Lomu 8 - The Keyagana NT and 25 OT booksAtafa apaipamo akame nehaya kavaʼe Goti Aunemeʼamo akame nehaya kavaʼefeʼmo huʼniya gemae 1 Kalaisiʼa hosu kavatilefeʼmo faliʼniyaʼmofeʼmo Gotiʼa Kalaisi Yesupiʼmo maiʼnisaya vayaʼaifeʼmo hunoʼaeʼmo, hosu vayane, huno huteno agoti huno oʼapatege kayoʼmo oʼapamige hugiye. Apakaemo atafa apaipamo akame nosafa Goti Aunemeʼamo hauʼniya kavaʼmo akame nehae. 2 Na kava hinagenoʼaeʼmo agoti huno lateteno falisuna agufa kayoʼmo olamigiye. Keʼaepa gemoʼa hosu kavaʼe nefali kavaʼeʼmo alino afole aino neʼateyaʼmonanafa Kalaisi Yesupiʼmo maiʼnonagenoʼaeʼmo Goti Aunemeʼamoʼmo afaʼa maisuna yaʼmo nelamiya Aunemeʼamoʼmo alagepa faigoko geʼaletiʼmo keʼaepa gefatiʼmo ago hatu maeno nateʼniye. 3 Atafa laipamo haneʼnigenoʼaeʼmo keʼaepa gemo akame hisuna himamutimo ohaneʼniyaʼmofeʼmo keʼaepa gemoʼa afaʼa laha oʼmaeʼniyaʼmofeʼmo Gotiʼa laha maeno hosu kavatilefeʼmo agaiʼa mafaʼneʼamo alino ateʼnigeno emineno hosu kavaʼmo nehaya vayaʼai apakufagana agufamo aliʼnigenoʼaeʼmo Gotiʼa Kalaisi agufafiʼmo hosu kavatilefeʼmo agoti huno ateteno amagiʼniye. 4 Keʼaepa gemoʼa hunoʼaeʼmo, fatago kavaʼmo hiyo, huno huʼniya fatago kavaʼamo lagaepiʼmo afole aisiyafeʼmo Gotiʼa ani kavaʼmo huʼniye. Lagaemo atafa laipamo akame osuta Goti Aunemeʼamo hauʼniya kavaʼmo akame nehune. 5 Atafa apaipamo akame nehaya vayaʼmogimo atafa apaipamoʼmo hauʼniya kavafeʼmo hapauʼnigeʼa ani kavafekeʼmo apakesamo neʼafiye. Goti Aunemeʼamoʼmo hauʼniya kavaʼmo akame nehaya vayaʼmogimo hauʼniya kavafeʼmo hapauʼnigeʼa ani kavafeʼmo apakesamo neʼafiye. 6 Atafa apaipamoʼmo hauʼniya kavafeʼmo hapauʼnigeʼa ani kavafeʼmo apakesamo neʼafiya vayaʼmo nefaliya kavategamo maiʼnae. Aunemeʼamoʼmo hauʼniya kavafeʼmo hapauʼnigeʼa ani kavafeʼmo apakesamo neʼafiya vayaʼmo afaʼa neʼmaiya kavategamo afaʼa maiʼneʼapaeʼmo, Gotiʼa aipamoʼmo falu huno nelate, huʼa nehagenoʼaeʼmo apaipamoʼmo falu nehiye. 7 Atafa apaipamoʼmo hauʼniya kavapiʼmo maiʼnisaya vayaʼmogi Goti aiyafiʼmo oʼmaige Goti keʼaepa geʼamo oʼafige nehayanageʼa afaʼa oʼafigayaʼmofeʼmo Goti kame vayaʼamo maiʼnae. 8 Maiʼnayaʼmofeʼmo atafa apaipamoʼmo yagaino neʼapateya vayaʼmogimo Gotiʼa amuse huno apatesiyafeʼmo mago alagepa kavaʼmo alagi osugae. 9 Osugayaʼmonanafa Goti Aunemeʼamo lapaipafiʼmo maiʼnisiyana atafa lapaipamoʼmo magoʼe huno yagaino nolapate. Muki vayaʼmogi Kalaisi Aunemeʼamo oʼaliʼnisayana Kalaisi vayaʼamo oʼmaiʼnae. 10 Kalaisiʼa lapaipafiʼmo maiʼnisiyana hosu kavaʼmo afole aiʼniyaʼmofeʼmo lapakufamo faligiyaʼmonanafa fatago kavaʼamo aliʼnayaʼmofeʼmo afaʼa maisaya yaʼmo alitetapa afaʼa maiʼnae. 11 Goti Aunemeʼamoʼmo Yesuʼmo faliʼniyatetiʼmo ago alino he tino ateʼniya vekamo lapaipafiʼmo maiʼnisiyana Kalaisiʼa alino he tino ateʼniya vekamoʼmo ani kava huno lapaipafiʼmo maiʼniya Aunemeʼaletiʼmo falisiya lapakufamo alino he tino lapategaiye. 12 Konagaʼnimogitapae, huʼna, ani kavaʼmo hugiyaʼmofeʼmo anonatimo haneʼniyaʼmonanafa atafa laipamo akame hisuna anonatimo ohaneʼniye. 13 Atafa lapaipamoʼmo hauʼniya kavaʼmo akame nehisayana faligayaʼmonanafa Goti Aunemeʼaletiʼmo lapakufamo hauʼniya kavaʼmo amagita falitapa ataleme ataleme neʼvisayana ofalitapa afaʼa maigae. 14 Goti Aunemeʼamoʼmo apayate aligeʼa akame nehaya vayaʼmo Goti mafaʼneʼamo maiʼnae. 15 Aliʼnaya Aunemeʼamoʼmo halate koli hisayafeʼmo lapavaleno kalavusi aliʼyateʼmo olapateʼnifa Goti afamo anagapiʼmo lapavalelino uno haino faleno lapateʼniye. Faleno lateʼnigeta Aunemeʼaʼe himamuʼaletiʼeʼmo hutaeʼmo, Afo, Afotimogae, huta keya neʼaone. 16 Goti Aunemeʼamoʼmo launelamefeʼmo, Goti mafaʼneʼamo maiʼnae, huno laha nepaigeta neʼafune. 17 Goti mafaʼneʼamo maiʼnonaʼmofeʼmo Afotimo yaʼamo alisunafeʼmo mafaʼneʼamo maiʼnone. Kalaisiʼeʼmo Afotimo yaʼmo aligune. Lagaemo agaeʼeʼmo magokepi kana yaʼmo neʼalisunana agaeʼeʼmo ha le konali yaʼamo magokepi aligune. 18 Nagesa afifi nehuʼnaeʼmo, hemenimo kana yaʼmo neʼaliya yaʼmo aise yanageno ha le konali yaʼamo lamisiya yaʼmo alopa yaʼmo haneʼniye. 19 Ani yatefeʼmo ma mopaʼe muki ma mopafi haneʼniya yaʼeʼmo Goti mafaʼneʼamoʼmo afole yateʼmo alino afole aino apatesiyafeʼmo agava maiʼnae. 20 Ma mopaʼe muki ma mopafi haneʼniya yaʼmogiʼeʼmo hosu kavaʼmo osuʼnayaʼmonanafa Gotiʼa alino hosu huno apateʼnigeʼa hosu kavaʼmo huʼa haneʼnae. Haneʼnayaʼmonanafa alagepa huʼa hanesayafeʼmo agava maiʼnae. 21 Gotiʼa mafaneʼamo hatu maeno apatesigeʼapaeʼmo ha le konali yaʼamo aliteʼa afaʼa maigae. Ani kava huno Gotiʼa ma mopaʼe muki ma mopafi haneʼniya yaʼeʼmo kasalisaya kavategati nofiʼmo hatu maeno apatesigeʼapaeʼmo alagepa huʼa hanegae. 22 Aʼnemogi mafaʼnemo aliʼa apatesayafe huʼnagenoʼaeʼmo apakafu kiʼnigeʼapaeʼmo kage kage huʼa yulagefa neʼaiya kava huʼa ma mopaʼe muki ma mopafi haneʼnaya yaʼmogiʼeʼmo kage kage hume hume neʼae. 23 Ani yaʼamogigeʼmo kage kage nosafa lagaemo Gotiʼa lamisiya yapatiʼmo hogoteno Aunemeʼamo ago lamiʼniya vayaʼmogitaʼeʼmo muki yaʼamo lamisiyafeʼmo kage kage nehune. Gotiʼa lagufale nofiʼmo hatu maeno latesigeta alopa mafaʼnegana huta maisunafeʼmo agava maiʼneta kage kage nehune. 24 Gotiʼa lagufamo alagi alino katino latesiyafeʼmo agava maiʼneta lavayagunagu nehune. Lagaemo ani yaʼmo ago aliʼnonesinana agava maiʼneta lavayagunagu nosunesine. Vayaʼmogi ageʼnaya kavafeʼmo agava maiʼneʼa apavayagunagu nosae. 25 Lagaemo oʼageʼnona yafeʼmo agava maiʼneta lavayagunagu nehutaeʼmo alagi agegaune, huta huteta oʼataleta agava neʼmaune. 26 Goti Aunemeʼamoʼmo ani kavaʼmo huno lagaemo lokiya oʼvaiʼnona vayaʼmo laha neʼmae. Lagaemo haiya kavafeʼmo nunumuʼmo hisupi huta oʼafiʼnonaʼmonanafa Goti Aunemeʼamoʼmo agaiʼamo laha neʼmaegeta lavayaʼaletikeʼmo ge osuta laipafatiʼeʼmo yulagefa aigekana agufa gemo huta nunumuʼmo nehune. 27 Lavayaʼaletikeʼmo ge nosunaʼmonanafa Gotiʼa apaipafikeʼmo neʼapakeya vekamo Aunemeʼamoʼmo agesa neʼafiya kava huno agesamo neʼafiye. Aunemeʼamoʼmo Gotiʼa hauʼniya kavafeʼmo nunumuʼmoʼmo huno nelategenoʼaeʼmo Gotiʼa neʼafiye. 28 Muki alu kava alu kavaʼmo afole neʼaiya kavaʼmoʼa Gotifeʼmo hapau apayamopafiʼmo nehapaiya vayaʼaifeʼmo Gotiʼa huguve, huno hu maleʼniya geʼaletiʼmo keya aeno ge huʼniya vayaʼmo alagepa huʼa maisayafeʼmo muki alu kavatetiʼe alu kavatetiʼeʼmo alino magokepi lokaeno aliʼyaʼmo neʼaliye. 29 Ani kavatefeʼmo Gotiʼa hogoteno agesamo afitenoʼaeʼmo hau ayamopafiʼmo hauʼniya vayaʼaifeʼmo, mafaʼneʼnigana huʼa maigae, huteno lekana paino apateʼniye. Aganaʼamogimo asole vayaʼmo maisageno hogote yege mafaʼneʼamoʼmo nepuʼapimoʼmo maisiyafekeʼmo lekana paino apateʼniye. 30 Lekana paino apateʼniya vayaʼaifeʼmo keya aeno ge huʼniye. Keya aeno ge huʼniya vayaʼaifeʼmo, naulagaleʼmo fatago vayaʼmo maiʼnae, huno hapa paiʼniye. Naulagaleʼmo fatago vayaʼmo maiʼnae, huno hapa paiʼniya vayaʼmo ha le konali yaʼamo apamiʼniye. 31 Ani kavaʼmo nehiya kavatefeʼmo na agufa gemo hugune. Gotiʼa lagaekeʼmo laha neʼmaeyaʼmofeʼmo haiya vayaʼmogimo lagaefeʼmo kame huʼa lategae. 32 Agaemo mafaʼneʼamo agegeno oʼateʼnifa mukiʼamogitalefeʼmo avalelino uno hosu vayaʼai apayapiʼmo ateʼniye. Agaemo mafaʼneʼamo ago avaleno lamiʼniyaʼmofeʼmo mafaʼneʼaʼe muki yaʼaʼeʼmo fikumo olamisifiye. Haʼao, fikumo lamigiye. 33 Ina laʼmo Gotiʼa lekana paino apateʼniya vayaʼmo apavalelinuno agoti huno apatetenoʼaeʼmo, ina hosu kavaʼmo huʼnae, huno hugiye. Haʼao, Gotiʼa apakaefeʼmo hunoʼaeʼmo, naulagaleʼmo fatago vayaʼmo maiʼnae, huno hapa paiʼniye. 34 Ina laʼmo agoti huno latetenoʼaeʼmo, hosu vayaʼmo maiʼnae, huno hugiye. Haʼao, Kalaisiʼa ago faliʼniye. Faliʼniyaʼmonanafa Gotiʼa ago alino he tino ateʼnigenoʼaeʼmo magoʼe huno laha maesiyafeʼmo Goti lamaga haopaleʼmo maiʼnenoʼaeʼmo nunumuʼmo huno nelate. 35 Ina laʼmo Kalaisiʼa lagaefeʼmo hau ayamopafiʼmo nehaiya kavapatiʼmo alino fako huno latalegaiye. Hanageke yaʼmo alisupi kana yaʼmo alisupi apaini huʼa latesafi laga tesifi kagemi yatimo ohanesifi lamagigefeʼmo hisafi lamagisageta falisupi huʼnisunana muki ani agufa kavatetiʼmo Kalaisiʼa lagaefeʼmo hau ayamopafiʼmo nehaiya kavapatiʼmo aliʼa fako huʼa olatalegae. 36 Goti mukufiʼmo avoʼmo kae maleʼniya gemoʼa hunoʼaeʼmo, Gotiyo, huʼa, vayaʼmogimo kagaetefeʼmo muki afinaʼmo kamitimo lamagisayafeʼmo nehae. Apakaemo huʼapaeʼmo, kamitimo apamagisuna sipisipi afugana huʼa maiʼnae, huʼa nehae, huno huʼniye. 37 Muki ani agufa kavaʼmo lagaetegamo afole neʼaiyaʼmonanafa lagaefeʼmo hau ayamopafiʼmo nehaiya vekaletiʼmo hemenimo magoʼe huta kame huta aeta agaseta alagepa huta neʼmaune. 38-39 Nagaemo ago ageʼnovana falisuna kavaʼmopi afaʼa maisuna kavaʼmopi enisole vayaʼmogimofi yagaiʼa neʼapateya vayaʼmogimofi himamu vayaʼmogimofi hemenimo haneʼniya kavaʼmopi henagaʼamo afole aisiya kavaʼmopi lokiya yaʼmopi anaga haneʼniya yaʼmopi afelaga haneʼniya yaʼmopi muki yaʼmopi vayaʼmogimofi huʼa Gotiʼa Ala kava netimo Kalaisi Yesupiʼmo maiʼnona vayaʼmogitaeʼmo hau ayamopafiʼmo nehaiya kavapatiʼmo aliʼa fako huʼa olatalegae. |
© 2013, Wycliffe Bible Translators, Inc. All rights reserved.
Wycliffe Bible Translators, Inc.