Luki 12 - The Keyagana NT and 25 OT books

Aeʼa ati nekaya kavafeʼmo ehetapiye, huno huʼniya gemae

¹ Muki asole vayaʼmo eʼa aliʼa anupa huʼa faiʼa kili paeʼa maiʼnagenoʼaeʼmo Yesuʼa geʼamo neʼafiya vayaʼaifeʼmo hunoʼaeʼmo, Falasi vayaʼai peleti mayafiʼmo aeno apafu neleya yafeʼmo aeʼa ati nekaya kavafeʼmo ehetapiye.

² Gotiʼa muki huʼa aeʼa ati nekaya kavaʼmo alino afole aino apave ligiye. Muki kavaʼmo huʼa fala nekiya kavaʼmo muki vayaʼai apaulagaleʼmo afole aigiye.

³ Lapakaemo hanipiʼmo nehaya gemo ha leyategamo afole aisigeʼa afigae. Lapakaemo kitamo ki maleʼnetapaeʼmo sumi gefatiʼmo nehaya gemo aliʼa anupa huʼa maiʼnisayateʼmo aeʼa hakalo huʼa hapa paisageʼa afigae.

Vayaʼaifeʼmo koli osutapa Gotifekeʼmo koli hiyo, huno huʼniya gemae

⁴ Nao vayaʼmogitapae, huʼna, ma mopafi vayaʼaifeʼmo koli osiyo. Afaʼa lapaesageta faligayaʼmonanafa magoʼe huʼa lapakafu kisiya yaʼmo aliʼa olapamigae.

⁵ Ina lafeʼmo koli hisafigeʼna lapa paiguve. Afaʼa lahapaesigeta falitesagenoʼaeʼmo himamuʼaletiʼmo alino ata kopiʼmo yaga auno lapatalesiya vekaekeʼmo koliʼamo hiyo. He, agaefekeʼmo koliʼamo hiyo, huʼna nehuve.

⁶ Vayaʼmogimo naya magokayagaʼa aise namamo lole sagalifa monilatetiʼmo miya nefaiyaʼmonanafa Gotiʼa ani agufa magoke namaeʼmo age kanino noʼatale.

⁷ Nama anagaʼmo ina agufa yaʼmo maiʼnagetapaeʼmo aeta apaka seta maiʼnayaʼmofeʼmo Gotiʼa magoʼe huno yagaino lapategaiyanagi koli osiyo. Gotiʼa lapayokaʼmo magoke magoke huno lekana paino ageʼniye, huno hapa paiʼniye.

Yesu vayaʼamo maiʼnone, huʼa aeʼa hakalo huʼa hapa nepaiya kavafeʼmo huʼniya gemae

⁸ Nagaemo lapa paiʼnaeʼmo, vayaʼmogimo mago vayaʼmogi apaulagaleʼmo nagiʼnimo aeteʼapaeʼmo Yesuʼmo akame nehuve, huʼa aeʼa hakalo huʼa hapa nepaisaya vayaʼaifeʼmo Vemo Mafaʼnemoʼmo Goti enisole vayaʼamogi apaulagaleʼmo vayaʼnimo maiʼnae, huno apakimo aegaiye.

⁹ Vayaʼmogimo mago vayaʼmogi apaulagaleʼmo nagiʼnimo oʼaeʼa afaʼa maiʼnisaya vayaʼaifeʼmo Goti enisole vayaʼamogi apaulagaleʼmo vayaʼnie, huʼna apakimo oʼaegauve.

¹⁰ Muki vayaʼmogimo Vemo Mafaʼneeʼmo huʼa faipa huʼa atesaya vayaʼmogi hosu kavaʼapimo Gotiʼa afaʼa alino atalegaiyaʼmonanafa Aote Aunemeʼaeʼmo huʼa faipa huʼa atesaya vayaʼmogi hosu kavaʼapimo alagi alino oʼatalegaiye.

¹¹ Vayaʼmogimo agoti huʼa lapatesayafeʼmo mono nopiʼmofi yagaiʼa neʼapataya vayaʼaitegamofi kanisole vayaʼaitegamofi huʼa lapavaleliʼa visagetapa he tita maiʼnetapaeʼmo, na agufa gemo hugupi na agufa gemo huta geʼapileʼmo aeta atagaina huta hapa paigupi, hutapa lapakesamo afiteta atete osiyo.

¹² Aote Aunemeʼamoʼmo ani afinaʼmo na agufa gemo hisafigeno alino lapaya malesigeta afaʼa hugae, huno hapa paiʼniye.

Negi nagi kagemi yaʼaʼe vekaeʼmo huʼniya gemae

¹³ Asole vayapatiʼmo mago vekamoʼmo hunoʼaeʼmo, Tisao, huno, afoʼnimoʼmo ago falitegeno muki kagemi yaʼamo nepuʼnimokeʼmo aliʼniye. Kagaemo ina gemo huka ha paiyo, kaganakamoʼmo kagemi yaʼmo alika fako huka amiyo, huka ha paiyo, huno ha paiʼnigenoʼaeʼmo,

¹⁴ ina laʼmo nagaefeʼmo kagemi yatanimo alino fako huno lanamisiya vekae, huno lekana paino nateʼniye, huno ha paitenoʼaeʼmo

¹⁵ muki vayaʼaifeʼmo hunoʼaeʼmo, lapakaemo kagemi yafeʼmo lapaʼye hisiya kavaʼmo afole oʼaisiyafeʼmo ehe alagepa huta yagaita lapateyo. Asole kagemi yaʼmo neʼaliya kavaʼmoʼa alagepa huʼa maisaya kavaʼmo aepaʼamo ohaneʼniye, huno hapa paiteno

¹⁶ ani kavafeʼmo huno aeno kalafefa gemo huno hapa painoʼaeʼmo, mago kagemi yaʼamo haneʼniya vekamoʼmo hoyaʼafatiʼmo asole neʼyaʼmo afole aiʼniye.

¹⁷ Agaemo aipafiʼmo agesamo afinoʼaeʼmo, neʼyaʼnimo malesuva nokoʼnimo ago kili paeʼniyaʼmofeʼmo nagaemo na agufa kavaʼmo huguve.

¹⁸ Nagaemo ina kavaʼmo huguve. Neʼyaʼnimo neʼmalova nokoʼnimo halate halagape vaiʼna alopa alopa nokoʼnimo kiteʼna muki neʼyaʼniʼe kagemi yaʼniʼeʼmo ani nokopiʼmo malegauve.

¹⁹ Maleteʼnaeʼmo, nagupi mafaʼneyo, huʼna, muki kafugaʼaeʼmo alagepa huka maisanafeʼmo muki kagemi yakamo maleʼnane. Neʼyakamo nege anikamo nege nehuka kamogaga aika maika haga leka maiyo, huʼna huguve, huno agesamo afiʼniye.

²⁰ Agesamo afiʼniyaʼmonanafa Gotiʼa hunoʼaeʼmo, negi vekae, huno, hemeni haniʼilagamo kagupi mafaʼnemo halate namiyo, huʼna hisugeka faligane. Falisanageʼapaeʼmo ina lagimo ageka maleʼnana kagemi yakamo aligae, huno ha paiʼniye, huno hapa paitenoʼaeʼmo,

²¹ ani kavaʼmo huʼa apakaiʼapilefekeʼmo kagemi yaʼapimo ageʼa neʼmalayaʼmonanafa Gotitefeʼmo ageʼa noʼmalaya vayane, huno hapa paiʼniye.

Ma mopafi yafeʼmo lapakesa alaʼamo afiteta lahapausoli osiyo, huno huʼniya gemae

^22-23 Yesuʼa geʼamo neʼafiya vayaʼaifeʼmo hunoʼaeʼmo, ina kavaʼmo huno haneʼniyaʼmofeʼmo lapa paiʼnaeʼmo, afaʼa neʼmaiya kavaʼmo hogote kavaʼmo haneʼnigeno neʼyaʼmo ago aeno aga seʼniye. Lapakufamo hogote yaʼmo haneʼneno kukena yaʼmo ago aeno aga seʼniye. Aeno aga seʼniyaʼmofeʼmo ma mopafi maisaya kavafeʼmo, vae, na agufa neʼyaʼmo negaune, na agufa kukena yaʼmo aligune, huteta lapakesa alaʼamo afiteta lahapausoli osiyo.

²⁴ Nama anagafeʼmo lapakesamo afiyo. Nama anagaʼmogimo avina yaʼmo aliʼa maleneʼa hoyamo aliʼa oʼvaige neʼyaʼapimo aliʼa noʼapifiʼmo oʼmalege nehayaʼmonanafa Gotiʼa neʼyaʼapimo afaʼa neʼapamiye. Lapakaemo nama anagaʼmo ago aeta apaka seʼnayaʼmofeʼmo Gotiʼa magoʼe huno neʼyaʼmo afaʼa lapamigiye.

²⁵ Lapakaepatiʼmo mago vekamoʼmo agesa alaʼamo afiteno hausoli huʼnisiyaʼmoʼmo Gotiʼa faligiye, huno lekana paino ateʼniya afinapatiʼmo magoʼe huno aiseʼamo alino yatala huno oʼategaiye.

²⁶ Lapakaemo ani aise kavaʼmo hisaya himamutapimo ohaneʼniyaʼmofeʼmo na kava higetapa alu kava alu kavafeʼmo lahapausoli nehae.

²⁷ Lapakaemo kahaufilaga auseeʼmo lapakesamo afiyo. Ausemoʼa agaiʼamo hageteno aliʼyaʼmo oʼalino kukenaʼamo alo nosiye. Alo nosiyaʼmonanafa ausemo kukena konali yaʼamoʼa ala vekaʼapimo yagaino neʼapateya vekamo Solomoniʼa vaino aliʼniya kukenaʼaʼe konali yaʼaʼeʼmo ago aeno aga seʼniye.

²⁸ Gotiʼa kahaufilaga kahaumo hemenimo haneʼniyanageno egaʼamo atamo lesiya kahaumo ausemo vaino neʼapateyaʼmofeʼmo magoʼe huno kukenatapimo vaino lapategaiye. Gotifeʼmo aiseʼamo lapakesamo afita fatago nehaya vayanagi afiyo.

²⁹ Neʼyaʼmo nesaya yafeʼmo kahauya hutetapaeʼmo na agufa neʼyaʼmo negaune hutapa osuta lahapausoli osiyo.

³⁰ Malaga vayaʼmogimo ani yafeʼmo hapaʼye nehigeʼapaeʼmo kahauya nehayaʼmonanafa Afotapimoʼmo afaʼa maisayafeʼmo aligae huno ago ageʼniye.

³¹ Gotiʼa yagaino lapatesiya kavafeʼmo kahauya higenoʼao ma mopafiʼmo maisaya yaʼeʼmo lapamigiyanagi.

³² Aise sipisipi anagaʼmogitapamo lapamoʼyamo oʼaiyo. Afotapimoʼmo yagaiʼniya koteʼmo maisayafeʼmo hauʼniyanageno lapamigiye.

³³ Kagemiyatapimo alita maketi higeʼa miya faitesagetapa alisaya monimo alita fako huta kagemi yaʼapimo ohaneʼnisiya vayaʼmo apamiyo. Kokuʼnapiʼmo alagepa kagemi yatapimo malegenoʼao hano osuno afaʼa haneno. Kokuʼnapi yatapimo kumayaʼmo oʼalige kafamoʼmo oʼnege hisigeno alagepa huno hanege hanege huno hanesiya yatapimo lapaya mukiki huta aliyo.

³⁴ Kagemiyaʼapimo ageʼa neʼmalaya kotefekeʼmo apaipa apakesamo neʼafiye.

Ala kava neʼmo eminesiyaʼaeʼmo alo huta maiyo, huno huʼniya gemae

³⁵ Kukena yaʼapimo vaiteʼa lamuʼapifiʼmo kani aeʼa kaeteʼa alo huʼa maiʼnaya vayakana huta maiyo.

³⁶ Mago aliʼyaʼmo afoʼamoʼmo aʼmo aliʼnigeʼapaeʼmo lusi yagita huʼnayategamo ugefeʼmo huʼnigeʼapaeʼmo aliʼyaʼamo neʼaliya vayaʼmogi agava maiʼnae. Eno hakalu hakalu nehisigeʼapaeʼmo malage huʼa kitamo yakiʼa atesayafeʼmo yagaiʼa maiʼnaya vayakana hutapa maiyo.

³⁷ Aepa vekamo esiya afinafeʼmo ohavaeʼa afaʼa yagaiʼa maiʼnaya vayaʼmo aulena vayaʼmo maiʼnae. Lama gemo lapa paiʼnaeʼmo hapao ke hetenoʼaeʼmo, eta haitetapa hiʼyalamuteʼmo siyateʼmo maiyo, huno hapa paiteno aliʼyaʼmo neʼaliya kukenamo vailiʼneno neʼyaʼmo fako huno apamigiye.

³⁸ Haniʼilaga folaguʼmo osuʼnisigeno esifi folaguʼmo ago hutesigeno esifi huteʼa yagaiʼa maiʼnisaya vayaʼmo aulena vayaʼmo maigae.

³⁹ No aepa vekamoʼmo kumaya neʼaliya vekamo esiya afinafeʼmo afiʼniyesinana au okaleno afaʼa yagaino maiʼnisigeno kumayaʼmo neʼaliya vekamo eno noʼamo aeno akaino kumayaʼmo oʼaliʼniyesine.

⁴⁰ Ani kavaʼmo hutapa alo huta maiyo. Vemo Mafaʼnemo hemenimo emiʼnoʼmegaiye, hutapa nehisagenoʼaeʼmo eminegaiye, huno hapa paiʼnigeno,

⁴¹ Pitaʼa hunoʼaeʼmo, Ala kava nene, huno, lagaefeʼmo mani aeka kalafefa gemo laha nepaipi muki vayaʼaifeʼmo hapa nepaine, huno loka huno ge huno afi geʼnigenoʼaeʼmo

⁴² aliʼyaʼmo afoʼamoʼmo alino amufa amiʼnisiya vekamo alagepa huno ageʼnisiya vekamoʼmo aliʼyaʼamo neʼaliya vayaʼaiteʼmo yagaiʼneno neʼyaʼapimo alino fako huno apamisiyafeʼmo lekana paino ategaiye.

⁴³ Aliʼyaʼamo alagepa huno neʼalisiyaʼmoʼmo aliʼyaʼmo afoʼamoʼmo enoʼaeʼmo alino auleno apategaiye.

⁴⁴ Lama gemo lapa nepauve, huno, aliʼyaʼmo afoʼamoʼmo hunoʼaeʼmo, muki yaʼnileʼmo yagaiyo, huno ha paigiyaʼmonanafa

⁴⁵ aliʼyaʼamo neʼaliya vekamoʼmo hunoʼaeʼmo, hemenimo aliʼyaʼmo afoʼamoʼmo oʼmegaiye, huno huteno aliʼyaʼmo neʼaliya ve aʼnemo aepa faino apamagiteno alopa neʼyaʼe aniʼeʼmo neteno negi nagi huno maiʼnenoʼaeʼmo

⁴⁶ oʼmegaiye, huno agesamo afiʼnisiya afinaʼmo malage huno eno folagapatiʼmo heno apalo atiteno geʼamo noʼafiya vayaʼaitegamo alino ategaiye.

⁴⁷ Aliʼyaʼmo neʼaliya vekamoʼmo aliʼyaʼmo afoʼamoʼmo geʼamo ago afiʼniyana alo huteno akame nosisiyana lusi kava huno amagigiyaʼmonanafa

⁴⁸ aliʼyaʼmo neʼaliya vekamoʼmo aliʼyaʼmo afoʼamoʼmo hauʼniya kavaʼmo oʼafiʼneno amagisiya agufa hosu kavaʼmo huno maiʼnisiyaʼmoʼmo aiseʼamo amagigiye. Vayaʼmogimo alopa yaʼmo apamiʼnageʼa aliʼnaya vayaʼaifeʼmo huʼapaeʼmo, alopa yaʼmo namiyo, huʼa hugae. Alopa yaʼmo apamiʼnageʼa aliʼnaya vayaʼmogi anonaʼapimo alopa anonamo magoʼe huno hanegaiye.

Aliʼna fako huʼna apatesuvafeʼmo emiʼneʼnove, huno huʼniya gemae

⁴⁹ Ma mopafiʼmo atamo aliʼna yaga ausuvafeʼmo emiʼneʼnove. Aepa faino atamo lesiyafeʼmo nahauʼniyaʼmonanafa oleʼniyanageno legaiye.

⁵⁰ Aniʼmo faleʼa neʼapataya kava huʼa hosu kavatetiʼmo faleʼa nategae. Kana nahaulino neʼvisigeʼna uʼna aliguve.

⁵¹ Ma mopafi vayaʼmo magokepi maiʼa haga lesayafeʼmo emineʼniye, hutapa lapakesamo neʼafifiye. Haʼao, ago lapa paiʼnaeʼmo, aliʼna fako hisuvafeʼmo emiʼneʼnove.

⁵² Ani afinatetiʼmo magoke nopiʼmo faefuʼa vayaʼmo maiʼnisayapatiʼmo aliʼa fako huʼa loleʼe magoʼe vayaʼmogi lole vekalaʼeʼmo kame hisageʼana lole vekalaʼmoganimo anonale loleʼe magoʼe vayaʼeʼmo kame hugaʼae.

⁵³ Aliʼa fako huteʼapaeʼmo afoʼamoʼmo mafaʼneʼalegamo kame huno atege mafaʼneʼamoʼmo afoʼamotegamo kame huno atege itaʼamoʼmo aʼmafaʼneʼalegamo kame huno atege aʼmafaʼneʼamoʼmo itaʼamotegamo kame huno atege mago aʼmoʼa anofeloʼamotegamo kame huno atege anofeloʼamomoa anofelotegamo kame huno atege hugae, huno hapa paiʼniye.

Afole aisiya alagena kavafeʼmo huʼniya gemae

⁵⁴ Yesuʼa muki vayaʼaifeʼmo hunoʼaeʼmo, lapakaemo ago ageʼnayana yegemo uno lamino nefaleya kotegamo hiyaʼmo kiʼnigeta agetetapaeʼmo hemenimo koʼmo aisiyafeʼmo huʼniye, hutapa nehagenoʼaeʼmo ani kavaʼmo afole neʼaiye.

⁵⁵ Ago ageʼnayana lusi kava huno yasimo aliʼnigeta agetetapaeʼmo alagepa koʼmo aligefeʼmo huʼniyanageno yegemo legaiye, hutapa nehagenoʼaeʼmo ani kavaʼmo afole neʼaiye.

⁵⁶ Aeta ati nekaya vayanagi ma mopale alagena kavaʼmo ago ageʼnayaʼmonanafa na kava higetapaeʼmo hemenimo nehuva alagena kavaʼmo noʼagae.

⁵⁷ Na kava higetapaeʼmo alita fako huta alagepa kavaʼmo noʼagae, huno hapa paiʼniye.

Alika nanu aeka anato, huno huʼniya gemae

⁵⁸ Kagaemo hosu kavaʼmo huʼnisanagenoʼaeʼmo agoti huno kategefeʼmo hisiya vekamoʼmo agoti gemo neʼafiya vekalegamo kavalelino neʼvisigekaeʼmo alika alagepa huka ato. Alagepa huka alika fako osisanaʼmoʼmo agoti gemo neʼafiya vekamoʼmo kavalelinuno amisigeno kavaleno ati vekamo amisigeno kalavusi huno kategaiye.

⁵⁹ Muki anonakaleʼmo oʼamisanageno magoke monitomo lageso hisigekaeʼmo kalavusifatiʼmo ataleka oʼugane, huno hapa paiʼniye.