Luki 22 - The Keyagana NT and 25 OT books

Yutasiʼmo kutulu yaʼmo neʼniya gemae

¹ Lusi neʼyaʼmo yagita nehaya hopa afinaʼmo aeno apafu noleya peleti mayamo neʼnaya afinaʼmo agiʼamo Pasova afinaʼmo afole aisiyafeʼmo huʼniye.

² Mono huʼa neʼapataya vayaʼaiteʼmo yagaiʼa neʼapataya vayaʼe keʼaepa gemo avoʼmo kaeʼa aliʼa apaya neʼmalaya vayaʼmogiʼeʼmo Yesuʼmo amagisaya kafeʼmo kahauya huʼnayaʼmonanafa vayaʼaifeʼmo koli huteʼa oʼatafauʼnae.

³ Ani afinaʼmo Sataniʼa Isakaliyoti kotega vekamo Yutasiʼmo tuolofuʼa vayapati vekamo aipafiʼmo uno haino maiʼniye.

⁴ Yutasiʼa apatalenuno mono huʼa neʼapataya vayaʼaifenagi ati vayaʼaiteʼmo yagaiʼa neʼapataya vayaʼaifenagi huno hapa painoʼaeʼmo, haiya agufa kavaʼmo huʼna avaleʼna lapamisufi, huno hapa paiʼnigeʼapaeʼmo ge huge afige huʼa maiʼnae.

⁵ Yutasiʼa huʼniya gemo afiteʼapaeʼmo apamogaga aiteʼapaeʼmo, mago monimo kamigune, huʼa ha paiʼnagenoʼaeʼmo,

⁶ he, kanalene, huno hutenoʼaeʼmo apataleno uno Yesuʼa muki vayaʼeʼmo magokepi lokaeno oʼmaino agaiʼageʼmo maisiya afinaʼmo avaleno apamisiyafeʼmo yagaino maiʼniye.

Geʼamo neʼafiʼa vekalaʼmo uʼana Pasova neʼyaʼmo yagita huʼnaʼa gemae

⁷ Inagi hopa afinaʼmo aeno apafu noleya peleti mayamo neʼnaya afinaʼmo Pasova neʼyaʼmo nesayafeʼmo aikeli sipisipimo neʼamagiya afinaʼmo afole aiʼniye.

⁸ Yesuʼa Pitaʼe Yoniʼefeʼmo hunoʼaeʼmo, utana Pasova neʼyaʼmo nesunafeʼmo yagita hiʼao, huno hana paiʼnigeʼanaeʼmo,

⁹ haiyaʼaleʼmo utaʼa yagita hisuʼae, huʼana ge huʼana afi geʼnaʼagenoʼaeʼmo,

¹⁰ afiʼao, huno, alopa taonifiʼmo uta haitana agesaʼana mago vekamoʼmo ani keʼmo alinino neʼvisigetanaeʼmo fotu hugaʼae. Akame hutana utanaeʼmo uno haisiya nopiʼmo uta haiʼao.

¹¹ Noʼmo afoʼamofeʼmo ina gemo hutana ge hutana afi geʼao, tisa vekamoʼmo kaha painoʼaeʼmo, nagaeʼe geʼnimo neʼafiya vayaʼeʼmo Pasova neʼyaʼmo nesunafeʼmo haiyaʼafiʼmo aeka hanagi maleʼnane, hutana afi geʼao.

¹² Agaemo anaga aeno hanagi maleʼniya yapiʼmo hiʼyalamuʼe siyaʼeʼmo haneʼniyanageno alino lanaveligiye. Ani nopiʼmo muki yaʼmo yagita hiʼao, huno hana paiʼniye.

¹³ Hana paiteno alino anateʼnigeʼana uʼana agaʼana hana paiʼniya agufa kavakeʼmo huno haneʼnigeʼana ageteʼana yagita huʼnaʼae.

Yesuʼa kaveʼmo alino apamiʼniya kavafeʼmo ava gemo huʼniya gemae

¹⁴ Neʼyaʼmo nesaya afinaʼmo ago afole aiʼnigeʼapaeʼmo Yesuʼe geʼamo neʼafiya vayaʼeʼmo uʼa haiʼa hiʼyalamuteʼmo siyateʼmo fai maiʼnae.

¹⁵ Agaemo hapa painoʼaeʼmo, nagafu kisiya kavaʼmo afole oʼaiʼninageʼna hogoteʼna lapakaeʼeʼmo magokepi neʼyaʼmo nesunafeʼmo lusi kava huno nahauʼniye.

¹⁶ Lapa nepauve, huno, halate Pasova neʼyaʼmo oʼneʼna maime maime neʼvisugeno muki kavaʼmo afole aitesigeʼna negauve.

¹⁷ Kapumo alino nunumuʼmo huno hao ke hetenoʼaeʼmo, alita fako huta neyo.

¹⁸ Mani afinatetiʼmo halate nofi alagafati aniʼmo oʼneʼna maime maime neʼvisugeno Gotiʼa yagaino apatesiya kavaʼmo afole aisigeʼnaeʼmo negauve, huno hapa paiʼniye.

¹⁹ Peleti mayamo alino nunumuʼmo huno hao ke heteno alino akaya heno apamitenoʼaeʼmo, manimona nagufaʼniye. Lapakaetefeʼmo Gotina amiguve. Mani afinatetiʼmo nagaefeʼmo lapakesamo afita ho hisayafeʼmo ani kavaʼmo huge huge huta maiyo.

²⁰ Neʼyaʼmo neteʼapaeʼmo ani kavaʼmo huno kapumo aliʼnenoʼaeʼmo, mani kapufi aniʼmo Gotiʼe lapakaeʼeʼmo magokepi lokaeta maisayafeʼmo saufa kotalakemo hu maleteʼna lapa maesiya kolaʼnimo aiʼna lakiguve.

²¹ Afiyo, huno, nagae kutulu yaʼmo neʼniya vekamo ayaʼmo hiʼyalamuteʼmo haneʼniye.

²² Vemo Mafaʼnemoʼmo Gotiʼa lekana paino ateʼniya kateʼmo afaʼa neʼviyaʼmonanafa vaehae agaemo kutulu yaʼmo neʼniya vekamoʼmo lusi kava huno kage kage huno yulagefaʼmo aigiye, huno hapa paiʼnigeʼapaeʼmo

²³ apakaiʼapimo ge huge afige huʼapaeʼmo, lagaepatiʼmo ina laʼmo ani kavaʼmo hugiye, huʼa huʼnae.

Ina laʼmo lagaepatiʼmo hogote vekamo maiʼniye, huʼa huteʼa ge vaiʼnaya gemae

²⁴ Geʼamo neʼafiya vayaʼmogi apakaiʼapieʼmo huʼapaeʼmo, lagaepatiʼmo ina laʼmo hogote vekamo maiʼniye, huʼa huteʼa ge vaiʼnae.

²⁵ Yesuʼa hunoʼaeʼmo, ma mopafi vayaʼmogi alaʼapimo maiʼneʼa yagaiʼa neʼapataya vayaʼmogi aliʼa afepi apatesayafeʼmo yagaiʼa neʼapatae. Muki vayaʼamogi huʼapaeʼmo, alagepa huʼa laha maeteʼa yagaiʼa nelataya vayane, huʼa hisayafekeʼmo hapauʼniye.

²⁶ Ani agufa kavaʼmo nehayaʼmonanafa lapakaemo ani agufa kavaʼmo osiyo. Lapakaepatiʼmo hogote vekamoʼmo henaga vekagana huno maino. Lapakaeteʼmo yagaino lapatesiya vekamo aliʼyaʼmo neʼaliya vekagana huno maino. Hiʼyalamuteʼmo siyateʼmo fai maiʼniya vekamo hogote vekamo maiʼnifi neʼyaʼmo alino neʼapamiya vekamo hogote vekamo maiʼniye.

²⁷ Hiʼyalamuteʼmo maiʼneno neʼyaʼmo neʼniya vekamo hogote vekamo maiʼniyaʼmonanafa nagaemo neʼyaʼmo alino nelapamiya vekagana huʼna maiʼnove.

²⁸ Namalageka nehagetapaeʼmo oʼnataleta nagaeʼeʼmo magokepiʼmo lokaeta maime maime eʼnae.

²⁹ Afoʼnimoʼmo ala vekaʼapimo yagaika apatesana vekae, huno lekana paino nateʼniya kavaʼmo huʼna yagaita apatesaya vayane, huʼna lekana paiʼna lapateʼnove.

³⁰ Yagaiʼna apatesuva koteʼmo hiʼyalamuʼnileʼmo siyateʼmo fai maiʼnetapa neʼyaʼmo nege aniʼmo nege huta maiʼnetapaeʼmo Isaleli vayaʼmo tuolofuʼa nofi vayaʼaiteʼmo yagaiʼa neʼapataya vayaʼai siyateʼmo fai maiʼnetapa yagaita apatesayafeʼmo lekana paiʼna lapateʼnove, huno hapa paiteno

³¹ Pitafeʼmo hunoʼaeʼmo, Saimoniyo, Saimoniyo, huʼna, Sataniʼa Gotifeʼmo hunoʼaeʼmo, apakaemo apavaleka namigeʼnao haiya agufa kavaʼmo hisafigeʼna apamalageka huʼna apakegauve, huno ha paiʼniye.

³² Ha paiʼniyaʼmonanafa kagesamo afika fatago nehana kavakamo hano osisiyafeʼmo nunumuʼmo huʼna kateʼnovaʼmofeʼmo kaipamo alika afe letekaeʼmo konagakamogimo alika lokiya vaika apato, huno ha paiʼnigenoʼaeʼmo,

³³ Ala kava nene, huno, ago alo huʼnovanagetaʼa kagaeʼeʼmo magokepiʼmo kalavusi hutetaʼa faliguʼae, huno ha paiʼnigenoʼaeʼmo,

³⁴ Pitao, huno, nagaemo kaha nepauve, kokolemoʼmo age oʼaiʼnisigeka ani afinaʼmo loleʼe magoʼe afinaʼmo nagaefeʼmo hukaeʼmo, oʼageʼnova vekae, huka hugane, huno ha paiʼniye.

Yesuʼa hosu afinaʼmo afole aigiyanagi alo hiyo, huno hapa paiʼniya gemae

³⁵ Yesuʼa hunoʼaeʼmo, monitapigi kutapigi sutapigi hutapa alinita oʼviyo, huʼna lapa paiteʼna aliʼna lapateʼnogeta uʼnaya afinaʼmo mago yatapimo ohaneʼnifiye, huno ge huno apafi geʼnigeʼapaeʼmo, haʼao, muki yatimo afaʼa haneʼniye, huʼa ha paiʼnagenoʼaeʼmo,

³⁶ haneʼniyaʼmonanafa hemenimo monitapiʼe kutapiʼeʼmo haneʼnisiya vayaʼmogitapamo alo hiyo. Naipeʼamo oʼaliʼnisiya vekamoʼmo yasi siyotiʼamo alininuno maleʼnisigeʼa miya faisageno moni aliteno naipeʼamo miya faino.

³⁷ Lapa nepauve, huno, Goti mukufiʼmo avoʼmo kae maleʼniya gemoʼmo hunoʼaeʼmo, keʼaepa gemo amagiʼa neʼatalaya vayapiʼmo maiʼniya vekae, huʼa apakesamo afiʼnae, huno nava gemo huno avoʼmo kae maleʼniya gemo afole aigiye. Muki kavaʼaeʼmo nava gemo huʼa avoʼmo kae maleʼnaya gemo afole neʼaiye, huno hapa paiʼnigeʼapaeʼmo,

³⁸ Ala kava nene, huʼa, ago, lole naipelaʼmo haneʼniye, huʼa ha paiʼnagenoʼaeʼmo, alagine, huno hapa paiʼniye.

Yesuʼa Alifiʼaepa avefiʼmo uno haino nunumuʼmo huʼniya gemae

³⁹ Taonifatiʼmo ataleno uno Alifiʼaepa avefiʼmo nunumuʼmo nehiya yategamo neʼvigeʼapaeʼmo geʼamo neʼafiya vayaʼmo akame huʼa uʼnae.

⁴⁰ Uʼa avaʼyi huteʼapaeʼmo, lapamalageka hisiya kavapiʼmo haita ofalesayafeʼmo nunumuʼmo hiyo, huno hapa paiteno

⁴¹ apatalenuno yafa kayoʼmo yaga aunageno uno nehaneya agufa afafaleʼmo uno aleʼya faiʼneno nunumuʼmo hunoʼaeʼmo,

⁴² Afo, huno, kapufiʼmo atu ofa anikana huno haneʼnigi oʼnesuvafeʼmo kahauʼnisiyana alika atalo, huʼna huvaʼmonanafa nagaemo nahauʼniya kavaʼmo akame osuka kagaikamo kahauʼnisiya kavaʼmo akame huvo, huno nunumuʼmo huʼniye,

⁴³ Mago enisole vekamo kokuʼnapatiʼmo emineno agaemo lokiya vaino ateʼniye.

⁴⁴ Lusi kava huno kana hauʼnigeno aipafiʼmo kaveta hugekana huʼnigeno maiʼnenoʼaeʼmo magoʼe huno lokiya vaino nunumuʼmo nehigenoʼaeʼmo amuko hauteno haisemoʼmo kolakana huno lusi kava huno mopafiʼmo lape tape huno asagauno aiʼniye.

⁴⁵ He tino eno geʼamo neʼafiya vayaʼmo apakeyana apaipamoʼmo kana huʼniyaʼmofeʼmo apau kaleʼa maiʼnageno apakeʼniye.

⁴⁶ Agaemo hunoʼaeʼmo, na kava higetapaeʼmo lapau kaleta maiʼnae. Lapamalageka hisiya kavapiʼmo haita ofalesayafeʼmo he tita nunumuʼmo hiyo, huno hapa paiʼniye.

Yesuʼmo atafauʼa kalavusi huʼa ateʼnaya gemae

⁴⁷ Ani gemo huno hapa nepaigeʼapaeʼmo asole vayaʼmo Yutasiʼa tuolofuʼa vayapati vekamo akame huʼa eʼnae. Agaemo Yesuʼmo haeno nesiyafeʼmo haopaleʼmo eʼnigenoʼaeʼmo

⁴⁸ Yesuʼa hunoʼaeʼmo, Yutasiyo, huno, Vemo Mafaʼnemo kame vayaʼamogi apayapiʼmo avaleka apamisanafeʼmo haeka neʼnapiye, huno ha paiʼnigeʼapaeʼmo

⁴⁹ agaeʼeʼmo lokaeʼa maiʼnaya vayaʼmogi agaetegamo na agufa kavaʼmo afole aisifi huʼa ageʼa maiʼneʼapaeʼmo, Ala kava nene, huʼa, naipetiletiʼmo apaisupiye, huʼa ge huʼa afi geʼapaeʼmo

⁵⁰ apakaepatiʼmo mono huʼa neʼapataya vayaʼaiteʼmo yagaino neʼapateya vekamo aliʼyaʼamo neʼaliya vekamo agesamo heno lafe hutalegeno asagauno aiʼniye.

⁵¹ Yesuʼa hunoʼaeʼmo, ina kavaʼmo osuta afaʼa ataleyo, huno hapa paiteno agesaleʼmo ame aliteno halate alino maleno kamaeno ateʼniye.

⁵² Yesuʼa mono huʼa neʼapataya vayaʼaiteʼmo yagaiʼa neʼapataya vayaʼaifenagi mono noteʼmo neʼyagaiya vayaʼaiteʼmo yagaiʼa neʼapataya vayaʼaifenagi vayatama vayaʼaifenagi huno hapa painoʼaeʼmo, vayaʼmo apamagiteno kumayaʼmo neʼaliya vekamo kalavusi huʼa atesayafeʼmo naipe alige kayoʼmo alige huliʼa neʼaya agufa kavaʼmo hutapa kalavusi huta natesayafeʼmo neʼafiye.

⁵³ Nagaemo lapakaeʼeʼmo muki afinaʼae afinaʼaeʼmo alopa mono nopiʼmo maiʼnogetapaeʼmo oʼnatafauʼnayaʼmonanafa hemenimo lapakaemo ani kavaʼmo hisayafeʼmo hani nehiya kavateʼmo neʼyagaiya vekamo himamuʼaletiʼmo hisiya afinaʼmo ago afole aiʼnigetapaeʼmo nehae, huno hapa paiʼniye.

Pitaʼa Yesufeʼmo oʼageʼnova vekae, huno huʼniya gemae

⁵⁴ Apakaemo kalavusi huʼa ateteʼa avaleli uʼa mono huʼa neʼapataya vayaʼaiteʼmo yagaino neʼapateya vekamo nopiʼmo uʼa haiʼnageno Pitaʼa apasa hulino uʼniye.

⁵⁵ Kumateʼmo ata kaeteʼa loto huʼa maiʼnagenoʼaeʼmo Pitaʼa eno apakaeʼeʼmo magokepi ataleʼmo loto huʼa maiʼnae.

⁵⁶ Mago a kanomoʼmo aliya neʼaliya a kanomoʼa eno ageyana atamoʼmo aeno ha leya yateʼmo Pitaʼa maiʼnigeno aulu haeno agetenoʼaeʼmo, ani vekamo agaeʼeʼmo magokepi lokaeno neʼmaiya vekae, huno nehigenoʼaeʼmo,

⁵⁷ Ane, huno, nagaemo oʼageʼnova vekae, huno ha paiʼniye.

⁵⁸ Aise afinaʼmo utegeno alu vekamoʼmo agetenoʼaeʼmo, kagaemo apakaepati vekamo maiʼnane, huno huʼnigenoʼaeʼmo, ma vekae, huno, nagaemo apakaepati vekamo oʼmaiʼnove, huno ha paiʼniye.

⁵⁹ Magoʼe huno aise afinaʼmo utegeno mago alu vekamoʼmo lokiya gefatiʼmo hunoʼaeʼmo, ani vekamo Galeliya kotega vekamo maiʼniyaʼmofeʼmo agaeʼeʼmo magokepi lokaeno neʼmaiya vekae, huno huge huge huno maiʼnigenoʼaeʼmo

⁶⁰ Pitaʼa hunoʼaeʼmo, ma vekae, huno, oʼafuva agufa gemo nehanagi na agufa yane huka nehane, huno nehigenoʼaeʼmo kokolemoʼmo age aiʼnigenoʼaeʼmo

⁶¹ Ala kava neʼmoʼa aino afe leno Pitana ageʼniye. Ala kava neʼmoʼa hogoteno Pitafeʼmo hunoʼaeʼmo, kokolemoʼmo age oʼaiʼnisigeka loleʼe magoʼe afinaʼmo nagaefeʼmo hukaeʼmo, oʼageʼnova vekae, huka hugane, huno ha paiʼniya geeʼmo agesamo afino ho hutenoʼaeʼmo

⁶² malaga uno lamino aipafatiʼmo atu haegekana huʼnigeno aviʼyaʼmo huʼniye.

Yesufeʼmo kigi huʼa ateteʼa amagiʼnaya gemae

⁶³ Yesuʼa atafauʼnaya vayaʼmogimo kigi huʼa atege amagige huteʼapaeʼmo

⁶⁴ lavolavoletiʼmo aulagafiʼmo aiʼa ati kaeʼa ateʼneʼa eʼa amagite amagite huteʼapaeʼmo, ina laʼmo kamagiʼnifigi kaune gemo huka laha paiyo, huʼa ge huʼa afi geʼnae.

⁶⁵ Magoʼe magoʼe gemo huteʼa huʼa faipa huʼa ateʼnae.

Kanisole vayaʼmogimo agoti huʼa ateʼnaya gemae

⁶⁶ Gotilamiyapiʼmo kanisole vayanagi vayatama vayanagi mono huʼa neʼapataya vayaʼaiteʼmo yagaiʼa neʼapataya vayanagi keʼaepa gemo avoʼmo kaeʼa aliʼa apaya neʼmalaya vayanagi huʼa eʼa aliʼa anupa huteʼa Yesuʼmo kanisole vayaʼaitegamo avaleliʼeʼapaeʼmo,

⁶⁷ Kalaisi vekamo maiʼnisanana laha paiyo, huʼa ha paiʼnagenoʼaeʼmo, lapa paisuvana lapakesamo afita fatago osugae.

⁶⁸ Loka huʼna lapafi gesuvana lapakaemo geʼnileʼmo aeta atagaina huta naha paitetapaeʼmo afaʼa oʼnatalegae.

⁶⁹ Ani afinaʼmo utesigeno Vemo mafaʼnemoʼmo uno haino himamuʼaʼe vekamo Gotiʼa lamaga haopaleʼmo fai maigiye, huno hapa paiʼnigeʼapaeʼmo

⁷⁰ inagi kagaemo hukaeʼmo, Goti Mafaʼneʼamo maiʼnove, huka nehapiye, huʼa ge huʼa afi geʼnagenoʼaeʼmo, lapakaitapimo ani gemo alagi nehae, huno hapa paiʼnigeʼapaeʼmo,

⁷¹ magoʼe huʼa faigoko gemo hisageta afisuna gemo alagi ohaneʼniye. Agaiʼamo ani gemo avayafatiʼmo ago higeta alagi afune, huʼa huʼnae.