Luki 1 - The Keyagana NT and 25 OT books

Lukiʼa Tiyofalasitegamo avoʼmo kaeno ataleʼnigeno uʼniya gemae

^1-2 Ala vekamo Tiyofalasigamo afiyo. Mago kavaʼmo lagaetegamo ago afole aiʼnigeta alagi lagesamo afita fatago nehune. Aepa faiʼniya afinatetiʼmo mago vayaʼmogimo ageme ageme eteʼapaeʼmo ani kavafeʼmo ava gemo aeʼa hakalo huʼa hapa paiʼnae. Ani vayaʼmogimo hapa paiʼnageʼapaeʼmo asole vayaʼmogi afiteʼa amalageka huʼa ani kavafeʼmo ava gemo apaote apaote huʼa avoʼmo kaeteʼa aliʼa magokepiʼmo avoʼmo kae maleʼnae.

³ Nagaeʼeʼmo yatala afinaʼmo muki kavafeʼmo ava gemo alagepa huʼna ago afiʼnovaʼmofeʼmo muki afole aite afole aite huʼniya kavafeʼmo avoʼmo kaegauve, huʼna nagesamo afiʼnove.

⁴ Alika lekana paika afitekaeʼmo, aliʼa naya maleʼnaya gemo alagi lama gemo huʼnae, huka ageka aeto hisanafeʼmo avoʼmo nekaove.

Enisole vekamoʼmo Sekalaiyasifeʼmo Yoniʼa alika ategane, huno ha paiʼniya gemae

⁵ Helotiʼa kini vekamo maiʼneno Yutiya kotegamo maiʼnaya vayaʼaiteʼmo yagaino apateʼnigenoʼaeʼmo mago vekamo mono huno neʼapateya vekamo agiʼamo Sekalaiyasiʼmo maiʼniye. Agaemo Amaiya monoʼmo huʼa neʼapataya nofi vayapati vekamo maiʼnigeno aʼamo Ilisameteʼmo ani kavaʼmo huno mono huʼa neʼapataya nofi vayaʼmo Eloni nofi vayapati a kanomo maiʼniye.

⁶ Ani yalavelaʼmoganimo Goti aulagaleʼmo alagepa kavaʼmo huteʼana muki Goti keʼaepa geʼamo akame huteʼana alagepa huʼana maiʼnaʼae.

⁷ Maiʼnaʼaʼmonanafa Ilisameteʼmo anamo aʼmogeno mafaʼnemo alino oʼateʼnigeʼana ago anau anekalomo leteʼana maiʼnaʼae.

⁸ Mago alu mono alu monoʼmo nehaya vayaʼmo monoʼmo ago hutageʼapaeʼmo Sekalaiyasi vayaʼamo mono nehaya afinaʼmo afole aiʼnigeno Goti aulagaleʼmo mono huno apateʼniye.

⁹ Mono huʼa neʼapataya vayaʼai kavaʼmo huno Sekalaiyasiʼa alagepa atumo neʼaiya yaʼmo hiʼyalamuteʼmo maleʼneno atamo kaesiyafeʼmo kayoʼmo lo aeʼa maleʼnaya yapatiʼmo yatala kayoʼmo aliʼnigeʼapaeʼmo lekana paiʼa ateʼnae. Lekana paiʼa ateʼnageno Ala kava neʼmo alopa mono noʼafiʼmo alagepa atumo neʼaiya yaʼmo maleʼneno ata kaesiyafeʼmo uno haiʼnigeʼapaeʼmo

¹⁰ asole vayaʼmo kumatega maiʼneʼa nunumuʼmo huʼnae.

¹¹ Sekalaiyasiʼmo haino ageyana Ala kava neʼmo enisole vekaʼamoʼmo alagepa atumo neʼaiya yaʼmo maleʼneʼa ata nekaya hiʼyalamuteʼmo lamaga haopaleʼmo he tino maiʼnigeno ageʼniye.

¹² Agetenoʼaeʼmo hau aiteno koli huʼniyaʼmonanafa

¹³ enisole vekamoʼmo hunoʼaeʼmo, Sekalaiyasiyo, huno, koli osuvo. Nunumuʼmo huʼnana gemo Gotiʼa ago afiʼniyanageno akamo Ilisameteʼmo ve mafaʼnemo alino ategaiye. Agiʼamo Yoniʼae huka ato.

¹⁴ Mafaʼnekamo alino atesigekaeʼmo kamogaga aika kavayagunagu hisanageʼapaeʼmo muki vayaʼamogimo apamogaga aigae.

¹⁵ Goti aulagaleʼmo ala agi vekamo maigiye. Lokiya aniʼmo neteʼa negi nehaya agufa aniʼmo oʼnegaiye. Itaʼamoʼmo alino atesiya afinatetiʼmo Aote Aunemeʼamoʼmo aipafiʼmo havai teno maigiye.

¹⁶ Agaemo muki Isaleli vayaʼmo alino aino atagineno apatesigeʼapaeʼmo Gotiʼa Ala kava neʼapimotegamo egae.

¹⁷ Agaemo Aunemeʼamo lokiyaʼamo aliteno Ilaiyaʼa huʼniya agufa kavaʼmo huno uno hogotesigeno Ala kava neʼmo agae akameʼmo huno eminegaiye. Agaemo vayaʼmogi apaipamo alino aino afe leno apatesigeʼapaeʼmo mafaʼneʼapieʼmo alagepa apaipamo kaliʼa apategae. Agaemo ge noʼafisaya vayaʼmo apaipamo alino afe leno apatesigeʼapaeʼmo fatago vayaʼmogi neʼaliya agufa apaipa apakesamo aligae. Agaemo Ala kava neʼmo vayaʼamo agaetefeʼmo alo huno apategaiye, huno ha paiʼniye.

¹⁸ Sekalaiyasiʼmo enisole vekaeʼmo hunoʼaeʼmo, kagaemo nehana lama geeʼmo haiya agufa kavaʼmo huʼna alagi lama gemo nehane, huʼna afiguve. Nagaemo ago kosuna leʼnogeno aʼnimo ago anekalo leʼniye, huno ha paiʼnigenoʼaeʼmo,

¹⁹ nagaemo Gemaliyoʼnamae. Muki afinaʼmo Goti haopaleʼmo aliʼyaʼamo alisuvafeʼmo he tiʼna neʼmauve. Gotiʼa kagaemo kamogaga aisana gemo kaha paisuvafeʼmo alino nateʼnigeʼna kagaetegamo emiʼneʼnove.

²⁰ Emineʼnovaʼmonanafa geʼnieʼmo kagesamo afika fatago osuʼnanaʼmofeʼmo kagemo oʼaika afaʼa maime maime neʼvisanageno lekana paiʼniya afinaʼmo geʼnimo afole aigiye, huno ha paiʼniye.

²¹ Kumatega maiʼnaya vayaʼmogimo Sekalaiyasifeʼmo agava maiʼneʼapaeʼmo, na kava higenoʼaeʼmo alopa mono nopiʼmo yatala afinaʼmo maiʼniye, huʼa huʼnae.

²² Nopatiʼmo eminenoʼaeʼmo ge osuno ayatetikeʼmo avame name kavaʼmo huʼnigeʼa ageteʼapaeʼmo, agaemo alopa mono nopiʼmo alagamuna agegekana huno aeto agufa kavaʼmo ageʼnenoʼaeʼmo nehiye, huʼa ageʼnae. Ayatetikeʼmo avame name kavaʼmo huteno ge osuno afaʼa maiʼniyaʼmofeʼmae.

²³ Henagaʼamo mono nopiʼmo aliʼyaʼmo alino hano huteno noʼalegamo uʼniye.

²⁴ Ani afinaʼmo utegeno aʼamo Ilisameteʼmo aipaguʼeʼmo maitenoʼaeʼmo faefuʼa kaimo fala kino maiʼnenoʼaeʼmo,

²⁵ Ala kava neʼmoʼa nageme nageme eno hemenimo naha maeno vayaʼai apaulagaleʼmo navagage nehiya kavaʼnimo aeno kalo paeno ataleʼniye, huno huʼniye.

Yesuʼmo alika ategane, huno ha paiʼniya gemae

²⁶ Ilisameteʼmo sigisiʼa kaimo aipaguʼeʼmo maiʼnigeno Gotiʼa enisole vekaʼamo Gemaliyoʼmo alino ateʼnigeno Galeliya kotega Nasalasa taonifiʼmo emineʼniye.

²⁷ Ani taonifiʼmo mago aʼmafaʼnemo agiʼamo Maliyaʼmo veʼeʼmo magokepi lokaeno ohavaeʼniya aʼmafaʼnemo Nevini nofi vayapati vekamo Yosefeʼmo aliguve, huno huteno lekana pai maleʼniya aʼmafaʼnemo maiʼniye.

²⁸ Enisole vekamoʼmo agaetegamo emineno, vase hutalo, huno ge amamaetenoʼaeʼmo, Ala kava neʼmoʼa kagaeʼeʼmo magokepi lokaeno maiʼneno muki asole aʼne anagapatiʼmo lekana paino kateteno alino auleno kateʼniye, huno ha paiʼniye.

²⁹ Maliyaʼmo ani gemo afitenoʼaeʼmo lusi kava huno koli hutenoʼaeʼmo, ani gemo aepaʼamo na agufa gemo nehifi, huteno agesamo afino maiʼniye.

³⁰ Enisole vekamoʼmo hunoʼaeʼmo, Maliyao, huno, koli osuvo. Gotiʼa lekana paino kateteno kaha maeʼniye.

³¹ Afiyo, huno, kaipaguʼeʼmo maiteka ve mafaʼnemo alika ategananagi ani mafaʼnemo agiʼamo Yesuʼae huka ato.

³² Ala agi vekamo maiʼnisigeʼa agi aeʼapaeʼmo, hogote vekamo aeno apaka seʼniya vekamo mafaʼneʼamo maiʼniye, huʼa hugae. Aginago vekamo Neviniʼa Isaleli vayaʼai alaʼapimo maiʼneno yagaino neʼapateya kava huno Ala kava neʼmo Gotiʼa hunoʼaeʼmo, Alaʼapimo maiʼneno yagaino apatesiya vekae, huno ategaiye.

³³ Agaemo Yekopu nofi vayaʼaleʼmo yagaino apateno hano osuno yagaino apateno maigiye, huno ha paiʼniye.

³⁴ Maliyaʼmo hunoʼaeʼmo, Veleʼmo oʼmaiʼnovanagi haiya agufa kavaʼmo afole aigiye, huno huʼnigenoʼaeʼmo,

³⁵ Aote Aunemeʼamoʼmo Goti himamuʼamo hiyakana huno kagaeteʼmo eminesigeka alika atesana mafaʼneeʼmo, aote vekamo Goti Mafaʼneʼae, huʼa agi aegae.

³⁶ Afiyo, huno, negafokamoʼmo Ilisameteʼmo anamo aʼmo maime uno anekalomo leʼniyaʼmonanafa sigisiʼa kaimo aipaguʼeʼmo maiʼniye.

³⁷ Gotiʼa mago kavaʼmo afaʼa osisiya agufa kavaʼmo ohaneʼnifa muki kavaʼamo afaʼa hugiye, huno ha paiʼnigeno

³⁸ Maliyaʼmo hunoʼaeʼmo, Goti aliʼyaʼamo neʼaluva aʼmafaʼnemo maiʼnovanageno muki huʼnana kavaʼmo nagaeteʼmo afaʼa afole aigiye, huno ha paiʼnigeno enisole vekamo ataleno uʼniye.

Maliyaʼmo uno Ilisameteʼeʼmo lokaeʼana maiʼnaʼa gemae

³⁹ Aise afinaʼmo utegeno Maliyaʼmo malage huno he tino aise aulafimo haneʼniya koteʼmo uno Yutiya kotega mago taonifiʼmo avaʼyi huteno

⁴⁰ Sekalaiyasi nopiʼmo uno haino Ilisametefeʼmo ge amamaeʼnigeno

⁴¹ Ilisameteʼmo ageʼniyana aipafiʼmo maiʼniya mafaʼnemoʼmo fanagu panage huʼnigeno Aote Aunemeʼamoʼmo Ilisamete aipafiʼmo havai teʼniye.

⁴² Ilisameteʼmo alopa gefatiʼmo ge hunoʼaeʼmo, Gotiʼa mago aʼne anagaʼaitegamo nosiya agufa kavaʼmo huno kagaemo lusi kava huno alino auleno kateteno kaipafiʼmo maiʼniya mafaʼneʼeʼmo alino auleno ateʼniye.

⁴³ Ina agufa a kanomo maiʼnovana haiya kavaʼmo higekaeʼmo Ala kava neʼnimo itaʼamoga nagaetegamo eʼnane.

⁴⁴ Afiyo, huʼna, ge namamaeʼnana gemo afiʼnogenoʼaeʼmo naipafiʼmo maiʼniya mafaʼnemoʼmo amogaga aiteno fanagu panage huʼniye.

⁴⁵ Ala kava neʼmoʼa kaha paiʼniya geeʼmo kagesamo afika fatago hutekaeʼmo, afaʼa afole aigiye, huka huʼnana aʼmo maiʼnanageno alino auleno kateʼniye, huno ha paiʼniye.

Maliyaʼmo Goti agiʼaleʼmo alino asaga huʼniya gemae

⁴⁶ Maliyaʼmo hunoʼaeʼmo, Naipafiʼmo Ala kava neʼmo agiʼaleʼmo aliʼna asaga huʼna neʼatove.

⁴⁷ Nauneʼnameʼmo Gotiʼa agufamo alino katino ateʼniya vekaeʼmo amogaga neʼaiye.

⁴⁸ Ina agufa aliʼyaʼmo neʼaluva a mafaʼnemo maiʼnogeno nagaefeʼmo agesamo afiʼniyaʼmofeʼmo vayaʼmogi huʼapaeʼmo, Gotiʼa alino auleno ateʼniye, huʼa hugae. Hemenimo maiʼnaya vayaʼmogiʼe henagaʼamo muki aliʼa apatesaya vayaʼmogiʼeʼmo ina gemo hugae.

⁴⁹ Ayamufaʼage vekamoʼa lusi kava huno naha maeʼniye. Agiʼamo Aoteʼae.

⁵⁰ Agaefeʼmo koli huteʼa aiyafiʼmo maiʼnaya vayaʼaifeʼmo hau huno apateme apateme uno hau huno neʼapate.

⁵¹ Ayatetiʼmo lokiya kavaʼmo huteno ala vayaʼmo maiʼnone, huteʼa, ina kavaʼmo hugune, ma kavaʼmo hugune, huʼa apakesamo neʼafiya vayaʼmo alino hapa faino apatalegeʼa u eʼa nehae.

⁵² Agaemo lokiya vayaʼmo yagaiʼa neʼapataya vayaʼmo alino afepi apateteno ina agufa vayaʼmo alino asagauno neʼapate.

⁵³ Apaka neteya vayaʼmo alagepa yaʼmo lusi kava huno neʼapamigeʼa neʼa apamu nehae. Neʼapamiyaʼmonanafa kagemi yaʼapimo haneʼniya vayaʼmo oʼapamino hapa faino apatalegeʼa afaʼa neʼvae.

^54-55 Agaemo Emalehamufeʼmo ge huteno aginago vayaʼaifeʼmo hunoʼaeʼmo, nahau huʼna lapateteʼna lapa maege lapa maege huʼna maiguve, huno hapa paite hapa paite huʼniye. Hemenimo laginago vayaʼaifeʼmo hapa paiʼniya geeʼmo agesamo afino ho huteno Isaleli nofi vayaʼmo aliʼyaʼamo neʼaluna vayaʼamo laha maeʼniye, huno huʼniye.

⁵⁶ Maliyaʼmo Ilisameteʼeʼmo loleʼe magoʼe kaimo lokaeʼana maiteʼanaeʼmo ataleno noʼalegamo uʼniye.

Ilisameteʼmo Yoniʼmo alino ateʼniya gemae

⁵⁷ Ilisameteʼmo mafaʼnemo alino atesiya afinaʼmo ago afole aiʼnigeno ve mafaʼnemo alino ateʼniye.

⁵⁸ Koʼalega vayaʼmogiʼe agaiʼa vayaʼamogiʼeʼmo ani gemo afiteʼapaeʼmo, Ala kava neʼmoʼa hau huno ateteno lusi kava huno ha maeʼniye, huʼa huteʼa Ilisameteʼeʼmo magokepi apamogaga aiʼnae.

⁵⁹ Magoke salemo utegeno Yu vayaʼmogi nehaya kavaʼmo huʼa ani mafaʼnemo agufamo lagausayafeʼmo eʼapaeʼmo, afoʼamo agileʼmo ategaune, huʼa huʼnagenoʼaeʼmo

⁶⁰ Itaʼamoʼmo hunoʼaeʼmo, haʼao, Yoniʼae, huta ategaune, huno hapa paiʼnigeʼapaeʼmo,

⁶¹ negafokamogipatiʼmo ani agufa apakimo ohaneʼniye, huʼa ha paiʼnae.

⁶² Apayatetiʼmo avame name kavaʼmo huteʼapaeʼmo, haiya agufa agimo mafaʼnekamo ategane, huʼa afoʼamofeʼmo ge huʼa afi geʼnagenoʼaeʼmo,

⁶³ mago avoʼmo kaesuva yaʼmo alita namiyo, huno hapa paiʼnigeʼapaeʼmo aliʼa amiʼnageno avoʼmo kaenoʼaeʼmo, agiʼamo Yoniʼae, huno avoʼmo kaeʼnigeʼapaeʼmo hapau aiʼnae.

⁶⁴ Ani afinaʼmo malage huno agemo aino halo aiʼnigeno Goti agiʼaleʼmo alino asaga huʼniye.

⁶⁵ Ani koʼale vayaʼmogi afiteʼa koli huʼnageno ani kavafeʼmo ava gemo muki haopale Yutiya aulafi kotegamo aino atagu faeno uneno uʼniye.

⁶⁶ Ava gemo afiteʼapaeʼmo aliʼa apaipafiʼmo maleteʼa, henagaʼamo haiya agufa mafaʼnemo maigiye, huʼa huʼnae. Ala kava neʼmoʼa alagepa huno ha maeteno yagaino ateʼniye.

Sekalaiyasiʼmo aune gemo huʼniya gemae

⁶⁷ Afoʼamoʼmo Sekalaiyasi aipafiʼmo Aote Aunemeʼamoʼmo havai teʼnigeno Gotitegati aune gemo alinineno aeno hakalo huno hapa painoʼaeʼmo,

⁶⁸ Ala kava neʼmo Isaleli vayaʼai Gotiʼapimoʼmo emineno laha maeno hatu maeno lateʼniyaʼmofeʼmo alita auleta ateyo.

⁶⁹ Agaemo aliʼyaʼamo neʼaliya vekaʼamo Nevini vayapatiʼmo lokiya vekamo lagufamo alino katino latesiya vekamo ago alino afole aino ateʼniye.

⁷⁰ Akeyaʼvilagamo ani kavafeʼmo agaetegati gemo alini eʼa aeʼa hakalo huʼa hapa nepaiya vayaʼai apavayafatiʼmo ago laha paiʼniye.

⁷¹ Ina gemo huʼa laha paiʼnae, lagaefeʼmo apaini nehaya vayaʼai apayapatiʼmo lagufamo alino katino lateteno muki vayatimogi apayapatiʼmo lagufamo alino katino lategaiye, huʼa hapa paiʼnae.

⁷² Gotiʼa kotalakemo hu maleʼniya aote geʼamo laginago vayaʼaifeʼmo hunoʼaeʼmo, nahau huʼna lapategauve, huno hapa paiʼniya geeʼmo agesamo afino ho huteno ani kavaʼmo huʼniye.

⁷³ Gotiʼa laginago vekamo Emalehamufeʼmo lama gemo huno agoʼyamo ataleno ge hugekana agufa kavafeʼmo agesamo afiteno laha maeʼniye.

^74-75 Agaemo kame vayatimogi apayapatiʼmo lagufamo alino katino latesigeta ma mopafiʼmo maisuna afinaʼmo aliʼyaʼamo alitetaeʼmo koli osuta aote fatago kavaʼamo huteta alagepa huta maige maige huta maigune.

⁷⁶ Kagaemo mafaʼneʼnimogae, huʼna, hogote vekamo aeno apaka seʼniya vekalegatiʼmo geʼamo alinineno aeno hakalo huno hapa nepaiya vekae, huʼa kagi aegae. Kagaemo Ala kava neʼmo esiya kaʼmo alagepa huka valika ateʼnisanageno egaiye.

^77-78 Kagaemo hukaeʼmo, Gotitimoʼmo aipamoʼmo falu huteno hau huno lateteno ha le yakana vekamo alino ateʼniye. Yegemoʼmo aeno ha lelino haine neʼeya kavakana huno lagaetegamo eʼniye. Gotiʼa agaetetiʼmo lapakufamo alino katino lapateteno hosu kavatapimo alino atalegaiye.

⁷⁹ Lagaetegamo enoʼaeʼmo hanipiʼmo fali kavaʼmo auneʼafiʼmo fai maiʼnona vayaʼmogitalegamo ha le yaʼmo lamiteno alagepa kaʼmo Gotiʼeʼmo lokaelita visuna kaʼmo alino lave ligiye, huka hapa paigane, huno huʼniye.

⁸⁰ Yoniʼmo ko sitenoʼaeʼmo aunemeʼamoʼmo lokiya vaiʼnigeno kaʼme kotega maime maime neʼunoʼaeʼmo Isaleli vayaʼmogi apaulagaleʼmo afole aiʼniye.