Leveleseni 9 - The Keyagana NT and 25 OT books

¹ Napa faefu enisole vekamoʼa pikulimo huʼnigeʼnaeʼmo ageʼnovana mago kanefiʼmo kokuʼnapatiʼmo aino atafaino ma mopafiʼmo asagauno aiʼnigeʼna ageʼnove. Ive keli kitale kiʼmo amiʼnigeno aliʼniye.

² Agaemo ive kelile kitamo yakiʼnigeno lusi kava huno halinamo aiʼnigenoʼaeʼmo yegemoʼe kokuʼnaʼmoʼeʼmo hani huʼniye.

³ Halinafatiʼmo mago akenu anagaʼmo ma mopafiʼmo haleliʼa emiʼeʼnae. Gotiʼa himamuʼapimo apamiʼnigeʼapaeʼmo sokopiyonigana huʼa hapaeʼnae.

⁴ Apakaefeʼmo, ma mopafi kahaugi hegafatalili yanagi yosagi hutapa alita hosu hutapa oʼateyo. Goti alagena yaʼamo hapanileʼmo ohaneʼnisiya vayaʼageʼmo hapaeyo, huno hapa paiʼniye.

⁵ Kamitimo apamagisaya himamuʼapimo oʼapamiʼnifa faefuʼa kaileʼmo vayaʼmo hapaesageno lusi kava huno apakafu kisiyafeʼmo himamuʼapimo alino apamiʼniye.

⁶ Ani afinaʼmo vayaʼmogi apakaiʼapimo falisaya kaʼmo afaʼa kahauya huʼa oʼagegae. Falisayafeʼmo hapaugiyaʼmonanafa afaʼa ofaligae.

⁷ Akenu anagaʼmogimo kame nehaya hosigana agufa apakufamo aliteʼa maiʼnae. Apakenopaleʼmo goligana kakolitamo aeʼa neʼapakasaya vayaʼmogi neʼmalaya agufa kakolitamo haneʼniye. Apaugosaʼamo ma mopafi vayaʼai apaugosagana huno haneʼniye.

⁸ Apayokaʼamo aʼne anagaʼai apayokagana huno yatala apayokaʼmo haneʼniye. Apaveʼmo laiyoni anagaʼai apavekana huno haneʼniye.

⁹ Hapaifiʼyaleʼmo huʼa aliʼnaya yaʼmo ati vayaʼai kapa siotigana huno haneʼniye. Hapaku agemoʼmo kame hisayafeʼmo asole hosi anagaʼmogi talalagana yaʼmo aeʼa vayu huliʼa nagu nagu huʼa uʼnagenoʼaeʼmo age neʼaigekana huno age aiʼniye.

¹⁰ Apaigoʼyaʼamo sokopiyonimo aigoʼyagana huno haneʼnigeno vayaʼmo nehapaeya aigoʼyagana agufa apaigoʼyamo haneʼniye. Apaigoʼyaletiʼmo hapaesageno apakafu kisiya himamuʼapimo haneʼniye.

¹¹ Mago vekamo kini vekaʼapimo maiʼneno yagaino apateʼniye. Ani vekamo ayoʼamo ohaneʼniya ive kelileʼmo neʼyagaiya enisole vekamo agiʼamo Himulu gefatiʼmo Amatoniʼae huʼa agi aeʼnageʼa Galiki gefatiʼmo Apoliyaniʼae, huʼa agi aeʼnae. Ani agimo aepaʼamo vayaʼmo nehapaeya vekamae.

¹² Hogote kana yaʼmo ago hano hutegeno lole kana yaʼmo afaʼa haneʼniyanageno henagaʼamo afole aigiye.

¹³ Napa sigisi enisole vekamoʼmo pikulimo huʼnigeʼnaeʼmo afiʼnovana mago vekamo Goti aulagaleʼmo haneʼniya goli hiʼyalamuʼmo folagapiʼmo maiʼnenoʼaeʼmo keya aeʼniye.

¹⁴ Agaemo pikulimo aliʼneno napa sigisi enisole vekaeʼmo, Loleʼe loleʼe enisole vayaʼmo alopa aniʼmo uno nelamiya aniʼmo agiʼamo Yufaletisi ani agiʼnaleʼmo nofi kiʼa apateʼnaya enisole vayaʼmo uka nofiʼmo hakalu heka apato, huno ha paiʼniye.

¹⁵ Uno loleʼe loleʼe enisole vayaʼmo hakalu heno apateʼniye. Gotiʼa ma mopafi maiʼnaya vayaʼmo loleʼe magoʼe vayapatiʼmo magoke vayaʼmo apamagisayafeʼmo ani aovamogi ani afinaʼmogi ani kaileʼmogi ani kafugamogi huno aliʼyaʼmo aepa faiʼa alisayafeʼmo alo huno apateʼniye.

¹⁶ Hosileʼmo fai maiʼnaya ati vayaʼmo na magi vayaʼmo maiʼnafi huno naha painoʼaeʼmo tu hataleti miliyoniʼamo vayaʼmo maiʼnae, huno naha paiʼniye.

¹⁷ Alagamuna agegekana huʼna apakeʼnovana hosiʼe hosileʼmo fai maiʼnaya ati vayaʼeʼmo maiʼnageno kapa siotiʼapimoʼa atagana huno haesa huge oko huge sofa yafaʼmo atafiʼmo kaeʼnageno leno nekamaʼage hugekana agufa yaʼeʼmo apakeʼnove. Hosimogi apakenopamo laiyoni anagaʼai apakenopagana huno haneʼnigeno apavayafatiʼmo atagi halinagi ata neleya yafaʼmo agiʼamo sofa yafanagi huno leʼniye.

¹⁸ Ani hosimogi apavayafiʼmo haneʼniya kayoʼmo ata kayotetinagi halina kayotetinagi ata neleya yafa kayotetinagi huʼa loleʼe magoʼe vayapatiʼmo magoke vayaʼmo kamitimo apamagiʼnae.

¹⁹ Hosimogimo apamagisaya himamuʼapimo apavayafiʼmo hanege apaigoʼyaleʼmo hanege huʼniye. Apaigoʼyamo nagaloʼyavemo aigoʼyakana huno haneʼnigeno apaigoʼya atupaleʼmo nagaloʼyavemo agenopagana huno haneʼnigeʼapaeʼmo vayaʼmo hapaeʼnae.

²⁰ Ani kayotetiʼmo kamitimo oʼapamagiʼnaya vayaʼmogimo hosu enisole vayaʼaiteʼe alo huʼnaya aigofe gotiʼapimogiteʼeʼmo oʼapataleʼa magoʼe huʼa mono huʼnae. Apakaemo aigofe gotiʼapimogi goli yafatetiʼmo alo huge siluva yafatetiʼmo alo huge haesa yafatetiʼmo alo huge afa yafatetiʼmo alo huge yosaletiʼmo alo huge huʼnaya aigofe gotiʼapimogimo mago yaʼmo oʼagege ge oʼafige kaʼmo umenitata osuge nehaya aigofe gotiʼapimogimo oʼapataleʼnae.

²¹ Ani kava huʼa vayaʼmo hapaege Satani himamuʼaletiʼmo noʼagaya agufa aune kavaʼmo huge kumai kavaʼmo huge kumayaʼmo alige nehaya kavaʼapimo ataleteʼa apaipamo aliʼa afe oleʼnae.