Leveleseni 8 - The Keyagana NT and 25 OT books

Napa seveni kamemo alino akauʼniya gemae

¹ Aikeli sipisipimoʼa napa seveni kamemo alino neʼakaigeʼapaeʼmo kokuʼnapi vayaʼmogimo aise afinaʼatomo aise aovafiʼmo ge osuʼa afaʼa maiʼnae.

² Inagi ageʼnovana seveniʼa enisole vayaʼmo Goti aulagaleʼmo he tiʼa maiʼnaya enisole vayaʼmo apamiʼniya pikulimo aliteʼa maiʼnageʼna apakeʼnove.

³ Mago alu enisole vekamoʼmo goli yuvapafiʼmo atamo kaeʼa neʼmalaya yuvapamo aliteno ofalinimo neʼmalaya hiʼyalamuteʼmo eno he tino maiʼniye. Mago vekamoʼmo asole yaʼmo atafiʼmo kaeʼnigeno alagepa atumo neʼaiya yaʼmo alino enisole vekamo amiʼniye. Muki apaote vayaʼmogimo nunumuʼmo nehaya geʼapiʼe alagepa atumo neʼaiya yaʼeʼmo alino goli hiʼyalamuteʼmo maleteno Gotiʼmo amisiyafeʼmo amiʼniye.

⁴ Alino yuvapafiʼmo maleʼnenoʼaeʼmo atafiʼmo kaeʼnigeno halinamo aiteno alagepa atumo aiʼnigeno halinaʼe apaote vayaʼmogi nunumuʼmo huʼnaya geʼapiʼeʼmo enisole vekamo ayapatiʼmo Gotitegamo magokepiʼmo lokaeno uno haiʼniye.

⁵ Inagi ani enisole vekamoʼmo yuvapamo aliteno hiʼyalamutetiʼmo atamo aeno yuvapafiʼmo maleno havai teteno alino ma mopafiʼmo aino atagu faeno ataleʼnigeno hakalu hakalu huge alopa agemo aige hafosa haiʼnigeno alino alave alave huge imima alige huʼniye.

Pikulimo huʼnaya gemae

⁶ Hutegeʼapaeʼmo seveniʼa enisole vayaʼmogimo seveniʼa pikulimo aliʼneʼa pikulimo hisayafeʼmo alo huʼa maiʼnae.

⁷ Hogote enisole vekamoʼmo pikuli huʼnigenoʼaeʼmo ko aigekana huno ko mopagi atagi kolanagi huno aiʼniye. Ma mopamo loleʼe magoʼe atupaletiʼmo magokayaga atupa mopamo ago atamoʼmo leno sagaliʼniye. Ani kava huno loleʼe magoʼe yosafatiʼmo magoke yosamo leno sagaliʼniye. Muki kahauʼamo ago leno sagaliʼniye.

⁸ Napa tu enisole vekamoʼmo pikulimo huʼnigenoʼaeʼmo alopa avefiʼmo atamo neleya avegana yaʼmo alino yaga auno ataleʼnigeno solovala anipiʼmo asagauno aiʼniye. Solovala aniʼmo loleʼe magoʼe atupaletiʼmo magokayaga atupalegamo kola aniʼmo hamaleʼniye.

⁹ Hamaleʼnigeʼa loleʼe magoʼe nofi vayaʼmo solovala anipiʼmo maiʼnaya vayapatiʼmo magoke nofi vayaʼmo ago faliʼnae. Asole sipifatiʼmo lole sipilaʼmo ateno magoke sipimo alino hosu huno atetenoʼaeʼmo magoke sipimo alino hosu huno atalete atalete hulino uʼniye.

¹⁰ Napa tali enisole vekamoʼmo pikuli huʼnigenoʼaeʼmo alopa kanefiʼmoʼa ata kani aegekana huno aeno ha leʼnigenoʼaeʼmo kokuʼnapiʼmo loleʼe magoʼe anipatiʼmo magoke aniʼmo uno nelamiya anipiʼe magoke meti anipiʼeʼmo asagauno aiʼniye.

¹¹ Ani kanefiʼmo agiʼamo atu neheya yaʼmae. Loleʼe magoʼe anipatiʼmo magoke aniʼmoʼa atu heʼnigeʼapaeʼmo asole vayaʼmogimo ani aniʼmo neteʼa ago faliʼnae.

¹² Napa fo enisole vekamoʼmo pikuli huʼnigenoʼaeʼmo loleʼe magoʼe yegemo atupaletiʼmo magokayaga atupaleʼmo amagiʼnigeno hani huʼniye. Ani kava huno loleʼe magoʼe kaimo atupaletiʼmo magokayaga atupaleʼmo hani huʼniye. Loleʼe magoʼe kanefipatiʼmo magoke kanefiʼmoʼa hani huʼniye. Felugamo lole afinaʼmo afaʼa haneʼnigeno magoke afinaʼmo hani huʼniye. Haniʼilagamo lole afinaʼmo afaʼa haneʼnigeno magoke afinaʼmo hani huʼniye.

¹³ Hutegeʼnaeʼmo ageʼnovana mago enisole vekamoʼmo kokuʼnaʼmo folagateʼmo halelitata nehunoʼaeʼmo, kage kage, huʼniye. Loleʼe magoʼe enisole vayaʼmogimo pikulimo nehisageʼapaeʼmo ma mopafi vayaʼmogimo kagegage hugae, huno huʼniye.