Lomu 11 - The Keyagana NT and 25 OT books

¹ Ani gemo huʼniyaʼmofeʼmo nagaemo huʼnaeʼmo, Gotiʼa vayaʼamo alagi alino hapa faino apataleʼnifiye. Haʼao, alagi atalegeno hano hino. Ani geeʼmo huʼnaeʼmo, nagaemo Emalehamu aginagoʼamo maiʼneʼna Menisameni nofi vayapatiʼmo Isaleli vekamo maiʼnove.

² Gotiʼa akeyaʼvilaga hunoʼaeʼmo, mafaʼneʼnimo maiʼnae, huno huʼniya vayaʼmo alino oʼapataleʼniye. Goti mukufi avoʼmo kae maleʼniya gemoʼa Ilaiyafeʼmo ava gemo huʼniya gemo lapakaemo afiʼnafiye. Ilaiyaʼa Gotifeʼmo,

³ Ala kava nene, huno, apakaemo kagaetegati gemo aliniʼeʼa aeʼa hakalo huʼa hapa nepaiya vayaʼmo ago apamagiʼnageʼa falige kagae ofalinimo neʼmalaya yafa hiʼyalamuʼmo aliʼa halagape vaiʼa atalege huʼnageʼna nagaiʼnigeʼmo maiʼnogeʼapaeʼmo hemenimo kamitimo namagisayafeʼmo kahauya nehae, huno huteno agoti huno apateʼniye.

⁴ Ani gemo huʼniyaʼmonanafa Gotiʼa geʼaleʼmo aeno atagaina huno ha painoʼaeʼmo, nagaemo seveni tauseniʼa vayaʼaiteʼmo alagepa huʼna yagaiʼna apateʼnogeʼapaeʼmo aigofe gotiʼapimoʼmo Meyalofeʼmo mono osuʼnae, huno ha paiʼniye.

⁵ Gotiʼa fikumo hapa maeno lekana paino apateʼniyaʼmofeʼmo hemenimo ani kava huʼa asole vayapatiʼmo logufaʼamo maiʼnae.

⁶ Fikumo hapa maeno apamitenoʼaeʼmo lekana paino apateʼniyaʼmofeʼmo alagepa kavaʼapilefeʼmo lekana paino oʼapateʼniye. Alagepa kavaʼapilefeʼmo lekana paino apateyesinana fikumo hapa maeno noʼapamiyesine. Alagepa kavaʼapimo anonaʼapilefeʼmo neʼapamiya kavaʼe fikumo hapa maeno neʼapamiya kavaʼeʼmo alu kava alu kavaʼmo haneʼniye.

⁷ Ani kava nehiyaʼmofeʼmo na kavafeʼmo ava gemo haneʼniye. Isaleli vayaʼmogimo kahauya huʼnayana oʼaliʼnae. Lekana paino apateʼniya Isaleli vayaʼmogigeʼmo aliʼnayaʼmonanafa alu Isaleli vayaʼmogi apaipamoʼmo lokiya vaiʼniye.

⁸ Ani kavatefeʼmo mago avoʼmo kae maleʼniya gemoʼa hunoʼaeʼmo, Gotiʼa apaipamo alino havaeno ategekana huge oʼagesaya agufa apaulagamo alino hamaleno apatege oʼafisaya agufa apakesamo apamige huʼnigeʼapaeʼmo ani kavaʼmo huʼa maime maime eʼa hemeniʼeʼmo huʼa maiʼnae, huno huʼniye.

⁹ Ani kavatefeʼmo Neviniʼa hunoʼaeʼmo, apatesigeʼa hosu kavaʼmo anonaʼapilefeʼmo neʼyaʼmo neʼnaya neʼyaʼmoʼa apaneʼmu aegekana huge aneʼaifiʼmo hegekana huge yafapiʼmo apaiyamo faiʼa lo aeteʼa asagauʼa neʼaiya kavakana huge hino.

¹⁰ Apatesigeʼa oʼagesayafeʼmo apaulagafatiʼmo haniʼage hino. Lusi kana yaʼmo alika apamigeʼapao aliteʼa muki afinaʼmo ape hulitata huʼa maiyo, huno huʼniye.

Henagaʼamo Isaleli vayaʼmo haiya agufa kava huʼa maisafi huno huʼniya gemae

¹¹ Inagi Yu vayaʼmo alagi asagauʼa aisayafeʼmo apaiyamo faiʼa lo aeteʼa asagauʼa aiʼnafiye. Haʼao, alagi atalegeno hano hino. Asagauʼa aiʼnaya kavatetiʼmo Gotiʼa alu nofi vayaʼai apakufamo alino katino apateʼniye. Isaleli vayaʼmogimo apaipa kafa hapaesayafeʼmae.

¹² Ma mopafiʼmo maiʼnaya vayaʼmogimo asagauʼa aiʼnaya kavatetiʼmo asole kagemi yaʼmo neʼaliye. Malaga nofi vayaʼmogi alagepa yaʼapimo ataleʼnaya kavatetiʼmo asole kagemi yaʼmo neʼaliye. Neʼaliyaʼmofeʼmo muki Yu vayaʼai apakufamo alino katino apatesiya kavatetiʼmo na agufa kagemi yaʼmo aligae.

^13-14 Apa vekaʼamo maiʼneʼna alu nofi vayaʼmogitapalegamo neʼuvaʼmofeʼmo hemenimo alu nofi vayaʼmogitapaeʼmo mani gemo hugesuve. Ma mopafi kavatefeʼmo huʼnaeʼmo, nofi vayaʼnimogi lapaketeʼapaeʼmo hapaʼye hisigeʼna apakufamo aliʼna katiʼna apatesuvafeʼmo alu nofi vayaʼmogitapalegamo lusi aliʼyaʼmo neʼaluve.

¹⁵ Gotiʼa Yu vayaʼmo apataleʼniya kavatetiʼmo muki ma mopafi vayaʼmo alino nanu aeno neʼapatesiyaʼmoʼmo agaetegamo esageno alino falu huno apatesiya kavatetiʼmo na agufa kavaʼmo afole aigiye. Vaehae, huʼna, faliʼnayatetiʼmo alino he tino neʼapateya agufa kavaʼmo afole aigiye.

¹⁶ Mago vayaʼmogimo okaeʼnisaya peleti mayamo aliʼa lo aeʼa magokayaga atupaʼamo kaeteʼa Gotiʼmo ofalinimo amiʼnisayana magokayaga atupaʼaʼeʼmo aote yaʼmo haneʼniyaʼmofeʼmo Gotiʼa agaiʼa yaʼmo haneʼniye. Ani kava huno yosa hafuʼyaʼamo Gotiʼa agaiʼa yaʼmo haneʼnisiyaʼmoʼmo yosa akopaʼaʼeʼmo Goti agaiʼa yaʼmo haneʼniye.

¹⁷ Gotiʼa hoyafiʼmo haneʼniya yosamo agiʼamo olivi yosa akopamo lo aeno ataleteno kahaufilaga olivi yosa akopamo lo aelineno aeno hanino ateʼniye. Lapakaemo alu nofi vayaʼmo kahaufilaga yosagana hutapa maiʼnae. Hemenimo lapakaemo yosa akopaʼaʼeʼmo lokaetapa maiʼnetapaeʼmo hafuʼyaʼafatiʼmo yosa anumo aliʼnageno alino lokiya vaino nelapate.

¹⁸ Lapakaemo alino lo aeno ataleʼniya yosa akopaʼaeʼmo hutapaeʼmo, aeta agaseʼnone, hutapa osiyo. Ani agufa himuʼnamu gemo osutapa, lagaemo yosa hafuʼyaʼamo alita lokiya vaita oʼateʼnonagenoʼaeʼmo alino lokiya vaino nelate, hutapa lapakesamo afiyo.

¹⁹ Lapakaemo geʼnileʼmo aetapa atagaina huta naha paitapaeʼmo, Anonaleʼmo maisunafeʼmo akopamo lo aeno ataleʼniye, hutapa hugae.

²⁰ He, lama gemo huʼnayaʼmonanafa Kalaisifeʼmo apakesamo afiʼa fatago osuʼnayaʼmofeʼmo alino lo aeno apataleʼnigetapaeʼmo lapakaemo lapakesamo afita fatago nehaya kavatapiletiʼmo afaʼa neʼmaiye. Himuʼnamu kavaʼmo osutapa koligeʼmo huta maiyo.

²¹ Gotiʼa yosaʼafatiʼmo agaiʼamo aeʼniya yosa akopamo alino lo aeno atalesiyafeʼmo agegeno oʼateʼniyaʼmofeʼmo lapakesamo afita fatago osisayana ani kava huno lapakegeno olapategaifa alino lahapafaino lapatalegaiye.

²² Gotiʼa ani kavaʼmo huʼniyaʼmofeʼmo yuna aipamo kalino nelapateya kavaʼaʼe lokiya aipamo kalino neʼapateya kavaʼaʼefeʼmo lapakesamo afiyo. Agaemo asagauʼa aiʼnaya vayaʼaifeʼmo lokiya aipamo kalino neʼapateyaʼmonanafa lapakaefeʼmo yuna aipamo kalino nelapate. Lapakaemo yuna aipamo kalino nelapateya kavaʼafiʼmo maime maime neʼvisayana yuna aipamo kalino lapategaiyaʼmonanafa atalesayaʼmoʼmo Gotiʼa ani kava huno lapakaeʼeʼmo alino lo aeno lapatalegaiye.

²³ Apakaemo halate apakesamo afiʼa fatago hisayaʼmoʼmo apavalelino eno noʼapileʼmo aeno hanino apategaiye. Gotiʼa halate afaʼa alino aeno hanino apategaiye.

²⁴ Gotiʼa kahaufilaga haneʼniya yosafati akopamo alino lo aelino eno hoyafiʼmo haneʼniya yosafiʼmo aeno hanino lapateʼniye. Alu yosa akopamo aliʼa lo aeli eʼa akopa oʼaeʼniya yosafiʼmo aeʼa haniʼa aeʼa kamaeʼa noʼatae. Gotiʼa ani kavaʼmo huʼniyaʼmofeʼmo hoyafi haneʼniya yosa akopamo agaiʼa aeʼniya yosa akopamo noʼaleʼmo halate alinino eno aeno hanino aeno kamaeno atesiyafeʼmo lokiya aliʼyaʼmo ohaneʼniye.

Gotiʼa muki Isaleli vayaʼmogi apakufamo alino katino apatesiya kavafeʼmo huʼniya gemae

²⁵ Konagaʼnimogitapae, huʼna, alagepa huta afiʼnone, huta hutetapa himuʼnamu kavaʼmo osisayafeʼmo mago fala kiʼniya gemo lapa paisugetapa afisayafeʼmo nahauʼniye. Gotiʼa mago Isaleli vayaʼai apakesamo aino akani maleʼnigeʼa geʼamo oʼafiʼa maime maime neʼvisageʼapaeʼmo mago alu nofi vayaʼmogimo Goti kegiʼyafiʼmo uʼa haite haite huʼa haiʼa lekana pai maleʼniya vayaʼmo afole aigae.

²⁶ Gotiʼa ani kavaʼmo huno muki Isaleli vayaʼai apakufamo alino katino apategaiye. Ani kavatefeʼmo Goti mukufiʼmo huʼniya gemoʼa hunoʼaeʼmo, Apakufamo alino katino apatesiya vekamo Saiyoni kotegatiʼmo eno muki Yekopu aginago vayaʼai hosu kavaʼapimo alino atalegaiye.

²⁷ Ani kotalake gemo ago hapa paiʼnove. Henagaʼamo hosu kavaʼapimo aliʼna atalegauve, huno huʼniye.

²⁸ Yu vayaʼmogimo alagepa faigoko gemo oʼafiʼa lapakaetefeʼmo Goti kame vayaʼamo maiʼnae. Maiʼnayaʼmonanafa Gotiʼa lekana paino apateteno apakinago vayaʼaifeʼmo kotalakeʼamo hu maleʼniya kavatefeʼmo hau ayamopafiʼmo nehaiya vayaʼmo maiʼnae.

²⁹ Gotiʼa apamiʼniya yaʼmo halate hapa ofalegaiye. Keya aeno ge huʼniya kavatefeʼmo halate alu aipa agesamo oʼafigiye.

³⁰ Lapakaemo mago afinaʼmo Goti geʼamo oʼafiʼnaya kava huʼa hemenimo Yu vayaʼmogi Goti geʼamo noʼafiyaʼmofeʼmo Gotiʼa lapakaefeʼmo hau huno lapateʼniye.

³¹ Ani kavaʼmo huʼa Goti geʼamo noʼafiyaʼmofeʼmo hau huno lapateʼniya agufa kavatetiʼmo hau huno apategaiye.

³² Gotiʼa muki vayaʼaifeʼmo hau huno apatesiyafeʼmo muki vayaʼmo kalavusi huno apateʼnigeʼa geʼamo amagiʼa neʼatalae.

Gotifeʼmo hao ke hegetao, huno huʼniya gemae

³³ Vae, huʼna, solovala aniʼmo lusi vasilonamo haneʼniya kavakana huno agesamo neʼafiya kavaʼe afiteno aliʼyaʼmo neʼaliya kavaʼeʼmo vasilonagana huno haneʼniye. Lagaemo kahauya hugunaʼmonanafa alagi agae aipa agesamo oʼagegaune. Ina laʼmo aliʼyaʼmo neʼaliya kavaʼmo aepaʼamo agegaiye.

³⁴ Ani kavatefeʼmo Goti geʼamoʼmo hunoʼaeʼmo, Ina laʼmo Ala kava neʼmoʼa agesamo neʼafiya kavaʼmo ageʼniye. Ina laʼmo alino aya neʼmale.

³⁵ Ina laʼmo hogoteno Gotina mago yaʼmo amiʼnigeno anonaʼamo haneʼniye, huno huʼniye.

³⁶ Gotiʼa muki yaʼmo afoʼamoʼmo maiʼnigeno muki yaʼamo agaetetikeʼmo afole neʼaiye. Muki yaʼamo agaetetiʼmo hemenimo haneʼnigeno yagaino neʼate. Agaiʼalefeʼmo muki vayaʼe yaʼeʼmo afole aiʼnae. Muki vayaʼmogimo muki afinaʼmo agiʼaleʼmo aliʼa asaga huge huge huʼa maiyo. He, lama ge.