Lomu 16 - The Keyagana NT and 25 OT books

Ge apamamaeʼniya gemae

¹ Nagaemo lasatimoʼa Fipiʼmo Senikali kotega siosi aliʼyaʼmo neʼaliya a kanomo lapakaemo ha maesayafeʼmo agiʼaleʼmo aliʼna asaga huʼna ategesuve.

² Agaemo asole vayaʼe nagaeʼeʼmo laha maeʼniyaʼmofeʼmo lapakaemo na yaʼmo ha maetapa amisaya yaʼmo haneʼnisifi afaʼa ha maetapa amiyo. Apaote vayaʼmogi nehaya agufa alagepa kavaʼmo hutapa Ala kava neʼmo agiʼalefeʼmo alita falu fala hutapa ateteta yagaitapa ateyo.

³ Pilisilaʼe Akuvilaʼeʼmo Kalaisi Yesu aliʼyaʼamo nagaeʼeʼmo neʼaliʼa yalavelafeʼmo, Poloʼa ge lanamamaeʼniye, hutapa hana paita nateyo.

⁴ Anakaemo ofaliʼna afaʼa maisuvafeʼmo faliʼana natesaʼafeʼmo alo huʼana maiʼnaʼaʼmofeʼmo nagaemo hanao ke nehogeʼanaeʼmo muki alu nofi siosi vayaʼmogiʼeʼmo hanao keʼmo nehaʼae.

⁵ Ani kavaʼmo hutapa noʼanifiʼmo aliʼa anupa huʼa neʼmaiya siosi vayaʼaifeʼmo, Poloʼa ge lapamamaeʼniye, hutapa hapa paitapa nateyo. Nahau nayamopafiʼmo nahauʼniya vekamo Epinitasiʼa hogoteno Akaiya kotega Kalisitini vekamo hamaleʼniya vekaeʼmo, Poloʼa ge kamamaeʼniye, hutapa ha paitapa nateyo.

⁶ Maliyaʼa laha maesiyafeʼmo lusi aliʼyaʼmo aliʼniya a kanoeʼmo hutapaeʼmo, Poloʼa ge kamamaeʼniye, hutapa ha paitapa nateyo.

⁷ Atalonikasiʼe Yuniyasiʼefeʼmo hana paitanaeʼmo, Poloʼa ge lanamamaeʼniye, hutapa hana paitapa nateyo. Nagaemo Kalaisipiʼmo oʼmaiʼnova afinaʼmo hogoteʼana Kalaisipiʼmo maiʼnaʼa vekalane. Anakaemo nagae nofi vekalaʼmo maiʼneʼana mago afinaʼmo nagaeʼeʼmo magokepi kalavusi huʼnone. Anakaemo apa vayapatiʼmo ala anaki vekalane.

⁸ Ala kava nepiʼmo maiʼniya vekamo Apaliyetasifeʼmo nahau nayamopafiʼmo nahauʼniya vekaeʼmo, Poloʼa ge kamamaeʼniye, hutapa ha paitapa nateyo.

⁹ Epaniʼa Kalaisi aliʼyaʼamo lagaeʼeʼmo aliʼniya vekaʼe Setekisiʼefeʼmo nahau nayamopafiʼmo nahauʼniya vekalaʼanifeʼmo, Poloʼa ge lanamamaeʼniye, hutapa hana paitapa nateyo.

¹⁰ Apelisiʼa Kalaisiʼmo oʼataleno akame huʼniyaʼmofeʼmo agimo haneʼniya vekaeʼmo ha paitapaeʼmo, Poloʼa ge kamamaeʼniye, hutapa ha paitapa nateyo. Alisitomulasi afamo anagaʼaifeʼmo hapa paitapaeʼmo, Poloʼa ge lapamamaeʼniye, hutapa hapa paitapa nateyo.

¹¹ Nagae nofi vekamo Helotiyanifeʼmo ha paitapaeʼmo, Poloʼa ge kamamaeʼniye, hutapa ha paitapa nateyo. Nasisi afamo anagaʼamogimo Ala kava nepiʼmo maiʼnaya vayaʼaifeʼmo hapa paitapaeʼmo, Poloʼa ge lapamamaeʼniye, hutapa hapa paitapa nateyo.

¹² Talaifinaʼe Talaifasaʼeʼmo Ala kava neʼmo aliʼyaʼamo neʼaliʼa atalaʼanifeʼmo hana paitanaeʼmo, Poloʼa ge lanamamaeʼniye, hutapa hana paitapa nateyo. Pesisifeʼmo siosi vayaʼmogimo hapau apayamopafiʼmo hapauʼniya a kanomo Ala kava netefeʼmo lusi aliʼyaʼmo aliʼniya afeʼmo ha paitapaeʼmo, Poloʼa ge kamamaeʼniye, hutapa ha paitapa nateyo.

¹³ Lufasiʼa Ala kava nepiʼmo hogoteno maiʼniya vekaeʼmo ha paitapaeʼmo, Poloʼa ge kamamaeʼniye, hutapa ha paitapa nateyo. Itaʼamoʼmo itaʼnimokana huno maiʼniye.

¹⁴ Asikalitasiʼagi Falikoniʼagi Hemasiʼagi Patolopasiʼagi Hemesiʼagi huʼa apakaegiʼeʼmo magokepi lokaeʼa maiʼnaya konagatimogiʼefeʼmo hapa paitapaeʼmo, Poloʼa ge lapamamaeʼniye, hutapa hapa paitapa nateyo.

¹⁵ Filogasiʼagi Yuliyaʼagi Neliyasiʼagi Neliyasi asaʼamoʼagi Olipasiʼagi huʼa apakaegiʼeʼmo muki vayaʼmo magokepi lokaeʼa maiʼnaya apaote vayaʼaifeʼmo hapa paitapaeʼmo, Poloʼa ge lapamamaeʼniye, hutapa hapa paitapa nateyo.

¹⁶ Lapaote kavaʼmo hutapaeʼmo konagatapimogimo hapaetapa netetapa ge apamamaeyo. Muki haopalegamo aliʼa anupa huʼa neʼmaiya siosi vayaʼmogiʼeʼmo ge lapamamaeʼnae.

Mago vayaʼmogimo siosimo aliʼa fako nehaya vayaʼaifeʼmo huʼniya gemae

¹⁷ Konagaʼnimogitapae, huʼna, aliʼna he tiʼna lapatesuvafeʼmo huvanagi mago vayaʼmogi lapakaemo afiʼnaya gelefeʼmo kame huʼa ateteʼa aliʼa fako huʼa lapatege hosu kavaʼmo hisayafeʼmo lapayateʼmo alige nehaya vayaʼaifeʼmo alagepa hutapa yagaita maiʼnetapaeʼmo maitapa halove huta maiyo.

¹⁸ Ani agufa vayaʼmogimo Ala kava netimo Yesu Kalaisi aliʼyaʼamo noʼalifa amega apakufamoʼmo hauʼniya kavaʼmo akame nehae. Haga hapausiya agufa gemo huteʼa aigofe geʼapiletiʼmo hapao ke heʼa apametala huteʼa fikumo neʼafiya vayaʼmo apakesa nefaiye.

¹⁹ Muki vayaʼmogimo lapakaemo alagepa hutapa gemo afitetapa akame nehaya kavafeʼmo lapava gemo ago afiʼnayaʼmofeʼmo namogaga aiʼna nelapatove. Afiʼnayaʼmonanafa lapakaemo alagepa kavaʼmo hisayafeʼmo afiʼnaya lapaipa lapakesamo alisayafekeʼmo nahauʼniyaʼmonanafa hosu kavaʼmo osisayafeʼmo oʼafiʼnaya vayakana hutapa maisayafeʼmo nahauʼniye.

²⁰ Gotiʼa alagepa huta neʼmauna kavaʼmo aepa vekamoʼmo malage huno Sataniʼmo lapaiya afeʼalumelagamo alino aeno latapaigiye. Ala kava netimo Yesu Kalaisiʼa fikumo lapa maeno lapamino. He, Lama ge.

²¹ Timotiʼa nagaeʼeʼmo lokaetaʼa aliʼyaʼmo neʼaluʼa vekaʼe nagae nofi vayaʼmo Lusiyasiʼagi Yesoniʼagi Sosipataʼagi huʼa ge lapamamaeʼnae.

²² Nagaemo Tetiyusiʼnamo mani gemo Polo avayafatiʼmo aliʼna avoʼmo kaeʼnaeʼmo Ala kava nepiʼmo maiʼneʼnaeʼmo ge lapamamaeʼnove.

²³ Gaiyasiʼa Poloʼnaleʼmo alagepa huno yagaino nateʼniya vekaʼe noʼafiʼmo aliʼa anupa huʼa maiʼnaya siosi vayaʼmogiʼeʼmo ge lapamamaeʼnae. Elasatasiʼa taonifi monileʼmo neʼyagaiya vekaʼe Kuvotasiʼa konagatimoʼeʼmo ge lapamamaeʼnaʼae.

²⁴ Ala kava netimo Yesu Kalaisiʼa mukiʼamogitapamo fikumo lahapa maeno lapamino. He, lama ge.

Goti agiʼaleʼmo alino asaga huno ateʼniya gemae

²⁵ Gotiʼa nagaemo aeʼna hakalo nehuva alagepa faigoko geʼaletiʼe Yesu Kalaisifeʼmo ava gemo aeʼa hakalo nehaya geʼaletiʼeʼmo afaʼa alino lokiya vaino lapategaiye. Ma mopamo alo huʼniya afinatetiʼmo ani gemo fala kino haneme haneme eʼniyaʼmonanafa

²⁶ hemenimo Gotitegati gemo alini eʼa aeʼa hakalo huʼa hapa nepaiya vayaʼmogimo avoʼmo kae maleʼnaya gemo alagepa faigoko geʼamo ha le yategamo ago afole aiʼniye. Maige maige huno neʼmaiya Gotiʼa, alita aeta hakalo hiyo, huno huʼnigeʼa muki nofi vayaʼmogi apakesamo afiʼa fatago hisaya gemo akame hisayafeʼmo aeʼa hakalo huʼa hapa paiʼnae.

²⁷ Agaemo magoke Gotiʼa agaiʼageʼmo muki yaʼamo ageno aeto huʼniya vekamo agiʼaleʼmo Yesu Kalaisitetiʼmo aliʼa asaga hume hume uʼa aliʼa asaga huʼa hano osuʼa aliʼa asaga hiyo. He, lama ge.