Luki 13 - The Keyagana NT and 25 OT books

Lapaipamo alita afe olesaya vayaʼmo faligae, huno huʼniya gemae

¹ Ani afinaʼmo mago vayaʼmo Yesutegamo eʼapaeʼmo, Galeliya kotega vayaʼmogi sipisipi ofalinimo neʼamigeʼapaeʼmo Pailati ati vayaʼamogi eʼa hapaeʼnageno sipisipimo kolaʼe vayaʼmogi kolaʼeʼmo magokepi aino lakino haneʼniye, huʼa ha paiʼnagenoʼaeʼmo

² Yesuʼa hunoʼaeʼmo, ani kavaʼmo huteʼa faliʼnayaʼmofeʼmo hosu kavaʼapimoʼmo muki Galeliya kotega vayaʼai hosu kavaʼapimo ago aeno aga seʼniye, huta lapakesamo neʼafifiye.

³ Haʼao, lapaipamo alita afe olesayana ani kavaʼmo huta faligae.

⁴ Silomi kotegamo lusi yatala yafa noʼmo aino halagape vaino asagauno aino eitiniʼa vayaʼmo apamagiʼnigeʼa faliʼnaya vayaʼai hosu kavaʼapimoʼmo muki Yulusalemu taonifiʼmo maiʼnaya vayaʼai hosu kavaʼapimo ago aeno aga seʼniye, huta lapakesamo neʼafifiye.

⁵ Haʼao, lapaipamo alita afe olesayana ani kavaʼmo huta faligae, huno hapa paiʼniye.

Alagamo noʼaeya yosaeʼmo huʼniya gemae

⁶ Inagi mago gemo aeno kalafefa gemo huno hapa painoʼaeʼmo, mago vekamoʼmo hoyaʼafiʼmo fiki yosamo haneʼnigeno yosa alagamo aeʼnisiyaʼaeʼmo agesiyafeʼmo eʼniyana oʼaeʼniye.

⁷ Agaemo yosa hoyaʼafiʼmo aliʼyaʼmo neʼaliya vekaeʼmo hunoʼaeʼmo, loleʼe magoʼe kafugamo eʼna agege agege huʼnovana alagamo oʼaeʼnigeʼna ageʼnove. Lanitani mopamo ago leno hau huʼnigenoʼaeʼmo alagamo noʼaeyanagi heʼya aika atalo, huno ha paiʼnigenoʼaeʼmo,

⁸ aliʼyaʼmo afoʼamofeʼmo hunoʼaeʼmo, hemeni kafugamo afaʼa ato. Mago mopamo aiʼyu aiteʼna malasinimo malegauve.

⁹ Anaga kafugamo alagamo aesiyaʼmoʼmo kanalene. Alagamo oʼaesigekaeʼmo eka heʼya aika atalegane, huno ha paiʼniye, huno hapa paiʼniye.

Yesuʼa akameʼyamo kalagegiʼniya a kanomo alino api aino ateʼniya gemae

¹⁰ Mago Sapati afinaʼmo Yesuʼa Yu vayaʼai mono nopiʼmo uno haino alino apaya neʼmalegenoʼaeʼmo

¹¹ Mago a kanomo eitiniʼa kafugamo akameʼya ayamufamo kalagegiʼnigeno ape hulitata huno maiʼniye.

¹² Mono nopiʼmo maiʼnigeno Yesuʼa agetenoʼaeʼmo, Ane, huno, kakameʼyamo kalagegiʼniya nofikamo hatu maeʼna kateʼnove, huno ha paiteno

¹³ agufaleʼmo ayaʼmo maleʼnigeno malage huno akameʼyamo aino api aiʼnigeno he titenoʼaeʼmo Goti agiʼaleʼmo alino asaga huno ateʼniye.

¹⁴ Ateʼniyaʼmonanafa Yesuʼa Sapati afinaʼmo alino api aino ateʼniya kavafeʼmo monoteʼmo neʼyagaiya vekamoʼmo aipamo leʼnigeno muki vayaʼaifeʼmo hunoʼaeʼmo, sigisiʼa afinaʼmo aliʼyaʼmo alisaya afinaʼmo haneʼniyaʼmofeʼmo alino alagepa huno lapatesiyafeʼmo sapati afinaʼmo oʼmeta alu afinakeʼmo eyo, huno hapa paiʼnigeno

¹⁵ Ala kava neʼmoʼa geʼaleʼmo aeno atagaina huno hapa painoʼaeʼmo, aeta ati nekaya vayane, huno, Sapati afinaʼae afinaʼaeʼmo pulumakatapimofi hositapimofi hutapa noʼapifatiʼmo hatu maeta apateteta aniʼmo nesayafeʼmo apavalelita neʼvae.

¹⁶ Hatu maeta neʼapatayaʼmofeʼmo ani a kanomo Emalehamu aginago a kanomo eitiniʼa kafugamo lusi yatala afinaʼmo Sataniʼmo nofi aeno ateʼnigeno maiʼniya a kanomo hatu maeʼna atesuva kavaʼmo ohaneʼnifiye, huno hapa paiʼnigeʼapaeʼmo

¹⁷ kame vayaʼamogi afiteʼa apavagage huʼniyaʼmonanafa muki vayaʼmogi noʼagaya agufa alagepa kavaʼmo huʼnigeʼa ageteʼapaeʼmo apamogaga aiʼnae.

Masateti avina yaʼe yisiʼefeʼmo aeno kalafefa gemo huʼniya gemae

¹⁸ Agaemo hunoʼaeʼmo, Gotiʼa yagaino neʼapateya kavaʼmo haiya agufa kavakana huno haneʼniye. Gotiʼa yagaino neʼapateya kavafeʼmo haiya agufa gemo huʼna aeʼna kalafefa gemo huguve.

¹⁹ Ina kavakana huno haneʼniyana mago vekamoʼmo masateti avina yaʼmo aise avina yaʼatomogeno hoyamo aliteno hakale maleʼnigeno hageno uno haino mago yosagana huno haneʼnigeno nama anagaʼmo haleliʼeʼa akopaleʼmo hakaleteʼa apanoʼmo ki maleʼnae, huno hapa paitenoʼaeʼmo,

²⁰ Gotiʼa yagaino neʼapateya kavaʼmo haiya agufa kavakana huno haneʼniye.

²¹ Ina kavakana huno haneʼniyana mago a kanomoʼmo falaovafiʼmo atagu fae maleʼnigeno ko nesiya yaʼmo agiʼamo yisimo alino talamufiʼmo haneʼniya falaovafiʼmo atagu fae maleʼnigeno muki falaovafiʼmo uneno huʼnigeno aeno apafuleʼniye, huno hapa paiʼniye.

Aise kipapiʼmo uta haisayafeʼmo lapaya mukiki hiyo, huno huʼniya gemae

²² Yesuʼa muki aise taonifiʼe alopa taonifiʼeʼmo umenitata huno alino apaya malemale malemale hume hume Yulusalemu taonifiʼmo uʼniye.

²³ Mago vekamoʼmo enoʼaeʼmo, Ala kava nene, huno, Gotiʼa magoke magoke vayaʼmogi apakufamo alino katino neʼapatefiye, huno ge huno afi geʼnigenoʼaeʼmo,

²⁴ aise kipapiʼmo uta haisayafeʼmo lapaya mukiki hiyo. Nagaemo lapa paiʼnaeʼmo, asole vayaʼmo uʼa haisayafeʼmo hugayaʼmonanafa afaʼa uʼa ohaigae.

²⁵ Noʼmo afoʼamoʼmo he tino kitamo ki maleʼnisigetapaeʼmo kumatega he tita maiʼnetapaeʼmo kitaleʼmo hakalu hakalu nehutapaeʼmo, Ala kava nene, hutapa, kitamo yakika lato, huta nehisagenoʼaeʼmo, olapakeʼnova vayanagi haiyaʼalegati eʼnae, huno ge huno lapafi gesigetapaeʼmo,

²⁶ kagaeʼeʼmo magokepi lokaeta maiʼneta neʼyaʼmo neʼnone. Kagaemo kumatileʼmo alika laya maleʼnane, hutapa ha paisagenoʼaeʼmo,

²⁷ olapakeʼnova vayanagi haiyaʼalegati eʼnae. Muki vayaʼamogitapamo hosu kavaʼmo nehaya vayanagi nagaetegatiʼmo ataleta lapaune heta viyo, huno lapa paigiye.

²⁸ Lapakaemo alino lapafaino lapatalesigeta maiʼnetapaeʼmo apakesayana Emalehamuʼagi Aisikiʼagi Yekopuʼagi muki vayaʼmo Gotitegati gemo alini eʼa aeʼa hakalo huʼa hapa nepaiya vayaʼeʼmo Gotiʼa yagaino neʼapateya koteʼmo maiʼnisagetapaeʼmo malaga maiʼneta apaketetapaeʼmo aviʼyaʼmo huge lapaipamo leʼninagetapa lapavepiʼmo hanita agafu kige huta maigae.

²⁹ Muki asole vayaʼmo yegemo haine neʼeya kotegatiʼmo ege yegemo uno lamino nefaleya kotegatiʼmo ege aluga aluga haopalegatiʼmo ege huʼa eʼa Gotiʼa yagaino neʼapateya kote hiʼyalamuteʼmo siyate fai maiʼneʼapaeʼmo neʼyaʼmo negae.

³⁰ Afiyo, huno, hemenimo mago henagamo maiʼnaya vayaʼmo hogote vayaʼmo maisageʼa hemenimo mago hogoteʼa maiʼnaya vayaʼmo henaga vayaʼmo maigae, huno hapa paiʼniye.

Yesuʼa Yulusalemu taonifiʼmo maiʼnaya vayaʼaifeʼmo hau huno apateʼniya gemae

³¹ Ani afinaʼmo mago Falasi vayaʼmo Yesutegamo eʼa, Helotiʼa kamitimo kamagisiyafeʼmo nehiyanagi kaune ho, huʼa ha paiʼnagenoʼaeʼmo,

³² ani vekamoʼmo aigofe huteno afela kalamoʼa humi nami kavaʼmo nehiya agufa kalagana huno maiʼniya vekalegamo utapaeʼmo, afiyo, hutapa, hemeniʼe egaʼeʼmo hosu apaune vayaʼmo vayaʼmogi apaipafatiʼmo aliʼna hapa faiʼna apatalege kaita hapauʼnisiya vayaʼmo aliʼna hapageʼna apatege huteʼna olagaʼamo ka atupaleʼmo uʼna avaʼyi huguve, huno huʼniye, huta ha paiyo.

³³ Fiku yanageʼa apakaemo Gotitegati gemo alinineno aeno hakalo huno hapa nepaiya vekamo alu kotegamo amagisageno faligiye. Yulusalemu taonifikeʼmo faligiye.

³⁴ Yulusalemuvo, Yulusalemuvo, huʼna, monoteʼmo yagaiʼnaya vayaʼmogitapamo lapakaemo Gotitegati gemo alini eʼa aeʼa hakalo huʼa hapa nepaiya vayaʼmo apamagige alino apateʼnigeʼa lapakaetegamo uʼnaya vayaʼmo yafa kayotetiʼmo kamitimo apamagige huta neʼmaiya vayane. Kokolemogimo apanaʼaumo aliʼa hapakufiʼmo neʼapataya kava huʼna muki afinaʼmo mafaʼnetapimo nagaetega apavaleliʼna esuvafeʼmo nahauʼniyaʼmonanafa lapakaemo olapauʼniye.

³⁵ Afiyo, huʼna, Gotiʼa ago lapataleno uʼniye. Nagaemo lapa paiʼnaeʼmo oʼnageta maime maime neʼutapaeʼmo Ala kava neʼmo agiʼalefeʼmo neʼeyanagi aulena vekamo maiʼniye, hutapa hisaya afinaʼmo nagegae, huno hapa paiʼniye.