Lomu 3 - The Keyagana NT and 25 OT books

¹ Mani gemo nehuvaʼmofeʼmo Yu vayaʼmogimo alu nofi vayaʼmo aeʼa apakasesayafeʼmo hapa maesiya yaʼmo oʼaliʼnafiye. Apakufamo lagauʼnaya kavaʼmoʼa haiya kava huno hapa maegaiye.

² Muki kavatefeʼmo hapa maesiya yaʼmo ago aliʼnae. Hogote yaʼmo hapa maesiya yaʼmo haneʼniyana Gotiʼa geʼaleʼmo yagaiʼa atesayafeʼmo geʼamo ago apamiʼniye.

³ Apamiʼniyaʼmonanafa mago Yu vayaʼamogimo apakesamo afiʼa fatago osuʼnayaʼmofeʼmo Gotiʼa Emalehamufeʼmo, kaginago vayaʼmo hapa maegauve, huno ha paiʼniya gemo afa gemo haneʼniyanageno Gotiʼa agaiʼa geʼamo afaʼa akame osisifiye.

⁴ Alagi atalegeno hano hino. Muki vayaʼmogimo aigofe gemo nehisagenoʼaeʼmo Gotiʼa agaiʼa geʼamo alagi oʼataleno akame hugiye. Ani kavatefeʼmo Goti mukufi gemoʼa hunoʼaeʼmo, kagaemo gemo hisanageʼa afiteʼapaeʼmo, alagi lama gemo nehiye, huʼa hugae. Vayaʼmogimo agoti huʼa nekatesagekaeʼmo aeka apakasegane, huno avoʼmo kae maleʼniye.

⁵ Lagaemo Yu vayaʼmogita hosu kavaʼmo huʼnisunana Goti fatago kavaʼamo vayaʼai apaulagaleʼmo magoʼe huno afole aiʼnisiyana na agufa gemo hugune. Gotiʼa anonatilefeʼmo kayoʼmo nelamisigetaeʼmo, hosu kavaʼmo nehiye, huta ma mopafi vayakana huta gemo hisupiye.

⁶ Alagi atalegeno hano hino. Mani gemo lama gemo haneʼniyesinana Gotiʼa ma mopafi vayaʼmo afaʼa agoti huno oʼapatesine.

⁷ Mago Yu vayaʼmogi, hosu kavaʼmo huʼnisunagenoʼaeʼmo Goti fatago kavaʼamo vayaʼai apaulagaleʼmo magoʼe huno afole aiʼnisiyana na kava higeno agoti huno lategaiye.

⁸ Vaehae, huʼna, alagepa huʼa apakesa afiʼnaesinana alagepa kavaʼmo afole aisiyafeʼmo hosu kavaʼmo higetao, huta afaʼa nehunesine. Ani gemo afaʼa osugunaʼmonanafa mago vayaʼmogi lagaefeʼmo huʼapaeʼmo, ani gemo nehae, huteʼa huʼa faipa huʼa nelatae. Gotiʼa mani vayaʼaifeʼmo, hosu vayane, huno huteno agoti huno apategaiye. He, alagi lama gemo hugiye.

Muki ma mopafi vayaʼaifeʼmo hosu vayane, huno huʼniya gemae

⁹ Inagi lagaemo Yu vayaʼmogita aeta apakaseta alagepa vayaʼmo maiʼnopiye. Haʼao, hosu kavaʼmoʼa Yu vayaʼmogitaʼe Yu nofi vayapatiʼmo oʼmaiʼnaya vayaʼeʼmo aeno lagaseno yagaino lateʼniye, huʼna aliʼna lapave liʼnove.

¹⁰ Ani kavatefeʼmo Goti mukufiʼmo avoʼmo kae maleʼnaya gemoʼa hunoʼaeʼmo, Mago fatago vayaʼmo oʼmaiʼnae. Magokeʼatomo alagi oʼmaiʼniye.

¹¹ Mago afiʼnaya vayaʼmo oʼmaiʼnae. Gotiʼmo agesayafeʼmo kahauya nehaya vayaʼmo oʼmaiʼnae.

¹² Muki vayaʼmogimo ani kaʼmo ago ataleʼnae. Mukiʼamo hosu vayaʼmo hamaleʼnae. Alagepa kavaʼmo nehaya vayaʼmo mago oʼmaiʼnae. Magokeʼatomo alagi oʼmaiʼniye.

¹³ Lugoʼapimo kano kelimo aliʼa halo aiʼnageno atumo neʼaiya kano keligana huno haneʼnigeno hosu gemo afole neʼaiye. Apavenafuʼnaletiʼmo aigofe gemo nehae. Nagaloʼyaveʼmogi apavayafiʼmo analisa aniʼmo havai teʼniya kava huno hosu gemo apavayafiʼmo havai teʼnigeʼa geʼapiletiʼmo vayaʼmo neʼapamagiye.

¹⁴ Apakaemo lifana geʼe hapai vaiʼa neʼapataya kavaʼeʼmo apaipafiʼmo havai teʼniye.

¹⁵ Apakaemo apaiyaletiʼmo nagu nagu huʼa uʼa vayaʼmo neʼapamagiye.

¹⁶ U eʼa nehayategamo muki yaʼmo aliʼa hosu huʼa atege apakafu yaʼmo aliʼa apamige nehae.

¹⁷ Alagepa huʼa magokepi lokaeʼa maisaya kaʼmo alagi noʼagae.

¹⁸ Gotifeʼmo koli hisaya agufa apakesamo noʼafiye, huʼa avoʼmo kae maleʼnae.

¹⁹ Ago afiʼnonana Gotiʼa keʼaepa geʼaletiʼmo keʼaepa geʼamo afeʼalumelagamo maiʼnaya vayaʼaifeʼmo hapa nepaiye. Apakaemo geʼaleʼmo aeʼa atagaina huʼa ge osuʼa ani gemo huʼa ha paiʼapaeʼmo, Goti aulagaleʼmo hosu kavaʼmo huʼnonanageno kayoʼmo lamigiye, huʼa hisayafeʼmo hapa nepaiye.

²⁰ Hapa nepaiyaʼmofeʼmo Gotiʼa muki vayaʼmogimo keʼaepa geʼamo akame nehisaya kavatetiʼmo, naulagaleʼmo fatago vayaʼmo maiʼnae, huno osugiyaʼmonanafa keʼaepa geʼaletiʼmo vayaʼai hosu kavaʼapimo alino apave neliye.

Fatago kavaʼmo Gotitegatiʼmo emineneʼe, huno huʼniya gemae

²¹ Ani kava huʼa maiʼnayaʼmonanafa hemenimo Gotiʼa fatago kavaʼamo agaiʼalegatiʼmo alino apave neliye. Keʼaepa geʼamo akame nehaya kavatetiʼmo noʼapamifa fikumo hapa maeno neʼapamiye. Moseseʼe Gotitegati gemo alini eʼa aeʼa hakalo huʼa hapa nepaiya vayaʼmogiʼeʼmo avoʼmo kae maleʼnaya gefatiʼmo ani kavafeʼmo ava gemo aeʼa hakalo huʼa hapa nepaiye.

²² Gotiʼa mani fatago kavaʼamo Yesu Kalaisifeʼmo apakesamo afiʼa fatago nehaya kavatetiʼmo muki apakesamo afiʼa fatago nehaya vayaʼmo apamiʼnigeno apakaeteʼmo haneʼniye. Hailami salami huʼa noʼmaifa magoke aiyaya vayaʼmo maiʼnayaʼmofeʼmae.

²³ Na kava huʼnagenoʼaene. Muki vayaʼmogimo hosu kavaʼmo huteʼa Goti ha le konali yaʼamo uʼa haiʼa me taleʼnayaʼmofeʼmo noʼaliye.

²⁴ Noʼaliyaʼmonanafa Gotiʼa Kalaisi Yesuʼmo miya faino hatu maeno lateʼniya kavatetiʼmo, naulagaleʼmo fatago vayaʼmo maiʼnae, huno laha paiʼniye. Gotiʼa muki kavatilefeʼmo agesa oʼafino fikumo laha maeno lamiʼniye.

²⁵ Agaemo mafaʼneʼamo kolaʼaeʼmo lagesamo afita fatago hisuna kavatetiʼmo aipamo leno olateno aipamo falu huno latesiyafeʼmo mafaʼneʼamo muki vayaʼai apaulagaleʼmo alino afole aino ateʼniye. Akeyaʼvilagamo Goti vayaʼamogi hosu kavaʼmo huʼnagenoʼaeʼmo kayoʼmo oʼapamino afaʼa apakeno apataleʼniye. Gotiʼa hau huʼniya kavaʼaletiʼmo fatago kavaʼmo huʼnove, huno alino lave lisiyafeʼmo mafaʼneʼamo muki vayaʼai apaulagaleʼmo alino afole aino ateʼniye.

²⁶ He, hemenimo Gotiʼa fatago kavaʼamo ago alino lave nelinoʼaeʼmo Yesufeʼmo lagesamo afita fatago nehuna vayaʼmogitaeʼmo hunoʼaeʼmo, naulagaleʼmo fatago vayaʼmo maiʼnae, huno nehunoʼaeʼmo, fatago vekamo maiʼnove, huno alino lave lisiyafeʼmo Yesuʼa afole yateʼmo ago alino afole aino ateʼniye.

²⁷ Huʼniyaʼmofeʼmo lagitileʼmo afaʼa alita asaga huta atesuna kavaʼmo haneʼnifiye. Haʼao, ani kavaʼmo ago alino hafaino ataleʼniye. Haiya agufa kavatetiʼmo alino hafaino ataleʼniye. Keʼaepa geʼaletiʼmo alino hafaino ataleʼnifiye. Haʼao, lagesa afita fatago nehuna kavatetikeʼmo alagi alino hafaino ataleʼniye.

²⁸ Ataleʼniyaʼmofeʼmo ina kava huta afiʼnonana Gotiʼa keʼaepa geʼamo akame nehaya kavatetiʼmo naulagaleʼmo fatago vayaʼmo maiʼnae, huno nosifa apakesamo afiʼa fatago nehaya kavatetikeʼmo naulagaleʼmo fatago vayaʼmo maiʼnae, huno nehiye.

²⁹ Yu vayaʼmogitageʼmo Gotitimoʼmo maiʼniye, huta hisupi Yu nofi vayapatiʼmo oʼmaiʼnaya vayaʼmogiʼeʼmo, Gotitimoʼmo maiʼniye, huʼa hugae. He, Yu nofi vayapatiʼmo oʼmaiʼnaya vayaʼmogiʼeʼmo Gotitimoʼmo maiʼniye, huʼa hugae.

³⁰ Gotiʼa magokeʼageʼmo maiʼniyanageno Yu vayaʼmogi apakesamo afiʼa fatago nehaya kavatetiʼmo apakaefeʼmo hunoʼaeʼmo, naulagaleʼmo fatago vayaʼmo maiʼnae, huno huge Yu nofi vayapatiʼmo oʼmaiʼnaya vayaʼmogiʼeʼmo apakesamo afiʼa fatago nehaya kavatetiʼmo apakaefeʼmo hunoʼaeʼmo, naulagaleʼmo fatago vayaʼmo maiʼnae, huno huge hugiye.

³¹ Inagi lagaemo apakesamo afiʼa fatago hisaya kavafeʼmo ava gemo nehutaeʼmo keʼaepa geʼamo aeta ati nekaopiye. Alagi atalegeno hano hino. Lagaemo keʼaepa geʼamo ha maeta alita he tita neʼatone.