Lomu 4 - The Keyagana NT and 25 OT books

Gotiʼa Emalehamufeʼmo, naulagaleʼmo fatago vekamo maiʼnane, huno huʼniya gemae

¹ Mani kavatefeʼmo laginago vekamo Emalehamuʼa agaiʼa agufaletiʼmo aliʼniye, huta hisupiye.

² Haʼao. Gotiʼa Emalehamuʼmo alagepa kavaʼmo huʼniya kavatetiʼmo, naulagaleʼmo fatago vekamo maiʼnane, huno huʼniyesinana Emalehamuʼa agaiʼa agiʼaleʼmo afaʼa alino asaga huno ateʼniyesine. Ateʼniyesinaʼmonanafa Emalehamuʼa Goti aulagaleʼmo agiʼaleʼmo afaʼa alino asaga osugiye.

³ Goti mukufiʼmo avoʼmo kae maleʼniya gemoʼa na kava huʼniye, huno huʼniye. Ani gemoʼa hunoʼaeʼmo, Emalehamuʼa Goti geʼaeʼmo agesamo afino fatago huʼnigeno Gotiʼa fatago kavaʼamo amiʼniye, huno huʼniye.

⁴ Inagi vayaʼmogimo aliʼyaʼmo aliteʼapaeʼmo miyaʼapimo neʼaliya yafeʼmo, fikumo neʼaliye, huta nosupa aliʼyaʼmo aliʼnaya anonaʼapilefeʼmo miyaʼapimo neʼaliye, huta nehune.

⁵ Huta nehunaʼmonanafa aliʼyaʼmo oʼaliʼa Gotifekeʼmo apakesamo afiʼa fatago nehaya vayaʼaifeʼmo, naulagaleʼmo fatago vayaʼmo maiʼnae, huno nehiye. Agaemo mono nosaya vayaʼaifeʼmo hunoʼaeʼmo, naulagaleʼmo fatago vayaʼmo maiʼnae, huno nehiya Gotifekeʼmo apakesamo afiʼa fatago nehae.

⁶ Neviniʼeʼmo ani aulena kavafeʼmo hunoʼaeʼmo, Apakaemo keʼaepa gemo akame nehaya agufa aliʼyaʼmo oʼaliʼnayaʼmonanafa Gotiʼa fatago kavaʼamo apamiʼnisiya vayaʼaifeʼmo

⁷ ani geeʼmo hunoʼaeʼmo, Gotiʼa keʼaepa geʼamo amagiʼa neʼatalaya hosu kavaʼapimo alino atalege hosu kavaʼapimo aeno ati kaege huʼnisiya vayaʼmo aulena vayaʼmo maiʼnae.

⁸ Ala kava neʼmoʼa hosu kavaʼmo anonaʼapilefeʼmo oʼapamiʼnisiya vayaʼmo aulena vayaʼmo maiʼnae huno huʼniye.

⁹ Apakufamo lagauʼnaya vayaʼageʼmo alino auleno neʼapatefi apakufamo olagauʼnaya vayaʼeʼmo alino auleno neʼapate. Lagaemo hutaeʼmo, Emalehamuʼa agesamo afino fatago huʼnigenoʼaeʼmo Gotiʼa fatago kavaʼamo amiʼniye, huta nehune.

¹⁰ Ani afinaʼmo Emalehamuʼa haiya kava huno maiʼniye. Agufamo lagauʼniya vekamo maiʼnifi agufamo olagauʼniya vekamo maiʼniye. Agaemo agufamo lagauʼniya vekamo oʼmaiʼnifa agufamo olagauʼniya vekamo maiʼniye.

¹¹ Emalehamuʼa agufamo olagauʼniya vekamo maiʼnenoʼaeʼmo agesamo afino fatago huteno fatago kavaʼamo aliʼniye. Fatago kavaʼamo aliʼniya alagena kavaʼmo haneʼniyana agufamo lagauʼniya alagena kavaʼmo aliʼniye. Mani alagena kavaʼmo aune kavaʼmo haneʼniyana, fatago vekamo maiʼniye, huno alino apave neliya kavaʼmo haneʼniye. Apakufamo olagauʼnaya vayaʼai aepa vekamo maisigeno Gotiʼa apakaeʼeʼmo fatago kavaʼamo apamisayafeʼmo ani kava huno maiʼniye.

¹² Agaemo apakufamo lagauʼnaya kavaʼageʼmo huʼnaya vayaʼai afoʼapimoʼmo oʼmaiʼniyaʼmonanafa apakufamo lagauʼnaya vayaʼmogimo Emalehamuʼa agufamo olagauʼniya afinaʼmo agesamo afino fatago huʼniya kavaʼamo akame nehisaya vayageʼmo afoʼapimoʼmo maiʼniye.

¹³ Gotiʼa Emalehamufeʼmo hunoʼaeʼmo, muki ma mopamo kagaeʼe kaginago vayakaʼeʼmo lapamisugetapa alagi alagepa hutapa maigae, huno polomasi gemo huno ha paiʼniye. Emalehamuʼmofi aginago vayaʼamogimofi huʼa keʼaepa geʼamo akame huʼnisaya kavatetiʼmo Gotiʼa lapamiguve, huno huʼniya yaʼmo alisayafeʼmo osuʼnifa apakesamo afiʼa fatago huteʼa fatago kavaʼamo aliʼnisaya kavatetikeʼmo alisayafeʼmo huʼniye.

¹⁴ Mafaʼneʼapimogimo afoʼapimogi maleʼnaya yaʼmo neʼaliya kava huʼa keʼaepa geʼamo akame nehaya vayaʼmogimo aliʼnaesinana apakesa afiʼa fatago nehaya kavaʼmo ina agufa kavaʼmogeno Gotiʼa fikumo lapa maeʼna lapamiguve, huno huʼniya polomasi geʼamo afa gemo haneʼnisigeno afole oʼaiʼniyesine.

¹⁵ Na kava higenoʼaene. Keʼaepa geʼamo ohaneʼniyesinana keʼaepa geʼamo amagiʼa noʼatalaesine. Hiyaʼmonanafa keʼaepa geʼamo haneʼniyaʼmofeʼmo aipamo leno neʼapateya kayoʼmo apamisiya agufa kavaʼmo alino afole aino neʼate.

¹⁶ Ani kavaʼmo haneʼniyaʼmofeʼmo muki aginago vayaʼmogimo uʼa haiʼa me otaleʼa alagi uʼa haiʼa hapaiteʼa polomasi gemo hu maleʼniya yaʼmo alisayafeʼmo fikumo hapa maeno neʼapamiyanageʼa apakesamo afiʼa fatago nehaya vayaʼmogi aligae. Yu nofi aginago vayaʼamogigeʼmo oʼaligafa Emalehamuʼa huʼniya kava huʼa apakesamo afiʼa fatago nehaya aginago vayaʼmogiʼeʼmo alisayafeʼmae. Agaemo mukiʼamogita afotimoʼmo maiʼniye.

¹⁷ Ani kavatefeʼmo Goti mukufiʼmo avoʼmo kae maleʼniya gemoʼa hunoʼaeʼmo, Muki nofi vayaʼai apakinago afoʼapimoʼmo aliʼna afole aiʼna kateʼnove, huno hu maleʼniye. Ani gemo huno hu maleʼniya afinaʼmo Goti aulagaleʼmo Emalehamuʼa mukiʼamogita afotimoʼmo afole aiʼniye. Agaemo Gotifeʼmo agesamo afino fatago huʼnenoʼaeʼmo faliʼnaya vayaʼmo alino he tino apatege ohaneʼniya yafeʼmo, haneʼniye, huno huge nehiya Gotifeʼmo agesamo afino fatago huʼniye.

¹⁸ Emalehamuʼa afole aisiya kaʼmo oʼageʼniyaʼmonanafa agesamo afino fatago huteno avayagunagu huno agava maiʼniyaʼmofeʼmo Gotiʼa, muki asole kaginago vayaʼmo maigae, huno ha paiʼniya gemo afole aiʼnigeno muki nofi vayaʼai afoʼapimoʼmo ha maleʼniye.

¹⁹ Emalehamuʼa kafugaʼamoʼmo vani hataleti hisiyafeʼmo hogo huʼniya kafugafiʼmo maiʼnenoʼaeʼmo, kolaʼnimoʼmo aliʼyaʼmo oʼaliʼnigeno aʼnimo aipamo ago alino kalagu kiʼnigeno laʼagufamo faligekana huno haneʼniye, huno huʼniyaʼmonanafa ani kavafeʼmo agesa afifi huno maiʼnenoʼaeʼmo aiseʼamo agesamo afino fatago osuʼniyaʼmonanafa magoʼe huno lokiya vaino agesamo afino fatago huʼniye.

²⁰ Agaemo Gotiʼa huʼniya polomasi geeʼmo, hisifi osisifi, huno lole agesamo oʼafiʼniye. Haʼao, agesamo afino fatago huʼniya kavaʼamoʼmo lokiya vaino ateʼnigenoʼaeʼmo agaemo Gotiʼmo ala agiʼamo amiʼniye.

²¹ Agaemo Gotiʼa, huguve, huno huʼniya polomasi geeʼmo lokiya vaino magoke agesamo afiʼnenoʼaeʼmo, ani kavaʼmo afaʼa hugiye, huno huʼniye.

²² Huno huʼniyaʼmofeʼmo Gotiʼa hunoʼaeʼmo, naulagaleʼmo fatago vekamo maiʼnane, huno ha paiʼniye.

^23-24 Gotiʼa hunoʼaeʼmo, naulagaleʼmo fatago vekamo maiʼnane, huno ha paiʼniya gemo Emalehamufekeʼmo avoʼmo okaeʼnifa lagaeʼefeʼmo avoʼmo kae maleʼniye. Ani kava huno Gotiʼa lagaemo agaefeʼmo Ala kava netimo Yesuʼa faliʼniyatetiʼmo ago alino he tino ateʼniya Gotifeʼmo lagesamo afita fatago nehuna vayaʼmogitaeʼmo, naulagaleʼmo fatago vayaʼmo maiʼnae, huno laha paigiye.

²⁵ Gotiʼa hosu kavatilefeʼmo avalelino uno hosu vayaʼai apayapiʼmo atetenoʼaeʼmo naulagaleʼmo fatago vayaʼmo maiʼnae, huno laha paisiyafeʼmo kanolufatiʼmo ago alino he tino ateʼniye.