Lomu 9 - The Keyagana NT and 25 OT books

¹ Hemenimo nagaemo mago gemo hisuvafeʼmo huve. Nagaemo Kalaisipiʼmo maiʼneʼnaeʼmo lama gemo nehuve. Aote Aunemeʼamoʼmo nagupi mafaʼneleʼmo yagaino neʼategenoʼaeʼmo lama gemo nehane, huno naha nepaiye.

² Ani lama geeʼmo huʼnaeʼmo, nagae nofi vayapatiʼmo ma mopafi konagaʼnimogifeʼmo nagesamo neʼafugenoʼaeʼmo muki afinaʼmo lusi kava huno naipamoʼmo kana nehigeno nainagamo nefaiye.

³ Kanale kavaʼmo haneʼniyesinana apakaetefeʼmo Kalaisipiʼmo oʼmaiʼna malaga lifana vekamo maisuvafeʼmo nahauʼniyesine.

⁴ Apakaemo Goti vayaʼamo Isaleli nofi vayaʼmo maiʼnagenoʼaeʼmo, mafaʼneʼnimo maiʼnae, huno huteno agaiʼamo ha le konali vekamoʼmo apakaeʼeʼmo magokepi lokaeno maiʼniye. Gotiʼa apakaefeʼmo kotalakeʼamo hapa paime hapa paime ege keʼaepa geʼamo apamige mono kavaʼmo alino apave lige lapa maegauve, huno hapa paiʼniya polomasi geʼamo hapa paige huno maiʼniye.

⁵ Hogote apakinago vayaʼmo Isaleli nofi vayaʼmo maiʼnae. Kalaisiʼa apakaepatiʼmo ma mopafi vekagana huno afole aiʼniye. Kalaisiʼa muki yaʼaleʼmo neʼyagaiya vekamo maige muki afinaʼmo aulena Gotiʼa maige maige huno maigiye. He, lama ge.

⁶ Nagaemo huʼnaeʼmo, Gotiʼa Emalehamufeʼmo kotalake gemo ha paiʼniya gemo afole oʼaiʼniye, huʼna nosuve. Muki Isaleli nofi vayapatiʼmo afole aiʼnaya vayaʼmogimo mago lama ge Isaleli vayaʼmo oʼmaiʼnae.

⁷ Ani kava huʼa muki vayaʼamogimo Emalehamu aginago vayaʼamo Goti mafaʼneʼamo oʼmaiʼnae. Gotiʼa Emalehamufeʼmo hunoʼaeʼmo, Aisikiʼa alino apatesiya vayaʼaifekeʼmo keya aeʼna ge hisugeʼa kaginago vayaʼmo maigae, huno ha paiʼniye.

⁸ Ani gemo aepaʼaeʼmo huʼnaeʼmo, apakufaletiʼmo aliʼa neʼapataya vayaʼmo Goti mafaʼneʼamo oʼmaiʼnafa Gotiʼa huguve, huno hu maleʼniya polomasi geʼaletiʼmo alino afole aino neʼapateya vayaʼageʼmo lama ge aginago vayaʼamo maiʼnae.

⁹ Ani kavatefeʼmo Gotiʼa huguve, huno hu maleʼniya polomasi geʼalefeʼmo hunoʼaeʼmo, magoke kafugamo utesigeʼna henagaʼamo ani agufa afinaʼmo eminesugenoʼaeʼmo Selaʼa mago ve mafaʼnemo alino ategaiye, huno ha paiʼniye.

¹⁰ Magoʼe gemo afaʼa haneʼniye. Mago laginago vekamo Aisiki aʼmo Lipekaʼa aipaguʼeʼmo maiteno lole lagoʼya mafaʼnelaʼmo alino anateʼniye.

^11-12 Alino oʼanateʼnigeʼanaeʼmo mago alagepa kavaʼe hosu kavaʼeʼmo osuʼnaʼa afinaʼmo Gotiʼa, yege mafaʼnemoʼa aganaʼamo aiyafiʼmo maiʼneno aliʼyaʼamo alisiya vekamo maigiye, huno ha paiʼniye. Gotiʼa hogoteno agesa afiteno hauʼnigeno lekana paino ateʼniya kavaʼamo alino afole aino atesiyafeʼmo ani gemo hu maleʼniye. Mago vekamo alagepa kavaʼaletiʼmo lekana paino oʼateʼnifa keya aeno ge nehiya vekamoʼmo agaiʼageʼmo hauʼnigeno lekana paino ateʼniye.

¹³ Ani kavatefeʼmo Gotiʼa avoʼmo kae maleʼniya gemoʼa hunoʼaeʼmo, Yekopufeʼmo nahau nayamopafiʼmo nahauʼniyaʼmonanafa Isofeʼmo naini huʼnove, huno huʼniye.

¹⁴ Gotiʼa ani kavaʼmo nehiyaʼmofeʼmo lagaemo na agufa gemo hugune. Gotiʼa fatago kavaʼmo nosiye, huta hisupiye. Haʼao, alagi atalegeno hano hino.

¹⁵ Ani kavatefeʼmo Gotiʼa Mosesefeʼmo hunoʼaeʼmo, Ina lagifeʼmo nahau huʼna apategauve, huʼna huʼnisufigeʼna nahauʼniyanageʼna afaʼa nahau huʼna apategauve. Ina lagimo fikumo hapa maegauve, huʼna huʼnisufigeʼna nahauʼniyanageʼna afaʼa hapa maegauve, huno ha paiʼniye.

¹⁶ Vayaʼmogi apakaiʼapi hapauʼniya kavatetiʼmo afole oʼaige apayamukiki nehaya kavatetiʼmo afole oʼaige huʼnayana Gotiʼa hau huno neʼapateya kavatetikeʼmo afole neʼaiye.

¹⁷ Ani kavatefeʼmo Goti mukufiʼmo avoʼmo kae maleʼniya gemoʼa hunoʼaeʼmo, yagaino neʼapateya kini vekamo Felofeʼmo hunoʼaeʼmo, Ina kavatefeʼmo aliʼna he tiʼna kateʼnove. Nagaemo himamuʼnimo kagaetetiʼmo aliʼna apave lisugeʼapaeʼmo ma mopafi muki haopalegamo maiʼnaya vayaʼmogimo ala nagi vekamoʼna nava gemo aeʼa hakalo huʼa hapa paisayafeʼmae, huno ha paiʼniye.

¹⁸ Ani kavatefeʼmo Gotiʼa ina lagifeʼmo hau huno apatesifigeno hauʼniyanageno afaʼa hau huno apategaiye. Ani kava huno ina lagimo apaipamo alino akanino apatesifigeno hauʼniyanageno apaipamo afaʼa alino akanino apategaiye.

Gotiʼa aipamo leno apatege hau huno apatege nehiya kavafeʼmo huʼniya gemae

¹⁹ Ani kavaʼmo nehiyaʼmofeʼmo kagaemo hukaeʼmo, na kava nehagenoʼaeʼmo Gotiʼa vaiʼmo neʼapamiye. Ina laʼmo Gotiʼa hauʼniya kavaʼamo alino atalegaiye, huka naha paigane.

²⁰ Vayalafaʼmo maiʼnanaʼmofeʼmo ina lagamo Goti geʼaleʼmo afaʼa aeka atagaina huka nehane. Alo huʼniya yaʼmoʼa alo huʼniya vekaeʼmo, na kava higeka ani kavaʼmo huka alo huka nateʼnane, huno afaʼa hugifiye.

²¹ Kalipa mopaletiʼmo keʼmo alo nehiya vekamoʼmo, na agufa keʼmo alo hugufi, huno nehisiyana hauʼniyanageno agaiʼa yaʼmogeno ani agufa keʼmo afaʼa alo hugiye. Agaemo ani kalipa mopaletiʼmo alino kamaeteno alino lo aeno magokayaga atupaʼaletiʼmo kanale alagepa keʼmo alo huteno magokayaga atupaʼaletiʼmo afa keʼmo alo hugiye.

²² Ani kavaʼmo huno Gotiʼa aipamo leno neʼapateya kayoʼe himamuʼaʼeʼmo afaʼa alino apave lisiyafeʼmo hauʼniyaʼmonanafa aipamo leno neʼapateya vayaʼmo malage huno oʼapamagino yatala afinaʼmo afaʼa apakeno maiʼniye. Apakaemo mopa kegana huʼa maiʼnayanageno Gotiʼa alino hano huno apatalesiyafeʼmo apakaiʼapimo alo huʼa maiʼnae.

²³ Ani kavaʼmo huno Gotiʼa mago vayaʼamo lusi ha le konali yaʼamo alino apavelisigeʼa agesayafeʼmo hogoteno alo huno apateʼniye. Apakaemo mopa kegana huʼa maiʼnayanageno Gotiʼa hau huno apategaiye.

²⁴ Keya aeno ge huʼniya vayaʼmogitalegamo ani kavaʼmo huʼniye. Yu vayaʼaifekeʼmo keya aeno ge osuʼnifa alu nofi vayaʼefeʼmo keya aeno ge huʼniye.

²⁵ Ani kavatefeʼmo Hoseyaʼa Goti mukufiʼmo avoʼmo kae maleʼniya gemoʼa hunoʼaeʼmo, Hogoteʼa vayaʼnimo oʼmaiʼnaya vayaʼaifeʼmo, vayaʼnimo maiʼnae, huʼna huguve. Nahau nayamopafiʼmo oʼnahauʼniya vayaʼaifeʼmo nahau nayamopafiʼmo nahauʼniya vayane, huʼna huguve, huno hutenoʼaeʼmo,

²⁶ Vayaʼnimo oʼmaiʼnae, huʼna hapa paiʼnova vayaʼai koteʼmo maiʼnaya vayaʼmogi alagi afaʼa neʼmaiya Goti mafaʼneʼamo maiʼnae, huʼa hugae huno huʼniye.

²⁷ Aiyeyaʼeʼmo Isaleli vayaʼaifeʼmo hunoʼaeʼmo, Isaleli vayaʼmogimo ani kahaepagana huʼa asole vayaʼmo maiʼnayaʼmonanafa ani vayapatiʼmo logufa vayaʼai apakufamo alino katino apategaiye.

²⁸ Ani kavatefeʼmo Ala kava neʼmoʼa apamagiguve, huno huʼniya gelefeʼmo ma mopafi vayaʼmo malage huno apamagigiye, huno hapa paiʼniye.

²⁹ Aiyeyaʼa hogoteno ani agufa geʼeʼmo hunoʼaeʼmo, Ala kava neʼmoʼa muki kokuʼnapi neʼmaiya vayaʼaitenagi ma mopafiʼmo neʼmaiya vayaʼaitenagi huno yagaino neʼapateya vekamoʼmo avina yakana huta maisunafeʼmo lageno olataleʼniyesinana Sotomi taonifiʼmo maiʼnaya vayaʼe Gomola taonifiʼmo maiʼnaya vayaʼeʼmo afaʼa apakeno oʼapataleno alino hano huno apataleʼniya kava huno alino hano huno lataleʼniyesine, huno huʼniye.

Isaleli vayaʼmogimo apakesamo afiʼa fatago osuʼnayaʼmofeʼmo oʼaliʼnae, huno huʼniya gemae

³⁰ Nehuva gemo aepaʼaeʼmo huʼnaeʼmo, Alu nofi vayaʼmogimo fatago kavaʼmo alisagenoʼaeʼmo Gotiʼa hunoʼaeʼmo, naulagaleʼmo fatago vayaʼmo maiʼnae, huno hisiyafeʼmo vegala oʼaeʼnayaʼmonanafa apakesamo afiʼa fatago huʼnaya kavatetikeʼmo Gotitegatiʼmo fatago kavaʼamo aliʼnae.

³¹ Aliʼnayaʼmonanafa Isaleli nofi vayaʼmogimo fatago kavaʼmo alisayafeʼmo keʼaepa geʼamo akame huʼnaya kavatetiʼmo vegala aeʼnayaʼmonanafa haiʼa metaleʼnae.

³² Na kava huʼnayaʼmofeʼmo oʼaliʼnae. Apakesamo afiʼa fatago hisaya kavatetiʼmo alisayafeʼmo osuʼnafa keʼaepa gegeʼmo akame huʼnaya kavatetiʼmo alisayafeʼmo huʼnayaʼmofeʼmo oʼaliʼnae. Goti mukufi gemoʼa mago yafafeʼmo ava gemo huʼniye. Ani yafapiʼmo apaiyamo faiʼa lo aeteʼa asagauʼa aiʼnae.

³³ Goti mukufi gemoʼa hunoʼaeʼmo, Afiyo, huno, nagaemo Saiyoni taonifiʼmo noʼmo faiʼna atesuva yafaʼmo malegauve. Maleʼnisugeʼapaeʼmo apaiyamo faiʼa lo aeteʼa asagauʼa aigayaʼmonanafa ina lagimo agaefeʼmo apakesamo afiʼa fatago nehisafigeʼa apavagage osuge hapai vaiʼa oʼatege hugae, huno huʼniye.