Lomu 12 - The Keyagana NT and 25 OT books

¹ Konagaʼnimogitapae, huʼna, Gotiʼa ani kavaʼmo nehiyaʼmofeʼmo nagaemo lapa maeno hau huno lapateʼniya kavaʼaletiʼe kavaʼaletiʼefeʼmo huʼnaeʼmo, Lahapao ke hovanagi Gotikeʼmo lapakufamo amiyo. Ofaliʼniya ofalinimo aunemeʼe ofalinimo aote ofalinimo Gotiʼa amuse huno lapatesiya agufa ofalinimo amiyo. Ani agufa kavaʼmo lapakesafatiʼmo mono hisaya kavaʼmo haneʼniye.

² Ma mopafi vayakana hutapa oʼmaigenoʼao Gotiʼa saufa lapaipa lapakesaʼe vayaʼmo alino hamaleno lapateno. Lapakaemo ani kavatetiʼmo Gotiʼa hiyo, huno nehiya kavaʼmo amalageka hutapa agegae. Agetetapaeʼmo, alagepa kavaʼmo Gotiʼa hauʼniya kavaʼmogeno uno haino hapaiʼniya kavaʼmo haneʼniye, hutapa agegae.

³ Nagaemo fikumo naha maeno namiʼniya himamuʼaletiʼmo muki vayaʼmogitapaeʼmo lapa paiʼnaeʼmo, Gotiʼa lapamete lapamete huno lapamiʼniya yafeʼmo hutapaeʼmo, nagesamo afiʼna fatago huʼnova yaʼmo na magi yaʼmo namiʼnifi, hutapa lapamete lapamete hutapa lapakesamo afita ho hutetapa yagaita ateyo. Fikumo yanageno mago aiseʼamo aliʼnisiya vekamoʼmo, alopa yaʼmo aliʼnove, huno agesamo afigiye.

⁴ Lagufafiʼmo asole alu ya alu yatimo haneʼniyaʼmonanafa magoke agufa aliʼyaʼmo noʼalifa alu aliʼya alu aliʼyaʼmo neʼaliye.

⁵ Ani kava huta asole vayaʼmo maiʼnetaeʼmo Kalaisiʼa magoke vekamo agufafiʼmo maiʼnone. Lamete lamete huta maiʼnonaʼmonanafa magoke vekamo agufafiʼmo alu ya alu yaʼamo maiʼnonaʼmofeʼmo afalu afalugana huta maiʼnone.

⁶ Gotiʼa alu aliʼya alu aliʼyaʼamo alisunafeʼmo alu ya alu yaʼamo fikumo laha maeno lamiʼniye. Agaetegati gemo aliʼnitetapa aeta hakalo hutapa hapa paisayafeʼmo lapamiʼnisiyana ani kavaʼmo hutapa apakesamo afiʼa fatago hisaya agufa gemo aeta hakalo hutapa hapa paiyo.

⁷ Hapa maetapa aliʼyaʼmo alisayafeʼmo lapamiʼnisiyana ani kavaʼmo hutapa hapa maetapa aliʼyaʼmo aliyo. Alitapa apaya malesayafeʼmo lapamiʼnisiyana ani kavaʼmo hutapa alita apaya maleyo.

⁸ Alita he titapa apatesageʼapaeʼmo akame hisayafeʼmo lapamiʼnisiyana ani kavaʼmo hutapa Goti geʼamo hapa paitetapa alita he titapa apateyo. Fikumo hapa maeta apamisayafeʼmo lapamiʼnisiyana ani kavaʼmo hutapa alagepa huta lapakesamo afiʼnetapaekeʼmo fikumo hapa maeta apamiyo. Yagaitapa apatesayafeʼmo lapamiʼnisiyana ani kavaʼmo hutapa lapayamukiki hutapa yagaitapa apateyo. Lahapau hutapa apatesayafeʼmo lapamiʼnisiyana lapamogaga aiʼnetapa lapau hutapa apateyo.

⁹ Aigofe olahapauno lapaipafatiʼmo lapau lapayamopafiʼmo lahapaino. Hosu kavafeʼmo alagi olahapauʼninagetapa alagepa kavateʼmo atafautapa alagi hutapa maiyo.

¹⁰ Magoke konagamogimo nehaya kava hutapa yuna lapaipa kaliʼnetapa lahapau lapayamopafiʼmo lahapaino. Apakava oʼmaitapa hogotetapa apakiʼapileʼmo alita asaga hutapa apateyo.

¹¹ Alaga olapaenagetapa lapayamukiki hutapa Ala kava neʼmo aliʼyaʼamo aliyo.

¹² Afole aisiya kavafeʼmo agava maiʼnetapaeʼmo lapavayagunagu hutapa lapamogaga aiyo. Hanageke yaʼmo aliʼnetapaeʼmo oʼataleta atafautapa alagi hutapa maiyo. Oʼataleta nunumuʼmo huge huge hutapa maiyo.

¹³ Kagemi yatapimo alita fako hutapa apaote vayaʼmo kagemi yaʼapimo ohaneʼnisiya vayaʼmo apamiyo. Nata vayaʼmo esagetapaeʼmo alagepa huta yagaitapa apateyo.

¹⁴ Lifana gemo lapa nepaiya vayaʼaifeʼmo aulena gemo hapa paiyo. Gotifeʼmo hutapaeʼmo, hosu kavaʼmo huʼa maiyo, hutapa osuta alagepa kavaʼmo huʼa maiyo, hutapa nunumuʼmo hutapa apateyo.

¹⁵ Apamogaga aisaya vayaʼeʼmo magokepi lapamogaga aiyo. Inagi aviʼyaʼmo hisaya vayaʼeʼmo ani kavaʼmo hutapa magokepi aviʼyaʼmo hiyo.

¹⁶ Magoke lapaipa lapakesamo alitapa maiyo. Ala lapaki alisaya agufa kavaʼmo osutapa ina agufa vayaʼmo maiʼnae, huʼa hisaya agufa kavakeʼmo hutapa maiyo. Alagi ago afiteta ageʼnona vayaʼmo maiʼnone, hutapa lapakesamo oʼafitapa afaʼa maiyo.

¹⁷ Lapakaetegamo hosu kavaʼmo nehisagetapaeʼmo anonaʼapileʼmo hosu kavaʼmo aeta atagaina hutapa osutapa afaʼa maiyo. Muki vayaʼmogimo lapaketeʼapaeʼmo, alagepa kavaʼmo nehae, huʼa hisaya agufa kavakeʼmo hiyo.

¹⁸ Muki vayaʼeʼmo magokepi alagepa hutapa lokaeta maisaya kaʼmo haneʼnisiyaʼmoʼmo lapakaemo afaʼa hisaya kavaʼmo hutapa magokepi lokaeta maiyo.

¹⁹ Nahau nayamopafiʼmo nahauʼniya vayaʼnimogitapae, huʼna, hosu kavaʼmo anonaʼapilefeʼmo hosu kavaʼmo aetapa atagaina huta osutapa Gotiʼa apamisiyafeʼmo maitapa halove huta ategenoʼao. Ani kavatefeʼmo Goti geʼamoʼmo hunoʼaeʼmo, Ala kava neʼmoʼa, Hosu kavaʼmo anonaʼapileʼmo apamisuva aliʼyaʼnimo nagaiʼni aliʼyaʼmo haneʼniye. Anonaʼapileʼmo aeʼna atagaina huʼna apamiguve, huno hu maleʼniye, huno huʼniye.

²⁰ Magoʼe gemo hunoʼaeʼmo, kame vayatapimo apaka tesigetapaeʼmo neʼyaʼmo apamiyo. Anifeʼmo nehapaisigetapaeʼmo aniʼmo hefitapa apamiyo. Mani kavaʼmo nehutapaeʼmo ata hokanufamo hutapa apakenopaleʼmo malesageno apakafu kigiye, huno huʼniye.

²¹ Fikumo yanageno hosu kavaʼapimoʼa aeno lapakasegaiyanagi alagepa kavatapiletiʼmo hosu kavaʼapimo aeta agaseyo.