Leveleseni 6 - The Keyagana NT and 25 OT books

Kamemo alino akauteno pepamo alino ata leʼniya gemae

¹ Ageʼnovana aikeli sipisipimoʼa hogote kamemo alino neʼakaigenoʼaeʼmo magoke vekamo loleʼe loleʼe vayapati vekamoʼmo alopa gefatiʼmo hakalu hugekana agufa gemo hunoʼaeʼmo, eka ago, huno ge huʼniye.

² Huno huʼnigeʼna ageʼnovana naulagaleʼmo yaveyave hosimo maiʼnigeʼna ageʼnove. Hosileʼmo fai maiʼniya vekamoʼmo ati aliʼnigeno Gotiʼa yagaino neʼapateya kakolitamo amiʼnigeno aliteno uno kamemo huno aeno neʼapakaseya vekamoʼmo uno kamemo huno aeno apakasesiyafeʼmo uʼniye.

³ Aikeli sipisipimoʼa napa tu kamemo alino neʼakaigenoʼaeʼmo loleʼe loleʼe vayapatiʼmo napa tu vekamoʼmo eka ago, huno ge huʼnigeʼna afiʼnove.

⁴ Mago alu hosimo haesa hosimo eʼnigeno ani hosileʼmo fai maiʼniya vekamoʼmo apamagisiyafeʼmo kame huno apatesiya himamuʼamo aliʼniye. Mago vekamoʼmo alopa naipemo amiʼnigeno aliteno uʼniye.

⁵ Aikeli sipisipimoʼa napa tali kamemo alino neʼakaigenoʼaeʼmo loleʼe loleʼe vayapatiʼmo napa tali vekamoʼmo eka ago, huno ge huʼnigeʼna afiteʼna ageʼnovana naulagaleʼmo anupa hosimo eʼnigeno ani hosileʼmo fai maiʼniya vekamoʼmo sigelimo ayapiʼmo aliʼniye.

⁶ Inagi loleʼe loleʼe vayapati vekamoʼmo age aigekana huno ge hunoʼaeʼmo, kafu hu afinafeʼmo magoke afinaʼmo aliʼyaʼmo aliʼnaya yatefeʼmo miyaʼapimo afaʼa ataleʼa loleʼe loleʼe laisi kapumo hugekana huʼa huʼnaya yaʼmo agiʼamo vitimo miya faigae. Magoke afinaʼmo aliʼyaʼmo aliʼnaya yatefeʼmo miyaʼapimo afaʼa ataleʼa tuolofuʼa kapumo napa tu agufa vitimo agiʼamo malimo miya faigae. Alifi yosa alagafati aniʼe nofi alagafati aniʼeʼmo alika hosu huka oʼato, huno huʼniye.

⁷ Inagi aikeli sipisipimoʼa napa fo kamemo alino neʼakaigeʼnaeʼmo afiʼnovana loleʼe loleʼe vayapatiʼmo napa fo vekamoʼmo eka ago, huno ge huʼniye.

⁸ Ageʼnovana naulagaleʼmo falupa hosimo maiʼnigeno ani hosileʼmo fai maiʼniya vekamo agiʼamo vayaʼmo apamagisigeʼa falisaya vekamae, huno haneʼniye. Eno uʼnigeno akame huno mago vekamo eʼniye. Agiʼamo faliʼnaya vayaʼmo uʼa maiʼnaya kotegae, huno haneʼniye. Anakaemo ma mopafi maiʼnaya vayapatiʼmo aliʼana fako huʼana loleʼe loleʼe vayaʼmo apateʼneʼana loleʼe magoʼe vayaʼmo afaʼa apateteʼana magoke vayaʼmo apamagisaʼa himamuʼanimo aliʼnaʼae. Anakaemo kame huʼana apatesaʼageʼapaeʼmo falige kafu kavaʼmo aliʼana afole aiʼana atesaʼageʼapaeʼmo falige kaita hapausiya kavaʼmo aliʼana afole aiʼana atesaʼageʼapaeʼmo falige afela afumogi hapaesageʼa falisayafeʼmo aliʼana apatesaʼageʼa uge hisaya himamuʼanimo aliʼnaʼae.

⁹ Agaemo napa faefu kamemo alino neʼakaigeʼnaeʼmo ageʼnovana faliʼnaya vayaʼai apakupi mafaʼnemo ofalinimo nehaya hiʼyalamuʼmo hipakapiʼmo maiʼnageʼna apakeʼnove. Ani vayaʼmogimo Goti geʼamo Kalaisife ava gemo oʼataleʼa alagepa huʼa aeʼa hakalo huʼa hapa paiʼnayaʼmofeʼmo apamagiʼnae.

¹⁰ Apakaemo alopa gefatiʼmo huʼapaeʼmo, kayamufaʼage ala kava neʼmogae, kaote vekamo lama geʼageʼmo nehana vekamogae, huʼa, Ma mopafi vayaʼmogimo kamitimo lamagiʼnayaʼmofeʼmo na magi afinaʼmo utesigeka hosu kavaʼapimo alika fako huka apateteka kayoʼmo apamigane, huʼa ge huʼa afi geʼnae.

¹¹ Gotiʼa yatala yaveyave kukenamo apamitenoʼaeʼmo, Lapamagiʼnagetapa faliʼnaya kava huʼa aliʼyaʼnimo lapakaeʼeʼmo magokepi lokaeta neʼaliya vayaʼe konagatapimogiʼeʼmo apamagisageʼapaeʼmo faligae. Aise afinaʼmo apakava maime maime neʼvisageʼapaeʼmo muki falisayafe hisaya vayaʼmo afaʼa faligae, huno hapa paiʼniye.

¹² Ageʼnovana aikeli sipisipimoʼa napa sigisi kamemo alino neʼakaigenoʼaeʼmo lusi imimaʼmo aliʼnigeno yegemo oleno alino anupaʼage huteno anupa kenagana huʼnigeno kaimoʼmo kolakana huʼniye.

¹³ Yasimoʼmo yuʼyu yosa alagamo alino hali hutalegeno asagauno neʼaiya kava huno muki kanefiʼmo mopafiʼmo asagauʼa aiʼnae.

¹⁴ Hiya kokuʼnaʼmo matimo aliʼa kafage kigekana huno hano huʼniye. Muki aveʼe ani agoʼnanenaʼmogiʼeʼmo hanaʼnaya yatetiʼmo ataleʼa uʼa lageso hisayafeʼmo uʼnae.

¹⁵ Hutegeʼapaeʼmo ma mopafi ala kini vayanagi yagaiʼa neʼapataya vayanagi ati vayaʼaiteʼmo yagaiʼa neʼapataya vayanagi kagemi yaʼapiʼe vayanagi lokiya vayanagi muki kalavusi aliʼyaʼmo neʼaliya vayanagi afaʼa neʼmaiya vayanagi huʼa muki vayaʼamo uʼa yafa kapiʼmo fala kige avefiʼmo haneʼniya yafa kapiʼmo uʼa haiʼa fala kige huʼnae.

¹⁶ Apakaemo aveʼe yafaʼefeʼmo, Aika naku paeka emikeka aika lati kaegeʼanao yagaino neʼapateya vekamo siyateʼmo fai maiʼniya vekaʼe aipamo leno nelateya aikeli sipisipimoʼeʼmo olagesaʼafeʼmae.

¹⁷ Anaipamo leʼana neʼapataʼa afinaʼmo afole aiʼnigi haiya vayaʼmo afaʼa he tiʼa maigae, huʼa huʼnae.