Luki 17 - The Keyagana NT and 25 OT books

Apayateʼmo neʼaliya kavafeʼmo huʼniya gemae

¹ Yesuʼa geʼamo neʼafiya vayaʼaifeʼmo hunoʼaeʼmo, Vayaʼmo apayate aligayaʼmonanafa apayateʼmo alisaya vayaʼmo vaehae, huʼna, lusi hanageke yaʼmo aligae.

² Lusi hanageke yaʼmo aligayaʼmonanafa mago vekamoʼmo ani agufa aise mafaʼnemoʼmo hosu kavaʼmo hisiyafeʼmo hogoteno ayateʼmo oʼaliʼnisigeʼapaeʼmo atafauʼa alopa yafateʼmo nofi aeteʼa lugoʼafiʼmo aeteʼa avaleliʼuʼa solovala anipiʼmo yaga auʼa atalesagenoʼaeʼmo aise hanageke yaʼmo aligiye.

³ Lapakaitapileʼmo alagepa huta yagaita lapateyo. Konagakamoʼmo kagaetegamo hosu kavaʼmo huʼnisigekaeʼmo hosu kavaʼmo huʼnane, huka ge hauvo. Aipamo alino afe lesigekaeʼmo hosu kavaʼamo alika atalo.

⁴ Konagakamoʼmo magoke felugamo seveniʼa afinaʼmo kagaetegamo hosu kavaʼmo huteno seveniʼa afinaʼmo enoʼaeʼmo, kagaetegamo hosu kavaʼmo huʼnovanageʼna magoʼe huʼna ani agufa hosu kavaʼmo osuguve, huno hisigekaeʼmo hosu kavaʼamo alika atalo, huno hapa paiʼnigeʼa

⁵ apa vayaʼamogi huʼapaeʼmo, lagesamo afita fatago huʼnona kavatileʼmo magoʼe huka alika ko sika ato, huʼa ha paiʼnageno

⁶ Ala kava neʼmoʼa hunoʼaeʼmo, lapakesamo afita fatago huʼnaya kavaʼmo aise avina yakana huno haneʼnisiyaʼmoʼmo mago yosaeʼmo hutapaeʼmo, kagaemo kahafuʼyaʼaʼeʼmo aika lamika halagatika uka anipatiʼmo halate hageka uka haiyo, hutapa hisagenoʼaeʼmo getapimo afaʼa afigiye, huno hapa paiʼniye.

Aliʼyaʼmo neʼaliya vayaʼaifeʼmo huʼniya gemae

⁷ Lapakaepatiʼmo aliʼyatapimo neʼaliya vekatapimoʼmo mopafiʼmo aiʼyumo aiʼnisifi sipisipileʼmo yagaino apateʼnisifi huno maiʼneno esigekaeʼmo, malage huka eka haikeka hiʼyalamuteʼmo maiʼneka neʼyaʼmo no, huka ha paigapiye.

⁸ Haʼao, ani gemo osuganaʼmonanafa hogoteka neʼyaʼnimo kaeka hatika nateʼneka aliʼya kukenakamo vailiʼneka neʼyaʼnimo alinikeka namiyo. Namigeʼna netesugeka kagaemo henagaʼamo negane, huka ha paigane.

⁹ Geʼamo akame nehiyaʼmofeʼmo kahao ke hove, huno hugifiye. Haʼao.

¹⁰ Ani kavaʼmo hutapa Gotiʼa muki lapa paiʼniya geʼamo afitetapaeʼmo akame huteta ani gemo hutapaeʼmo, aliʼyaʼmo neʼaluna vayaʼageʼmo maiʼnone. Alagepa kavaʼmo afaʼa osuʼnonaʼmonanafa aliʼyatigekeʼmo aliʼnone, hutapa hiyo, huno hapa paiʼniye.

Yesuʼa teniʼa vayaʼmo lepolosi yaʼmo hapauʼniya vayaʼmo alino hapageno apateʼniya gemae

¹¹ Yesuʼa Yulusalemu taonifiʼmo ugefeʼmo uno Sameliya koʼmo hanete Galeliya koʼmo hanete hutegeno folagapi haneʼniya kateʼmo uteno

¹² mago taonifiʼmo uno haigefeʼmo nehigeʼapaeʼmo teniʼa lepolosi vayaʼmo eʼa fotu hugefeʼmo muga afagiʼaleʼmo eʼa he tiʼa maiʼneʼapaeʼmo

¹³ alopa gefatiʼmo huʼapaeʼmo, Yesuvo, huʼa, Ala kava nene, huʼa, kahau huka lato, huʼa ha paiʼnageno

¹⁴ Yesuʼa apaketenoʼaeʼmo, uta mono huʼa neʼapataya vayaʼmo lapakufamo alita apave liyo, huno hapa paiʼnigeʼapaeʼmo kategamo neʼvagenoʼaeʼmo apakufalafaʼmo alino hamaleʼniye.

¹⁵ Ani vayapatiʼmo mago vekamoʼmo agufalegamo ageyana agufalafaʼmo alino hamaleʼnigeno agetenoʼaeʼmo aino atagi neno enoʼaeʼmo alopa gefatiʼmo Goti agiʼaleʼmo alino asaga hulino eno

¹⁶ Yesu aiyafiʼmo agoʼya faiteno hao ke heʼniye. Ani vekamo Sameliya kotega vekamae.

¹⁷ Yesuʼa ani vekamo agetenoʼaeʼmo, teniʼa vayaʼmo aliʼna hapageʼna apateʼnovana naeniʼa vayaʼmo haiyaʼalega maiʼnae.

¹⁸ Na kava higenoʼaeʼmo mani magoke alu nofi vekamoʼmo Goti agiʼaleʼmo alino asaga huno atesiyafeʼmo eʼniye, huno hapa paiteno agaefeʼmo hunoʼaeʼmo,

¹⁹ kagesamo afika fatago huʼnana kavakamoʼmo alino kahageno kateʼniyanagi he tika afaʼa uvo, huno ha paiʼniye.

Gotiʼa yagaino neʼapateya kavafeʼmo huʼniya gemae

²⁰ Mago Falasi vayaʼmogimo Yesufeʼmo huʼapaeʼmo, hainu afinaʼmo Gotiʼa yagaino apatesiya kavaʼmo afole aigiye, huʼa ge huʼa afi geʼnagenoʼaeʼmo, Gotiʼa yagaino apatesiya kavaʼmo afole aisiyaʼmoʼmo muki vayaʼmogimo apaulagafatiʼmo oʼagegae.

²¹ Vayaʼmogi huʼapaeʼmo, manile afole aiʼniye, huʼa osuge, mugalega afole aiʼniye, huʼa osuge hugae. Afiyo, huʼna, Gotiʼa vayaʼai apaipafiʼmo yagaino neʼapate, huno hapa paiʼniye.

²² Geʼamo neʼafiya vayaʼaifeʼmo hunoʼaeʼmo, henagaʼamo lapakaemo hutapaeʼmo, Vemo Mafaʼnemo aise afinaʼmo agesunafeʼmo nehune, hutapa hugayana oʼnagegae.

²³ Mago vayaʼmogi lapakaefeʼmo huʼapaeʼmo, mugalegamo uta ageyo, huʼa lapa paige, manileʼmo eta ageyo, huʼa lapa paige hisagetapaeʼmo geʼapimo afiteta uta apakame osiyo.

²⁴ Alino alave alave nehigenoʼaeʼmo muki kokuʼnateʼmo aeno ha legeʼapaeʼmo muki vayaʼmogi neʼagaya kava huno Vemo Mafaʼnemo eminesigeʼa agegae.

²⁵ Eminegaiyaʼmonanafa hogoteno lusi kava huno agafu yaʼmo alisigeʼapaeʼmo hemeni afinaʼmo maiʼnaya vayaʼmogimo apakameʼyamo amigae.

²⁶ Novaʼa maiʼniya afinaʼmo haiya agufa kavaʼmo huʼa maiʼnafi Vemo Mafaʼnemo afinaʼeʼmo ani agufa kavakeʼmo huʼa maigae.

²⁷ Neʼyaʼmo nege aniʼmo nege aʼmo alige aʼmafaʼnemo lagauliʼa uge hume hume neʼagenoʼaeʼmo Novaʼa sipifiʼmo uno haino maiʼnigenoʼaeʼmo aniʼmo heteno muki vayaʼmo ago aeno apati kaeʼniye.

²⁸ Ani kavaʼmo huʼa Lotiʼa maiʼniya afinaʼmo neʼyaʼmo nege aniʼmo nege mago yaʼmo miya faige maketi huge hoyamo vaige noʼmo kige hume hume neʼagenoʼaeʼmo

²⁹ Lotiʼa Sotomi taonifatiʼmo ataleno neʼvigenoʼaeʼmo ani afinaʼmo ataʼe atamo neleya yafaʼeʼmo ko aigekana huno kokuʼnapatiʼmo emineno muki vayaʼmo apaleno pasaga liʼniye.

³⁰ Ani agufa kavakeʼmo huʼa maiʼnisageno Vemo Mafaʼnemo afole aigiye.

³¹ Ani afinaʼmo kumatega maiʼnisaya vayaʼmogi noʼapifatiʼmo kagemi yaʼapimo alisayafeʼmo uʼa ohaiyo. Hoyalegamo maiʼnisaya vayaʼmogi noʼapilegamo halate oʼviyo.

³² Lapakaemo Loti aʼaʼmoʼmo huʼniya kavafeʼmo lapakesamo afita ho hiyo.

³³ Ina lagimo ma mopafiʼmo alagepa huʼa maige maige huʼa maisaya kavateʼmo yagaiʼa neʼatesafigeno alagepa huʼa neʼmaisaya kavaʼapimo hano hugiyaʼmonanafa ina lagimo alagepa huʼa neʼmaisaya kavaʼapimo ataleʼnisafigeʼa alagepa huʼa maisaya kavaʼapimo aligae.

³⁴ Nagaemo lapa paiʼnaeʼmo ani haniʼilagamo lole vekalaʼmo magoke hipaleʼmo lokaeʼana havaeʼnisaʼageʼapaeʼmo mago vekamo avaleliʼa uteʼa mago vekamo ategae.

³⁵ Lole atalaʼmo magokepi aliʼyaʼmo neʼalisaʼageʼapaeʼmo mago a kanomo avaleliʼa uteʼa mago a kanomo ategae.

³⁶ Lole vekalaʼmo hoyafiʼmo maiʼnisaʼageʼapaeʼmo mago vekamo avaleliʼa uteʼa mago vekamo ategae, huno hapa paiʼnigeʼapaeʼmo,

³⁷ Ala kava nene, huʼa, haiyaʼalegamo ani agufa kavaʼmo afole aigiye, huʼa ge huʼa afi geʼnagenoʼaeʼmo, afu anagaʼmo apakufaʼamo haneʼniya yategamo hakiki anagaʼmo haleli eʼa aliʼa anupa huʼa neʼmaiye, huno hapa paiʼniye.