Leveleseni 7 - The Keyagana NT and 25 OT books

Gotiʼa vani hataleti foti fo tauseniʼa vayaʼaiteʼmo alagena kavaʼamo hu maleʼniya gemae

¹ Ani gemo afiteʼna ageʼnovana loleʼe loleʼe enisole vayaʼmogimo mopafiʼmo loleʼe loleʼe atupaleʼmo he tiʼa maiʼneʼapaeʼmo mopalenagi solovala anitenagi yosalenagi huʼa yasimo oʼalisiyafeʼmo ma mopamo atupaleʼmo loleʼe loleʼe yasileʼmo atafauʼnageʼna apakeʼnove.

² Ageʼnovana mago alu enisole vekamoʼmo yegemo haine neʼeya kotegatiʼmo afaʼa neʼmaiya Goti alagena kavaʼamo hu malesiyafeʼmo aliteno eʼnigeʼna ageʼnove. Agaemo loleʼe loleʼe enisole vayaʼaifeʼmo Gotiʼa ma mopaʼe solovala aniʼeʼmo aliʼa hosu huʼa atalesaya himamuʼapimo apamiʼniya enisole vayaʼaifeʼmo alopa gefatiʼmo keya aeno ge huʼniye.

³ Lapakaemo ma mopagi solovala aninagi yosagi hutapa alita hosu hutapa oʼataleʼnigetao hogoteta Gotitimo aliʼyaʼamo neʼaliya vayaʼai hapanileʼmo alagena kavaʼamo hu malegaune, huno hapa paiʼniye.

⁴ Na magi vayaʼmogi Goti alagena kavaʼamo hapanileʼmo hu maleʼnaya vayaʼmo maiʼnafi huno naha paiʼniye. Vani hataleti foti fo tauseniʼa vayaʼmo muki Isaleli nofi vayapatiʼmo maiʼnaya vayaʼaiteʼmo alagena kavaʼamo hu maleʼnae.

⁵ Yuta nofi vayapatiʼmo tuolofu tauseniʼa vayaʼaiteʼmo alagena kavaʼamo hu maleʼnae. Lumeni nofi vayapatiʼmo tuolofu tauseniʼa vayaʼaiteʼmo alagena kavaʼamo hu maleʼnae. Gati nofi vayapatiʼmo tuolofu tauseniʼa vayaʼaiteʼmo alagena kavaʼamo hu maleʼnae.

⁶ Asa nofi vayapatiʼmo tuolofu tauseniʼa vayaʼaiteʼmo alagena kavaʼamo hu maleʼnae. Napitali nofi vayapatiʼmo tuolofu tauseniʼa vayaʼaiteʼmo alagena kavaʼamo hu maleʼnae. Manasa nofi vayapatiʼmo tuolofu tauseniʼa vayaʼaiteʼmo alagena kavaʼamo hu maleʼnae.

⁷ Simiyoni nofi vayapatiʼmo tuolofu tauseniʼa vayaʼaiteʼmo alagena kavaʼamo hu maleʼnae. Livai nofi vayapatiʼmo tuolofu tauseniʼa vayaʼaiteʼmo alagena kavaʼamo hu maleʼnae. Isaka nofi vayapatiʼmo tuolofu tauseniʼa vayaʼaiteʼmo alagena kavaʼamo hu maleʼnae.

⁸ Semulani nofi vayapatiʼmo tuolofu tauseniʼa vayaʼaiteʼmo alagena kavaʼamo hu maleʼnae. Yosefe nofi vayapatiʼmo tuolofu tauseniʼa vayaʼaiteʼmo alagena kavaʼamo hu maleʼnae. Menisameni nofi vayapatiʼmo tuolofu tauseniʼa vayaʼaiteʼmo alagena kavaʼamo hu maleʼnae.

Asole vayaʼaifeʼmo hapa paiʼniya gemae

⁹ Ani kavaʼmo afole aitegeʼna ageʼnovana asole vayaʼmo lekana opaisuna agufa vayaʼmo muki alu kotega alu kotegamo neʼmaiya vayanagi muki alu nofi vaya alu nofi vayanagi muki alu apakufaʼe alu apakufaʼe vayanagi muki alu apake alu apakemo neʼaiya vayanagi huʼa yagaino neʼapateya vekamo siya aulagaʼe aikeli sipisipimo aulagaʼeʼmo eʼa he tiʼa maiʼnageʼna apakeʼnove. Apakaemo yatala yaveyaveʼage kukenamo vaiʼa aliʼnaya vayaʼmogi vayaveʼmo haitagana yaʼmo apayapiʼmo aliʼnae.

¹⁰ Apakaemo alopa gefatiʼmo huʼapaeʼmo, Gotitimoʼmo yagaino neʼapateya vekamo siyaʼaleʼmo fai maiʼniya vekamoʼe aikeli sipisipi vekamoʼeʼmo anakaiʼanigeʼmo lagufamo alitana katitana lateʼnaʼanagi ala lanakitanimo aliʼao, huʼa huʼnae.

¹¹ Muki enisole vayanagi vayatama vayanagi loleʼe loleʼe vayanagi huʼa yagaino neʼapateya vekamo siyaʼaleʼmo he tiʼa faiʼa ku aiʼa ateʼnae. Inagi apakaemo yagaino neʼapateya vekamo siya aulagaʼmo asagauʼa aiteʼa apaugosalegatiʼmo mopaleʼmo aiʼa ati kaeʼneʼa Gotifeʼmo mono huʼnae.

¹² Apakaemo huʼapaeʼmo, He lama ge. Gotitimofeʼmo amuse huʼa ateteʼa agiʼaleʼmo aliʼa asaga huʼa ateyo. Alagepa huno ageteno afiʼniya vekamae, huʼa huteʼa hao ke heʼa ala agiʼamo amiyo. Muki yaʼagi lokiyaʼagi himamuʼagi huno haneʼniya vekamae, huʼa, muki afinaʼmo hume hume viyo. He lama ge, huʼa huʼnae.

¹³ Mago vayatama vekamoʼmo, Yatala yaveyaveʼage kukenamo vaiʼa aliʼnaya vayaʼmo ina lagimae. Ani vayaʼmo haiyategatiʼmo eʼnae, huno nafi geʼnigeʼnaeʼmo,

¹⁴ Ala vekae, huʼna, oʼapakeʼnove. Kagaemo apakeʼnanagi naha paiyo, huʼna afi geʼnogeno naha painoʼaeʼmo, Kalaisiʼa lusi kava huʼa apaini huʼa lapatesaya afinaʼmo afole aigiye, huno lapa paiʼniya afinaʼmo alopa hanageke yaʼmo ago afole aiʼnigeʼa Goti geʼamo oʼataleʼa eʼa maiʼnae. Yatala kukenaʼapimo aikeli sipisipi vekamo kolaʼaletiʼmo sese huʼnageno yaveyave kukenamo hamaleʼniye.

¹⁵ Ani kavaʼmo huʼnayaʼmofeʼmo Goti aulagaleʼmo yagaino neʼapateya vekamo siya aulagaleʼmo maiʼneʼa felugaʼe haniʼilagaʼeʼmo aote mono noʼafiʼmo aliʼyaʼmo aliʼnae. Yagaino neʼapateya siyateʼmo fai maiʼniya vekamoʼmo apakaeʼeʼmo magokepi lokaeno maigiye.

¹⁶ Halate apaka otege anifeʼmo ohapauge hugiye. Yegemoʼmo leno pasaga olisigeno atamoʼmo amuko ohapaugiye.

¹⁷ Na kava hinageʼapaene. Aikeli sipisipimoʼa yagaino neʼapateya vekamo siyaʼamo folagapiʼmo maiʼniya sipisipi vekamoʼmo sipisipileʼmo yagaiʼa neʼapataya kava huno yagaino apateteno meti aniʼamoʼa afaʼa maisaya yaʼmo neʼapamiya anitegamo apavalelino ugiyaʼmofeʼmae. Gotiʼa apaulagafatiʼmo apaunumo alino laneno atalegaiye, huno huʼniye.