Leveleseni 5 - The Keyagana NT and 25 OT books

Avoʼmo kaeteno alino kafage ki maleʼniya gemae

¹ Ageʼnovana yagaino neʼapateya siyateʼmo fai maiʼniya vekamoʼmo apepaleʼmo aluga alugaʼamo avoʼmo kaeteno alino kafage ki maleʼneno seveniʼa afinaʼmo kameletiʼmo faleteno aino kamaeteno lamaga ayapiʼmo aliʼniye.

² Ageʼnovana mago lokiya enisole vekamoʼmo hunoʼaeʼmo, Ina laʼmo himamuʼaʼe vekamo maiʼniyanageno seveniʼa kamemo afaʼa alino akauteno alino ata legaiye, huno alopa gefatiʼmo aeno hakalo huno hapa paiʼniye.

³ Hapa paiʼniyaʼmonanafa muki kokuʼnapi neʼmaiya vayanagi ma mopafi neʼmaiya vayanagi ma mopamo afeʼalumelagamo neʼmaiya vayanagi huʼa avoʼmo kae maleʼniya gemo afaʼa aliʼa akauteʼa aliʼa ata leʼa oʼagegae.

⁴ Magoke vekamoʼmo afaʼa alino ata leno lekana paisiya vekamo alagi oʼmaiʼniyaʼmofeʼmo lusi kava huʼna aviʼyaʼmo nehugenoʼaeʼmo

⁵ mago vayatama vekamoʼmo, Aviʼyaʼmo osuvo. Ago, huno, Yuta nofi vayapatiʼmo ani laiyonimo Nevini nofi vayapatiʼmo hafuʼyaʼagana huno maiʼniya vekamoʼmo muki kavaʼe vayaʼeʼmo aeno apakaseʼniyanageno seveniʼa kamemo afaʼa alino akauteno alino ata legaiye, huno naha paiʼniye.

⁶ Naha paiʼnigeʼnaeʼmo ageʼnovana mago aikeli sipisipimoʼmo yagaino neʼapateya vekamo siyateʼmo fai maiʼniya vekamo aulagamo maiʼnigeʼa loleʼe loleʼe vayaʼe tuveti foʼa vayatama vayaʼmogiʼeʼmo faiʼa ku aiʼa ateʼnae. Amagiʼnageno faliʼniya aikeli sipisipigana huno maiʼniye. Agaemo agenopafatiʼmo seveniʼa lokiyaʼamo haneteno seveniʼa aulagamo haneʼniye. Seveniʼa aulagamo haneʼniya kava huno Goti Aunemeʼamo himamuʼamo seveniʼa himamuʼamo alino ateʼnigeno muki ma mopafiʼmo uneno nehiya Auneme himamuʼamo haneʼniye.

⁷ Agaemo uno yagaino neʼapateya siyateʼmo fai maiʼniya vekamo lamaga ayapatiʼmo alino kafage ki maleʼniya pepamo aliʼniye.

⁸ Aliʼnigeʼapaeʼmo loleʼe loleʼe vayaʼe tuveti foʼa vayatama vayaʼmogiʼeʼmo aikeli sipisipimo aiyafiʼmo asagauʼa aiʼnae. Mukiʼamogimo apamete apamete huʼa alopa gitagana yaʼmo alige alopa goli yuvapa alige huteʼa maiʼnae. Ani yuvapafiʼmo atafiʼmo kaeʼnageno alagepa atumo neʼaiya agufa yaʼmo haneʼniya kava huno apaote vayaʼmogimo nunumuʼmo nehaya gemo haneʼniye.

⁹ Apakaemo saufa yokemo huʼapaeʼmo, Kamagiʼnageka faliteka Gotitefeʼmo kolakaletiʼmo miya faika lateʼnane. Kagaemo muki alu nofi vaya alu nofi vayanagi muki alu apake alu apakemo neʼaiya vayanagi muki alu apakufaʼe alu apakufaʼe vayanagi muki alu kotega alu kotegamo maiʼnaya vayanagi huka miya faika hatu maeka lateʼnanaʼmofeʼmo alino kafage ki maleʼniya pepaletiʼmo kamemo afaʼa alika akautaleka alika ata lesana vekamo maiʼnane.

¹⁰ Kagaemo yagaita apatesuna kini vayaʼmo maige mono huta apatesuna vayaʼmo maige huʼneta Goti aliʼyaʼamo alisunafeʼmo alika hamaleka lateʼnananageta ma mopafiʼmo yagaita apategaune, huʼa huʼnae.

¹¹ Hutageʼna apakeʼnovana tauseni tauseniʼa enisole vayaʼmogimo apake aiʼnageʼna afiʼnove. Apakaeʼe loleʼe loleʼe vayatama vayaʼmogiʼeʼmo yagaino neʼapateya siyaʼaleʼmo faiʼa ku aiʼa ateʼnae.

¹² Apakaemo alopa gefatiʼmo huʼapaeʼmo, amagiʼnageno faliʼniya aikeli sipisipimoʼa alagi alisiya vekamo maiʼniyaʼmofeʼmo himamuʼamo alige muki alagepa kagemi yaʼamo alige afiteno ageʼniya kavaʼamo alige lokiyaʼamo alige ala agiʼamo alige ha le konali yaʼamo alige muki yaʼamo fikumo alige hisiya vekamo maiʼniye, huʼa huʼnae.

¹³ Afiʼnovana muki kokuʼnapi vayanagi ma mopafi vayanagi ma mopamo afeʼalumelaga vayanagi solovala anipi vayanagi muki haopalegamo maiʼnaya vayanagi huʼa ge huʼnageʼna afiʼnove. Ge huʼapaeʼmo, Yagaino neʼapateya siyateʼmo fai maiʼniya vekaʼe aikeli sipisipi vekaʼefeʼmo hanao ke hege ala anakiʼanileʼmo aliʼa asaga huʼa anatege muki yaʼalefeʼmo lokiya vekalane, huʼa huge hume hume viyo, huʼa huʼnae.

¹⁴ Loleʼe loleʼe vayaʼmogimo huʼapaeʼmo, He lama ge, huʼa huʼnageʼapaeʼmo tuveti foʼa vayatama vayaʼmo asagauʼa aiteʼa maige maige huno maino hano osuno maisiya vekaeʼmo mono huʼnae.