magokepi falisunafeʼmo maiʼnonaʼmofeʼmo Gotifeʼmo koli nosapiye.

⁴¹ Laʼagaemo hosu kavaʼmo huʼnoʼaʼmofeʼmo anonatiʼalefeʼmo kayoʼmo nelaʼamiyaʼmonanafa mani vekamo magoke hosu kavaʼmo alagi osuʼniye, huno ha paitenoʼaeʼmo

⁴² Yesufeʼmo hunoʼaeʼmo, Ala kava nene, huno, vayaʼaiteʼmo alagi yagaika apatesana himamukamo alisana afinaʼmo nagaefeʼmo kagesamo afika ho huvo, huno ha paiʼnigenoʼaeʼmo,

⁴³ lama gemo kaha nepauve, huno, hemenitomo Palanaisi koteʼmo uka haisanagetaʼa nagaeʼeʼmo maiguʼae, huno ha paiʼniye.

Yesuʼa faliʼniya gemae

⁴⁴ Felugakukuʼmo muki koʼalegamo hani hulinuno uneʼmo kotiʼniye.

⁴⁵ Yegemoʼmo aeno ha neleya yaʼamo hano huʼnigenoʼaeʼmo alopa mono nopiʼmo alapaʼage kena kitamo aeno apake aino lole huʼnigenoʼaeʼmo

⁴⁶ Yesuʼa alopa gefatiʼmo hunoʼaeʼmo, afoʼnimogae, huno, nauneʼnameʼmo kayapiʼmo kamuve, huno huteno faliʼniye.

⁴⁷ Ati vayaʼaiteʼmo yagaino neʼapateya vekamoʼmo ani gemo afitenoʼaeʼmo, lama gemo nehuve, huno, mani vekamo fatago vekamo maiʼniye, huno hapa paiteno Goti agiʼaleʼmo alino asaga huno ateʼniye.

⁴⁸ Muki vayaʼmogi muki hisaya kavaʼmo agesayafeʼmo eʼa aliʼa anupa huʼa maiʼnaya vayaʼmogimo ageʼnageʼa nili aiʼnageno faliʼnigeʼa ageteʼa ataleʼa hapaifiʼyaʼmo amagiteʼa noʼapilegamo uʼnae.

⁴⁹ Yesu ao vayaʼe Galeliya kotegatiʼmo magokepi akame huʼa eʼnaya aʼne anagaʼmogiʼeʼmo afagiʼaleʼmo he tiʼa maiʼneʼa aulu heʼa ageʼnae.

Yosefeʼa Yesu agufaʼamo alininuno yafakapiʼmo kino ateʼniya gemae

⁵⁰ Mago kanisole vekamo Yosefeʼa Alamatiya taonimo Yu vayaʼmogi taonifi vekamo kanale fatago vekamo maiʼniye.

⁵¹ Agaemo Gotiʼa yagaino apatesiya kavaʼmo afole aisiya afinafeʼmo agava maiʼniye. Agaemo alu kanisole vayaʼmogi vege huteʼa huʼnaya gelefeʼmo, he kanalene, huno osuʼniye.

⁵² Agaemo uno Pailatifeʼmo hunoʼaeʼmo, Yesu agufaʼamo aligesuve, huno ge huno afi geʼniye.

⁵³ Afi geʼnigeno, he, huno ha paiʼnigeno eno malipu yosaletiʼmo Yesu agufaʼamo aino akailino emineno maleʼneno alagepa yaveyave kenaletiʼmo agufaleʼmo hayaeteno yafapiʼmo kafi maleʼnaya kapiʼmo mago vayaʼmo kiʼa oʼapateʼnaya yafakapiʼmo alininuno kino ateʼniye.

⁵⁴ Ani afinaʼmo nesaya Sapati afinaʼmo neʼyaʼmo aliʼa alu neʼaiya afinaʼmo afole aigefe huʼniye.

⁵⁵ Aʼne anagaʼmo Galeliya kotegati Yesuʼeʼmo magokepi lokaeʼa eʼnaya aʼne anagaʼmogi Yosefeʼa akame huʼa uʼa ageʼnayana yafa kaʼmo haneʼnigeno Yesu agufaʼamo kino ateʼnigeʼa ageteʼapaeʼmo

⁵⁶ ataleʼa noʼapilegamo uʼa alagepa atumo neʼaiya malasiniʼe uveliʼeʼmo alo huteʼa Sapati afinaʼmo keʼaepa gemo akame huʼa maiʼa hagaleʼnae.