Luki 18 - The Keyagana NT and 25 OT books

Kogu aʼe agoti gemo neʼafiya vekaʼefeʼmo huʼniya gemae

¹ Agaemo vayaʼmogimo muki afinaʼmo nunumuʼmo hisaya kavafeʼmo alagaʼmo hapaesigeʼa oʼatalesaya kavafeʼmo ani agufa gemo huno aeno kalafefa gemo huno hapa paiʼniye.

² Agaemo hunoʼaeʼmo, mago agoti gemo neʼafiya vekamo mago taonifiʼmo maiʼniya vekamoʼmo Gotifeʼmo koli osuge muki vayaʼaifeʼmo koli osuge huno maiʼniye.

³ Maiʼnigenoʼaeʼmo ani taonifiʼmo mago kogu a kanomoʼmo muki afinaʼaeʼmo ani vekalegamo uno ha painoʼaeʼmo, kame huno neʼnateya vekamoʼmo nagaetegamo hosu kavaʼmo nehiyanagi alika fako huka laʼato, huno ha paige ha paige huno maiʼniye.

⁴ Hogoteno ha oʼmaeʼniyaʼmonafa henagaʼamo aipafiʼmo agesamo afinoʼaeʼmo, Gotifeʼmo koli osuge vayaʼaifeʼmo koli osuge huʼnovaʼmonanafa

⁵ mani kogu a kanomoʼmo lusi kava huno alagaʼmo neʼnahaeya agufa gemo nehiyanageʼna afaʼa aliʼna fako huʼna ategauve. Aliʼna fako huʼna oʼatesuvana muki afinaʼmo ege ege huno maisigeno magoʼe huno lusi kava huno alagaʼmo nahaegaiye, huno agesamo afiʼniye.

⁶ Ala kava neʼmoʼa hunoʼaeʼmo, hosu vekamoʼmo agoti gemo neʼafisiya vekamo geʼamo afiyo.

⁷ Gotiʼa lekana paino apateʼniya vayaʼmogi muki felugaʼaʼe haniʼilagaʼaʼeʼmo aukaya huʼa ge huʼa afige afige nehisagenoʼaeʼmo ani kavaʼmo huno afiteno alino fako huno apateteno afaʼa hapa oʼmaegaifiye. Yatala afinaʼmo apakava maisiyaʼmoʼmo afaʼa hapa maegaiye.

⁸ Lama gemo lapa nepauve, huʼna, malage huno alino fako huno apateteno hapa maegaiyaʼmonanafa Vemo Mafaʼnemo emineno apakesamo afiʼa fatago nehaya vayaʼaina kahauya huno apakesifiye, huno hapa paiʼniye.

Falasi vekaʼe takesi monimo neʼaliya vekaʼefeʼmo huʼniya gemae

⁹ Mago vayaʼmogi Gotifeʼmo apakesamo oʼafiʼa apakaiʼapiyekeʼmo aliʼa amufa apamiʼapaeʼmo, lagaemo alagepa vayaʼmo maiʼnonageʼa alu vayaʼmo afaʼa ina agufa vayaʼmo maiʼnae, huʼa nehaya vayaʼaifeʼmo Yesuʼa ina gemo huno aeno kalafefa gemo huno hapa paiʼniye.

¹⁰ Lole vekalaʼmoganimo nunumuʼmo hisaʼafeʼmo Yu vayaʼai alopa mono nopiʼmo uʼana haiʼnaʼae. Mago vekamo Falasi vekamo maiʼnigeno alu vekamo takesi moni neʼaliya vekamo maiʼniye.

¹¹ Falasi vekamoʼmo he tino maiʼneno agaiʼaeʼmo nunumuʼmo huʼniye. Nunumuʼmo hunoʼaeʼmo, Gotiyo, huno, muki alu vayakana huʼna oʼmaiʼnovaʼmofeʼmo kahao keʼmo nehove. Mago kanale kavaʼmo osuge aigofe gemo huteʼa kumayaʼmo alige kumai kavaʼmo huge nehaya vayakana huʼna oʼmaiʼnove. Ani takesi monimo neʼaliya vekagana huʼna oʼmaiʼnove.

¹² Nagaemo muki saleʼae saleʼaeʼmo neʼyaʼmo neteʼna lole afinaʼmo oʼneʼna mo siʼnove. Nagaemo muki aliʼnova yapatiʼmo naeniʼa yaʼmo aliteʼna magoke yaʼmo nekamuve, huno nunumuʼmo huʼniye.

¹³ Huʼniyaʼmonanafa takesi monimo neʼaliya vekamo afagiʼaleʼmo he tino maiʼneno alino maku huno oʼageʼneno haifiʼyaleʼmo neʼamaginoʼaeʼmo, Gotiyo, huno, alagi hosu vekamo maiʼnovanagi kaipamo lanitani huka nateteka kahau huka nato, huno nunumuʼmo huʼniye.

¹⁴ Lapa nepauve, huno, Gotiʼa takesi moni neʼaliya vekaeʼmo hunoʼaeʼmo, naulagaleʼmo fatago vekamo maiʼnane, huno ha paiʼnigeno noʼalegamo fatago vekamo uno maiʼniyaʼmonanafa alu vekamo mago yaʼmo oʼalino afaʼa uʼniye. Gotiʼa muki vayaʼmogimo apakaiʼapi apakiʼapileʼmo aliʼa asaga huʼa neʼatesaya vayaʼai apakiʼapileʼmo alino afepi apategaiyaʼmonanafa Gotiʼa apakaiʼapi apakiʼapileʼmo aliʼa afepi neʼatesaya vayaʼai apakiʼapileʼmo alino asaga huno apategaiye, huno hapa paiʼniye.

Yesuʼa aise mafaʼne anagaʼmo alino auleno apateʼniya gemae

¹⁵ Yesuʼa aise mafaʼne anagaʼai apakufaleʼmo ayaʼmo malesiyafeʼmo apavaleliʼa eʼnageʼapaeʼmo geʼamo neʼafiya vayaʼmogi apaketeʼapaeʼmo ge hapauʼnae.

¹⁶ Ge hapauʼnayaʼmonanafa Yesuʼa aise mafaʼne anagaʼaifeʼmo hunoʼaeʼmo, nagaetegamo eyo, huno huteno, ka akanita apateteta nagaetegamo oʼmeyo, hutapa osiyo. Gotiʼa yagaino neʼapateya kegiʼyafiʼmo ani agufa mafaʼnegana vayaʼmo uʼa haiʼa maigae.

¹⁷ Lama gemo lapa nepauve, huno, vayaʼmogi Gotiʼa yagaino neʼapateya yaʼmo aise mafaʼnemogi neʼaliya kava huʼa noʼalisayana Gotiʼa yagaino neʼapateya kegiʼyafiʼmo afaʼa uʼa ohaigae, huno hapa paiʼniye.

Asole kagemi yaʼamo haneʼniya vekamo Yesutegamo eʼniya gemae

¹⁸ Mago yagaino neʼapateya vekamoʼmo Yesufeʼmo hunoʼaeʼmo, alagepa tisao, huno, alagepa huʼna maige maige huʼna maisuva yaʼmo alisuvafeʼmo na agufa kavaʼmo hisuve, huno ge huno afi geʼnigenoʼaeʼmo,

¹⁹ na kava higekaeʼmo nagaefeʼmo alagepa tisao, huka nehane. Ma mopafi vayapatiʼmo mago alagepa vayaʼmo oʼmaiʼnafa Gotikeʼmo magokeʼageʼmo alagepa vekamo maiʼniye.

²⁰ Goti keʼaepa geʼamo ago afiʼnanana, kumai kavaʼmo osuvo, vayaʼmo kamitimo apamagigeʼa ofaliyo, kumayaʼmo oʼaliyo, aigofe gemo osuvo, itakaʼafokalaʼmogani anaiyafiʼmo maiʼneka geʼanimo afiyo, huno ha paiʼnigenoʼaeʼmo,

²¹ mafaʼnemo maiʼnova afinatetiʼmo muki ani keʼaepa gemo akame hume hume eʼna hemeniʼeʼmo akame nehuve, huno ha paiʼnigeno

²² Yesuʼa ani gemo afitenoʼaeʼmo, magoke kavaʼatokamo aeka aga seʼnane. Muki kagemi yakamo alika maketi hugeʼa miya faitesageka alisana monimo alika fako huka kagemi yaʼapimo ohaneʼnisaya vayaʼaina apamigenoʼao alagepa yakamo kokuʼnapiʼmo haneno. Ani kavaʼmo hutekaeʼmo eka nakame huvo, huno ha paiʼnigeno

²³ ani gemo afitenoʼaeʼmo asole kagemi yaʼamo haneʼniyaʼmofeʼmo lusi kava huno aipamoʼmo kana huʼnigeno

²⁴ hosu augosamo kaliʼnigeno Yesuʼa agetenoʼaeʼmo,

²⁵ kamo afugefamoʼmo nekaya kapiʼmo faleno uno haisiyafeʼmo aiseʼamo lokiya vaiʼniya agufa kavaʼmo haneʼniyaʼmonanafa mago kagemi yaʼe vekamoʼmo Gotiʼa yagaino neʼapateya kegiʼyafiʼmo uno haisiya kavaʼmoʼmo magoʼe huno lusi kava huno lokiya vaiʼniya kavaʼmo haneʼniye, huno ha paiʼnigeʼa

²⁶ afiteʼapaeʼmo, ina lagimo maige maige huʼa maisaya yaʼmo afaʼa aligae, huʼa ge huʼa afigeʼnagenoʼaeʼmo,

²⁷ vayaʼmogimo alagi afaʼa osisaya agufa kavaʼmo Gotiʼa afaʼa hugiye, huno hapa paiʼnigeno

²⁸ Pitaʼa hunoʼaeʼmo, afiyo, huno, lagaemo muki yatimo ago ataleta eta kakame nehune, huno ha paiʼnigenoʼaeʼmo,

²⁹ lama gemo lapa nepauve, huno, muki vayaʼmogi Gotiʼa yagaino neʼapateya kavatefeʼmo noʼapigi aʼneʼapigi konagaʼapigi itaʼapi afoʼapimogimo mafaʼneʼapigi huʼa apataleʼeʼa maiʼnisaya vayaʼmo

³⁰ ma mopafi maiʼnagenoʼaeʼmo Gotiʼa lusi kava huno magoʼe yaʼmo fikumo neʼapamiyanageno henagaʼamo afole aisiya afinaʼmo alagepa huʼa maige maige huʼa maigae, huno hapa paiʼniye.

Yesuʼa napa tali afinaʼmo, faliteʼna he tiguve, huno hapa paiʼniya gemae

³¹ Yesuʼa tuolofuʼa vayaʼmo apaote apavalelinunoʼaeʼmo, afiyo, huno, Yulusalemu taonifiʼmo neʼvisunagenoʼaeʼmo akeyaʼvilagamo Gotitegati gemo alini eʼa aeʼa hakalo huʼa hapa nepaiya vayaʼmogimo Vemo Mafaʼneeʼmo ava gemo huʼa avoʼmo kae maleʼnaya kavaʼmo afole aigiye.

³² Avaleli uʼa alu vayaʼai apayapiʼmo apamisageʼapaeʼmo hosu kigi huʼa atege huʼa faipa huʼa atege apavenatuʼnaʼmo heʼa atege

³³ nofi kayotetiʼmo amagige huteʼa kamitimo amagisageno faliteno loleʼe magoʼe afinaʼmo utesigeno halate he tigiye, huno hapa paiʼnigeʼapaeʼmo

³⁴ afiʼa aeto osuʼnae. Ani gemo aepaʼamo afiʼa aeto osisaya agufa gemo fala kiʼniya gemo haneʼniyaʼmofeʼmo alagepa huʼa oʼafiʼnae.

Yesuʼa aulagamo ali huʼniya vekamo alino ayakeno ateʼniya gemae

³⁵ Yesuʼa Yeliko taonimo haopaleʼmo neʼegenoʼaeʼmo mago aulaga ali huʼniya vekamo ka agiʼnaleʼmo maiʼnenoʼaeʼmo muki vayaʼaifeʼmo monieʼmo aukaya huge huge huno maiʼniye.

³⁶ Asole vayaʼmo eʼa aiʼa aga seʼa ute ute huʼnageno apaiya gemo afitenoʼaeʼmo, na agufa kavaʼmo nehae, huno ge huno apafi geʼnigeʼapaeʼmo,

³⁷ Yesuʼa Nasalasa taonifi vekamo neʼe, huʼa ha paiʼnageno afitenoʼaeʼmo

³⁸ alopa gefatiʼmo hunoʼaeʼmo, Neviniʼa ala kini vekamo aginagomo Yesuvo, huno, kahau huka nato, huno ge huʼnigeʼa

³⁹ hogoteʼa eʼnaya vayaʼmogimo huʼapaeʼmo, ge osuka afaʼa maiyo, huʼa ge hauʼnayaʼmonanafa magoʼe huno ge hunoʼaeʼmo, Neviniʼa ala kini vekamo aginagomo, huno, kahau huka nato, huno ge huʼnigeno

⁴⁰ Yesuʼa eno he tino maiʼnenoʼaeʼmo, avalelita eyo, huno hapa paiʼnigeʼapaeʼmo avaleliʼa eʼnagenoʼaeʼmo,

⁴¹ kagaemo na kavaʼmo huʼna katesuvafeʼmo nehane, huno ge huno afi geʼnigenoʼaeʼmo, Ala kava nene, huno, naulagaʼnimo alika ayakeka nato, huno ha paiʼnigeno

⁴² Yesuʼa hunoʼaeʼmo, kaulagamo afa ageka ayako. Nagaefeʼmo kagesa afika fatago huʼnana kavakamoʼmo alino ayakeno kateʼniye, huno ha paiʼnigeno

⁴³ malage huno aulagamo ageno ayaketeno akame huno neʼunoʼaeʼmo Goti agiʼaleʼmo alino asaga hume hume uʼnigeʼa ageteʼapaeʼmo muki vayaʼmogimo Goti agiʼaleʼmo aliʼa asaga huʼa ateʼnae.