Lomu 10 - The Keyagana NT and 25 OT books

¹ Konagaʼnimogitapae, huʼna, nagaemo Gotiʼa Isaleli vayaʼnimo apakufamo alino katino apatesiyafeʼmo naipafatiʼmo nahauʼnigeʼna nunumuʼmo huʼna neʼapatove.

² Nagaemo apakeʼnovana apakaemo Gotitefeʼmo apayamukiki nehayaʼmonanafa Goti geʼamo alagepa huʼa noʼafiye.

³ Apakaemo huʼapaeʼmo, Gotiʼa fatago kavaʼamo fikumo neʼapamiye, huʼa afiʼa ha oleʼneʼa apakaiʼapi fatago kavaʼapigeʼmo aliʼa afole aiʼa atesayafekeʼmo aliʼyaʼmo neʼaliye. Gotiʼa agaiʼa fatago kavaʼamo alisayafeʼmo mago kaʼmo ago valino apateʼniyaʼmonanafa ohapauʼnigeʼa Goti aiyafiʼmo oʼmaiʼnae.

⁴ Kalaisiʼa muki apakesamo afiʼa fatago nehaya vayaʼmogi fatago kavaʼmo alisayafeʼmo apakae apaimuʼyaleʼmo Goti keʼaepa geʼamo ago akame huno hano huʼniye.

⁵ Moseseʼa keʼaepa gemo akame nehaya kavatetiʼmo Goti aulagaleʼmo fatago vayaʼmo maisaya kavafeʼmo avoʼmo kaenoʼaeʼmo, muki keʼaepa geʼamo akame nehisaya vayaʼmogimo akame nehaya kavatetiʼmo afaʼa maisaya yaʼmo aligae, huno avoʼmo kae maleʼniye.

⁶ Kae maleʼniyaʼmonanafa vayaʼmogi apakesamo afiʼa fatago nehaya kavatetiʼmo fatago kavaʼamo alisaya kavatefeʼmo ava gemo hunoʼaeʼmo, ina laʼmo uno haino Kalaisiʼmo avalelino eminesiyafeʼmo kokuʼnapiʼmo uno haigiye, hutapa lapakesa oʼafiyo. Ago emineʼniyaʼmofeʼmo ani agufa kavaʼmo hisaya aliʼyatapimo ohaneʼniye.

⁷ Ina laʼmo Kalaisiʼa faliʼniyatetiʼmo avalelino haisiyafeʼmo ma mopamo afeʼalumelaga uno lamigiye, hutapa osiyo. Ago he tino uno haiʼniyaʼmofeʼmae.

⁸ Ani kava hiyo, huno nosifa na agufa kavakeʼmo hiyo, huno nehiye. Ani gelefeʼmo, Goti geʼamo lapaopaleʼmo haneʼneno lapavayafiʼe lapaipafiʼeʼmo haneʼniye, huno hapa paiʼniye. Lagaemo ani gelefeʼmo apakesamo afiʼa fatago hisayafeʼmo aeta hakalo huta hapa nepaune.

⁹ Kagaemo hukaeʼmo, Gotiʼa Yesuʼmo faliʼniyatetiʼmo ago alino he tino ateʼniye, huka kaipafiʼmo kagesamo afika fatago hutekaeʼmo, Yesuʼa Ala kava netimo maiʼniye, huka kavayafatiʼmo aeka hakalo nehisanana Gotiʼa kagufamo alino katino kategaiye, huta lapa nepaune.

¹⁰ Ani kavatefeʼmo apaipafiʼmo apakesamo afiʼa fatago nehagenoʼaeʼmo Gotiʼa hunoʼaeʼmo, naulagaleʼmo fatago vayaʼmo maiʼnae, huno nehiye. Ani kavaʼmo huno Gotiʼa apagufamo alino katino apatesiyafeʼmo apavayafatiʼmo aeʼa hakalo hugae.

¹¹ Ani kavatefeʼmo Goti mukufiʼmo avoʼmo kae maleʼniya gemoʼa hunoʼaeʼmo, Ina lagimo agaefeʼmo apakesamo afiʼa fatago nehisafigeʼa apavagage osuge hapai oʼvaige hugae, huno avoʼmo kae maleʼniye.

¹² Na kava haneʼniyaʼmofeʼmae. Yu nofi vayaʼe alu nofi vayaʼmogiʼeʼmo hailami salami huʼa oʼmaiʼnae. Magokeʼage Ala kava neʼmoʼa muki vayaʼaiteʼmo yagaino neʼapateya vekamo maiʼnigeʼapaeʼmo muki vayaʼmogimo agaefeʼmo keya aeʼa ge nehaya vayaʼaitefeʼmo alopa kagemi yaʼe vekagana huno maiʼneno fikumo hapa maeno neʼapamiye.

¹³ Ani kavatefeʼmo Goti mukufiʼmo magoʼe gemoʼa hunoʼaeʼmo, Ina lagimo Ala kava neʼmo agiʼalefeʼmo keya neʼaesafigeno afaʼa apakufamo alino katino apategaiye, huno hapa paiʼniye.

¹⁴ Ani gemo huʼniyaʼmonanafa agaefeʼmo apakesamo afiʼa fatago nosisaya vayaʼmogimo haiya kava huʼa agaefeʼmo keya aeʼa ge hugae. Agaefeʼmo ava gemo oʼafiʼnisayana haiya kava huʼa agaefeʼmo apakesamo afiʼa fatago hugae. Mago vayaʼmogi agaefeʼmo ava gemo aeʼa hakalo huʼa hapa opaisayana haiya kava huʼa afigae.

¹⁵ Mago vekamoʼmo alino apatesigeʼa oʼvisayana haiya kava huʼa uʼa aeʼa hakalo huʼa hapa paigae. Ani kavatefeʼmo avoʼmo kae maleʼniya gemoʼa hunoʼaeʼmo, alagepa faigoko geʼaletiʼmo alino nanu aeno neʼapateya gemo aliniʼeʼa aeʼa hakalo huʼa hapa nepaiya vayaʼmogi apaiyamo kanale apaiyamo haneʼnigeʼa aliniʼa neʼae. Apakaemo alagepa kavafeʼmo ava gemo afiteʼa apamogaga aisayafeʼmo ani gemo aliniʼa neʼae.

¹⁶ Neʼayaʼmonanafa muki vayaʼmogimo alagepa faigoko geʼamo alagepa huʼa akame nosae. Aiyeyaʼa aise vayaʼmogi akame nehaya kavafeʼmo hunoʼaeʼmo, Ala kava nene, huno, ina lagimo ketieʼmo apakesamo afiʼa fatago huʼnae, huno ha paiʼniye.

¹⁷ Huno ha paiʼniyaʼmonanafa mago vayaʼmogi Goti geʼamo aeʼa hakalo huʼa hapa nepaigeʼapaeʼmo neʼafiye. Neʼafigenoʼaekeʼmo apakesamo afiʼa fatago nehaya kavaʼmo afole neʼaiye.

¹⁸ Afole neʼaiyaʼmonanafa Goti geʼamo oʼafiʼnafiye, huʼna loka huʼna lapafi nekove. Haʼao, ago afiʼnae. Avoʼmo kae maleʼniya gemoʼa hunoʼaeʼmo, Apake neʼaiya apakemoʼmo ma mopafi muki haopalegamo aino atagu faeno uneno huʼniye. Geʼapimoʼa muki ma mopamo atupalegamo aino atagu faeno uneno huʼniye, huno huʼniye.

¹⁹ Huʼniyaʼmonanafa Isaleli vayaʼmogimo Goti gemo oʼafiʼnafiye. Hogoteno Moseseʼa hunoʼaeʼmo, Nagaemo magoke nofi vayaʼmo oʼmaiʼnisaya vayapatiʼmo alu nofi vaya alu nofi vayaʼmo apavalesugetapaeʼmo lapaipa kafamo hapaegae. Monoʼmo oʼafiʼa negi nagi huʼa neʼmaiya vayapatiʼmo apavalesugetapaeʼmo lapaipamo legaiye, huno huʼniye.

²⁰ Henagaʼamo Aiyeyaʼa koli osuno huno haleno hapa painoʼaeʼmo, Nagaefeʼmo kahauya nosaya vayaʼmogimo nageʼnae. Ge huʼa nafi okeʼnaya vayaʼmo naipa nagesamo aliʼna apave liʼnove, huno huʼniye.

²¹ Huʼniyaʼmonanafa Gotiʼa Isaleli vayaʼaifeʼmo hunoʼaeʼmo, Nagae gemo oʼafiʼa himuʼnamu kavaʼmo nehaya vayaʼaiteʼmo yatala afinaʼmo he tiʼna maiʼneʼnaeʼmo eyo, huʼna huteʼna nahakumo aliʼna ataleʼna maiʼnove, huno hapa paiʼniye.