Lomu 13 - The Keyagana NT and 25 OT books

Gamani vayaʼai apaiyafiʼmo maiyo, huno huʼniya gemae

¹ Muki vayaʼmogitapamo gamani vayaʼai geʼapimo afiyo. Gamani vayaʼmogi yagaiʼa lapatesaya himamuʼapimo Gotitegatikeʼmo neʼaliye. Gotiʼa yagaiʼa apatesayafeʼmo lekana paino apateʼniye.

² Apateʼniyaʼmofeʼmo gamani vayaʼai geʼapimo amagiʼa neʼatalaya vayaʼmogi Goti geʼaʼeʼmo ago amagiʼa neʼatalayanageno kayoʼmo apamigiye.

³ Gamani vayaʼmogimo alagepa kavaʼmo huʼa neʼmaiya vayaʼmogimo koli hisayafeʼmo yagaiʼa noʼapatafa hosu kavaʼmo nehaya vayaʼmogimo koli hisayafeʼmo yagaiʼa neʼapatae. Gamani vayaʼaifeʼmo koli osisayafeʼmo lahapauʼnifiye. Lahapauʼnisiyaʼmoʼmo alagepa kavaʼmo higeʼapao alagepa kavaʼmo nehae, huʼa hiyo.

⁴ Apakaemo alagepa hutapa maisayafeʼmo Gotiʼa apamiʼniya aliʼyaʼmo neʼaliye. Apakaemo afaʼa yagaiʼa noʼapatayaʼmonanafa kayoʼmo apamisagetapa apaketetapaeʼmo lapakaemo hosu kavaʼmo nehisayana koli hugae. Gotiʼa apakaemo hosu kavaʼmo nehaya vayaʼmo kayoʼmo apamisayafeʼmo lekana paino apateʼniye.

⁵ Ani kava nehayaʼmofeʼmo gamani vayaʼai geʼapimo afiyo. Lapakaemo kayoʼmo lamigae, hutapa nehaya geeʼmo lapakesamo oʼafitapa yuʼilaga vekatapimoʼmo hunoʼaeʼmo, geʼapimo afiyo, huno nehiyagi lapakesamo afitetapa geʼapimo afiyo.

⁶ Gamani vayaʼmogi Goti aliʼyaʼamo neʼaliyanageʼa takesi monimo neʼaliyaʼmofeʼmo takesi monimo afaʼa apamiyo.

⁷ Muki vayaʼmo afaʼa apataletapa apamisaya yaʼmo apamiyo. Anonatapilefeʼmo takesi monimo lapakitapileʼmo apamige alu takesi monimo apamige hiyo. Apaiyafiʼmo maiʼnisaya vayaʼai apaiyafiʼmo maiyo. Apakiʼapileʼmo aliʼa asaga hisaya vayaʼai apakiʼapileʼmo alita asaga hiyo.

Muki vayaʼaitegamo hisuna kavafeʼmo huʼniya gemae

⁸ Anonatapimo afaʼa ohaneno. Magoke anonatapimo afaʼa haneʼnisiyaʼmoʼmo anonatapilefeʼmo muki konagatapimogifeʼmo lahapau lapayamopafiʼmo lapaino. Vayaʼaifeʼmo hapau apayamopafiʼmo nehapaiya vayaʼmogimo muki keʼaepa geʼamo akame huʼa aliʼa afole aiʼa neʼatae.

⁹ Keʼaepa gemoʼa hunoʼaeʼmo, kumai kavaʼmo osiyo, huno huge vayaʼmo kamitimo oʼapamagiyo, huno huge kumaya oʼaliyo, huno huge lahapaʼye osino, huno huge huʼniye. Ani geʼe magoʼe keʼaepa geʼeʼmo haneʼnisiyaʼmoʼmo aepaʼamo haneʼniyana lapakaitapieʼmo lahapau lapayamopafiʼmo nelahapaiya kava huta lapaopaleʼmo maiʼnaya vayaʼaifeʼmo lahapau lapayamopafiʼmo lahapaino.

¹⁰ Hapau apayamopafiʼmo nehapaiya vayaʼmogimo hapaopaleʼmo neʼmaiya vayaʼaitegamo hosu kavaʼmo nosayaʼmofeʼmo muki keʼaepa geʼamo akame huʼa hano nehae, huno huʼniyaʼmofeʼmae.

¹¹ Afole aiʼniya afinaʼmo ago ageʼnayaʼmofeʼmo mani kavaʼmo hiyo. Lagesamo afita fatago huʼnona afinatetiʼmo mago afinaʼmo utesigeno Gotiʼa lagufamo alino katino latesiya afinaʼmo ago hogo nehiyaʼmofeʼmo lapaupatiʼmo he tita yagaitapa maisaya afinaʼmo afole aiʼniye.

¹² Hani nehiya kavaʼmo hano hisiyafeʼmo ago hogo nehigenoʼaeʼmo ha le yaʼmo afole aisiyafeʼmo nehiyanagi hanipiʼmo nehaya kavatapimo ataletetapa kame hisuna kukenatimo ha le kukenatimo alita vaigetao.

¹³ Ha le yateʼmo neʼmaiya vayaʼmogimo nehaya agufa fatago kavaʼmo higetao. Lusi neʼyaʼmo netapa alita anupa hutapa maiʼnetapaeʼmo hosu kavaʼmo osuge aniʼmo netetapa negi nagi gemo osuge kumai kavaʼmo osuge alu kava alu kavatetiʼmo muki kumai kavaʼmo osuge ge oʼvaige lapaipa kafa ohapaege hutapa maiyo.

¹⁴ Lapakaemo lapakufamoʼmo hauʼniya kavaʼmo afole aisayafeʼmo alo osutapa Ala kava netapimo Yesu Kalaisikeʼmo kukenagana hutapa alita vaiyo.